今朝一早又去左買野食, 之後諗住去租碟睇啦, 點知唔記得帶張咭喎, 所以又要返屋企拎喇! 今日租左套戲有洪天明架! 夜晚睇＜公益金＞有洪天明又有吳國敬喎! 真係合我心意! 而家就睇緊新秀, 不過真係得四個字"不知所謂"! 首先果班所謂o既參賽者, 最大果個都係二十一歲, 全部都係未變聲咁! 形像設計又有好大問題! 根本Ｄ衫真係勁醜樣! 佢地所唱O既歌, 我唔係太相信呢幾個係由幾百人揀出黎架囉! 如果係的話, 真係該燴囉! O係街求其搵個人都唱得好過佢地! 真係架! 而家我就好似睇緊小學生校際歌唱比賽咁! 勁走音之餘又冇料! 走音之餘仲要發音同咬同都完全唔正! 唔明點解可以入到圍! 所以我對今年新秀絕對冇期望! 因為冇可能係好野!
真係一年不如一年! 睇見Ｄ參賽者真係嘔!

今朝一早就去左銀行喇! 之後仲去左百佳買野添! 落一落街就熱到我痴線! 一返到屋企即刻要沖涼呀! 因為真係太太太熱喇! 之後一日氣睇左四集＜邂逅＞, 終於都睇完喇! 不過唔係太好睇! 可能對個男女主角都冇興趣啦! 都係木村正Ｄ! 而家有線電視做緊果套日劇就正啦! 叫做＜BOY HUNT＞, 點解咁正? 因為有石田壹成囉! 佢真係好型架又! 雖然冇木村咁正! 不過佢都正啦! 聽日又會去租下碟睇! 因為悶囉! 聽日先話俾大家知我租左咩啦!
而家好想快Ｄ到星期三返學O既晚上!

本來校左鬧鐘七點鐘起身架! 因為想聽下收音機囉, 點知唔識醒喎, 最後訓到成十一點正先醒, 之後就落左去租碟喇! 今日我租左四套正戲! 首先就係＜MEET JOE BACK＞, 想睇左好耐架喇! 故事好感人, 睇到我都眼濕濕呀! 之外, 仲有＜榕樹頭講鬼＞, 呢套戲幾好笑架! 又有洪天明做喎! 佢仲有螢幕第一次拍 KISS 戲添! 仲有古巨基同埋舒淇O既＜天旋地轉＞, 都唔差架! 帶左一個戀愛O既訊息; 仲有一套就係好驚O既＜奪命高校＞喇! 呢套真係勁好睇! 因為真係好切身咁講學校! 而且套戲Ｄ異形O既樣, 的確好嚇人! 有幾個情節仲嚇到我成個人彈起添呀! 大家有時間就要睇下喇! 由其係＜MEET JOE BACK＞呀! 因為三小時O既故事, 的確值得, 睇完亦都會有所得著!
約左我二契姐聽日返學之前去玩呀!

今日好早醒左喇! 都唔知點解, 因為我尋晚又失眠, 今朝成五點幾先訓著! 不過可能物極必反啦! 下晝約左我二契姐去左一個好有益o既展覽呀, 就係位於 九龍公園o既, 係一個關於健康o既展覽, 好多玩架! 又可以測血壓之類啦! 我發覺我都幾健康喎! 不過果度個磅唔準o既, 磅重左我五磅! 整體上幾好玩架! 又可以認識到一Ｄ健康O既知識! 大家有時間都去睇下啦!
聽日我Ｄ表弟表妹黎我度玩呀!

今日一早就醒左喇! 主要係要執下間屋啦! 因為我表弟表妹地出黎我度訓! 之後就去左租碟喇! 租左四套啦! 一套話有洪天明先租架! 不過我睇果陣先知 道洪天明得兩個鏡頭咋! 俾隻碟呃左添! 仲租左＜凶鈴再現＞添, 不過而家仲 未睇呀, 因為要等夜Ｄ先睇會好睇Ｄ, 不過我聽我Ｄ朋友講冇＜貞子纏身＞咁 好睇! 唔知係咪真架呢? 仲租左小豬嘜同一套叫做＜巫法闖情關＞, 實又幾得 意, 因為係講女巫架! 今晚O既晚飯好正! 因為係我亞姨煮O既!
今日突然間黃色暴雨喎!

今日十點幾起身喇! 因為尋晚我表弟表妹地o係我屋企訓, 之後去左飲茶呀, 都好耐冇飲過茶喇! 不過遇到一個非常奇怪o既伙計, 話說我放左個手提電話o係桌上面啦, 佢行過之後望住我電話張貼紙相喎! 之後行開左啦! 我就將個電話反轉左唔俾人睇張貼紙相! 點知冇幾耐佢又行過黎專登睇張相喎! 不過由於我反轉左個電話就睇唔到啦! 之後我就勁望住佢, 羊少少問埋佢想點架喇! 之後行左一陣, 今日租番＜午夜凶鈴＞呀! 的確係好睇過＜凶鈴再現＞!
我表弟借左隻打碟機o既 CD-ROM 俾我玩呀!

今朝本來預左一早去郵局奇野架! 點知太眼訓喇! 所以起唔到身, 又要等星期一先寄到喇! 不過我今日又去左租碟, 值得推介俾大家o既戲, 今日就只有＜後備媽咪＞喇! 呢隻碟好抵睇架! 差不多兩個鐘, 而裡面包括左男女o既愛情, 主要係講小朋友同呢個繼母o既感情關係變化, 非常感人, 我好少睇戲會喊架! 而呢一套就感動到我喊喇! 大家有機會一定要睇一睇! 仲有呀, 今晚睇左最後一集o既＜公益金＞, 一諗到以後唔可以一星期有一晚睇到洪天明, 我就有少少失落喇! 希望我有一日會o係街度見到佢! 同佢傾幾句, 咁就好喇!
７仔有得換可樂電話繩, 不過我附近都換哂, 幫下手換條俾我啦!

由於尋晚睇電視睇到成四點幾, 所以今日訓到成兩點鐘先起身! 之後就去左租碟喇, 係呀又再去租碟! 不過都冇咩好睇喇! 之後去街市買野, 點知買唔到我想買o既野喎, 因為冇開檔囉! 而家我睇緊ＴＶＢ呀, 講緊捐贈器官, 不過都係好事黎架! 因為人死左Ｄ器官就等於冇用架嘛! 點解唔用黎幫人呢? 希望多Ｄ人明白呢個道理啦!
今日呼吸有少少困難, 可能天氣問題啦!

我尋晚睇有線電視o既＜基督 2000＞先知道原來練氣功係易受邪靈入侵身體架喎, 一直都唔知架, 節目中播左一Ｄ驅邪趕鬼O既真實片段, 的確係好得人驚, 仲有原來睇鬼戲係會易被邪靈入侵架! 我諗我會盡量少睇喇! 不過近排咁興鬼戲, 大家都係少睇為妙喇! 仲有喎, 大家要記住人死後絕對唔會變鬼架! 鬼只係邪靈O既小把戲, 佢地會假扮死去O既人O既聲音行動等! 另外呢我今日亦去左租碟, 不過硬係租唔到我最想睇果套 ＜THE BUG'S LIFE＞, 好想睇架真係, 因為冇咩好睇啦而家! 其實我都應該努力咁溫書喇, 因為十八號要考試呀, 呢一科係完全冇信心, 不過我一定會盡力架! 因為冇理由人地讀到我讀唔掂架嘛!
而家個天有少少紅色, 我諗聽日都會落雨喇!

今日一早就做功課喇, 因為下星期要交喇! 不過仲有少少未做好, 因為要同其餘兩位組員討論下先得! 之後落左去還碟之後去左街市買野食啦, 煮左餐好好味O既晚飯, 夜晚八點幾果陣好奇怪, 有一個好耐都冇打俾我O既舊同學, 原來佢地O係我屋企附近喎, 所以我就同佢地去左飲野喇! 其實係去左唱Ｋ先至真! 都係唱左兩個鐘到咋! 都幾好玩呀! 因為都有成大半年冇一齊出黎玩喇! 玩到差唔多十二點先返到屋企! 雖然傾唔到太多話題, 但係我都知道少少佢地近排Ｄ野啦, 今晚我得到一個啟發, 就係無論點都好, 都要珍惜眼前人, 因為唔係樣樣野都係必然得到o既!
我真心咁希望大家都得到幸褔!

其實今朝都係成六點幾先訓到, 因為尋晚落大雨, 又行雷咁, 攪到我訓唔到! 訓到十一點幾就醒左喇! 因為我呢幾晚都冇開到冷氣呀, 因為好貴電費同埋對環境唔好! 之後都係做左陣功課咁啦, 都仲未有時間溫書, 之後就執屋喇! 因為好耐冇執過喇! 我今日先發覺原來＜雙面伊人＞有洪天明做架喎, 真係好喇! 為左佢我先睇呢套野架咋! 我今日用左一個好特別o既方法, 令到我Ｄ膚色白左少少, 其實我都好白架喇! 不過冇時間去曬黑咪唯有整到更白囉! 如果大家想整白Ｄ乾淨ＤO既話, 就問我呢個方法啦!
希望聽日唔好落雨啦, 因為聽晚去街街呀!

今朝都好早醒左喇, 因為開窗訓, 但係落大雨囉, 所以好早醒左關窗, 食完野之後就開始溫書喇, 其實都唔係溫左好多咋, 不過算係咁啦! 晚上 o既時間我就同左兩個家姐去左唱Ｋ喇, 好好玩呀, 不過最衰係冇亞敬Ｄ正歌啦, 但係而家把聲都沙沙地! 大家姐前排去左加國旅行, 好開心呀, 因為佢冇忘記我地, 仲買左手信俾我地添! 兩樣都好鍾意呀, 真係要多謝家姐喇! 我今日先發覺原來咁大個新世紀, 都冇得影貼紙相架喎, 我仲諗住同兩個家姐影張好細好細果Ｄ貼O係手提添! 又要等下次喇! 返到屋企果一刻突然落大雨喎, 好彩行快步O者; 今日飲左兩杯咖啡, 唔知今晚會唔會失眠呢?
其實今日都有少少野令我唔係咁開心架!

今朝成四點幾先訓得著, 但係未夠七點就成個人醒哂, 我好耐都冇咁早自動醒到喇! 都唔知點解近排訓得咁少, 可能考試壓力又黎喇! 今日就一早去左我亞姨度飲茶! 之後上左佢屋企玩, 食埋晚飯先返屋企! 都有少少眼訓架! 不過又要上下網先安樂! 我今日寄左一封信俾 CRANBERRIES 呀, 我都唔相信我會咁做, 不過佢地實在太正喇! 所以我好用心咁寫左三頁英文信俾佢地! 突然覺得自己好可愛添! 而家有少少喉嚨痛添, 因為今日我面對住三個表弟同埋兩個表妹, 聲沙係難免O既!
今日決定下星期要曬黑自己!

今日我就好似患左渴睡咁, 攪到訓到成兩點幾, 之後食左少少野就溫書喇, 但係唔知點解真係好眼訓喎, 所以溫到五點幾就諗住再訓一陣啦, 點知一訓就訓到九點喇! 不過發左個好正O既夢, 因為夢見亞敬呀, 呵呵!! 下星期三就要考試喇! 但係問心一句, 我真係唔係好知點考喎, 唔好話合格啦, 我都唔知答唔答到野添果日!
希望合格都願咯!

今朝好早就起左身食野喇! 之後出左去旺角呀, 因為約左兩個亞姨去換可樂電話, 雖然個電話唔係我o既, 但係我亞姨借我用住先呀, 真係好喇! 好靚架, 不過我都仲係好想要條電話繩, 唯有飲多Ｄ, 希望開到即中獎啦! 夜晚O既ＴＶＢ又有一個節目有洪天明喎, 真係太好喇! 仲有三日就考試喇! 但係力不從心呀, 溫黎溫去都唔係好識, 點算好呢?
Ｄ天氣好熱呀, 訓又訓唔到, 溫書又溫唔到!

今朝未夠七點樓上有人裝修呀, 真係唔知攪咩咁早裝修, 噪到我訓都訓唔到, 一直噪到下晝五點幾, 未停過添呀, 都唔明Ｄ人為乜咁早裝修, 都唔知會噪住人架喎! 我訓到十一點幾啦, 不過都好難先訓到, 今日主要係溫書啦, 不過都溫唔到Ｄ乜, 因為都唔係太知點, 同埋太多野唔明喇! 又太多野要溫, 溫左又好似識, 但係又好似唔識咁, 都唔知星期三點考試添呀!
今日真係好熱, 可以去游水就好喇!

今日好好訓呀, 不過屋企個電話就好旺喇! 平時好日都唔響一次, 今日竟然響左成十幾次喎, 有好多朋友打黎呀, 今日真係奇妙喇! 今日我真係勁溫書呀, 仲唔溫等幾時喎, 不過真係冇咁可能會合格, 但係我會盡力架喇! 不過的確幾驚架! 望就望合格算架喇! 希望唔好出得咁深啦, 不過我肯定佢會出得好深好難架喇!
好眼訓呀!

今日真係好早起左身溫書喇, 因為今日係考試o既大日子, 溫左幾個鐘頭, 大約五點半就出門口去考試喇! 不過考得唔係太好喇! 我知架, 因為份卷幾難答, 望就望有奇跡出現啦! 成十點半先返到屋企呀, 真係好眼訓架, 不過都要上網架! 仲有呀, 我聽日會去我亞姨度住兩日, 所以大家要星期六先睇得番我未來呢兩日o既日記喇! o係度同大家講聲唔好意思先! 所以大家捧場客要等等我喇! 另外, 尋晚得知簡慧真不幸腦癌逝世, 真係好可惜! 我好希望佢可以安息, 亦希望大家可以依自己O既宗教信仰, 為佢祈禱, 希望佢安心咁離開呢個世界!
後日去曬太陽呵!

今日係屯門之旅第一日, 基本上我一早o係我屋企樓下同我亞姨地飲茶先, 再上左我屋企食埋晚飯先至入屯門o既, 入到去都差唔多十一點幾喇! 所以就即刻沖涼同埋執好Ｄ野喇! 呢晚O既活動都只係玩下電腦, 同埋同我亞姨傾下計咁! 冇咩特別, 不過我成四點幾先訓得著!
同我Ｄ表弟表妹玩左成日呵!

今朝一早十點幾就醒左喇! 因為始終都唔係自己張床, 所以唔係太習慣啦! 之後就落左街食野喇! 大約兩點果陣等埋我第二個亞姨, 就一行八人去左屯門泳池游水喇! 我唔識游架! 不過去同佢地玩下水咁, 我又O係池邊游幾步咁啦! 主要係想曬黑ＤＤ, 因為我實在太白喇! 不過太陽伯伯唔係幾幫手, 因為佢唔係太曬, 攪到我黑左少少, 真係好少果隻! 游到約六點鐘就走喇! 其實好正架, 因為我有個舅父係O係泳游攪餐廳O既, 所以我地果日食野就佢請, 不過大家千其唔好撻我個名呀, 因為人地做生意O既, 親戚都唔係太好架喇! 所以大家就算去到, 自己俾錢食啦, 果度Ｄ咖喱魚蛋真係勁好味呀! 之後就返左我亞姨屋企, 夜晚果餐我亞姨煮, 好多好好味O既野食架! 我好早就訓左喇, 因為游完水好累呀!
我發覺我對泳池水有少少敏感!

今朝未夠十點就起左身喇! 之後睇左一陣電視, 就同亞姨地出左去屯門市中心行下街, 食下野咁, 食左碗好正O既大碗麵, 大家有機會都去吉之島試下啦, 之後諗住去冒險樂園玩架, 不過實在太多人喇! 所以去行第二度啦, 行行下原來發覺有 SHOW 睇喎, 所以就企左O係度睇下啦, 點知個 SHOW 遲左成半個鐘先開始, 我地一心諗住睇蘇永康同埋謝霆峰架嘛, 但係個 SHOW 開始左成大半個鐘都未出場喎, 所以咪走囉, 因為好累呀! 再行左一陣我就諗住返屋企啦, 點知落大雨喎, 所以坐左車去巴士總站坐車, 驚冇位坐嘛! 大約六點鐘就返到屋企附近喇, 因為想去買野同埋租碟, 點知野就買唔到, 仲好蠢咁用現金去租左兩隻碟, 其實我係有租碟卷O既, 唔知點解唔記得用喎, 不過好彩我計過都唔係差好多O者, 不過一定冇下次!
就係咁, 屯門三日遊就結束左喇!

而家只係下晝四點幾, 今日終於轉左ＣＴＩ上網喇, 因為ＨＫＮＥＴ果個用完喇! 不過ＣＴＩ真係慢好多, 不過唔洗月費係咁架喇! 今日仲打緊三號風果陣我落左去租碟同買野, 返到屋企冇幾耐就八號風喇! 好似話仲會打高Ｄ風添喎! 不過天氣真係難測喇! 不過今日真係好眼訓呀, 一陣訓下都好喎! 晚上好不幸咁o係機場發生左飛機意外, 真係好唔開心, 希望唔好咁多人受傷啦, 而家知道有一個人不幸過世, 真係唔係咁開心! 希望唔好再有呢Ｄ意外發生啦! 另外我今日飲汽水中左５０分鐘免費通話時間呀!
好彩唔係今日去游水O者!

今日訓到成兩點呀, 因為前幾日都好累啦, 今日冇出到街呀, 因為打緊風, 又勁落雨, 天氣真係唔好! 成日就o係屋企行行企企, 玩下電腦咁咋! 又唔係咁想上網, 因為唔想用咁多錢上網, 要慳Ｄ嘛! 不過而家仲好眼訓呀!
原來吳奇隆唱左＜其實我深深愛著你＞O既國語版喎!

雨過天晴o既今日, 心情都靚Ｄ呀, 今朝一早去左還碟啦, 因為費事放O係屋企唔記得還嘛! 一唔落雨, 天氣又變番好熱喇! 唔知大家覺唔覺得呢? 前幾日我咪話我中左５０分鐘通話時間O既, 今日打電話去問過喇, 原來要機主先用得, 但係我唔係機主嘛! 所以我諗住送左俾我亞姨喇! 冇計啦! 尋晚我聽到一個令我好唔開心O既消息呀, 有傳伊健同美琪分左手喎, 仲話係因為粱詠琪介入, 其實我唔係太相信係真O既, 因為伊健唔會咁蠢唔要美琪, 要個咁O既人下華! 唔係話粱詠琪唔好, 只係美琪太好O者! O係呢度好希望伊健唔係真係咁蠢啦! 仲有呀好慘呀我, 果日游完水發覺隻左手好痛喎, 先前諗住係郁得多, 點知今朝仲好痛, 所以就照下鏡啦, 驚人O既大發現呀! 原來我左手瘀左一撻呀! 都有半個麥記薯餅咁大架! 都唔知幾時整親O既! 希望快Ｄ好番啦!
聽日我Ｄ表弟表妹又黎我屋企玩喇!

今朝未夠九點就醒左喇! 好邪咁發現左我全屋o既電話都唔通, 我諗係因為落雨, 攪到Ｄ線有事, 試過有一次成日都唔通添呀! 不過今次好彩, 一陣就冇事喇! 大約十二點半就落到酒樓搵位, 因為我亞姨同表弟表妹黎飲茶嘛! 好好彩地好快俾我搵到喇! 相信係我O既禱告發揮到作用! 同桌有一位婆婆仲未走架! 我冇咩所謂, 因為都夠坐, 點知呢位婆婆用左一Ｄ好唔友善O既眼神望住我, 我諗佢以為我趕佢走掛! 佢一直望左我好耐, 令到我好不安, 所以我不甘示弱望番佢轉頭, 我望左佢成兩分鐘佢先唔再望我! 其實我好唔想咁樣對佢架, 不過佢勁望住我, 我真係好唔自在嘛! 唯有望番佢轉頭囉! 大約點令鐘我亞姨地就到達喇! 未幾, 我二契姐打電話俾我喎, 原來佢諗住今晚黎我屋企一齊食飯架! 不過佢話好累, 所以唔黎, 唯有等下一次啦! 本來我亞姨地諗住今晚O係我度訓架, 不過因為少少原因所以返左佢地自己屋企喇!
我隻手真係瘀得好勁呀!

今朝又訓到成點幾喇! 因為呢幾日實在太累喇! 雖然冇咩做過, 不過實在係好眼訓, 就算而家都係好眼訓, 所以今日要早Ｄ訓先得喇! 因為聽日又要開始返學喇! 仲要一連返三日; 其實有件事我上星期六聽返黎架, 但係一直唔記得話俾大家知! 果晚我聽收音機, 聽到一個真人真事, 但係好多時會覺得只會做戲先有, 有一個男人打去電台, 話佢好唔開心, 原來佢近排知道同佢拍左拖七年O既女朋友, 其實係佢親妹妹, 大家係咪覺得好拍戲呢? 但係係真人真事, 原來佢細個果陣家貧, 所以佢媽媽要將佢最細個妹妹送俾人養, 由於佢當年年幼, 所以完全唔知呢件事, 加上佢家人全部移民外地, 直至前排, 佢家人返港渡假, 佢諗住帶佢女朋友見下家長咁啦, 點知佢媽咪聽到呢個女仔個名時, 面色一變, 再加上呢個女仔有一隻耳係有兩個耳孔O既(我唔係太清楚係咩情況), 之後佢媽咪靜靜的問佢個仔, 可唔可以唔同呢個女仔再發展, 一問之下, 原來話極有可能係佢妹妹, 所以佢帶左佢媽咪去見呢個女仔O既家人, 一見之下, 發覺原來真係佢親妹妹, 所以佢而家好唔開心, 曾經諗過自殺; 我聽完之後, 我O既反應同主持人一齊, 係愛莫能助, 因為的確有血緣關係, 係絕唔可能O係埋一齊, 唯有係時間沖淡一切啦!
大家睇完有咩感覺???

今日又試訓到十二點幾喇, 其實早起身同晏起身都冇咩分別, 今晚開始要返學喇又, 意味住我又會少左機會玩, 不過的確好辛苦架, 由其係今次, 因為果個外國教師把聲勁細, 講野又一舊舊咁, 不過我肯定唔係我英文差聽唔到! 聽日同後日我都要返學呀, 所以大家可能要見少我一陣喇! 大家要乖乖地啦!
幾時斯斯o既真命天子先出現架?

今日可以話係悲喜交雜呀, 話說今日要返全日學啦! 開心o既係見到"佢", 雖然到而家都仲未識到, 但係今日真係好開心, 至於唔開心o既事, 係關於一個勁衰o既同學o既, 呢個同學不嬲都勁衰口多架喇! 話說我地今次呢班有一位失明o既同學, 基本上我覺得大家亙相幫助, 唔好話邊個冇用Ｄ啦, 係咪先? 呢個口多O既人, 三番四次咁懶係幫呢位失明同學, 但係其實係有少少取笑佢O既成份! 我真係勁想行埋去中佢十令廿野呀! Ｄ咁O既人, 真係因住後尾果幾廿年呀! 真係我勁想講粗口鬧佢囉, 有咩理由咁都講得出架O者, 我諗如果唔係佢講Ｄ野咁細聲, 一定有幾廿人行埋去痛打佢呀! 不過我覺得呢位失明同學真係好叻呀! 因為佢真係好勤力, 但的確有困難O既, 希望佢努力啦! 夜晚果堂教我地拆電腦呀, 不過真係攪到隻手好痛好痛, 直情紅到暈呀! 不過幾好玩!
今日真係有心跳O既感覺! 唔通... ...

今日都仲要返學呀! 不過都真係好悶呀! 因為都係照筆記講, 好彩今日返半日o者, 學校Ｄ洗手間仲要全部大裝修添, 攪到我地要去隔離果間酒店去洗手間, 真係煩喇! 今日返到屋企果陣已經非常之累喇! 返屋企之前有去過ＣＤ店呀, 諗住睇下我想要果Ｄ ＣＤ幾多錢, 不過原來果間野賣得好貴! 所以冇買到囉!
今日係霆鋒O既生日, 祝佢生日快樂!

今日都訓到成十一點幾呀, 因為今日冇野做, 而且前幾日都返學, 真係要俾自己多Ｄ時間休息下先得架嘛! 所以尋晚十二點幾就訓喇! 你話我係咪唔挨得呢? 之後我去左租碟, 本來都冇咩戲想睇架喇! 不過又見到套＜還我情心＞喎, 咁咪租左囉, 點知返到黎睇完成套戲, 咪又係不外如是! 而且我覺得佢個故仔係抄以前一套廣播劇! 唔知大家以前有冇聽９０３O既廣播劇架呢? 有一套叫做＜我心不死＞架! 係陳慧嫻同埋劉德華做架! 完全個故事就係呢套劇O既故事! 所以唔算得上係好睇! 而且蔡少芬唔知點解呢套戲做得好差! 大家諗清楚先好租呢套戲喇! 諗諗下, 上次我咪話好蠢咁冇用到租碟券去租碟O既, 其實唔係完全係我自己O既蠢, 實情係果個職員有少少誤導我! 呢個世界真係咩人都有呀!
今日真係好熱呀!

今日好少有咁未夠十點就自己醒左喇! 今日主要o既節目係執屋呀, 因為大大話話都有成個幾月冇過屋喇! 大約四點鐘果陣我睇左一套新戲喎, 唔係租番黎架! 而係o係有線電視o既自選影院睇o既, 呢套就係＜七月又十四之信不信由你＞喇! 本來呢套戲要用一張套票再加十蚊先睇到架! 不過唔知點解我部電視機接收到果個台喎, 雖然Ｄ畫面唔係太靚, 但係唔洗錢睇到喎! 幾好呀, 不過呢套戲唔係太好睇! 都唔係太得人嚇! 反而有少少好笑, 但係又有少少核突, 睇完都有少少反胃架! 如果要我俾錢或者O係戲院睇, 真係勁唔抵囉!
遲Ｄ亞敬去溫哥華做蘇永康演唱會嘉賓, 我冇份睇!