私日記


背景音樂 : 安全感


想睇下我邊日O既私日記呀 ??
JAN
FEB
MAR
APL
MAY
JUN
JUL
AUG
SEP
OCT
NOV
1/12/99
2/12/99
3/12/99
4/12/99
5/12/99
6/12/99
7/12/99
8/12/99
9/12/99
10/12/99
11/12/99
12/12/99
13/12/99
14/12/99
15/12/99
16/12/99
17/12/99
18/12/99
19/12/99
20/12/99
21/12/99
22/12/99
23/12/99
24/12/99
25/12/99
26/12/99
27/12/99
28/12/99
29/12/99
30/12/99
31/12/99


1/12/99

又話咁易又到左十二月喇, 仲有三十日就到千嬉年啦, 大家有冇諗過點過呀? 其實唔係代代都可以咁過渡架! 其實我今日冇返到學, 因為我有兩個朋友放假, 一齊去左唱K, 唱到六點幾就去左食野同埋行街喇! 行到大約放學時間, 就撞到兩個舊同學喎, 真係好彩喇, 傾左幾句就繼續行啦, 點知又撞到夜校同學喎, 不過唔見佢呀, 只係見到佢個朋友咋, 冇緣份咯! 算啦, 之後我地再行左一陣, 就去左影貼紙相喇, 因為今日個 LOOK 非常之掂, 忍唔住要影低佢呀! 十一點返到屋企, 同我二家姐傾左一陣電話就涼, 再上網咁!
一日係咁過左喇!

返回


2/12/99

尋晚又再失眠, 唔知點解呢排成日訓唔到, 又唔係大壓力喎, 又唔係多野做, 唉, 唔知點解添! 食完野睇番尋晚o既<爆笑急轉彎>, 笑死我呀, 因為真係好好睇, 唔知我有冇機會見到亞傑呢? 之後我就打左一陣機, 就沖涼喇, 因為我約左二家姐去探朋友嘛, 其實我地探呢個朋友就係郭偉安喇! 因為佢下星期一生日, 咪諗住去俾張生日咭佢囉! 去到食完野就同亞 WAYNE 一邊行一邊傾左幾句, 原來佢病緊呀, 仲發緊燒添, 唔怪之得成個樣殘哂啦! 希望佢快D病好啦! 仲有呀, 大家電腦奇才, 可唔可以幫下我, 答一答我個問題呢? 點樣可以錄到影像呀? 我唔記得左果個格式點串添! 只係記得係"S"字頭, 好似叫做"STEAM", 類似係O係電腦錄到影像, 如果大家知我講咩而又知要點做, 可唔可以話我知呀? 唔該哂先!
聽晚要返學喇!

返回


3/12/99

今朝好早醒左喇, 因為隔離屋又打牌, 好鬼死嘈! 尋晚聽903, 講開"過敏"呢個問題, 大家有冇對D咩過敏架呢? 我有架, 我唔可以食太多蟹同埋蝦架, 如果唔係我個咀會腫, 同埋D手手腳腳會起紅點架, 都唔知點解, 係呢幾年先係咁咋喎, 同埋呢, 我唔可以掂到用"抓毛"O既衫架, 如果唔係我除左起紅點之外, 仲會好唔舒服架! 大家有冇呢D古怪過敏呢? 有O既不防講黎聽下丫! 之後我又O係有線O既自選影院睇左一套新O既鬼片<山村老屍>, 都幾驚架, 不過有陣時又幾好笑喎, 我覺得佢係抄<午夜凶鈴>O既, 不過睇完就算喇! 今晚係呢一科最後一堂, 但係好慘地係等左成半個鐘頭先有巴士喎, 又要落雨, 我成六點九先返到課室呀, 今日基本上冇咩講, 只係講番功課, 同埋考試要注意O既野, 當然都係會見到佢啦, 不過依然係幾失敗囉, 我硬係唔敢行第一步, 不過天意黎掛! 今日好早就走得喇, 本來放九點半, 但係我八點半未夠就走左喇, 之後我仲要去左裕華買左包涼茶聽日煲添! 好早返到屋企喇, 食左少少野就上網喇! 我都唔敢成日用KAZU俾我果個ACC, 唔係咁好意思嘛, 而家係用大學O既免費ACC上網O既, 只係玩到ICQ, 睇唔到網頁架, 不過唔緊要啦!
亞 WAYNE 尋日話我又再瘦左喎!

返回


4/12/99

今日訓到十二點幾, 但係睇電視睇到成三點幾, 再聽左一陣收音機, 聽到亞傑首新歌, 叫做<遍體鱗傷>, 都好蔡一傑o既, 好好聽架, 不過佢太耐冇消息喇! 果個節目仲有星期一晚<爆笑急轉彎>o既錄影, 不過我冇打去拎飛呀, 因為都冇人陪我去! 希望快D俾我搵到個男朋友就好喇!
好眼訓呀今日!

返回


5/12/99

尋晚成晚都有D摩打聲喎, 最慘係唔知O係邊度黎O既, 攪到我成晚都訓唔著, 今朝我轉性呀, 好早起身落左街買哂野煲湯, 因為前幾日睇電視學左個湯, 好方便架! 所以咪試下自己煲囉, 好有益架個湯, 有興趣就問下我點煲啦! 尤其係天氣開始凍, 有啖湯水好DO既, 大家覺唔覺呢? 不過今日熱左喎, 攪到我要換番哂D夏天衫添!
唉, 幾時先搵到野做架?

返回


6/12/99

真係發覺唔可以太早訓呀, 尋晚勁早訓, 點知訓到今朝十二點幾, 之後仲要訓晏覺添! 不過今日都冇咩做, 所以訓下都好o既, 電視又冇野睇喎, 又唔想落街, 咪訓下囉! 不過呢, 今日個頭成日都好痛喎, 新聞話而家D腦癌好流行, 仲要係冇得醫添, 唔係咁 ARM 下嘩!
同亞 WAYNE 講聲<生日快樂>!

返回


7/12/99

今朝勁早醒左呀, 之後食野, 又聽下歌咁, 因為真係冇咩野做, 到左下晝我竟然好有詩意咁望下街, 之後就悶到訓左, 到左六點鐘我又自己識醒喎, 食完野之後就真係睇下電視就冇野做喇! 我發覺我個怪怪渴睡証又黎喇, 因為我耐唔耐就會有一排係咁, 訓極都唔夠, 不過通常係o係我考完試之後先發生o既, 不過今次係例如囉!
我黎緊十九號又要考試喇!

返回


8/12/99

今朝本來諗住一早起身就去我亞姨屋企架, 不過又係渴睡, 所以起唔到身, 可能前幾日都有訓晏覺, 所以今日勁眼訓都唔俾自己訓晏覺, 溫過下書咁啦, 因為仲有兩個星期就考試喇! 今日開始好擔心我聖誕同埋除夕會一個人過, 你知啦, 我朋友唔多, 有D朋友又有拖拍, 冇理由約我架! 好擔心呀, 如果得我一個人過O既話, 咁就真係好似好浪費咁! 其實我尋晚好嬲架, 因為原本諗住約番以前讀電腦日校果班朋友出黎, 點知成日要我約, 唉, 我真係冇咩所謂O既本來, 但係成日都係我, 仲要受佢地氣喎, 明明上網又話唔得閒, 真係算啦, 我唔會再約架喇, 咁煩, 唔好出啦! 其實如果好聲好氣我都冇所謂, 不過實在頂唔順D妹妹仔同埋弟弟仔囉!
我 CUT 左個手電呀, 大家打番我舊果個手電啦!

返回


9/12/99

今朝未夠八點半就起身喇, 因為要去我亞姨屋企, 點知都咪咪麼麼左好耐, 食下早餐又聽下收音機咁, 攪到成九點十先出到門口, 仲邪o既係我部 DISCMAN 竟然面臨冇電狀態, 咁諗住去買啦, 點知又勁貴喎, 咁諗住返屋企拎啦, 點知行返屋企途中, 有一間賣平野O既地方, 有排擺明係中國出品O既電芯喎, 只係賣兩蚊, 有四粒喎, 咁咪買左排囉, 費事再行嘛, 因為部 DISCMAN 仲聽到, 咁就唔換電住啦, 點知真係激死人, 我由我住果頭坐巴士去到旺角, 再由旺角坐巴士入到屯門, 不停咁聽左成個幾鐘, 都仲有電喎, 只係如果一要用到避震功能, 就會即刻冇電, 但係開番又聽到喎! 入到屯門就接我細表妹放學啦, 之後去左飲茶, 再返左我亞姨屋企, 睇下電視, 傾下計咁, 又到食飯時間喇, 再玩左一陣就走了, 因為趕住返屋企睇<楓樺再現演唱會>! 好攪笑, 部 DISCMAN 勁好力水咁, 聽到返屋企都唔洗換電! 而家就睇緊華哥個演唱會喇! 其實佢改下佢D不可一世態度, 真係好掂O既, 佢唱歌唔錯架真係! 講開唱歌, 我好想講下, 做歌手, 唱歌O既, 唔進步都千其唔好退步, 近排我聽到一首熱播歌, 係 KELLY O既<戀愛程式>(好似係呢個歌名), 痴線架, 我聽完O既第一個反應係"有冇攪錯, 識唔識唱歌架!", 一直我都覺得 KELLY 唱歌都唔係咁差, 但係唔係差成咁下嘩! 嚇死人呀, 我唔知果D係咪新興唱法, 廿幾歲人仲勁扮可愛咁唱, 呢首歌令我諗起一首前排好 HIT O既歌, 係新人張茵唱O既, 唔知叫咩歌名, 但係有句歌詞係"I CAN SEE YOUR STAR LIGHT SHYING ON ME!", 完全感覺係呢種, 不過問心一句, 呢位新人把聲雖然高音D, 不過都唱得好過 KELLY , 我開始有少少唔係好明白, D人係聽歌定係睇樣, 我覺得好唔抵, 我呢D唱得但係個樣唔係好得O既, 永遠都只係泡卡拉OK, 果D唱歌唔得但個樣得O既紅到咁! 真係唔公平! 所以好想夾下 BAND 咁, 等我有機會唱下歌, 雖然我唔算唱得勁好, 但絕對唱到呢D所謂O既 HIT 歌, 我覺得Y2K應該要變喇, 唔識唱歌, 唔識音樂果D真係唔該反省一下! 我口味另類真係唔多唔少關於呢個樂壇, 如果大家都只係睇樣唔聽歌O既話, 真係呢個樂壇好快玩完架喇! 知唔知有好多外國人聽到香港D歌真係訓覺都笑醒呀, 成日改人D歌, 近排某天王改左 SHER 首歌啦, 直情係抄添呀! 我真係好心痛架, 點解咁多好O既創作人, 仲要抄人O者?
我有四日冇飲汽水喇, 不過今晚破左戒!

返回


10/12/99

今日好怪, 鬧鐘竟然可以鬧醒我喎, 不過一早起身又係睇電視, 今朝做果套<難兄難弟>粵語長片, 幾好睇架喎又, 係就係老土D, 不過以前O既演員真係演得好好! 之後落街買野同埋租碟, 之前想去噤機, 因為成屋無哂錢, 點知我要去到第四間銀行先用到喎部ATM, 都唔知發生咩事, 不過噤完機之後就去左買帶, 因為要買帶錄電視呀, 租左隻<怪談之魔鏡>, 即係霆鋒果套呢, 幾好睇, 不過林心如同埋何嘉莉做得奇差, 不過可能係我要求太高掛! 夜晚食羊肉呀, 係我亞姨俾我O既, 雖然我唔係太食, 但係我都會食哂o既! 仲有呀, 我今日用左三個鐘頭去填左首歌呀, 因為而家 idclub.com 有個比賽, 係幫安仔填新歌歌詞, 雖然填得唔係咁好, 但係我會再填多幾首, 多D題材, 希望揀中我, 咁我就可以做到我夢想喇!
今日又頭痛添!

返回


11/12/99

今朝唔洗鬧鐘我九點幾就醒左喇, 唔知攪咩咁唔正常! 而且仲整左西多士食添, 好耐冇過喇, 不過都幾好食啦, 之後就又填下歌咁啦, 今日填詞o既內容係關於母愛架! 唔係填得太好, 但係都幾感動o既, 我填完自己唱左一次都唱到眼濕濕咁! 之後我亞姨打電話俾我話佢個上網ACC俾人盜用喎, 但係又唔係用左好多, 真係好奇怪, 不過佢叫左間ISP查下發生咩事! 其實上網好危險架, 我果晚睇 DAYLINE, 佢話你上網, 有好多網站會整左個 COOKIES O係你部機度, 記住你去過邊度睇過咩網頁, 去令到佢地提供一D你有興趣廣告俾你, 即係完全冇哂私隱, 你去邊睇過咩, 直情連你打過咩都知呀, 果個記者試過果頭睇緊一個有關保險網頁, 十秒後有個保險經紀打電話去佢度問佢有冇興趣買保險, 所以話O係網上唔好透露自己個人資料!
今日頭唔痛, 但係條腰好痛!

返回


12/12/99

尋晚睇<東華>睇到一點幾, 有開心亦有唔開心, 開心o既梗係亞敬同亞 PAT 有表演啦, 佢地同 EASON & 克勤唱果一 PART 真係勁正, 又再一次証明到 UNPLUG 係掂O既, 而唔開心果 PART 亦即係我訓之前睇果 PART , 就係天明跳馬果一 PART 呀, 真係睇到我差少少喊左出黎, 眼見佢跳過左第一次, 已經知道佢對腳同埋肚附近已經係傷左架喇, 亦知道佢好痛好痛, 但仍要跳第二次(比第一次高一級), 點知彈板放O既位唔正確, 佢就成個人硬撞埋去隻跳馬度, 知唔知我果一刻真係嗌左出黎, 因為好擔心呀, 佢撞得好應架, 雖然唔想佢再試, 但係我亦知佢一定會再試, 果一刻見到佢腳O既傷令佢好好好痛, 但係要扮冇野咁再跳, 真係好心痛架, 好彩再跳果陣佢就過左喇, 好戥佢開心, 但係我諗佢都要休息番幾個禮拜先會好番, 其實我好唔想D藝人成日練D咁O既野去叫人捐錢, 根本果D咩主席果D咪又係呃呃埋埋D錢黎捐, 點解要練D咁O既野O者? 唔明囉, 好似王傑又要亡命飛車, 如果佢架車再歪少少, 佢就拜拜架喇, 又好似楊盼盼咁, 為乜O者? 睇完我又唔覺得個 SHOW 會有意義左咁喎! 搵條命去玩, 正所謂"身體髮膚, 受於父母", 爸爸媽媽睇到你咁攪法, 真係心都離埋架! 我覺得表演咪唱下歌, 做下短劇咁咪算囉, 點解要咁呀? 再唔係, 好似好姨咁車下蛋咪幾好! 講番今日先, 今朝八點幾起身再去左我亞姨度幫佢睇細路, 夜晚食完飯就去喇, 我返屋企之前去左旺角電腦中心, 因為想買對喇叭, 我之前見到有D三十令蚊對架咋, 點知今日睇果D成幾百蚊喎, 所以冇買到囉, 不過如果大家知有D平喇叭O既記住話我知喎!
我幾鍾意 SAMMI 新果首<ALIGADO>!

返回


13/12/99

今日勁訓呀, 訓到點幾先起身食野, 溫下書睇下電視咁啦, 都唔想落街, 因為一落街就要用錢! 今日星期一, 心情都係幾好咁啦, 可能新o既一個禮拜, 唔開心o既都冇哂掛! 今日發覺我部電腦有少少怪, 但係又唔知點形容喎! 真係攪笑!
新發明左包野一加水會有真雪感覺架, 唔知貴唔貴呢?

返回


14/12/99

今日都有到書呀, 因為考試迫近喇! 不過書途中都有落街買野架, 因為屋企咩都冇哂, 就行左去超級市場買野, 不過真係好易用錢, 係咁易買左少少野就百幾蚊喇! 不過希望果個 LUCKY DRAW 抽中我, 咁就好喇! 太耐搵唔到野做開始發錢寒呀, 真架, 我真係有少少發錢寒, 所以大家唔好見怪! 相信我有工番就會好番架喇! 大家再忍耐下先啦! 尋晚睇電視先知道原來平日撘自動電樓梯係要注意咁多野架!
記住記住聽晚睇最後一集<爆笑急轉彎>呀!

返回


15/12/99

仲有十幾日就到千嬉喇喎, 不過原來仲有一年先到真正o既千嬉年架, 因為以前o既人嗌第一年做"公元一年", 但係未滿一年, 到左滿一年果陣, 就叫做"公元二年"喎, 所以應該仲有一年先到千嬉架! 不過冇所謂啦, 大家諗左去邊玩未呀? 我仲未諗呀, 因為等緊人約嘛! 講番今日o既生活先喇, 一早起身食完野之後, 我竟然洗廚房喎, 因為呢排煮野太多, 有少少油煙, 所以就洗到乾乾淨淨喇! 我今日都有溫書架, 不過真係唔係太專心, 可能對內容仲好記得, 溫果陣咪好似好識咁囉, 不過我會努力架, 大家放心啦! 今日天氣好熱呀, 不過天文台又話聽日寒冷喎, 都唔知係唔係架!
今晚我一定會睇<爆笑急轉彎>, 因為我會睇囉!

返回


16/12/99

今日有一單好唔開心O既新聞, 就係有一個十歲O既女仔信死左之後會好似劇集<衝上人間>咁上番黎救人咁, 其實我睇完之後好唔開心, 因為我好唔明白點解有人會咁做, 一個十歲O既人, 點解會咁天真信電視劇呢? 點解會係咁呢? 有咩解決唔到要去輕生? 我好希望大家可以諗清楚每件事, 有咩解決唔到就同朋友或者屋企人傾下, 千其唔好做傻事! 另外我今日睇<星期四檔案>, 講及大家對愛滋病O既睇法, 其實我好憎D人歧視其他人架! 因為大家都係人, 都係平等, 點解要驚左人? 點解要歧視人O者? 試諗下如果被人歧視果個係你自己, 你會有咩感受? 麻煩大家將心比己, 冇人會想同人唔同, 只係天意要佢地係咁, 可能你要多謝個天俾你健全(無論意想上或係身體上), 但係絕對唔可以睇唔起人地, 唔歧視佢地亦唔代表要同情佢地, 冇人需要同情! 請永遠記住呢一點! 而我今日都冇出到街, 成日都溫書, 都溫到七七八八喇! 我諗考試係唔成問題O既!
天氣又會轉凍喇! 大家小心身體!

返回


17/12/99

今朝十點幾起左身, 但係發覺個鬧鐘壞壞地, 要佢響果陣佢又唔響, 唔洗佢響果陣佢又響喎, 都係時候換過個喇! 食完野之後就一直溫書溫到兩點幾, 之後就坐地鐵去左上環, 因為我好好彩咁我抽中左對錶呀, 好正架! 係蘇永康賣廣告果對囉, 我諗住送俾我爸爸媽媽! 不過車程來回要成兩個鐘呀, 可能我行得慢掛! 番左黎之後仲順便去左超級市場買左少少野添, 之後就返屋企再溫書喇, 大約都OKO既, 希望後日O既考試會順利啦!
噢, 聖誕有咩做呢?

返回


18/12/99

尋日我咪話個鬧鐘壞壞地o既, 今朝又好番喎, 真係奇怪喇! 今朝一早起身食完野洗完衫, 就開始溫書喇, 因為最後一日嘛, 聽日就考喇, 唔溫仲等幾時喎, 終於我由兩點鐘溫到六點半啦, 大致上都溫哂喇, 不過有時都要睇臨場表現o既, 大家支持我啦! 今晚做<創世紀>頭五十集大結局喎, 我本來冇睇到呢套野架, 因為覺得唔會吸引, 不過睇睇下都OK喎, 先頭佢話誇世紀劇集, 我仲以為係一直做到去下年添, 原來係而家做五十集, 下年又再做埋之後果五十集, 咁樣即係每套劇集都可以誇世紀O者, 可以誇幾個世紀添, 真係俾無線激死呀! 仲有呀, 我今日無意間聽到三首正歌呀, 不防話俾大家聽下啦, 其中一首仲係 SAMMI O既新國語歌<愛情故事>, 仲有係莫文蔚O既<忽然之間>同埋陶"吉吉"O既<普通朋友>, 三首都好好好聽喎, 大家有時間就留意下啦!
今日天氣凍左好多, 大家小心身體先好呀!

返回


19/12/99

今朝八點幾就醒左喇, 因為我發夢夢到自己考試唔知醒呀, 你話D夢幾邪呢? 拿拿聲食唔野之後就溫書喇, 因為真係想穩陣D嘛, 一直溫到十二點九到啦, 到左一點正就出門口喇, 點知都要一點九先返到學校, 坐左一陣就開考喇, 點知 MISS 俾D料唔係好準喎, 先前話要考 GRAMMER 架嘛, 點知一題都冇出過, 但係就出左一 PART 好致命O既就係寫 ESSAY 喇, 三題 ESSAY 揀兩題, 點知題題都識答DD, 基本上三個鐘太多喇, 我都唔知寫D咩好! 成份卷一共有三 PART , 其他果D都OK掛! 走果陣仲攪笑, 因為要我地填份問卷, 我填完拎出去諗住交俾 MISS 啦, 點知原來O係 MISS 隔離有成疊卷放左O係度, 我竟然當疊野冇到喎, 俾左 MISS , 之後 MISS 話交去果邊, 我先如夢初醒咁見到疊野, 真係瘀呀(可能我D考試後遺証又黎喇)! 之後落左去等巴士去我亞婆屋企做節, 等車果陣我見到佢喇! 佢望我, 我又望住佢, 有少少尷尬添! 今日一別又要等一月中先有再見O既機會喇, 因為我開始放暑假呀, 我冇講錯呀, 因為我個課程係澳洲U攪O既, 所以係放暑假! 唔知我地會唔會有緣咁O係街上撞到呢? 意味住我今年聖誕又一個人過喇! 食左餐好正O既晚餐, 返到屋企收到我今年第二張聖誕咭, 係嘉倫仔仔寄黎O既, 真係快喎, 前日佢先話我知佢寫好左, 估唔到我咁快收到添! 除此之外, 我仲收到一套將會做O既舞台劇O既宣傳品, 我都幾想睇架, 套劇叫做<遇上1941的女孩>, 我想睇O既原因係因為有一個做戲好正O既人做, 佢叫做"譚偉權", 仲記唔記得佢呢? 佢咪以前做<閃電傳真機>同埋唱<十二隻恐龍去野餐>果個 GARY 囉! 唔講可能大家唔知, 佢唱歌同做戲有番咁上下架! 我好鐘意佢O係<我和春天有個約會>裡面唱果首<孤燕>, 有機會大家真係要留意下喇!
睇報紙話千嬅同鄭中基分左手喎, 千嬅千其唔好咁傷心呀!

返回


20/12/99

今朝十點未夠就起左身喇, 食左野之後就睇電視喇, 因為我搵番一盒我幾年前錄O既錄影帶呀, 我錄哂全套<幻法小魔星>, 大家有冇睇過呢? 好好睇架, 一直睇到五點幾, 之後我突然想搵番條頸巾喎, 點知搵唔到, 所以就要成個衣櫃O既衫都拎哂出黎, 順便執埋個衣櫃嘛! 天氣凍就要拎番D凍天衫出黎, 我發覺原來我冬天都有好多衫未著過架喎, 所以有排都唔洗買衫喇! 之後我諗住拎部衣車出車野啦, 點知唔知點解車唔到野喎, 真係令人費解!
收到有線電話, 話我中左一年免費電腦雜誌喎, 正!

返回


21/12/99

今朝七點幾就起左身喇, 因為要去我亞姨屋企, 仲一早沖左涼添, 得七度咋, 本來我唔怕凍架, 但係我尋晚都要帶住條頸巾訓, 你可想而知幾凍呢! 十點幾就去到我亞姨屋企喇, 之後去左飲茶, 基本上成日都冇咩特別, 同我大表妹執屋咋, 之後夜晚食麥記同埋杯麵咋, 不過一餐半餐冇所謂啦!
聽晚大家記住睇月圓呀! 如果唔係就要等 2052 年喇!

返回


22/12/99

基本上成日都冇咩野做過, 係同我大表妹落左去行街, 夜晚都係食麥記咋, 過左一個好平淡o既冬節, 大家冬節又點過呀? 係咪食左餐好正o既晚餐呢?
我唔記得左睇月圓呀, 咁咪要等 2052 年囉!

返回


23/12/99

一早醒左, 去左食野, 係我好耐都冇食過o既茶餐, 真係真係好正! 之後就去左買"送"喇, 因為我亞姨叫我幫佢買, 買完果陣收到 CONNIE O既電話, 之後就陪左佢去食野喇, 又傾下計咁, 到左三點幾就返到我亞姨屋企執屋喇, 本來諗住今晚返自己屋企O既, 不過成九點幾先食完飯, 咁咪訓多晚先走囉!
夜晚訓訓下竟然熱醒左喎!

返回


24/12/99

平安夜O既日頭, 一早俾我細表妹攪醒左, 之後就去飯茶喇, 食左少少咋, 因為飲茶唔係咁健康, 太油喇! 飲完茶之後我就坐車返屋企喇, 不過好慘, 架巴士滿哂人, 攪到我要企O係度, 本來我O係角轉車返屋企架, 不過我最後都O係美孚轉車返屋企, 有位坐丫嘛!
今晚係咁多年黎最平安O既一個平安夜!

返回


25/12/99

今朝九點幾就醒左喇, 之後落去買野, 食完晏就睇番尋晚凌晨錄左果D樂節目, 之後俾我發覺我錄埋<白雪公主音樂劇>喎, 李綺紅做果個呢, 都幾好睇喎; 今日我應該冇人約架喇, 不過一個人靜靜咁過聖誕真係唔錯架!
祝各位聖誕快樂!

返回


26/12/99

今日係 BOXING DAY 喎, 大家有冇D咩大禮物拆下咁呢? 我就一份都冇喇, 都冇咩所謂O既, 有冇禮物都要生活架! 本來今朝去燒野食架, 點知有一個朋友病病地, 咁所以太少人攪唔成囉! 仲攪到我開心左成日諗住有得去燒野食, 諗住標個聖誕尾會, 點知又冇著落! 夜晚就去左我亞姨屋企打邊爐, 一來聖誕節啦, 二來就係因為聽晚我表弟個"麻麻"就會返去美國喇, 叫做同佢食餐飯咁, 佢仲好客氣咁俾左封利是我添! 我成十一點先走呀, 返到屋企十二點到啦! 不過今日我都有件開心事呀, 就係我終於O係 idclub.com 度投到<遇上 1941 的女孩>O既飛喇, 我有得睇喇! 不過唔知邊個同我睇O者!
我表妹仔病左呀, 希望佢快D好番啦!

返回


27/12/99

今日好早起左身, 睇左一陣電視咁啦, 之後就訓左一陣晏覺喇, 可能尋晚太夜訓啦, 完全係要充份休息, 不過我真係要搵番D時間溫下書, 因為收到 EMAIL 話下星期唔知邊日要補考番上年唔合格果一科, 不過真係未知時間同埋內容, 成年前讀O既野, 真係唔係好記得, 不過希望我可以合格啦, 因為再唔合格我真係唔知幾時先讀哂呢廿幾科!
唔夠一百個鐘就到千禧喇, 大家有咩劃呀?!

返回


28/12/99

今日一起身就發覺我竟然肥左五磅喎, 天呀, 點解會咁架! 要 KEEP 番先得喇! 溫書溫左兩個鐘到啦, 不過仲未溫哂架, 我都唔知D人點做野架, EMAIL 黎話下星期唔知邊日要補考, 到今日仲未再 EMAIL 話幾時考同埋考D咩喎, 痴線架, 你估電腦咩, 插隻碟就咩都掂呀? 唉, 天呀天呀!
我有得睇舞台劇喇!

返回


29/12/99

今日一早起身冇食到野喎, 因為唔肚餓, 只係飲左杯野O者, 之後落左街買禮物, 原因係因為今晚約左兩個家姐唱K, 買左幾份啦, 我諗 ARM 用掛! 之後就準備去街喇! 約就約左六點O既, 不過我四點幾就出左門口喇, 因為我要去左商台拎飛先, 係下星期實驗電影飛, 有 6 張咁多架, 不過有 3 張係預左俾我表弟O既, 之後就去左九龍城廣場新開果間 NEWAY 唱K喇, 由六點幾唱到成十點幾, 不過我好懷擬佢呃我地錢! 解釋張單解得好好好冇力! 大家小心D奸商! 不過今朝我去左銀行打簿, 發覺好多人唔知係咪驚千年蟲, 勁多人打簿, 我排左成五分鐘先到我! 不過我出門口之前竟然收到一個電話, 係我以前讀電腦果個亞 SIR , 主要係問番我近況, 同埋話佢遲D會攪D網上O既野, 要呢方面O既人幫下手, 所以搵下我, 睇下我得唔得閒幫下手! 梗係得啦, 我咁鬼得閒!
聽日又要開始溫書喇!

返回


30/12/99

今朝好早起身溫書喇, 都冇落過街, 因為唔想落街囉! 不過都仲有好多書未溫哂呀, 梗係唔知點溫好, 成年冇掂過喇個科目, 好驚唔合格架, 不過如果唔補考又要再讀過, 咁我梗係駁一駁啦! 希望我會合格啦! 仲有一日多D就千禧啦喎, 有咩計劃呀? 有咩願望呢? 我就真係好想世界和平, 唔係老土架, 而係我真係好想O係我有生之年見到呢一日出現!
計我話除夕最好就係靜靜地過!

返回


31/12/99

今朝一早起身就開始溫書喇, 原因係仲有好多未溫掂! 我仲煲左粥食添, 因為成屋都冇咩野食, 都有公仔麵O既, 但係唔想日日食呢D野, 所以就煲左粥食囉! 本來諗住落街買番D野食O既, 不過真係唔想出街, 可能係懶啦, 不過我真係費事出街嘛, 又要洗錢! 我下星期三晚考試喇! 真係剩番好少時間去溫番一年前讀O既野! 溫到四點幾我就訓左一陣, 因為唔知係咪作病呢, 成日都好眼訓咁, 又覺得好凍喎, 你知啦, 我唔怕凍架嘛, 前排我都係著短袖衫, 到左果陣十度以下我先開始著長袖, 但係而家真係唔得, 一著短袖衫, 我凍到震呀, 唔知係咪身體唔好呢? 仲有幾個鐘就到 2000 年喇, 大家一定出街玩啦? 我就冇咁O既打算, 因為我始終唔係好明白點解要慶祝千禧年, 其實每一年都會有除夕同元旦架啦, 咁今年又有咩特別O者? 每日都有日出日落架, 點解最後一個日落同第一個日出係咁重要呢? 我唔明白囉! 我會幾戥其他日出日落唔抵, 唔係出現O係呢D特別日子就冇咁多人理佢地!
不過都祝大家千禧快樂啦!

返回


inserted by FC2 system