咁快又一個月o既開始喇! 今日又係回歸兩週年o既日子, 呢兩年 真係變化勁大喎, 無論係香港定邊度啦, 我都變左唔少啦, 唔知大家 又有冇發覺到呢? 呢兩年我的確係大個左好多喎! 思想直情有少少老 餅添! 變成左一個好認命o既女仔! 其實咁唔係幾好喎, 而家先至係 二十歲, 咁十年後, 我咪變左餅中之后? 不過有時唔係自己可以控制 到長唔長大, 好多時係環境迫我要長大要改變! 呢幾個月黎, 我真係 感到前路茫茫, 書係就係仲有得讀, 不過我命運好似點都唔俾我入大 學咁o既, 有Ｄ人可以不費吹灰之力就入到大學, 我就點努力都仲未入 到, 不過我開始好懷擬而家大學Ｄ入學條件呀! 話哂我都讀左電腦咁 耐, 冇理由收Ｄ剛剛中學畢業O既小朋友, 都唔收我呢Ｄ人O既? 雖然 我唔係話十分精於電腦, 但係假假地都考過第一, 又讀緊夜校學位 課程咁, 唔通個天真係要咁趕絕我? 真係希望個天放過我啦! 今年俾 我入到啦!
尋日係黃家駒o既死忌, 真係希望佢可以安息!

今朝好早起左身食完野又開始要溫書喇! 因為真係冇咩時間 溫喇! 聽日又要返全日學, 真係好辛苦, 今次仲要係一個o係澳 洲過黎o既香港人教師添! 硬係覺得對住一個母語係中文o既人 講英文, 仲要成堂都係用一Ｄ好外國化O既語氣同埋教法咁講書, 係好唔習慣O既! 所以聽日將會係幾難挨O既一日, 而星期日我 將會走堂唔返學, 因為星期一晚要考會計喇! 雖然我真係溫左 幾日書, 不過真係好大壓力! 訓覺果陣成腦都係Ｄ會計O既野! 讀書咁多年, 會考都冇咁大壓力呀! 而家望就望個天唔好再玩 我啦!
回歸兩年, 我就真係覺得冇咩值得高興!

返左成日學, 一心諗住今日o既日記都冇咩特別架喇! 估唔 到個天連少少安靜日子都唔俾我過, 就o係我返到屋企沖完涼, 煮 完野食洗完碗之際, o係碗櫃果Ｄ碟唔知點解唔係放得好好咁, 有 Ｄ想跌咁, 所以我就好快手咁扶番佢地, 點知我唔記得左原來當時 我手裡面拎住幾隻碟, 就係咁, 手裡面果幾隻碟應聲落地! 咁O既 情況其實都已經好黑架喇! 就O係我勁話自己黑果陣, 我見到我隻 腳有Ｄ紅色野流出黎喎! 仲慢慢有痛O既感覺添! 就係咁我發覺到 原來自己隻腳俾打爛左果一隻碟O既碎片整損左, 仲要係唔止一度 添, 我咁大個女都未試過打爛野之餘仲要整損自己, 眼見隻腳流 左成五滴血, 我先識得要去止血! 其實斯斯好驚血架! 但係冇計啦, 一 定要自己止血, 一邊止血一邊鬧自己蠢, 仲咩咁大意咁都打得爛Ｄ 野, 更何況我真係覺得我對唔住我爸爸媽媽, 身體髮膚受之父母嘛! 尋 晚發左個好得人驚又好開心O既夢喎, 驚就唔好講喇! 開心O既係我 夢見一個我到而家仲係好鍾意O既人呀, 大家唔洗估係邊個喇! 因 為我諗住而家話你地知呀! 果個人叫做黃翊, 真架! 我真係仲好鍾 意佢架! 識得我耐果Ｄ朋友一定知呢樣野! 雖然我都鍾意吳國敬, 同埋 好多好多靚仔! 但係黃翊的係鍾意左佢好多年!
希望個天真係放過我, 唔好再玩啦!

今日訓到成兩點鐘呀! 大家可能會好奇怪咁問我點解可以訓 到咁晏, 唔洗返學咩? 其實係要o既, 不過我諗住唔返o係屋企 溫書, 因為大日子聽日就係喇! 所以要閉門造車! 再加上今日 只係上ＬＡＢ, 咪可以唔返都可以囉! 大家放心啦! 今次只係 特別情況, 下次唔會架喇! 食左少少野又要溫書喇! 我真係發 覺好大壓力呀! 識就識哂架喇! 但係個腦始終都係靜唔到! 我 諗過埋聽晚考完之後, 我一定會勁訓勁玩! 不過星期二我就約 左我二契姐去行下街, 又會一齊考慮下揀咩科讀好! 大家聽晚 記住睇ＴＶＢ喎, ＜反黑先鋒＞有洪天明做架! 記住記住一定 要睇呀!
聽晚千其唔好落雨呀!

今次會計考試都可以話令到我精神受壓呀! 除左前幾晚打爛野 界損腳之外, 尋晚仲失眠添呀, 今朝七點先訓到, 十點幾果陣仲 要俾一個冇聊人打電話黎嘈醒左! 真係多得佢唔少呀! 我發覺我 一失眠唔夠訓果朝就一定有Ｄ咁O既人打黎講埋Ｄ冇聊野架喎! 最 慘係佢感覺唔到我仲未訓醒, 同埋好唔想同佢傾! 夜晚考試都叫 做過得去啦! 我會合格架! 不過好憎果班人呀, 我都未見過Ｄ人 考試可以不停咁講野, 出貓同埋嘈住人架! 都仲要完全唔覺得自 己係唔應該咁做架喎! 坐我隔離果個女人仲離譜, 考考下問我識 唔識喎, 我冇答佢示埋意俾佢知我好忙於考試, 佢之後仲成份佢 做O既答案俾我抄喎, 大姐呀, 我唔做Ｄ咁野架! 你冇病下嘩? 咁 我同佢講我唔會抄架! 你自己做自己野啦! 好唔容易考完喇! 呢位 女士仲要勁問我識唔識喎, 咁我話應該會合格O既, 佢話佢唔夠時 間做喎, 仲話冇做好多題喎, 又唔識做喎, 嘩! 我心諗好彩我唔會 出貓架O者, 我好想鬧佢, 好心佢唔識就唔好懶係好掂咁俾人抄啦! 大 姐; 所以呢我覺得呢班人全部怪怪地咁, 都唔知咩人黎架!
終於都考左會計喇! 太好喇!

尋晚實在太好訓喇! 因為完全冇哂考試壓力! 訓到今朝十一 點鐘, 之後食左少少野就去左九龍城會合我二契姐去行街喇! 陪 佢食左野之後行九龍城廣場, o係某時裝店撞到＜閃電傳真機＞ 靚女主持"唐韋琪"同埋"黃玉鳳"o係度買衫喎, 之後坐車去左旺 角行左一陣啦, 再去左尖沙咀, 就o係行緊ＩＴ時裝店果陣, 又 見到亞視藝員"朱燕珍"喎, 佢原來好高架! 著平底鞋都好高! 佢 真人都好靚! 之後行ＵＰＤＡＴＥ ＭＡＬＬ果陣有驚人發現呀! 見 到個靚仔喎! 呢個靚仔係拍戲O既, 不過我真係唔知佢叫咩名, 最 深刻果套戲係＜四個３２Ａ和一個香蕉少年＞裡面做"吳家樂"個細佬, 真 係好靚仔呀, 雖然佢而家大個仔左, 不過依然正! 我先頭望唔到佢架! 我 二契姐行行下突然"嘩!"左一聲, 我先望過去, 第一個感覺係"嘩! 好靚 仔呀!"再睇真Ｄ, 原來係佢, 真係好開心呀, 不過美中不足O既係佢望我二 契姐唔望我! 其實係因為佢一望我二契姐, 我二契姐"嘩!"左一聲嚇親 佢唔敢望我! 真係有少少唔抵喇! 二契姐記住係你爭我架! 行完之後去 左我屋企附近食日本定食! 之後上左我屋企一齊諗下報咩科好! 原來我 地要報讀左ＴＩ一年級先, 讀得好先可以直升ＴＣ二年級架喎! 希望今 次會一齊入到, 而且可以一齊升到ＴＣ啦! 預計總共要讀三年時間! 大家 祝褔我地啦! 仲有呀, 今日我去左ＨＭＶ買平ＣＤ呀, 買左５隻我心頭 好, 比較舊O既減價貨, 都只係８５蚊咋! 真係幾抵, 大家愛音樂之人可 以去睇下有咩ＡＲＭ聽!
多謝二契姐送俾我果隻震震豬仔! 我真係好鍾意!

今日訓到兩點正先起身呀, 因為真係好眼訓, 我唔挨得架 嘛! 食完野落左去買水果, 點知去超級市場買水果都俾人呃 喎, 明明話十蚊, 點知打ＢＡＲ ＣＯＤＥ果陣又廿蚊喎, 不過 算啦, 因為果個收銀係暑期工黎O既, 我又唔想佢俾人鬧, 算 啦! 冇下次囉! 不過諗諗不又真係幾唔抵!
好想剪頭髮添!

今朝一早起身去左街市買野呀! 好開心呀, 因為我俾人 讚有禮貌喎, 果個人仲話而家Ｄ後生仔女好少咁好禮貌 喎, 又係O既, 斯斯咁乖咁好禮, 一定會俾人讚架啦! 哈 哈! 夜晚食左一餐好豐富O既晚餐, 都係我煮得好O者, 今 日唔知點解好想讚下自己喎, 唔通有病?
唔知點解我今日成日諗起佢喎!(你地唔識架喇!)

其實今日冇咩特別事發生左, 反而尋晚發果個夢幾好! 我 夢見吳國敬呀, 真係好正呀個夢, 最正o既係個夢境好真實 嘛! 今日係中七放榜o既日子, 我都有好多網友今日放榜 架, 唔知佢地考成點呢? 仲有就係今日升中派位, 我大表 妹係其中一個喇, 不過我都唔知佢派到邊間呀, 聽日打個電話 俾我亞姨先至知! 今晚要返學呀, 見到我尋日成日諗起果個 人, 唔知幾時先識到佢呢? 嘩, 好開心呀! 因為今次ＴＶＢ 網頁有洪天明O既資料呀! 原來佢７月１日生日架喎!
唔知今晚又會發個咩美夢呢?

今朝都好早起左身, 可能人開始老就訓唔得耐啦! 下晝 時間同左我兩個契姐去左唱Ｋ, 雖然遇到個好冇禮貌O既服 務員, 但係的而且確佢O既態度係好有問題! 唱到８點之後 坐車去左尖沙咀行ＨＭＶ, 大家姐送左隻黎瑞恩ＣＤ俾我呀, 真 係好鍾意, 多謝家姐! 行完之後去左文化中心諗住買飛架! 因 為本月２４號有一套我好想睇O既戲上, 不過唔知係咪俾人點 呢, 因為有個人話我知文化中心有得買飛, 不過的確係冇! 所 以我都要再查下先! 今日影左好多相呀, 因為好邪地我地三姊 妹都有帶相機, 真係識左咁耐, 第一次咁齊, 仲要係完全冇事 先講好架喎! 遲Ｄ哂左相睇下有冇Ｄ正相啦, 如果有就俾大家 睇下啦!
希望我表妹派到間好中學啦!

一個平淡o既星期日, 拎左尋晚影完果筒菲林去 哂, 聽日有得喇! 之後去左買左一隻我一直都好想 要O既ＣＤ, 就係我至愛 CRANBERRIES O既 BURY THE HATCHET 喇! 唔 知大家有冇聽過佢地唱歌呢, 呢一隊樂隊係斯斯O既 最愛, 不過唔係人人都接受到佢地O既音樂同埋唱法架! 不 過的確好正! 如果你問我佢地有咩歌值得推介俾大家, 相 信我會俾一個好難令人接受同相信O既答案, 因為我一 定會話俾大家知, 佢地四張大碟裡面O既全部歌都值得推介, 呢 樣係真架! 因為我仲好記得我第一次O係收音機聽到佢地O既 ODE TO MY FAMILY 之後, 我就買哂佢地Ｄ ＣＤ喇, 因為 主音唱得唱在有一種無形O既魅力, 相信鍾意 CRANBERRIES O既 人都會咁覺得! 亦係而家樂壇少有O既音樂, 試問而家Ｄ ＣＤ仲 有邊Ｄ可以好似佢地咁, 全部都好聽? 我相信真係除左佢地真係 冇喇! 返到屋企睇左前幾日錄左O既 MICHAEL JACKSON 好 友演唱會, 完全全感覺到世界巨星果種震撼, 整個演唱會最好睇 O既部份, 當然係 MICHAEL JACKSON 果 PART, 一邊睇一邊喊, 因 為的確佢表達到想世界和平O既意識, 加上佢O既歌, 一班小朋友O既 演出, 的確令到我拍爛手掌, 因為的確好正!
希望今次報學校會入到啦!

因為尋晚實在太累o既關係, 今朝訓到十二點幾先醒, 食 左午餐之後坐地鐵過左中環, 因為我要去ＨＫＮＥＴ拎戲飛, 但 係到左目的地先知道原來上環站落先係最近, 不過算啦, 第 一次去係咁架喇! 今日亦都拎左相, 但係影得都唔係好見得 人, 所以大家又要等下先得喇! 今日真係熱左好多, 出街行 左一陣就成身汗, 呢個暑假真係難過喇! 唔知點解呢幾日好 眼訓呀, 攪到我上網都早左好多! 仲有呀, 尋晚左少少港姐, 不 過冠軍都唔靚O既, 我覺得季軍果個仲靚過佢, 笑又笑得親切 過佢, 但係冠軍果個係熱門, 所以冇計啦!
真係非常非常非常之熱呀!

我尋晚先知原來聽晚要去睇戲呀, 係"天使之城", 由 於大家約左成個幾月架喇! 冇計啦一定要去, 唯有唔返一 晚學啦! 因為大家買哂飛咁, 另外原定星期四同我二契姐 一齊去交聯招表格, 因為佢有工作在身, 所以聽日我一個 人去交啦, 唯有係咁啦! 今日o係屋企冇咩做, 所以睇左 有線電視o既自選影院, 睇左一套叫做"ＧＴＯ之世紀未暑 假", 都幾好笑架! 未睇之前佢話係一集過我先睇架咋, 但 係睇完之後我硬係覺得唔止一集咁架! 如果唔止就慘喇! 因 為我未必會睇, 希望唔係啦!
今朝落一落街就差Ｄ熔左呀!

今朝出奇地好早起左身呀, 因為要去交ＦＯＲＭ, 大 約十點到達交表地點, 排左成大半個鐘先交到表, 交完之 後仲要發現左自己填錯左科添, 好在果個係排左第六個選 擇, 而且都唔會輪到我啦, 就算收左我我都讀到! 之後行 左一陣又一城, 不過真係冇咩睇, 同金鐘廊差唔多, 都係 Ｄ名牌店, 根本都唔會去買, 所以就好快返到屋企喇! 本 來諗住再訓過架, 不過又訓唔到, 所以成個下晝就好悶咁 過左喇! 夜晚本來要返學架, 不過由於我朋友前日先知佢 買左今晚"天使之城"O既飛, 所以冇理由浪費張飛架嘛! 正 因為咁, 我今晚就冇返到學喇! 好在呢一科都係自己睇番Ｄ 野就ＯＫ喇! 夜晚去睇左一套好好睇O既"天使之城", 出奇 地俾我O既感覺非常之好, 呢樣係預料唔到O既, 睇完之後 喬宏叔O既妻子小金子仲同我地一齊分享, 成晚個感覺都好 感人, 因為戲中所講O既野, 正好係現實生活中大家所缺乏 O既, 最ＡＲＭO既一樣野係"大家習慣左唔講自己對人O既 關心, 對人O既愛講出黎, 好似點左啞穴咁", 我聽完之後, 我 O既眼淚不其然咁流左出黎, 的確每一日大家O既身邊都發生 緊, 好多時可能係傳統思想, 覺得心照就可以, 但係愛係咪真 係咁難? "我愛你"係咪真係唔講得出口呢? 相信如果大家可以 衝破自己心理關口的話, 呢一個世界都會溫暖Ｄ, 人同人之間 又會更加好! 我自問唔係一個好O既基督徒, 但係的而且確我心 裡面係有神, 我好希望大家唔好覺得同家人溝通係咁難, 因為 實有好多野唔係必然O既! 仲有呀, 今日睇果陣見到楊羚呀, 佢 真人好靚, 本來好想走過去請佢簽名同埋恭喜佢架! 不過最後都 冇走埋去! 仲有仲有, 大家有冇睇過果個俾貓貓睇O既廣告呀? 我 覺得好得意呀! 大家覺得呢?
一定要珍惜眼前你所擁有O既一切!

今日又再次訓到兩點鐘喇! 我知我自己太累喇! 係個腦清 醒但係個身體好累咁訓, 唔知大家有冇試過咁呢? 本來今日 約左我二契姐交表同埋去玩架, 不過佢有工作在身, 所以今 日都冇咩做, 只係我舅父黎陪下我食飯咁咋! 聽晚要返學喇! 因 為再唔返我又肥架喇! 而今個星期日呢, 我就有機會去睇"中華 英雄", 唔知好唔好睇呢? 聽聞就好高水準製作, 不過都唔係太大 期望, 只希望套戲唔會太差已經好安慰!
今日仲熱過尋日!

今朝七點幾有個人打錯電話喎, 真係俾果個人激 親呀, 有咩理由一早打電話都打錯架? 之後訓到十一 點幾啦, 食左野之後又冇咩做咁, 一直至到夠鐘返學, 返 到學又冇咩做過, 因為上ＬＡＢ, 所以八點幾就返左屋 企喇! 而家又冇咩做, 睇緊ＴＶＢ咁咋! 有洪天明丫嘛! 不 過聽朝要好早好早起身呀, 因為有Ｄ野要攪攪咁啦!
突然好想食薯條添!

今朝七點鐘就要起身喇, 因為有Ｄ事要去做, 好耐都冇試 過咁早起身, 對我黎講係有Ｄ難度! 就係因為咁, 所以攪到我 又有渴睡, 咁早起身原來可以做到好多野架真係! 不過代價就 係六點幾果陣唔知點解訓到成八點幾, 如果唔係呀亞姨打電話 俾我, 我都唔知會訓到幾時添呀! 而家都仲係好眼訓添! 所以 我訓今晚會好早訓!
聽晚去睇＜中華英雄＞呀, 唔知好唔好睇呢!

今日訓到點幾呀又, 因為尋日朝太早起身, 補唔番Ｄ 睡眠時間; 夜晚同左嘉倫仔仔去睇＜中華英雄＞喎, 好 彩張飛係唔洗我地俾錢買架O者, 唔係話唔好睇, 而係 唔值俾咁多錢去睇, 整體故事架構唔夠好! 睇到我地好 亂, 有少少唔知佢做乜咁, 同埋佢地同左好多錢製作果 場決鬥場面, 根本好冇謂咁, 冇情情走上去自由神像度 打, 都唔知為乜, 特技的確係幾好, 不過好誇張囉! 有 一次華英雄竟然跳下跳下咁跳左上月球, 果一刻成戲院 Ｄ人都笑, 因為的確好攪笑! 反而我覺得霆鋒有一段感 情戲做得幾好! 佢喊得好有感情好到呀個FEEL! 整體上 我對呢套戲幾失望, 因為真係冇佢宣傳果種好睇O既感 覺! 不過大家可以留意下佢有一場黃秋生同吳鎮宇決鬥 果一場幾值得睇, Ｄ水整到好靚!
大家唔好抱咁大期望去睇呢套戲!

原本諗住今日開始做功課架! 點知太多野做喇! 又 要掃地又要洗地又落街買野, 又整左o者喱添! 所以又 要聽日先開始到喇! 今日天氣又勁熱呀! 攪到我成個 人都唔知點咁!
聽日我表妹仔又黎同我玩喇!

今日係大日子呀, 係我媽咪生日, 首先祝佢生日快樂! 我亞姨同表弟表 妹今日黎左我屋企玩喎, 都好耐冇試過咁玩喇! 有少少累架, 不過我表弟教 左我玩一個好有趣又有益o既啤牌遊戲, 就係開四隻啤牌出黎, 鬥快將佢地加 喊乘除成為二十四, 其中公仔牌可當作十或零o既, 呢個遊戲好有益架! 因為 可以令到頭腦靈活Ｄ, 又有味, 大家可以試下玩架! 另外呢, 尋日睇網上報 紙, 木村拓哉話香港人冇咩禮貌, 唔會主動講"唔好意思""對唔住"之類呢Ｄ說 話, 今日我成日都諗起呢樣野, 得出左一個結論, 中國人其實係一個幾唔白O既 民族黎架喎, 因為由細到大, 一直都覺得唔輸得, 唔可以認低威咁, 所以久而久 之, 中國人的確係咁, 而日本係一個好有禮貌O既民族, 見佢地講野都成日點頭 等等, 都表示左日本人同中國人係兩個好唔同O既民族, 所以我好明白木村黎香 港果陣香港人俾左呢個印像佢! 因為成長背景根本係兩回事, 更何況香港呢個社 會係好覆雜架, 一樣米養百樣人, 正好道出中國人O既社會狀況!
遲Ｄ會轉ＩＳＰ, 請記住: http://i.am/szeci

今日可算係好嬲o既一日喇! 話說係咁o既, 幾個月前我申請左數碼通 o既長途電話服務, 由於當時係宣傳期, 所以我成功申請就有電話費回贈 俾我o既, 但係o係第一張單要我交錢喎, 咁我就打去服務熱線去問點解冇 回贈, 當時該位服務員話我知係會由第二張單開始回贈, 直至滿左佢所定 果個價錢為止, 冇期限o既! 果然第二張有回贈, 點知前日收到第三張單, 又 要我俾錢喎, 所以我打左去再問多一次, 今次呢位服務員哥哥就話我根本冇 得回贈, 咁經過一番調查之後又話其實係會分三期單回贈, 叫我搵到申請之 後寄俾我果張單之後再打去問, 改番張單Ｄ野啦! 好喇, 今日我搵到張單之 後再一次打去服務熱線, 今次個答案好新鮮, 果位服務員話只會O係第二張單 回贈一次, 大家聽到呢一刻, 有咩感覺呀? 係咪有少少覺得數碼通好亂, 有 少少無能呀? 我亦係咁覺得, 所以我同果個人講 : 我一直以黎問左你地Ｄ服務 員咁多次, 次次Ｄ答案都完全唔一樣, 究竟咩先係真架? 呢一刻我有少少被騙 O既感覺, 你雖則知道, 呢個唔係錢O既問題, 而係你地咁大間公司, 點解我問 咁多次同一個問題, 竟然次次答案都唔同! 係咪玩呀而家? 之後果個服務員就 話佢唔多清楚喎, 不過電腦係咁顯示, 天呀! 好想講粗口囉, 因為我問咁多次, 每 一次該位服務員都係話電腦咁顯示係咁, 大哥呀, 一間數碼通電話服務熱線, 唔 係用同一個 DATABASE 架咩? 玩我呀而家, 真係唔係錢O既問題, 而係的確有被 編O既感覺! 如果有O係數碼通工作O既朋友, 唔該幫我反映一下, 真係好無能呀!
我諗住聽日再問多一次, 睇下佢地仲有咩答案俾我!

今朝好早醒左喇, 因為約左我二契姐嘛! 一點鐘到達約會地點 啦, 好準時架我! 之後去左藝術中心買飛, 係一套實驗電影, 叫 做"夢之旅", 相信會幾好睇! 之後行左去銅鑼灣行下街咁啦, 行 行下落大雨喎, 好彩我二契姐有帶傘o者! 行左一陣再去左旺角行 街, 因為真係冇咩野行, 之後就去左青衣城喇! 因為要探一個朋 友! 再食埋晚飯就返屋企喇! 其實都有少少眼訓架, 不過上陣網 先訓啦!
今日發現到旺角某地方有部掃描機呀!

今日主要節目都係同學習有關o既, 用左五小時去做左三分 一o既功課啦, 唔好以為我蠢要做咁耐喎, 而係呢份工課的確要 寫好多野, 又要睇番以前第二科Ｄ內容, 又要睇番本書先識做, 由 於真係好好好多野要睇番先答到, 睇黎我未來呢幾日都要加倍努 力喇! 因為大把功課黎緊! 至於聽晚我有機會去睇一套香港O既實 驗電影, 名為"夢之旅", 不過等我聽晚睇完先寫感覺啦!
越黎越覺得有部份香港人O既行為好賤格呀!

今朝個鬧鐘唔知點解唔響喎, 好彩唔係一定要早起身o者, 大約一點鐘 起身啦, 食左少少野之後就做功課喇! 用左大約三個鐘就完成左第一份要 交o既功課喇! 真係好開心架, 雖然一定拎唔到高分; 晚上時份, 我同左 二契姐去藝術中心睇左一套實驗電影, 叫做＜夢之旅＞, 其實我地去睇o既 原因, 除左係故事吸引之外, 就係因為個男主角係我地朋友, 所以一定要 捧下場o既, 套戲o既故事係講述女主角o係現實中, 未婚夫突然失左蹤, 而 佢又唔知咩原因失眠左成個星期, 偶然之下, 佢發現到有一個電腦軟件叫 做"夢之旅", 可以幫助人入夢境, 女主角o係夢中發現左真係o既自己, 了 解左自己真正o既諗法, 明白到其實有Ｄ野係自己忘記左, 亦有Ｄ野係自己 知道但係唔肯去相信! 同時間男主角亦有去到"夢之旅", 佢想搵一個女主 角細個果陣幻想O既美好地方, 但係慢慢佢開始分唔清夢境同現實, 亦搵唔 到果個理想地方, 亦感到而家O既人只識對住部電腦自閉, 亦變得自私, 所 以佢好唔鍾意呢個現實世界, 所以佢撰擇O係旅程中自殺, 亦係因為咁樣, 現 實中O既佢昏迷, 其中男主角O係旅程之中得知原來女主角已經唔再愛佢, 所 以亦開始唔去搵女主角, O係佢自殺之前, 佢問左一個問題"究竟人生存係為 左Ｄ乜呢?", 呢個問題大家有冇問過呀? 我諗大部份O既你都會諗過呢個問題, 男 主角完全諗唔到生存係為左乜, 所以情願夢裡面死, 不過故事尾都冇講到個男主 角後來點, 導演話呢個其實唔重要, 重要O既係要帶出女主角O係呢個"夢之 旅"裡面, 搵番真正O既自己, 雖然改變唔到現實世界, 但係夢裡面係可以受 控制O既; 睇完之後的確俾到好多啟發我, 有少少想拍番套自己O既實驗電影 添! 因為的確幾有挑戰性同埋可以表達到自己想帶出O既野俾人知! 等我而家 開始儲定Ｄ錢先, 有朝一日可以達成O既! 睇完之後我問左自己如果真係有呢 個軟件, 我會唔會去試? 我一定會試, 因為現實太殘酷喇, 有好多野變化 緊, 仲係越變越醜, 神創造果個美好O既世界已經變左喇! 唯有O係自己可以 控制O既夢境裡面搵番美好O既世界, 同埋我亦好想好似女主角咁, 了解自己 多Ｄ, 更何況如果真係有O既話, 係高科技黎架喎! 梗係要試啦! 係咪?!
如果係你, 你又會唔會試下呢?

今日就勁正喇! 一次過睇哂十二集＜午夜凶鈴＞劇集, 原來 我睇呢套同而家o係有線電視播果套係唔同架喎! 不過都好好睇 呀, 亞龍司好型呀! 故事都好感人, 睇完之後我明白到而家o既 人變得好自私自利, 為左自己唔會因咀咒而死, 好自私咁將盒帶 COPY俾人睇, 其中有一句講得好好, "愛一定會戰勝仇恨", 所以 大家要記住要有"愛"呀, 呢個世界先會美好! 另外我睇左有線電 視首播o既＜基督 2000＞節目, 好感人呀, 其中播左少少＜天使 之城＞o既片段, 真係好有意思! 希望大家有機會都睇下啦!
突然好想食牛扒添!

今日都做左好多野喎, 一早起身落街買左好多野返黎食呀, 因 為屋企都冇哂野煮囉, 之後又去左超級市場買野, 真係好重呀! 一 陣都要去下佢個網頁睇下有冇網上超市包送貨先! 之後我一日氣睇 左五集＜沉睡的森林＞, 有我最愛o既木村拓哉嘛! 真係幾好睇架! 但 係中山美穗真係舊左Ｄ, 因為我好細個果陣已經睇佢架喇! 梗係覺得 佢地兩個合作怪怪地咁! 不過我一陣將會再睇多幾集先! 應該好好睇!
天文台話又會打風喎!

今日終於都睇哂成套＜沉睡的森林＞喇! 好好睇呀! 因為有 木村嘛! 佢做咩都好睇架啦, 不過睇完之後好唔明白佢個結局究 竟係點? 木村拓哉係咪真係同中山美穗一齊呢? 但係佢地算叫係兩 姊弟喎, 點可以架? 大家如果知個結局想表達Ｄ咩o既話, 麻煩大 家話一話我知啦! 另外今日食左餐好豐富O既晚餐, 到而家都仲有少 少頂住個胃咁! 不過食飽左又想睡一睡喇! 相信我一陣上網睇完報 紙, 我就會訓一陣先, 再睇＜反黑先鋒＞架喇!
一個好平淡O既三號風球!

本來諗住今日返學之前拎Ｄ野去俾我姑姐架! 點知想出門口之 時我姑姐打黎約我聽日飲茶喎! 所以咪可以晏Ｄ先出門口返學 囉! 今晚有月蝕睇呀, 放學果一刻我見到個月好圓架! 如果我知今 晚係月蝕O既話, 我一定企O係度睇架! 行緊去坐車果陣見到有人拍 戲呀! Ｄ燈真係要好光好光先拍到架! 好耐都冇睇過呢Ｄ燈喇! 我 今年好想曬黑Ｄ呀, 本來諗過去曬燈架! 但係睇完＜午夜凶鈴＞日 劇版之後, 好驚曬燈會令到身體內潛在O既病毒會發出黎呀! 真係好 驚架嘛! 所以大家就算係曬黑都係去曬真O既太陽會好好多! 最緊要 梗係要做足防曬傷O既預備啦!
如果有一日我曬黑左, 一定話俾大家知!

今朝九點幾醒左喇! 下晝去左同我姑姐佢地飲茶, 大約五點鐘返到屋企啦! 之後執下屋咁啦, 睇多兩集日劇＜邂逅＞啦, 不過有少少悶呀套野! 希望跟住落去好睇Ｄ啦! 夜晚食左少少野咋! 做左功課啦, 因為聽晚要分組做野! 所以就做左一Ｄ預備工作喇! 而家就等緊睇＜反黑先鋒＞, 今晚同聽晚都做兩集呀, 好正呀, 因為有洪天明嘛!
今日真係熱到我差Ｄ熔!

今日都好早起左身喇, 一早落左超級市場買野! 今日我先發覺下晝ＴＶＢ重播番＜美味天王＞喎! 睇番又真係幾好笑喎, 原來果陣都有楊千嬅做架喎! 不過得好少戲份! 夜晚又要返學喇! 其實聽日都要返去做功課, 因為分組做, 所以就要返去傾下點樣做! 希望考試果日交到啦! 聽晚會出去食晚飯! 不過聽日日記先再講啦!
今日其實有少少開心!

今朝都幾早起左身, 之後落左去買麥當勞返屋企食, 因為好耐唔食過喇! 之後去左尖沙咀, 因為約左兩個夜校同學做功課! 點知架衰巴士又大塞車喎! 攪到我遲左成四個字! 好在佢地仲等我o者! 之後去傾左大約份功課要做Ｄ咩啦! 之後陪左同學去買書! 再坐左ＭＴＲ去我爺爺屋企食飯! 好豐富呀! 不過我九點鐘都返左屋企喇! 今日收到新果間ＩＳＰO既戶口資料喇! 而呢個網頁我諗住搬去ＨＫ.ＣＯＭ, 所以大家記住 http://i.am/szeci 喇!
尋晚睇果套日劇有石田壹成呀!