私日記


背景音樂 : 安全感


想睇下我邊日O既私日記呀 ??
1/11/99
2/11/99
3/11/99
4/11/99
5/11/99
6/11/99
7/11/99
8/11/99
9/11/99
10/11/99
11/11/99
12/11/99
13/11/99
14/11/99
15/11/99
16/11/99
17/11/99
18/11/99
19/11/99
20/11/99
21/11/99
22/11/99
23/11/99
24/11/99
25/11/99
26/11/99
27/11/99
28/11/99
29/11/99
30/11/99


1/11/99

話咁易又過左一個月喇! 日子真係過得勁快, 唔知大家覺唔覺得呢? 我今日係全休息喎, 本來諗住睇下書, 預備下有咩可以 PRESENT, 不過真係唔明有咩講呢, 連讀書都未教, 睇又睇唔明, 又冇際經驗, 都唔知點好, 最慘係同組果個新同學, 都唔知佢咁緊張仲咩? 攪到我今日都好驚咁, 唔知點算好, 係佢帶俾我地O既無形壓力! 大約五點幾, 我個朋友打俾我, 傾左一陣就話想約出黎行街喎, 不過終於都約聽晚先出, 因為佢個妹聽日要測驗, 佢要幫佢個溫書嘛, 咪約聽日囉, 我冇咩所謂O既! 之後又係勁聽太極同 SAMMI O既CD啦, 勁正, 冇計! 今日我翻睇番<表姐你好野 3 之大人駕到>, 點解? 因為有亞敬份客串囉, 先頭諗住睇番<藍江傳>架, 但係我唔見左盒帶喎, 真係邪! 今晚終於有機會睇朱慧珊佢地報新聞, 發覺唔係太好睇, 硬係覺得佢地太演員 FEEL, 不過是但啦, 係我控制範圍之外! 仲有呀, 香港決定左起"迪士尼"喇, 大家有咩感覺呀? 我有少少唔開心, 因為一諗到D香港人諗得太美好, 況且呢個"迪士尼"咪又係俾D內地人落黎玩, 咪即係第二個"世界之窗", 真係冇咩分別, 不過我可以肯定, 到時香港會比而家更加 DIRTY!!!
聽日會得 18 度咋, 正呀!!!

返回


2/11/99

今日係訓到十一點幾啦, 因為住我隔離果家人一早開局打牌! 真係唔明點解D人咁鍾意一早打牌, 又唔係話太好玩, 之後又自己煮左一餐好正O既午餐啦, 有時覺得自己幾叻架, 起碼唔會餓死先啦! 之後我終於睇書喇, 因為費事聽晚返到學冇野發表, 其實個 PRESENTATION 真係唔會做得好囉, 講真啦, 成組有四個人, 我只係同其中一個合作過, 係好明白對方做法果隻, 而另外兩個組員, 可以話差D連個名都唔記得呀, 同埋大家個目標都唔同, 試問咁又點會做好呢? 不過要發生O既始終都要發生, 唯有面對現實啦, 最慘係唔係止做 PRESENTATION 呢, 仲有兩份 PAPER WORK 要一齊做! 之後我就出左街喇, 因為尋日約左果個朋友出去行下嘛! 六點鐘開始行, 由尖沙咀行到去旺角, 我都冇買到野呀, 睇唔 ARM 嘛! 晚餐係家鄉雞呀, 幾貴呀都, 不過就好滿足! 跟住都有去飲沙冰架, 我太鍾意飲喇! 我大約十點半返到屋企啦, 之後嘉倫仔仔打俾我, 話個 ICQ 又 CONNECT 唔到喎, 咁我就下啦, 點知真係喎, 我就用手電打俾佢, 根住傾左成四十五分鐘, 因為手電冇電, 之後我就 CUT 左個 INTERNET 用屋企電話打俾佢傾過, 一直傾到成十二點九先收線, 都傾左好多野呀, 可能我勁悶啦, 難得有人同我傾計嘛! 相信經過今日之後, 我今個月O既電話費好抵喇, 一定會用哂果 100 分鐘啦!
可能我下星期會同D朋友去D呀!!!

返回


3/11/99

今朝凍左好多呀, 所以凍醒左喎, 雖然我唔怕凍, 不過訓訓下就怕D架喇! 起身之後食左好多好多野, 因為好肚餓呀, 所以食得好開心呀, 仲飲左支綠茶添, 每一次飲綠茶都會諗起亞敬同埋 SAMMI 架, 點解? 大家自己諗下先啦! 之後再睇左一陣書, 大約五點半就落到車站喇, 點知送車尾喎, 心諗五點九會有一班車, 因為以往果幾個月都係好準時, 等呀等呀, 等到五點九都冇車喎, 再等呀等呀, 最後成六點一先有班車喎, 嚇死我呀, 因為我返六點半, 落左車仲要行五分鐘先到學校, 好彩唔係好塞車, 我六點五到左課室, 今次香港個 TUTOR 係女仔黎架, 我諗佢左約二十五歲啦, 不過佢好叻架喎, 又教 HKU 又教我地呢度, 仲幾靚女架添, 型格有少少似陳慧珊, 佢D英文都好掂架喎, 梗係啦, 人地教英文架喎; 一口氣上左兩個幾鐘頭堂, 做埋份小功課先有得 BREAK 喎, 之後又再上多大半個鐘頭堂, 我同我D組員就傾下有咩要做, 仲唔係傾 PRESENT D野喎, 因為下星期三要交果份 GROUP REPORT O既 OUTLINES , 不過都冇傾到D咩, 因為冇資料傾! 今日雖然都見到佢, 但係完全冇接觸呀, 望都冇望到佢, 因為我好驚我O既弱點, 就係會好易投入一段感情, 或愛上一個人, 仲要係不顧一切果隻, 所以我要開始控制自己, 因為我唔想我又中招, 受害O既始終係自己! 正如我朋友所講, 目前為止我冇野可以做, 只有等! 可能係等佢過黎識我, 亦可能係等我真命天子出現, 總之就係等! 不過我知道佢日頭係一個學生, 讀咩就唔知喇! 不過我知佢幸褔過我, 日頭有書讀喎, 我都唔知幾想呀!
今日係KAZUO既生日, 祝佢生日快樂之外, 亦希望佢O既傷快D好番啦!

返回


4/11/99

今日一早落左去超級市場買野, 又好快咁用左幾廿蚊喇! 之後自己煮左一餐超正午餐啦, 之後都係冇咩做過, 係有個朋友打黎傾左一陣, 因為本來今晚約去唱K架, 不過亦因為太遲未約好時間, 有一個人另外約左人去街, 所以改左下星期二先再去唱囉! 真係好開心架, 我勁鍾意唱K架嘛! 夜晚我舅父就黎左同我食飯, 好多野食架, 真係唔肥就假喇! 本來我想溫下書咁, 不過真係好想俾自己休息一下!
今日天氣熱左少少O者!

返回


5/11/99

今朝訓到好夠呀, 因為訓到自己醒呀, 所以係好夠訓囉, 之後我都有煮飯呀, 鍾意煮飯嘛! 之後就勁睇電視, 到左五點半就落街等巴士返學喇, 今日五點九就真係好準時咁有班車, 不過好慘呀, 因為六點一就到左學校喇, 由於果間係中學黎o既, 班房D中學生都未走, 所以唔入得去坐, 所以我去左洗手間企下, 洗下手咁, 到左六點四就返番去班房喇! 唔知係好彩定唔好彩, 課室裡面只係有佢, 同埋一個中學生, 我入左去坐O既時候, 個中學生就走左喇! 換句話講, 課室只係得我同佢, 氣氛十分尷尬, 完全冇講過野, 我只係自己睇番下一份功課要做D咩, 佢就唔知做緊咩咁, 有時我覺得佢未必係想識我架, 因為如果真係想識O既話, 今日一定係一個大好機會! 但係我同佢都錯過左呢個大好機會! 之後慢慢多人返, 我有我同D同學傾計, 佢有佢同D同學傾計, 一口氣上左一個多鐘頭堂, 之後 MISS 同我地分組做討論, 我就同左三個好好O既人一組, 雖然同左班成年幾兩年, 不過今日都可以話係一大突破咁講野, 仲要用英文討論喎! 幾大挑戰架, 不過真係討論得幾開心, 其中一個係佢個朋友黎架, 都冇咩點丫, 但係我感覺到佢有留意下我咁, 討論果陣有一件趣事呀, 我地就假設自己係一間 HOTEL 工作去作一D決定咁啦, 點知佢個朋友有兩次都講 HOSPITAL 喎, 令到我地好開心呀, 因為佢太順口咁講! 放左學之後, 我專登唔望佢就出左課室門口, 我唔知咁做 ARM 唔 ARM , 但係相信會好過一廂情願, 不過我 FEEL 到佢同佢朋友講過我, ANYWAY 算啦, 冇咩可以做到架! 放左學仲要同組員們去左麥記傾 REPORT 做D咩, 一直都冇咩野, 幾順利咁, 不過我最興O既係, 我竟然聽到果位新黎O既組員講左一句唔係人講O既說話, 話說我地一路傾傾傾啦, 發覺傾得差唔多想走O既時候, 佢就問洗唔洗週末約出黎再傾, 由於大家手頭上O既野都夠做野, 而且其他組員要返工, 好難約時間, 咁其中一個人就話: "我驚好難就到時喎! 不如而家傾埋佢, 下次返學再傾過啦!", 其實呢個提議係OKO既, 因為D野都唔係太趕要做哂, 點知呢個新組員即刻講一句: "開門見山喇! 係咪唔想約出黎先? 如果係O既咪出聲囉!", 大哥呀, 你有冇腦架? 咁冇人性O既說話你都講得出, 我要寫一個"服"字! 大家評下理喇, 有咩理由會咁同人講野架? 果一刻我完全想串佢同埋鬧佢, 因為太冇人性, 又冇用腦諗過野, 不過我俾面另外兩個組員, 所以我話: "唔係咁講, 而係可能難約到時間!", 算係咁啦掛, 如果係我朋友咁講, 我講左粗口好耐啦! 果一刻如果我唔係俾面佢地, 我一定會講: "係呀, 係唔想出呀, 咁又點呀? 因為你樣衰, 你好煩, 見多你一眼都作嘔, 唔該你唔好再同我地一組, 我絕對唔歡迎你!", 但係我俾面大家, 冇攪串個 PARTY ! 但係就憑佢呢一句說話, 我清楚呢個係一個點O既人!
今日廿五度呀, 熱死人呀!!

返回


6/11/99

今朝一早我朋友打電話黎約我去行街喎, 不過我太多功課要做, 所以推左! 之後無幾耐, 電話又響喎, 係一個女人黎o既, 佢竟然問我係邊個喎, 咁我又問佢係邊個啦, 點知都唔知咩家教黎架, 唔鬼出聲不特止, 仲要 HOLD 住我條線喎, 我就唔理佢收左線啦, 因為三分鐘後就會自動 CUT 佢線, 所以話而家D人真係奇怪! 起左身食完野之後, 我就開始做功課喇, 基本上係做左份 GROUP REPORT 我果 PART 先, 費事果位新同學咁煩啦! 做左大約兩個鐘頭, 大致上我果 PART O既 OUTLINE 就出左黎喇! 之後當然仲要做自己份功課啦, 唔通真係俾哂D時間去 GROUP 果份咩! 個人果份功課要做 5 PARTS 架,我今日做左第一 PART O既大部份, 只係差未打入電腦O者, 諗住聽日先打啦!
我發覺我個人好似健康左咁喎!

返回


7/11/99

今朝一早就俾附近間中學o既畢業禮嘈醒左, 因為今朝一早就播中國國歌, 又校長演講咁, 總之勁嘈啦! 之後都冇咩做呀, 又係o係屋企, 睇左一個好新o既 CRANBERRIES O既專訪, 最衰係重播黎O既, 因為個節目有佢地D野送, 不過過哂期啦, 不過算啦, 我都睇到一個好正O既訪問! 之後又係做功課, 都完成左自己果份O既 5 份之 4 , 仲差少少就完成喇, 夜晚搵我個朋友, 本來想約佢地星期二唱K, 不過其中一個話可能唔得喎, 攪到我都唔知點咁, 我到而家都仲等緊佢地答覆! 上網 CHECK EMAIL 時, 我發覺我做 GROUP WORK 果份野個方向唔係好 ARM 喎, 唉, 攪到我仲用左成幾粒去做添, 唯有再仔細咁諗下係點做先得喇! O係網上我睇左某報紙O既娛樂版喎, 話影到亞傑同個女仔一齊行街, 仲話佢地拍拖喎, 不過亞傑話唔係, 只係朋友一個, 同行仲有個女仔O既男友, 之後個記者又話拍拖可以粉碎外間話亞傑同性戀O既聞喎, 大佬呀, 冇公開自己戀情唔代表同性戀, 更何況就算真係同性戀咁又點O者? 最緊要佢開心嘛, 呢D係人地私事, 關大家咩事呢?
究竟星期二去唔去到唱K呢?

返回


8/11/99

今日勁早醒左呀, 都唔知係咪隔離屋太嘈, 成晚o係度打牌, 都唔明點解可以打咁多晚通宵都仲打到; 之後都係煮下野食咁啦, 之後都諗左一陣果份功課究竟要做D咩, 不過仲未開始改住, 星期三返學再問下先做, 大約一點果陣, 我睇左套西片, 叫做<天眼追兇>, 好好睇喎, 不過有D地方就唔係明白, 至於我點解會睇呢? 其實呢套戲係拎過唔知咩獎架, 咁 ARM 有線自選影院又做, 仲要係難得其他台所有節目都唔好睇, 所以咪睇囉, 果然唔差O既製作! 之後睇左套幾好睇O既卡通喎, 係亞視O既<石器星君>, 再之後睇左無線果套<蠟筆小王國>, 都幾好笑呀, 睇完之後就訓左一陣, 唔知係咪今朝太早醒, 訓唔夠呢? 六點幾起身食野, 食完野就上網喇! 所以今日冇出到街!
點解天氣又熱左咁多架?

返回


9/11/99

今朝個電話都未停過咁響, 主要係D精神有問題O既人玩電話, 都係同一個人打黎, 講埋D四級野, 其實今日都唔係第一次收到呢D電話架喇, 好奇怪, 我開始懷擬係識我O既人做O既, 因為如果係玩電話O既, 冇理由次次都係差唔多時間打黎, 都係同一個人喎, 最衰我冇來電顯示啦, 不過我原諒佢, 因為算啦, 無謂鬧佢啦, 我極唔想係我識O既人做, 因為如果係的話, 我真係唔知我會點對待果位朋友; 下午落左街租碟, 租左隻前排好流行O既<催眠>, 我租呢套片並唔係完全因為流行, 而係冇第二套戲值得我去睇, 租完碟再去左麥記買左個包夜晚食呀, 再去左超級市場買左少少野, 就咁又用左成五十蚊喇, 我要錢呀, 有冇工請我做呀? 返左屋企第一件事就係睇碟喇, 嘩! 真係估唔到咁得人驚架套戲, 真係好驚呀, 可能講O既野唔係鬼, 而係冇可避免O既<催眠>, 多年前我聽過美國某薯片廣告就落左一D類似O既訊息O係個廣告背後, 第人睇左個廣告就會影響到佢O既潛意識去買果隻薯片, 果然真係好多人走去買, 你話幾得人驚呢? 片中亦有講過呢一樣野, 好可能唔知幾時俾人催眠左, 等到某一D信號時, 就會控制左我地去做一D野, 而自己係完全唔知架喎! 我覺得會有咁O既機會, 再唔係睇廣告呀, 電視收音機呀咁, 落左呢D信號, 其實真係有可能發生, 世事無奇不有嘛! 我好欣賞呢套片O既拍攝手法, 真係好正, 攪到我好投入, 有幾個鏡頭嚇到我嗌左出黎, 好彩屋企得我一個O者, 如果唔係一定嚇親D屋企人呀, 同埋女主角<菅野美穗>O既演出, 真係好好, 因為我一邊睇一邊毛管都楝埋, 片中佢要演一個有性格分裂O既人, 足足要分裂做 4 個角色, 真係難演! 尋晚六十分打電話俾我, 本來今晚去唱K嘛, 點知其中一個朋友唔得閒, 所以本來約時間O既電話, 就變左傾計喇, 由十一點傾到成十二點八先收線, 傾左勁多野, 可能太耐冇傾計啦!!! 仲有呀, 尋晚睇左<60 MINUTES>, 訪問左 PINUS 漫畫O既作者, 好佩服佢架, 因為 PINUS 漫畫, 由故事到畫都係佢自己一個人做, 因為佢話 PINUS 中個個人物都係佢自己O既影子, 而故事亦係佢自己身邊所發生O既事, 而我自己都係由細睇到大架, 果陣有睇果D漫畫架, 而我最鍾意人物就係 LINUS 喇, 果個成日拎住條毛巾但係又好有學問果個呢, 我覺得佢好可愛, 所以咁愛佢囉!

希望快D去唱K啦!

返回


10/11/99

今朝九點幾就醒左喇, 之後煮野食, 跟住係打左一陣機啦, 不過都幾悶架, 唔想做功課住, 因為好想今晚上堂先再去確定自己要做D咩, 果然經過今晚開小組會議時, 我所做O既野完全同之前講果D唔同, 不過都發生左一件幾攪笑O既事, 唔知係咪天意呢! 話說講完哂 LECTURE 時, MISS 俾個一個練習我地做, 就係每人派左一張某D書O既內容影印本, 而全班共有二十多張, 而全部係可以組合到四本書O既內容, 我地就要搵同自己同一本書O既另外三個人, 再去寫 REFERANCE , 唔知係咪天意(定係人為?), 竟然O係找尋同伴當中, 當我同個朋友睇緊佢果張係邊組時, 某人突然O係我左手邊出現, 問我佢果張係邊度, 果一刻我真係嚇親喎, 因為估唔到嘛, 所以本能反應係向右彈左一彈! 之後距離都幾近架, 差少少掂到! 仲要好巧合地我同佢一樣係同一組, 但係我同佢都冇參與到寫果一 PART , 不過好攪笑佢有幾次企我隔離, 而我留意唔到, 所以我最少踩到佢三次, 真唔好意思喇! 今日都對話到幾句咁大把o既, 唔知呢D係咪神俾我O既提示呢?
星期五 MID-TERM TEST 添!

返回


11/11/99

今朝一起身就落左去街市買野喇, 都唔知點解突然咁想自己煮飯食! 攪完一大輪先有餐好o既食, 我諗值得掛! 之後上網 CHECK E-MAIL , 因為我等緊我個同學 SEND D資料俾我做 GROUP REPORT , 不過都未收到, 所以做唔到住, 所以就溫書喇, 因為聽晚 TEST 呀, 話深唔深, 話淺唔淺咁啦, 要 TEST 番D中學野, GRAMMER 果D呢! 溫左兩個幾鐘, 總算OK啦, 相信英文呢家野難唔到我O既! 成日都冇咩睇過電視, 因為而家果D劇集簡直不知所謂, 可能係我接受唔到啦, 無線果D又係咁, 亞視果D都係咁, 無線就做埋D老土野, 亞視成日都"格格", 一係就又係老土野, 我細個睇果D野而家可以睇番哂! 只係D演員唔同左O者, 所以好難講話個社會要進步, 每日接觸O既電視節目都咁咯, 進咩鬼步丫, 我覺得電視台要認真諗下!
太極唱<都是你的錯>正過 KELLY 勁多!!

返回


12/11/99

今朝都好早醒左喇, 之後係溫書囉, 因為今晚要測驗, 唔溫唔得, 最慘係英文呢家野冇得溫, 我唯有溫D以前O既 LECTURE NOTES 啦, 都冇咩可以溫喇! 五點半出門口返學, 真係 ARMARM 好等班車, 勁早返到呀我, 我返到去只有 MISS O係度咋, 我返到去都係溫書啦, 唔溫書有咩做喎, 唔通同 MISS 傾計咩, 今晚O既課程都冇咩問題, 測驗都識做, 因為D問題係冇標準答案架! 大部份係以前學過O既, 所以我應該會合格O既! 不過始終最慘O既係見佢, 堂堂見住佢, 但係又未正式認識, 你話幾咁慘呢? 點解會咁架!!! 放學之後好攪笑咁竟然可以同左幾個平時冇咩兩句O既同學傾計, 主要係傾下搵工呀, 測驗呀果D問題, 唯獨是冇同佢果班傾, 因為佢地行得好慢! 算啦, 相信有朝一日我地會正面交談O既! 聽朝約左個組員拎D野做 GROUP REPORT, 拎完之後我會去我亞姨屋企幫佢整D野, 最緊要係借佢個 PRINTER 我 PRINT 功課, 因為我部 PRINTER 唔知點解仲係 PRINT 唔到彩色!
我好鍾意 SAMMI 果首<不可多得>, 有機會聽下!!

返回


13/11/99

今朝七點幾就起左身喇, 一起身就開左電視睇新聞, 但係太多唔開心o既新聞喇, 所以大清早個心情有所影響, 其實咁早起身都係因為約左個夜校同學拎D野做功課, 拎完野之後就坐車去屯門我亞姨屋企喇! 未到十一點我就到左喇! 算係早啦掛! 入去坐左一陣, 之後就幫我亞姨整佢部電腦喇! 其實都係好簡單咁安番D軟件咁, 之後諗住 PRINT 我份功課啦, 我真係唔知我係好彩定唔好彩, 佢部 PRINTER 竟然冇黑色墨喎, 唉, 天呀, 你可唔可以俾我平平淡淡咁過日子呀? 攪到我即刻週圍去睇下邊度有得買, 真係"呢HAIR"喇! 好彩都攪到, PRINT 左喇終於, 都冇白費我心機, 份功課真係做得好喇! 不過我聽日成日仲要為份 GROUP REPORT 而努力, 我諗可能要賣力添呀, 冇計啦, 成組人O既成果都O係我地手上喇! 夜晚十點半到就返到屋企喇! 本來想今晚就開始做功課架, 不過真係好辛苦呀, 想訓醒先做, 不過一定會聽日完成, 點死都死到出黎! 有個咁唔 ARM KEY O既新組員, 真係冇計, 有排對住佢, 細胞都死多幾個呀!
D空氣真係差, 因為我出左街成日, 我對眼好辛苦呀!

返回


14/11/99

今日一直訓到三點正呀, 原因係因為尋晚寫完日記之後, 我竟然放心不下咁做果份 GROUP REPORT 喎, 一直由十一點做到兩點幾呀, 一直未停過, 終於叫做完成左我果 PART 啦! 做得 ARM 掛, 我都唔知喎, 寫完就算架喇! 所以用盡哂所有精神去做, 尋晚一野就訓到今日下晝三點喇, 所以唔挨得就係咁解! 都唔知幾耐未試過因為做功課而挨夜! 今日一起身就食左幾塊餅, 之後落左去諗住睇下有咩買, 點知空手而回喎, 咩都買唔到, 之後我玩左一陣電腦啦, 再好難得咁煲左煲涼茶, 因為天氣轉, 我D皮膚又因為熱氣而差左少少, 所以要煲下涼茶飲番幾日先OK, 冇計啦, 冇亞媽D湯水嘛! 夜晚自己又煲左碗粥食, 因為唔想煮飯又唔想食麵, 咪食粥囉, 清下腸胃嘛! 尋晚<真情>終於大結局喇, 我大大話話都等左呢一日成四年幾喇! 因為以往都係做D好開心O既劇, 好似<卡拉屋企>咁, 所以<真情>真係好難頂(我個人認為難以接受)! 今日我聽到一首幾好聽O既歌, 就係楊千O既第一隻國語碟O既主打歌<微笑>, 真係幾好聽架千唱國語歌, 大家有機會真係要聽下! 另外我有樣野覺得幾心痛架, 就係我表弟喇! 佢好似幾唔識諗咁, 我都唔知點解佢變成咁, 同家人O既關係完全失控, 我好想佢可以放開自己, 唔好咁執著啦, 亦好希望大家O既關係真係會改善, 因為好似而家咁, 真係唔好!
我得閒都要學下煲湯先!!

返回


15/11/99

今朝一早起身本來心情非常之好, 點知痴哂線咁收到果位新同學o既電話, 話搵唔到第二個組員叫我搵喎, 又叫我 SEND 我做左果份俾佢睇, 總之就煩到你嘔啦! 大佬呀, 你搵佢唔到我都冇計架, 係咪先? 咁都算喇, 之後我到左我亞姨屋企, 佢又打俾我(因為我將我屋企電話飛左去我手提), 又話仲未搵到果個女仔, 又叫我搵喎, 痴線架? 唔識聽中文呀而家? 我講左唔止一次我都搵佢唔到, 語氣又唔好喎, 講真我不嬲係人地用咩語氣同我講野我就用番咩語氣, 講果個電話講到我氣都頂埋, 直情想鬧佢啦, 咁大個人都唔用腦諗野O既! 咁都算喇, 夜晚我坐緊車果陣, 佢又再一次打俾我, 又係話搵唔到另外兩個組員, 我果一刻開始懷擬佢唔識聽中文, 我講都講到自己煩哂喇, 你估我玩緊你咩? 我真係唔知, 之後佢就有少少嬲咁講: "講真丫, 如果佢真係做唔掂O既開聲囉, 我地三個做埋佢又好, 點都好, 做唔掂出句聲囉, 唔通四個人攬住一齊死咩!", O係呢一刻我開始發覺佢好過份, 我真係忍唔到佢D咁O既性格, 所以我講所一句: "冇所謂架喎, 佢做完份野就自然會浦頭架啦, 你而家咁同我講都冇用架! 我只能夠講我所知佢地好忙O既, 會好夜先返到屋企O既, 佢地都有佢地O既工作架嘛!", 心裡面真係好想講粗口鬧佢(唔好意思, 斯斯真係好憎呢類人), 我最嬲就係佢講咩"攬住一齊死", 無 LALA 死咩呀死? 係死都唔攬住你一齊死啦, 貪你副尊容撈飯貓都唔食咩? 仲話係基督徒喎, 講真, 講D野都唔經大腦, 一組人一齊去完成一D野, 要亙相信任, 佢就攪到我地好似阻住佢咁, 咩都要聽佢講, 佢D POINTS 又唔好喎, 俾人 REJECT 又唔, 要爭持到底, 你老兄咁鬼大個人, 講D野連小朋友都不如, 佢再係咁落去, 我真係會爆發架!
我今日好感謝神, 因為佢聽我禱告, 改變左我表弟!

返回


16/11/99

今日訓到十一點幾咋, 因為隔離又開戰三十六圈, 真係不要寫個"服"字俾佢地, 有咩可能日日夜夜係咁打, 都仲係咁精神, 之後落左街買野喎, 原因係尋日拎左部電視遊戲機番黎, 係好舊果隻紅白機, 但係好好玩架嘛, 不過就拎漏左個火牛, 唯有落街買個啦, 買左個返到黎試機, 係玩到o既, 不過越諗越唔抵, 我亞姨有果個火牛, 我唔洗用幾廿蚊買多個架喎, 遲幾日入去拎咪得囉, 我玩少呢幾日又唔會死O既, 所以就拎番落去退錢喇, 我對果個店員講左個大話, 話個火牛唔 ARM 用, 攪到部機過熱, 佢半懷疑狀態咁退番錢俾我, 真係唔好意思喇! 因為我知佢間野好少人會幫襯, 我今日運左吉添! 成日都冇約人呀, 因為唔想出街, 玩左一陣電腦 GAME 啦, 不過眼都痛埋, 真係覺得有少少犯賤添!
聽晚返學喇, 又要面對果個唔識中文O既組員, 唉~~~~!

返回


17/11/99

今朝做左好多野呀今日, 除左食野之外, 仲有睇電視啦, 玩 GAME 啦, 執野等等, 所以幾充實O既一日, 夜晚返學果陣都冇咩特別囉! 不過我懷疑緊一樣野, 就係佢可能有女朋友, 因為我見佢今日好多電話搵佢呀, 我同自己講唔好咁多心, 就算佢真係有女朋友都唔奇架, 關我咩事喎, 但係我會日個心忐忑不安咁, 真係唔得佢死呀! 好憎自己, 唔知點解自己硬係咁執著, 攪到我真係好好好憎自己! 點解要咁架!!! 個腦成日唱住一首歌"我是不是該安靜的走開? 還是該在這裡等待? 等你明白我給你的愛, 永遠都不能走開! ...", 你話死唔死丫, 自己窒自己, 真係好煩架, 因為我真係唔知自己想點, 想識佢, 但係我又唔主動, 佢又唔主動, 點算? 十二點幾仲發生左一件邪事, 話說我想打電話俾我個朋友約聽晚去街, 點知響左好鬼耐佢先聽喎, 問佢仲咩咁耐先聽電話啦, 原來佢話佢打緊電話俾我, 但係唔通, 正睇緊係咪打錯電話, 真係夾時間都冇咁 ARM 呀, 我諗係我拎起電話想打果一刻佢打黎囉, 真係午夜邪事!!!
聽晚約左幾個朋友去玩呀!

返回


18/11/99

今朝十點幾就醒左喇, 唔知點解呀, 可能附近個地盤開工啦, 所以俾佢嘈醒左囉, 之後都係食野同執屋, 之後就打機喇, 都有上網 SEND EMAIL 俾D組員架, 我都算係咁啦, 唔好話我冇盡力喇! 到左六點幾我其中一個朋友就黎左我屋企, 因為佢住屯門, 費事放左學返完屋企又再出黎, 所以黎我度先, 我地成八點四先出門口, 因為約左九點O係灣仔地鐵站等, 再去左食上海野, 基本上唔好食, 因為我由細到大都食慣左上海野, 今晚果D完全唔掂! 之後再會合其他人一齊去左灣仔某一間 DISCO , 其實正確黎講我今次係第一次落D咋, 上次都去過呢間D, 但係果次係 X'MAS BALL , 唔同O既! 玩左唔係好耐, 因為要趕尾班地鐵呀, 好彩我坐果班就真係最後一班車喎, 差唔多十二點九返到屋企啦, 不過呢, 我由食完飯果一刻到而家都勁胃痛喎, 唔知係咪D野食唔乾淨呢, 死啦, 唔好中毒呀, 其實今日都有奇遇架, 可能今晚化左裝, 我坐車返屋企果陣都幾多靚仔望我架! 哈哈, 不過冇我份O既! 其實講真一句, 我今日時不時都諗起佢, 好可能我對佢O既好感已經有升冇跌, 真係要唱一句: "神呀救救我吧, 一把年紀了, 一個愛人都沒有 ...", 我相信神為我安排左未來, 但係我依然好想有個人愛我! 仲有喎, 尋晚有件好開心O既事, 就係我寫O既一段野, O係有線電視O既<開心.COM>節目中讀左出黎, 我好開心呀, 題目係"如果廿四小時後係世界未日, 你會點過", 而我就話: "如果仲有廿四小時就世界未日, 我會利用呢廿四小時用哂我d錢, 做所有我一直唔敢做o既事, 例如同我鍾意人大大聲咁講:我愛你, 我會o係仲有幾個鐘頭果陣, 反省下我一生人當中做過o既錯事, 好好享受一下餘下o既時間!!!", 如果係你, 你又會點呢?
唔知點解我隻手損左幾撻喎!

返回


19/11/99

今朝一早就醒左喇, 因為唔知點解咁早醒左囉! 之後收到新組員o既電話, 佢叫我做埋份 REPORT O既最後工作, 都冇所謂啦, 邊個叫我咁鬼得閒O者, 之後我用左一陣去攪掂左啦, 不過又差一 PART 我唔知佢想寫D乜, 所以就打俾呢個新組員問下佢啦, 鬼整佢丫, 佢明明話佢好忙唔會返公司所以要我做架嘛, 點知一拎起電話我得到O既係一把 ARMARM 熟睡而俾人嘈醒果把聲! 我表明左身份之後, 佢把聲即刻醒哂啦! 我冇意見喇, 佢想點就點, 橫掂同佢夾多份 PRESENTATION 就完結喇! 完左呢一科有排都見唔到佢, 太好喇(請原諒我咁講)! 不過下星期五就係我地 PRESENT O既大日子喇, 我唔明白點解咁多野做, 希望大家為我祈禱, 希望我信心會多D, 因為我覺得我夠膽參加歌唱比賽, 夠膽去試鏡, 冇理由 PRESENTATION 難到我架, 不過我冇咩信心O既原因可能係要全程講英文, 其實有少少驚自己講到一舊舊咁啦! 不過大家為我祈禱啦, 多謝大家先! 我發覺我對佢可能真係太沉迷, 今日佢好遲先返到, 可能係做份 REPORT 啦, 返到黎佢個位俾佢個朋友坐左, 佢只好坐前一個位, 而呢個位正係我隔左一條走廊仔O既坐位, 我唔知係我多心定係事實, 佢坐果陣, 佢個朋友竟然講左一句: "尊登留呢個位俾你坐架!", 呢句說話係咩意思呢? 我真係唔清楚喇! 我好想同佢傾下計咁, 但係的確會好怪, 同埋冇咩機會囉, 我可能未到真係愛佢, 但係的確好有好感, 好多人話廿一世紀, 女仔可以主動D, 我都覺得, 我諗過寫自己個 UIN & EMAIL 俾佢, 但係我真係驚嚇死佢呀, 如果佢對我有意思O既話, 可能會係好事, 但係都會諗我好開放呀; 但係如果佢完全對我冇意, 嘩! 仲慘, 人地以為我<發仔寒>添呀! 唉, 總之做又煩, 唔做又煩啦!
我今日做哂自己下星期五交果份功課喇!

返回


inserted by FC2 system