私日記


背景音樂 : 親密關係


想睇下我邊日O既私日記呀 ??
1/2/99
2/2/99
3/2/99
4/2/99
5/2/99
6/2/99
7/2/99
8/2/99
9/2/99
10/2/99
11/2/99
12/2/99
13/2/99
14/2/99
15/2/99
16/2/99
17/2/99
18/2/99
19/2/99
20/2/99
21/2/99
22/2/99
23/2/99
24/2/99
25/2/99
26/2/99
27/2/99
28/2/99





1/2/99
今日好番好好好多喇, 真係開心喇, 唔知係唔係一唔"介"
口就好番哂喇, 都有好幾日冇真真正正咁上過網喇, 估唔
到幾日冇check email, 有成廿幾封喎, 真係有少少攪笑,
同埋頭先睇左一套戲, 幾好睇架, 叫做"YOU'VE GOT MAIL"

返回




2/2/99
尋晚真係好好訓, 唔知係咪天氣又好左少少, 病又好左少
少咁; 尋晚睇"寵物情緣"好好睇喎, 因為有SAMMI囉, 佢
好正囉; 不過今日又肚痛, 真係唔知係咪有少少暗病呢?
成日都覺得我冇咁長命架, 哈哈哈; I MISS U!

返回




3/2/99
今日一心諗住學用PHOTOSHOP啦, 點知完全唔識喎, 照住
個網頁咁做, 完全都搵唔到佢講果D野O既, 所以我真係對
PHOTOSHOP死哂心喇, 有冇人可以教下我用呀? 有就好喇;
今晚要返學喇, 病好左希望可以追番上堂O既野啦, 唔好衰
情人節會唔會一個人過呢?

返回




4/2/99
今日去左配藥呀, 因為仲未病好又唔想睇多次醫生, 咪叫
個護士配多三日囉; 我諗今年呢個情人節我要一個人過喇,
唉, 而家真係冇咩時間見佢, 慘~~~~~~
我想哭但是哭不出來...

返回




5/2/99
今日都可以話勁攪笑喇, 首先去左POLY拎聯招表格啦,
之後就同朋友去左行街街, 到6點我就自己一個人行返
學喇, 就O係呢個時間, 有兩個個子好小O既女人拉住我
件衫喎, 咁先頭我以為佢地問路啦, 點知佢問我O既問題,
非常非常奇怪, 不過我覺得幾攪笑囉, 對答如下:
女子 : 小姐小姐, 我想問下你係咪著細碼衫架?
斯斯 : 唔知喎, 仲咩呀?
女子 : 我見你個肩好橫喎, 有冇17寸呀?
斯斯 : 都係唔知喎, 仲咩事呢? 我好趕時間!
女子 : 呵係咁O既, 其實我地兩個係做GARMENT架!
斯斯 : 咁關我咩事呢, 請問?
女子 : 冇, 而家轉季, 我地公司想請D PART-TIME O既!
斯斯 : 我真係好趕時間, 有咩唔該快少少!
女子 : 以你O既肩咁橫呢, 其實好ARM做註廠MODEL囉!
斯斯 : 唔好意思, 我要走了, 係咁啦!
大家係咪覺得我好醒呢? 最衰我冇時間, 如果唔係一定同
佢玩到底, O係我面前想呃我? 好難呀, 我夠讀GARMENT
囉, 其實好多野想同果位女子講, 因為我都想知下D人
點呃人, 幾想同佢講我有睇"城市追擊"呀, 根本佢太唔了
解做GARMENT O既野, 我就梗清楚啦, 我個肩係橫, 不過
點可以做MODEL呀, 有自知之名嘛! 你地話啦, 香港係咪
太多人冇自知之名呢? 咁講真句, 果D人係抵俾人呃O既!
病到暈暈地!

返回




6/2/99
今日係一個好平淡o既星期六, 一早起身睇下電視呀, 食下
野咁, 之後想去沖涼, 點知冇水喎, 咁咪去左訓覺囉, 訓
到成7點幾呀, 可能前幾日都忙功課, 又唔願早訓, 所以咪
咁鬼眼訓囉~~~~~
情人節極可能一個人過!

返回




7/2/99
今日都係一個好平淡o既星期日, 又係訓左幾個鐘頭, 可
能懶掛, 訓覺好開心架嘛, 又可以令到唔係好靚o既我變
得靚D, 唔信你都可以試一試架, 我今年都靚過上年啦!
頭先佢打電話俾我呀~~好開心呀!

返回




8/2/99
今朝去左飲茶, 之後去辨年貨喎, 嘩! 買左好多糖呀, 今
年新年一定好甜喇, 另外我SCAN左幾張新貼紙相, 放左
上網頁喇, 雖然只係多左幾張, 不過睇住先啦, 遲D影左
靚相再俾大家睇啦! 本來聽晚"喜劇之王"有遊船河架,
不過得我一個人去, D朋友又唔去得, 所以我決定唔去
攪到做聯絡果個人都話:點解你成日都唔去架! 冇計啦,
因為一個人好悶架嘛~~~~~~
今日又食哂藥喇, 仲未好番哂添!

返回




9/2/99
今日去左飲茶, 仲有去左銀行入錢報聯招呀, 其實都幾
驚今年又入唔到, 不過都要試架啦, 唯有希望個天唔好
再玩我啦, 俾次機會我入去讀啦; 今日都冇咩特別, 溫
左一陣書咁啦, 因為聽晚夜校測驗, 不過測MC, 咁都
好D, 因為我好有把握會掂架, 信我啦!
個病好番好多喇!

返回




10/2/99
今日食左呀爸尋日第一次整o既蘿白糕, 好正喎, 好好味
呢個係我意料之外, 所以今日呀爸就整年糕喇, 自己整
好味D架, 同埋慳番唔少錢, 唔信就試下自己整啦! 今
晚要返學呀, 測驗喎, 不過都唔知自己識唔識做, 你話
死唔死, 不過今晚有一煲我好鍾意O既湯 -- 羅宋湯!
不過飲得多得滯, 有少少肚痛!

返回




11/2/99
今日同番一個朋友傾電話喎, 果個就係"嘉倫"喇, 不過
傾番計先知原來佢好冇記性架, 好多野佢都要諗好鬼死
耐o既, 仲有呀, 約左年三十晚一班人出黎行花市喎,
真係開心喇, 又見到舊朋友, 正!!
今日仲有少少肚痛!

返回




12/2/99
今晚又返左學呀, 不過我異常地早走, 因為教哂野呀嘛
返到黎仲有飯食添, 真係正正正! 大家情人節點過呢?
我果晚就要食團年飯, 而我o既情人要返工喎, 所以我
會過一個冇情人陪伴左右o既情人節喇, 不過有表弟表
妹陪! 今日仲肚痛, 唔通有暗病?

返回




13/2/99
今晚終於聽到細表妹唱成首歌喇, 雖然唔係好知佢唱乜
不過我覺得好得意呀, 因為佢得兩歲幾咋嘛, 不過都唔
知佢o係邊度學識唱果首歌, 我都未聽過, 就連佢媽咪
都唔知佢o係邊度學o既, 你話幾奇呢!
唔知我今年有冇情人節禮物收呢?

返回




14/2/99
今日好累呀, 因為表弟表妹黎我屋企團年呀, 細表妹成
日都冇停過咁食野, 真係佩服; 仲有呀, 今日同媽咪呀
姨同埋兩個表妹去左影貼紙相, 第一次同家人影咋, 我
貼左張o係我手提電話, 今年過左一個好特別o既情人節
仲記得上次o既今日, 第一次同一個網友傾左成三個鐘
頭電話, 不過已成過去了~
祝大家情人節快樂!

返回




15/2/99
夜晚去左婆婆度食飯, 之後同左媽咪去行左旺角一陣,
買左一對正鞋, 之後同左班舊同學去維園行花市, 前
所未有咁多人, 好迫, 見到好幾個明星, 不過我咩都
冇買到呀, 基本上都迫唔到入去睇; 兩點幾返到屋企
前所未有咁累呀, 所以話下年都唔好預我夜晚去行花
市了, 冇咩得著!
聽日有利是"豆"!!!

返回




16/2/99
年初一, 一早去左婆婆屋企拜年, 食左我最愛o既咸湯
丸, 我食左三碗咁多呀, 之後就去左爺爺屋企拜年,
又有甜湯丸食, 夜晚果餐仲多野食呀, 食完冇耐我就
自己返左屋企先了, 因為佢地打牌呀要, 所以返黎寫
日記, 今日都"豆"左唔少利是, 希望"長豆長有"!
恭喜發財!!!

返回




17/2/99
初二係一個好平淡o既一日, 冇咩特別囉, 都冇出到街
不過就睇左兩隻VCD, 真係冇咩特別, 今年希望發
多D新年財, 越多越好!!
都恭喜大家(同埋我)發財!!!

返回




18/2/99
初三係赤口, o係屋企打三人麻雀, 不過都係練下技術
o者, 新年對我黎講都係幾悶架, 好就好在有利是"豆"
今年都幾好收獲, 你地又點呢?!
今日祝大家想果樣有果樣!

返回




19/2/99
初四去左舅父度拜年, 夜晚佢地又去左我屋企食飯開
局, 不過打牌又幾好玩o既, 大家唔好以為我好爛賭
喎, 有時我覺得打牌可以同家人聯絡感情, 又可以
練下思考能力喎, 一舉兩得, 仲有係發新年財!
新正頭咩都好!!

返回




20/2/99
呢幾日都冇上到網, 因為太多野做了, 又唔係好夠
訓喎, 所以唔想上網囉, 今日婆婆地黎左我屋企,
而家又開緊局了, 所以我先有時間同精神上下網
咋, 不過上到黎又寫唔到留言版, 又冇咩人上網
天呀! 點解咁對我?
恭喜恭喜!~

返回




21/2/99
今日一次過睇左好多套戲, 真係幾悶囉, 冇計啦
冇乜野做, 就唯有睇下老翻VCD, 不過唔好拉
我喎, 大家都要乖乖地喎; 尋晚同KAZU傾左
幾耐下電話, 希望佢可以理智D去處理佢O既問題
啦, 記住唔好令到朋友擔心呀, 我都係你好朋友黎
架喎, 你都唔好令到我咁擔心你喎, 知嘛?
我好亂呵!

返回




22/2/99
今日好熱呀, 都唔知點解, 天氣又話凍左但係又唔係好覺
得喎, 食完午餐之後, 我去左電影公司拎"喜劇之王"o既戲
飛喎, 唔知幾時去睇呢? 不過好累呀今日, 又去左影印自
己D証書黎報聯招, 各位呀, 我又整緊一個網頁了, 不過
未知幾時會完成, 到時一定話你地知!
大家生日快樂呀!

返回




23/2/99
今日勁早起身, 之後去左沙田喎, 睇左"喜劇之王"喇, 一
句講哂 : 幾有新意, 不過冇咩內容咁, 都OK, 其中我
就幾鍾意"李思捷"o既演出, 佢係邊個? 如果有睇過呢套
戲o既人, 相信都會記得有一個好似劉德華o既導演角色架
我留意左佢好耐架喇, 果陣上堂見到佢扮華仔, 好出色,
而佢又幾靚仔喎, 我覺得佢有前途架; 睇完套戲再行左一
陣, 都冇咩好睇, 返到屋企都成四點了, 所以冇咩做啦,
而家諗番起真係好在冇去拍果場戲O者, 不過下次有機會
我都會試下O既!
唔知KAZU點呢?

返回




24/2/99
今日好好訓呀, 訓到成一點鐘, 你話係咪好懶呢? 咁女仔
訓多D會靚D架嘛! 你唔信可以搵一個禮拜, 再睇下係咪
靚左! 今晚要返學呀, 都幾好O既, 因為下星期日又要考
試喇, 今晚叫做係最後一堂了, 不過幾驚唔合格, 好鬼驚
大家請祝褔我!
聽日又見到表妹仔喇~

返回




25/2/99
表弟表妹又黎我屋企玩喇, 真係好攪笑又好好玩, 食左我
最鍾意o既壽司, 真係勁好味; 不過好邪呀, 尋晚我失眠
喎, 我爸爸又失眠喎, 我好耐未試過喇, 唔知點解呀, 眼
光光到5點幾, 希望今晚同埋以後都唔會再失眠啦, 但願
如此! 究竟點先係亙相了解?

返回




26/2/99
今日約左六十分去行街街, 買唔到野呀我, 不過去玩左好
多野, 好難忘, 我地又約定下星期五去某學校o既開放日
大家有興趣可以估下我地會去邊間, 想睇靚女o既就去開
放日啦, 包你會見到兩個勁靚o既靚女呀, 唔信咪去睇下
囉! 今日又影左貼紙相呀, 你地可以o係我o既網頁睇到
兩個靚女喇, 去睇下啦, 可以去我留言版讚下我地架,
我地絕對唔介意你地讚我地架!
旺角D空氣真係好差!

返回




27/2/99
尋晚我又失眠啦, 真係慘, 只係訓到五個鐘, 我真係唔知
點解成日訓唔著, 今朝起身仲勁肚痛添, 有咩解決方法?
聽朝又要去做訪問了, 所以今晚一定要訓餐飽, 希望我訓
到啦! 大家請祝褔我!

返回




28/2/99
尋晚我又再次失眠啦, 唉真係俾自己激死, 成日都係咁
遲早死; 今朝去左啟德睇野同埋做訪問, 真係好累呀,
不過好攪笑喎, 夜晚上網時, 勁多人問我有冇識到D靚
仔喎, 答案係冇, (訪問對像例外, 因為我識左佢五年)
今日好累呀!

返回

inserted by FC2 system