私日記私日記背景音樂 : 親密關係
| 1/1/99 |
新o既一年新希望, 我今年好希望可以有一個人陪我過, 無 論順境或逆境, 因為我發覺我每一年o既特別日子都係自 己一個人過, 今年開始我唔想再係自己去面對困難, 唔知今年呢個願望會唔會實現呢?? |
| 2/1/99 |
好掛住我Ｄ表弟表妹呀, 雖然尋日先見完, 不過我細表妹 而家好好玩架, 因為又好多野講, 又識"乙水"人開心喎, 真係抵鍚, 不過大個左之後又會點呢?? 會唔會變質呢?? 希望一路都咁乖就好喇!!! |
| 3/1/99 |
|
今日一早同左二家姐去行街街喎, 一心去買高高鞋, 因為 要高D高D, 點知睇唔o岩喎, 真係激死人啦; 夜晚上網, 一ONLINE就收到佢o既WWW PAGER 喎, 講真真係幾 開心架, 因為佢工作之餘都仲記得我掛住佢, 不過我真係 唔知佢今日返工返幾多點喎, 我係咪好失敗呀?? 不過, 係要俾D時間大家去習慣下O既, 會唔會我太易投入呢?? |
| 4/1/99 |
|
1999年只係過左幾日咋, 不過都仲係有少少病病地添, 唉 真慘 ~尋晚發左個好鬼怪o既夢, 夢裡面有好多人同我講 野,攪到我好亂, 不過我大約都記得係叫我唔好再咁易去 信人,要保護自己喎, 不過我諗我係太緊張掛, 又幾日冇 同佢傾下計咁, 我知佢工作好辛苦架; 希望佢都知我掛住佢, 唔知佢幾時先得閒同我去睇戲呢, 快 D 就好 |
| 5/1/99 |
|
今日一早出左旺角同家人飲茶喎, 好耐未試過自動咁早 起身啦, 所以幾大都去飲茶, 原來而家飲茶好貴架, 以 前平好多, 所以食左好少野, 之後去左行街街, 買左勁 多野喎, 不過大部份都唔係我o既, 係咪好攪笑呢? 可 能而家手緊掛, 冇計啦, 仲係量地呀, 得閒死唔得閒 病, 不過又病緊喎; 我終於知道我戀愛弱點係咩野喇, 就係每一次我都好快投入左, 就係咁好容易就愛得深過 對方, 好似而家咁一個字 : 苦, 唔係話同佢一齊唔好, 只係要時間去証明囉, 而佢工作又勁忙, 都唔得閒同我 去街街, 不過遲D會好好多架喇, 千其唔好又話唔鍾意我 喎, 斯斯好鬼慘架啦,鬼鬼唔好蝦我喎~~~~~ |
| 6/1/99 |
|
今日可以話係最忙o既一日喇, 小掃除呀今日, 咩係"小掃 除"? 比"大掃除"細規模D O既咪係"小掃除"囉, 執左好多 野出黎呀, 又比我搵番以前中一至中三O既校出黎喎 (註:中四同中五呢兩年, 學校縮皮, 冇校刊, 連班相都係自 己影架咋), 不過好有趣囉, 見番以前好肥O既我, 真係肥 而家成30磅都有, 唔識我仲可能以為我有病呀, 差成 30磅 喎, 不過我而家都覺得我肥左少少, 可能女仔係靚掛, 不 過俾我睇到亞"姣LI"中一時O既樣喎, 勁有趣啦~~~~今日 好開心呀, 因為我一口氣回左三封信呀, 好少咁勤力架, 唔上網住都要回左信先~~~~ 不過最開心係見到佢ONLINE!!! |
| 7/1/99 |
|
一早醒左喎, 因為尋晚訓得唔好呀, 唔知點解尋晚臨訓之 前忍唔住喊左出黎, 好耐都冇咁喊過喇, 不過我又諗唔到 有咩原因會咁樣, 我自己都諗爆腦啦, 可能係病病地, 又 傻傻地掛; 我想留番長頭髮喎, 可能係成日短頭髮悶啦, 不過我個人好怪架, 而家話留呢, 可能不出一日就又會去 剪左佢架喇, 不過唔洗驚住, 我到而家都仲未遇到一個好 髮型師, 次次剪完都衰過未剪, 你話死唔死呢? 話時話喇, 我長頭髮定短頭髮好睇呀? 俾少少意見我好喎話哂都一 場朋友喎; 佢病病地呀又, 希望佢快快好番啦!!! |
| 8/1/99 |
|
今朝一起身成身都好痛呀, 可能係所謂O既"骨火"掛, 我諗 係因為我呢排勁食野, "熱氣"呀, 而且又加上天氣轉啦, 人老左係多病架喇! 而家經濟唔好真係慘喇, 搵唔到工已 經好慘架啦, 而且仲物價高漲添, 而家做人真係難喇, 我 唔算大洗架啦, 又會咁苦O既?? 睇醫生都唔敢睇, 以前我 就係少少野都走去睇醫生架, 不過而家我真係唔敢去睇, 一來冇咩作用, 二來貴到暈喎, 所以我早排病都係買成藥 食, 不過大家唔好學我喎, 我條賤命食我唔死先好咋, 大 家唔好亂食藥呀, 如果唔係真係死左都唔知咩事喎所以希 望快D搵個人嫁左佢算啦, 唔知有冇咁O既人呢? |
| 9/1/99 |
|
一早起身, 媽咪話我Ｄ表弟表妹黎我屋企玩喎, 真係開心 喇! 去左樓下飲茶喎, 食得好飽呵; 之後返左我屋企, 我 幫我表妹練習會話(普通話同英文)喎, 真係好耐未試過咁 幫人溫下書咁原來我Ｄ普通話都仲幾掂架, 我細表妹好坐 唔定呀, 成屋咁走黎走去喎, 捉都捉唔住, 遲Ｄ再大Ｄ我 都唔知可以再點捉住佢坐定Ｄ咁; 仲有呀, 今日我以前TI O既好朋友約我下星期食飯喎, 好正呀; 已經好幾日冇同 佢傾計啦, 唔知佢病好未呢? 其實有時我都唔知同佢咩關 係, 佢做咩我都唔係好知咁, 但係又係佢女朋友喎, 真係 令人傷腦筋喇, 希望下星期佢可以抽到時間同我一齊去睇 戲啦; 唔知有冇機會呢? |
| 10/1/99 |
|
今日又有小掃除喎, 油油呀, 雖然我冇咩幫手, 不過都幾 忙架喎, 唔好以為我冇幫手呀, 所以攪到成凌晨一點幾先 上網, 不過要同KAZU講聲唔好意思, 本來話見你上網再 打電話俾你傾計不過斯斯唔記得要早上網呀, 對唔住呀, 仲諗左好多野去同你傾添, 下次啦, 就星期一晚啦, 因為 你星期二唔洗返學, 我真係有好多野想你俾下意見我架, 你都知我好易亂諗野架啦, 真係死; 唉, 佢係咪忙得滯呢? 真係有好幾日冇上網同埋冇打俾我啦, 噢撈! 我真係唔知 幾時先可以同佢出黎睇下戲, 唯有等下先啦, 快Ｄ就好喇! 我呢個星期五要返夜校喇, 佢唔會約我要返學果日呀嘛~~~~~~ |
| 11/1/99 |
|
今日係小掃除下半部份, 都幾忙, 都成１２點幾上先網, 終於見到佢上網囉, 不過有少少事發生左, 我諗佢唔知我 會咁諗架, 可能平日已經冇咩機會傾下計, 見下面咁, 我 覺得總係爭咁Ｄ野咁, 但係又講唔出係咩, 可能我係一個 比較麻煩O既女仔掛, 佢對我O既態度我硬係覺得唔似O係 埋一齊咁, 係就係時間O既問題O者, 可能我平時講野係 冇咩所謂咁講, 可能係咁佢唔鍾意我咁講掛, 唔知呢, "等"呢個字在我黎講, 我好憎呀, 都唔知點, 神呀! 救救我吧! |
| 12/1/99 |
|
我今日好病呀, 發燒呀好似, 不過我仲係要執屋, 執到自 己間房好乾淨又多左好多空間喎, 真係正啦, 不過代價係 腰痛, 手痛, 頭痛同埋好"支力"; 今日終於同ＫＡＺＵ 傾到電話, 佢真係幾肯聽我講野囉, 亦都俾左意見我, 真 係好, 多謝你呀! 有時我都唔係好了解自己架, 我講野又 唔係好經大腦喎, 我知我尋晚對佢講錯左少少野, 不過 O係度同佢講番聲對唔住, 真心O既唔好意思, 希望你 唔好放果番說話O係心啦, ＯＫＡＹ???? 仲有呀, 前幾日 睇左一本正書, 而家介紹俾大家啦, 就係張小嫻架 --- 再 見野鼬鼠 ! |
| 13/1/99 |
|
我今日仲未病好, 直頭發燒添, 不過今日食左好多野喎, 真係肚腩都出左黎呀, 噢, 我諗又要ＫＥＥＰ番ＦＩＴ 先得喇!!!! 今日又約左個舊同學聽日去街街喎, 真係 開心喇, 因為講左話食飯都講左成年架喇, 你話都市 人幾忙呢; 不過食完晚飯之後肚痛呀, 真係慘喇, 冇咩 人關心我, (哈哈, 攪到好似果個叫人多Ｄ關心少年Ｏ既 廣告咁), 不過可能病啦, 我失眠喎呢幾日, 唔知呢Ｄ係 咪叫做抵死呢? 平時有人關心又勁串人喎, 到而家有病想 人關心下, 佢又好似嬲左我咁喎, 我唔敢打電話俾佢呀, 點算好呢? 真係對唔住你呀~~~~ |
| 14/1/99 |
|
我今日直情病左添呀, 但係又要出街喎, 去左黃埔行街街, 不過又落微微雨, 攪到我勁頭痛呀, 所以四點幾就返左屋 企喇沖完涼又勁辛苦, 咪訓一陣囉, 點知一醒就已經八點 喇, 所以成八點先食野呀, 食完野就上網喇, 係咪好早上 呢今日? 因為今日我想早Ｄ訓, 因為個頭仲勁痛呀而家, 冇計啦, 聽晚要開始返學喇, 我會好忙掛, 唔知喇, 因為 我都放左假好耐喇, 希望我唔會"洽眼訓"啦, 到時又見番 一個同學女喇; 尋晚好夜訓呀, 因為學緊整ＳＣＲＥＥＮ ＳＡＶＥＲ囉, 係咪好正呢? 第一個製成品送左俾佢, 不 過都唔知佢收到未, 不過真係好用心機去做架, 希望佢鍾 意啦, 真係為你而整架~~ |
| 15/1/99 |
|
都係未病好, 今日又要開始返夜校喇, 好鬼凍呀, 大家都 要著多件衫呀, 唔好好似我咁成日都病唔好啦, 所以健康 真係好重要; 另外今日終於又一口氣回左三封信喎,真係 好服自己呀, 真係叻叻喇~ 哈哈, 有冇Ｄ想讚下我先, 如果你想讚下我呢個O靚妹呀, 有O既話好歡迎去我留 言版度讚下我架, 我唔介意架~~~~; 尋晚有個人話我 自己有寫私日記之後而冇寫自己留言版, 覺得留言版 冇以前咁好睇喎, 大家有咩意見呀, 其實我都覺得少 左好多人寫留言囉, 唔知係咪呢排唔ＵＰＤＡＴＥ呢, 不得而知喇, 不希望你地都會俾下面, 寫多Ｄ留言啦! |
| 16/1/99 |
|
一早去飲茶, 之後又返左學, 放學之後又去左買書, 好 貴呀, 而家做學生真係慘喇, 天氣又凍冰冰; 返到屋企, 真 係好舒服, 食左一大煲熱烏冬, 勁正! 今日有個新計劃, 就 係自己再整衫俾自己喇, 冇計啦, 因為出面冇想要Ｄ款 咁唯有自己設計再畫紙樣然後再車, 我諗一個禮拜有得 著喇, 到時再話俾大家知啦; 佢幾時得閒呢? |
| 17/1/99 |
|
都係去左飲茶, 之後又係返左學喎, 今日返到屋企真係忙 呀, 畫紙樣加剪布呀, 千其唔好以為好易呀, 紙樣畫得好 車果陣同著果陣先正, 不過我不嬲紙樣都幾掂; 聽晚仲 要返學呀, 真係命苦喇, 幾時可以去玩下呀??? 尋晚睇 左一集新日劇呀, 幾正架喎, 不過睇得一集, 未出ＶＣＤ 呀好似, 套野叫做 ＯＶＥＲ ＴＩＭＥ, 得閒睇下! |
| 18/1/99 |
|
都仲係去飲茶, 夜晚又係返左學喎, 上堂勁悶呀, 可能呢 幾日我都要返學, 個人好累囉; 聽日開始車衫, 仲有呀, 今日"鑑証實錄"有靚仔洪天明呀, 真係勁靚仔, 好衰唔衰 呢, 佢o係劇入面一出第一集就死鬼左, 激死我, 攪到我仲 以為可以集集睇到佢添, 真係 : nan-ta-yo! |
| 19/1/99 |
|
今日好累呀, 因為車衫嘛, 聽日去買埋少少野, 就可以好 快完成呢件正衫喇, 不過聽晚又要返學, 真係慘~~~~~~~~ 其實今日冇咩特別, 所以冇咩野講~; 唔知佢呢排咩呢? |
| 20/1/99 |
|
今日條腰勁痛呀, 唔知係咪訓得唔好呢, 另外今日好忙呀, 出左去行旺角喎, 買左好多野呀, 而且仲換左個新56K MODEM添, 係就係遲左少少先換, 冇錢係咁架喇, 鬼叫你 窮呀, 頂硬上~~仲係未得閒去車衫喎, 因為我太懶喇, 仲未去買齊野車衫, 我諗聽日會去買架喇; 仲有喎, 今日 收到佢O既EMAIL呀, 好開心添, 不過佢竟然串錯我個名~ |
| 21/1/99 |
|
今日我條腰終於冇咁痛, 真係開心, 今日都冇咩特別做過, 又係行行企企咁, 不過陪左呀媽去買"送", 又買唔到野車 衫喎, 真係傷腦筋喇, 呀, 仲有呀, 原來我個新MODEM上 網前係唔可以將屋企條電話線飛左去手提, 之後大家可能 會得到好多冇人聽O既電話喇, 真係唔方便, 都係以前個 MODEM好D, 不過冇計啦; 好掛住你添~ |
| 22/1/99 |
|
今日我條腰完全唔痛喇, 真係好喇, 不過條腰唔痛又有第 二樣野, 唉, 激死我喇, 今日我勁肚痾呀, 真係得閒病唔 得閒死囉最慘就係今晚要返學呀, 果個呀sir又鬼咁好氣 喎, 講左幾個鐘書, 都好似仲好精神咁, 真係趣怪sir喇; 其實我覺得我而家好似唔係一個好好o既女朋友咁, 可能 佢太忙, 冇咩時間同我一齊啦, 佢快D冇咁忙, 可以快D一 齊去街街就好喇! |
| 23/1/99 |
|
今日勁悶呀, 先前諗住有得去街街架嘛, 點知冇得去添, 激死人; 不過條腰有少少累呀, 可能坐得多掛, 你話死 唔死呀, 得果20歲就咁鬼多病痛, 幾時先得黎老呀? 唉, 不過真係好鬼悶功課又做哂喎, 不過今晚又有日劇 睇, 係陳慧琳o既"鬼之棲家", 不過有人話勁悶架喎, 今晚睇完話俾大家知, 仲有呀, 佢好鍾意陳慧琳架, 唔知佢得唔得閒去睇佢地果個歌劇呢? |
| 24/1/99 |
|
今日肚痛, 仲幾累添, 本應諗住打俾佢架, 不過佢又今朝 先放工, 我驚佢好眼訓囉; 另外, 果套"鬼之棲家"勁唔好 睇架, 好悶咁囉, 都係ＯＶＥＲ ＴＩＭＥ正Ｄ, 不過深 田恭子做得幾好, 好感人咁囉, 所以我想睇"神呀, 請給 我多一點時間", 今日表妹佢地黎我屋企玩, 真係好累; 佢幾時會得閒呢? |
| 25/1/99 |
|
今日都仲係肚痛喎, 尋晚終於打俾佢架, 不出我所料, 佢 果陣好夢正濃, 不過都傾左一陣啦, 從新清楚番個方向喇, 不過尋晚我為佢而喊, 係為我地而喊吧, 不過大家放心, 我地仲好好, 只不過係我呢個o靚妹仔傻o者, 成日鍾意亂 諗野, 天生如此, 冇計~~~~; 不覺我覺得要時間去証明o既! |
| 26/1/99 |
|
死啦, 今日我喉嚨痛呀, 你話死唔死, 真係痛死我喇, 仲有 呀, 今日我將呢個網頁從新再整理過, 靚左好多呢? 我整 左好耐架喇, 因為我想大家睇得舒服Ｄ呀嘛, 有咩意見記 住話我知喎; 佢今日打電話俾我呀, 好開心呀! |
| 27/1/99 |
|
病到死死下 |
| 28/1/99 |
|
半條人命, 燒到103度 |
| 29/1/99 |
|
好番少少, 不過都係勁辛苦 |
| 30/1/99 |
|
幾日冇上到網, 好番好多~ |
| 31/1/99 |
|
今日同埋幾個舊同學去玩左成日, 好開心呀! |