尋晚同我二家姐傾計上網同埋打牌, 到兩點到先訓, 訓到今朝, 之後去左大家樂食早餐, 再之後約左以前Ｄ舊同學出黎聚, 食左晏晝就去左加洲紅唱Ｋ, 好多新歌唱呀, 不過好好好貴呀今日! 因為今日冇折囉! 之後唱到五點到啦, 再行左一陣又過左去銅鑼灣, 因為要 JOIN 埋我個朋友放工, 再去食左"味千拉麵", 再之後又行左一陣, 再落左 BAR 喇! 今日係就係勁開心, 但係用左好多錢呀!
估到我買咩飛未呀大家?!

由於尋晚太好訓喇, 唔記得左打電話俾我亞姨添! 今朝佢地都黎左我屋企玩, 好累架, 因為我表妹未停過咁走黎走去, 大約九點半就走喇! 好眼訓架都! 今日我個洗手間漏水喎, 過幾日我舅父黎幫我整呀! 我而家睇緊有線o既＜台灣紅不讓＞, 其中一個環節叫做＜台灣孩子王＞, 有一個四歲o既小妹妹真係勁得意呀, 又好叻架喎, 佢識唱台語歌架, 又好攪笑喎! 好得人鍾意架!
我終於睇完左果本好正o既＜孤男寡女＞小說喇!

今日訓得好好, 因為尋晚太累, 下午果陣落雨喎, 都好o既, 涼Ｄ嘛! 今日睇報紙好開心呀, 因為蘇永康結婚喇! 其實今時今日O既歌手, 仲有Ｄ咁尊重感情O既人, 真係難得, 雖然以我所知蘇永康係幾花心架! 不過我好好好開心佢尊重愛情! 唔知幾時到亞敬呢?
又幾時到我呢?!

今朝我大舅父黎幫我整番好個洗手間呀, 之後四點幾我細舅父黎同我食飯喎, 今晚食湯河呀! 真係真係好好好食呀! 今日實在食得太多野喇! 又有o者喱啦, 又飲左椰皇喎, 好正! 所以肥左少少啦!
我就黎去睇我買飛果場野喇! 估到我睇咩未呀?

講你都唔信呀, 竟然成日o係屋企都有奇遇呀! 話說一早起身, 用微波爐去整番熱Ｄ野食啦, 叮完之後, 當我想拎番個碗出黎果陣, 怪事就發生喇! 相信大家可能呢一世都冇可能遇到! 就係我用布隔住拎果陣, 竟然發現左個碗碎開左四份喎! 真係非常奇怪, 因為果個碗係入得微波爐架喎, 點解短短一分鐘O既番熱, 點會碎成咁架? 好彩唔係番熱湯O者! 如果係流質O既話, 肯定熱鬼死我呀! 真奇怪呀, 冇可能會爛架嘛! 最衰買左好鬼耐, 如果唔係去番間公司告死佢呀! 幾危險呀! 尋日我舅父借左佢部勁 ZOOM 相機俾我呀, 下星期去睇果日買飛果場 SHOW, 一定影到正相! 其實大家知唔知我去睇咩O者? 仲有仲有! 我搵到個睇完會覺得好幸褔O既網頁, 大家得閒去睇下! 請按這裡
唔識做功課添! 點算好?

今日好嬲呀, 痴線架! 邊有Ｄ咁O既人架! 我係講緊呢兩日O既熱門話題O既主角 -- 鄭伊健 + 梁詠琪! 講真一句丫, 呢Ｄ事我地係局外人, 本應我都唔想出聲架喇! 但係我睇完今日O既電視, 我實在要講一講我O既意見! 一直我都唔相信伊健係咁O既人, 因為以往O既佢令到我感動, 佢曾經承諾過會照顧美琪一生一世! 雖然我明白有陣時Ｄ野話變就會變, 但係大哥呀, 七年喎! 真係好過份架喎, 一個女仔冇咩幾多個七年架咋! 簡直離譜, 而家佢地叫做高姿態咁拍拖喎, 完全冇諗過美琪O既感受, 就好似當美琪係傻婆咁, 話知佢! 講真一句, 雖然而家呢件事只係Ｄ傳媒寫出黎, 不過我覺得伊健有一樣野係做錯左架! 成件事傳左咁耐, 伊健冇正面去講過呢件事, 只係成日話: 有Ｄ事發生緊就由佢發生落去! 佢O既經理人林珊珊都只係話: 伊健遲Ｄ會向大家代清楚, 大哥呀! 交咩代O者? 交代佢貪新忘舊呀? 交代佢忘恩負義? 簡直痴線! 如果我係伊健, 我會快手快腳講清楚俾大家知發生緊咩事! 而家佢咁做, 其實係對美琪非常唔公平! 根本Ｄ人而家迫得美琪太緊要喇! 佢不嬲身體又唔係幾好! 而家又拍劇咁辛苦! 精神唔好, 但係仲俾Ｄ咁O既壓力佢! 一個人唔可以受咁大壓力架! 我覺得, 如果伊健真係貪新忘舊O既話, 我衷心咁希望美琪可以震作! 因為呢Ｄ咁O既男人送都唔好要啦! 簡直係人中之賤! 我以前都覺得伊健幾好架! 但係冇辨法, 呢Ｄ係人格O既問題! 真係睇佢地幾時散! 因為我唔可以祝褔佢地, 我過唔到"良心"呢一關! 另一方面, 我又睇到一段新聞關於陳寶蓮O既, 睇完ＴＶＢ果個＜全線大搜查＞之後, 好心痛呀, 以前O既陳寶蓮真係又高又靚女, 而家O既佢, 真係面色蒼白, 好唔相信佢就係陳寶蓮, 我好希望佢真係可以自愛啦! 亦希望神可以幫助佢, 因為好唔忍心見到佢咁!
今日真係多事發生喇!

今日都冇咩做過喎, 睇過下Ｄ功課點做啦, 夜晚睇左ＴＶＢ, 講陳寶蓮好番好多! 真係好開心, 希望佢可以快Ｄ變番以前咁, 一樣咁靚, 咁精神! 今日食左好多野呀, 自己煲左粥食喎, 又食左O者喱啦, 真係勁好食呀! 今日計過喇! 原來我算叫做過瘦喎! 真係估唔到! 今日睇見康仔同佢老婆咁幸褔, 真係誠心祝褔佢地! 希望佢地快Ｄ生番個ＢＢ啦!
呢個風打唔打得成呢?

今朝訓到十一點幾, 之後我有個朋友打俾我約我出街喎, 所以我地就出左去行街喇! 但係我未出街之前, 聽左收音機, 亞伊健開果個記者會! 聽完之後係幾嬲架, 佢交代左佢同美琪已經分左手一段時間, 又話同梁詠琪只係好朋友, 但係我朋友之前聽佢上商台個節目, 佢親口承認話同梁詠琪拍緊拖架喎, 唔通鄭先生咁快失憶? 我覺得好信唔過, 係咪一早講完話係拍拖, 之後記者會時又話只係好朋友? 我唔多清楚點解喇! 可能天氣熱啦! 不過我覺得咩都係第一野講果番說話先至係真架啦! 再講果陣就係經過思考, 經過思考O既野, 就即係信唔過啦! 大家話係咪先?! 所以我想大家見証, 我由今日開始, 唔會對佢地兩個有好感, 唱Ｋ亦唔會唱佢地O既歌, 我真心咁講架! 如果有朋友同我去唱Ｋ而發覺我有點唱佢地Ｄ歌O既, 麻煩大家狠狠咁鬧醒我啦, 我明白到拍拖其實係好難講, 今日可以好好, 但係聽日就可以有問題, 但係我想講一句: 橫刀奪愛係有報應架! 呢樣係真架, 我眼見唔少橫刀奪愛O既人冇好結果, 要相信一句說話: 善惡到頭終有報, 相信冇咩人覺得呢件事係善事掛! 講今日個行程先! 首站係尖沙咀, 行左一陣之後就去左食麥記喎, 好平呀而家, 每人都只係$12.5咋, 真係抵食啦係咪? 之後再由尖沙咀行到去旺角, 好多衫都好靚呀, 不過好貴呀, 所以唔捨得買囉! 行一次旺角大家就知道近排興Ｄ咩喇! 仲有呀, 我同佢行左去一個O係尖沙咀O既商場, 呢個商場對我黎講係幾重要架! 因為本來諗住同班朋友O係果度開時裝店架! 但係奈何佢地都唔夠錢開, 唯有見住一盤有得做O既生意隨風而去! 不過, 希望真係O係未來O既日子真係開到啦! 之後都行到十點幾, 有少少累啦! 不過好開心架, 雖然我同佢1號果日先見過! 不過識左佢咁多年, 今日都係第一次我地兩個人去街街架咋! 影左張貼紙相添呀, 好抵架喎, 只須十蚊, 仲可以影兩款添! 雖然Ｄ色唔係太靚, 但係真係好抵好抵, 真係好抵影, 大家有興趣就去銀都睇下啦! 仲有呀, 原來＜山水冰站＞O既青蘋果沙冰, 好鬼好飲架! 大家有機會試下啦!
聽朝我又去我亞姨度LU!

今朝八點幾起左身, 之後食左少少野就同我舅父入左屯門, 因為今日安怡生日, 入到去飲左茶, 之後去左市中心行下街, 買下野咁啦, 真係買左好多野喎, 有蛋糕啦, 仲有好多野食咁啦, 仲第一次食大閘蟹添! 我仲買左幾張餅咭呀, 可以平幾十蚊換蛋糕, 真係好抵食呢! 何況斯斯就黎生日咯, 咁各方好友都會同我慶祝下o既, 咁咪有用囉! 不過諗諗下都真係用左幾多錢, 聽日我又要去超級市場買下野, 因為都要買定Ｄ野預備Ｄ朋友黎我屋企玩果陣食呀飲呀咁架嘛! 大約十一點返到屋企啦, 要多謝我舅父送我返屋企同埋傾左好耐計, 而家好眼訓添, 因為好早起左身嘛! 其實今日係我上一個男朋友生日, O係呢度都佢生日快樂啦! 祝佢早日搵到個同佢夾O既人啦! 仲有呀, 大家留意我網頁o既主頁丫, 有樣重要野寫左o係個訪客計下面呀!
突然間好想打機添!

今日訓到十二點幾呀, 因為尋晚成三點幾先訓得著, 生活真係唔係幾健康! 之後就去左兩間超級市場, 主要係睇下有咩抵買, 可以慳番Ｄ錢嘛! 冇計啦, 又未搵到野做, 又要食架嘛, 唯有慳番多Ｄ, 遲Ｄ搵到野做就唔洗咁辛苦啦! 基本上今日都冇出到去行街, 不過有奇怪O既事發生左喎, 話說我去超級市場俾錢果陣, 由於我係用信用咭俾錢O既, 所以要簽名啦, 點知簽左三份之一果陣, 突然完全唔記得個名點簽喎, 幾邪呀! 好彩最後都識簽番, 只係唔知點解簽得肉酸左O者! 今日買左兩罐好靚O既"百事"汽水喎, 有亞菲個樣架, 真係好靚, 我諗住買黎 KEEP 架, 因為唔出架喇好似! 好平咋, 只係 $1.5 一罐, 大家想買就去惠康超級市場睇下仲有冇啦! 今日寫左一頁新O既網頁呀, 叫做＜私感覺＞, 內容係講下一Ｄ斯斯好欣賞O既人O既, 有興趣就去望下, 俾Ｄ意見我啦!
我很愛很愛鄭秀文呀!

今朝好早醒左呀, 可能尋晚訓得唔係咁好, 所以早Ｄ起身, 成日都冇出過街呀, 食完野就溫左個幾鐘頭書喇! 之後就聽歌咁啦! 黃昏六點幾就食飯喇! 因為好肚餓嘛! 不過食食下果陣收到個電話, 係一個自稱姓"林"O既一個女仔, 講得出我個名喎, 佢問我有冇興趣買保險, 咁我咪問佢點知我電話囉, 點知佢話係同我一個朋友傾開買保險, 果個朋友俾我Ｄ資料佢架喎, 我問佢我個朋友叫咩名, 佢又死都唔肯講, 仲話除左我之外仲俾左幾個人名佢喎, 我點問佢, 佢都話要約我出黎傾下保險, 如果我唔抗拒先話個朋友個名我知喎, 興到我丫, 點問都唔肯講, 話費事我鬧我果個朋友喎, 之後我話呢Ｄ係我O既權利, 我有權知我Ｄ資料來源, 佢依然係唔肯講, 所以我講左一句: "你連咁都唔肯講, 我點幫你買保險呀?", 之後我就收左佢線喇! 我收完線果一刻, 我勁O係度諗係邊個人會將我Ｄ電話果Ｄ話俾人知, 我發覺都會有好幾個會咁做, 斯斯實在太多人知我電話喇! 所以冇得追查, 所以我好希望果位人仕自動投案! 仲有一樣野, 我唔希望再有下次, 因為香港有私隱權條例架, 同埋我覺得咁樣出賣朋友O既個人資料, 呢Ｄ人O既人格都要真真正正咁諗真Ｄ, 將心比己, 如果係你自己, 成日有Ｄ唔識O既人打俾你, 講呢樣講果樣, 但係又俾你知係一個識得你O既人將你Ｄ電話俾果Ｄ人, 你會點呀? 相信你都會好似我咁咁興! 我真係好希望知係邊個!
唔該大家做每件事之前都諗下人地O既感受!

今朝一早落左去租碟, 租左隻＜跳躍大搜查線＞, 真係好好睇喎, 又好笑, 又好要用腦諗究竟邊個係犯人! 不過我覺得如果睇埋佢日本版o既劇集會明少少, 好睇好多! 織田裕二做得好好, 不過我最鍾意都係深津繪里, 因為佢好可愛! 把聲又好聽! 夜晚就落左去還碟喇, 順便買一本叫做 pc.com o既雜誌, 但係我行左第七間報紙檔先買到喎, 唔知係咪新得滯呢? 不過返到屋企睇好失望喇! 因為睇唔到我想睇果段野, 唔通我個朋友講錯左我知? 真係失望喇! 唔知係咪下星期果期先出呢? 尋晚發左個夢喎, 好開心架! 因為 ... ... 我夢到亞敬呀!
我而家擁有兩罐有王菲o既樣o既空罐做記念!

今朝真係好好訓, 因為尋晚太累喇! 除左執屋之外, 就係溫左書喇, 所以就訓到十二點喇! 不過朝早好熱呀, 所以基本上係熱醒o既! 今日飲左碗中藥呀! 好苦好苦, 但係唔係太難飲; 今日o既心情係好緊張, 因為聽晚有重要約會, 就係我要同二家姐去睇一場 SHOW 喇! 係咩 SHOW 呢? 唔講住喇我, 大家再估下先啦, 總之係絕頂正 SHOW! 其實完全唔難估架! 大家諗下先啦! 總之係足以令到我好緊張, 好開心, 差Ｄ訓唔著咁啦! 今日全日都冇出到街呀, 因為唔想用錢嘛! 屋企又有野食! 而且仲係好正O既烏冬添呀! 都溫過下書架, 不過唔係太多, 因為今日唔係好夠訓咁, 又好似作病咁添! 可能係天氣問題! 古巨基都有首歌叫做＜天氣會變＞啦, 我咪係天氣變之下O既"犧牲品"囉! 所以大家都要小心身體呀! 仲有仲有, 今晚開始, 每個星期三夜晚 10:50 O係ＴＶＢ都會有靚仔睇! 當然果個就係蔡一傑啦! 大家記住睇喎!
好希望我生日果日會有好多人簽留言版祝我生日快樂!

今朝七點幾就醒左喇! 可能今晚有重要約會啦! 其實今晚我係去睇＜太極十五週年演唱會＞, 首先要多謝二家姐請我去睇! 約左二家姐六點o係九龍城廣場等, 我遲左兩分鐘, 因為我等左半個鐘頭巴士! 之後用左 25 蚊去食麥記, 好抵食架! 之後就坐巴士去紅館喇! 當我地入左火車站行緊去紅館果陣, 竟然見到亞細迎面而黎喎, 但係佢同佢助手好似搵緊野咁, 所以我唔想阻住佢, 所以只係望住佢"嘩"左一聲, 但係之後覺得勁傻喎, 所以都o係後台門口等左佢一陣, 但係等唔到佢返黎, 不過就見到亞敬落車, 都影到一張近ＤO既相! 之後入場喇! 但係好慘, 個位雖然都正, 但係我地買飛果陣睇錯左張圖, 一直以為唔係呢個位! 不過都算啦, 唔錯O既位! 大約八點半過Ｄ個 SHOW 就開始喇! 亞細講開場白, 之後就係主角太極出場, 一連唱左幾首歌! 冇幾耐, 第一隊特別嘉賓出現喇! 估都估唔到, 竟然係 WINNERS(溫拿), 有亞倫, 亞Ｂ同埋健仔O既, 一連唱左幾首勁歌! 亞倫仲叫我地起身跳舞, 我地第一時間彈起身, 但係發覺後面完全冇人起身, 又唔想阻住後面O既人睇 SHOW 所以就坐番低喇! 但係的確勁想企起身! 之後太極又勁唱左好多首正歌, 我完全唔覺得冷氣勁, 反而好熱, 因為我勁投入咁去睇嘛! 再之後請左個唔知係邊個O既女仔出黎合唱＜留住我吧＞, 講真, 個女仔唱得勁差, 又勁肥, 不過好彩唱左一首就落左台喇! 再唱左好多首正歌, 因為我太 HIGH 喇! 都唔係好記得唱左邊幾首歌! 之後就請到亞敬安仔同埋康仔上去, 傾左一陣計, 再先由安仔唱出 JOEY 作O既＜一加一減你＞, 再由亞敬唱出＜其實我深深愛著你＞, 最後由康仔唱出＜越吻越傷心＞, 好好笑架, 因為太極佢地恭喜康仔, 佢叫我地出場果陣封利是俾佢喎, 佢地幾個一唱一和咁玩安仔, 話亞嫂條 NIKE 媚唔興, REBORT 媚正Ｄ喎, 之後勁多人勁嗌 SAMMI(包括我), 氣氛好正! 安仔都話: "講埋Ｄ咁O野架? 唔可以咁講野架喎!" 之後 JOEY 好攪笑咁話: "今晚個場我地太極O既, Ｄ歌迷係我O既, 鍾意點講都得!", 不過佢地係笑住咁講O既! 亞敬今日裡面著左件白色長袖衫, 出面一件短袖衫, 安仔勁話佢係咪冇錢買件短袖低衫, 仲話下年生日諗到送咩俾佢, 一係送件短袖底衫俾佢, 一係送件長袖面衫俾佢, 笑死人呀真係! 但係好知道佢地好好朋友, 因為好開心咁互串! 其實成晚最開心O既係, 有一 PART 係太極成員 SOLO 果部份喇! 原來唔講你唔知, 其他人幾唱得架喎, 由其係太極O既"大王" GARY, 唱左佢作俾哥哥果首＜怪你過份美麗＞, 玩下手仲好聽過哥哥唱呀! 之後到"意大利歌手" ERNEST 唱左首＜你把我灌醉＞, 嘩! 唱得幾好呀! 估唔到呀, 個樣仲好殺食添呀! 之後就到太極O既"夏金城"蛇仔唱＜我是一隻小小鳥＞喇! 但係好攪笑, 佢唱錯左好多句, 不過好好氣氛, 最後到左我O既新寵 RICKY 唱喇! 不過我唔記得左佢個別號添, 好似係太極"張學友"呀, 佢唱左學友首＜日出時讓戀愛終結＞, 唔講你地唔知, 我好鍾意打鼓O既人架! 因為好型同埋好難度高架囉! 唱完之後 RICKY 唔肯返去打鼓喎, 佢話: "大大話話O係上面打左十幾年鼓喇! 冇乜幾何可以落黎呢度唱下歌! 點都要唱多隻架喇!", 又話要好似Ｄ歌手咁有張椅坐下, 又叫人打燈打靚Ｄ, 又話只係得 JOEY 張結他單調左少少, 要成隊人一齊夾首歌佢唱! 之後唱左學友首＜分手總要在雨天＞, 但係有奇怪事發生喇! 點解 RICKY 唱唱下咁似學友O既? 原來特別嘉賓係學友, 場面好好笑, 之後學友仲話 RICKY 之前唱錯歌詞! 再一齊夾左首＜情不禁＞, 真係唔知點解學友今晚咁 HIGH! 太極再唱左好幾首歌, 有新有舊! 全部都好鬼正! 之後亞 PAT 就講鳴謝啦! 再講再見入左後台, 我地就勁叫 ENCORE 啦! 之後出黎讀信喎, 因為佢地互相寫左Ｄ信俾大家! 好感人架! 因為玩踢爆! 原來蛇仔成日遲到O既, 而亞 JOEY 成日泡架喎, 不過最開心係見到佢地成長左, 起碼亞 PAT 識諗左好多! 之後就到左卡拉ＯＫ時間喇! 因為可以點唱! 唱左好多首正歌, 例如: ＜每一句說話＞咁啦! 我最感動都有好多 PART 架! 有好幾次我差Ｄ喊左出黎! 就好似開始時唱左 BEYOND 首＜情人＞果陣啦! 唔知點解個氣氛好 DOWN, 家駒太早唔O係度喇! 其次就係佢地講到十五年O既感覺, 突然我覺得佢地好慘! 要係週年記念先可以做到主角, 平時就做和音或者係作曲呀果Ｄ, 睇到亞 PAT 個樣, 真係好稀虛, 到最後個 SHOW 真係要完喇! 唱完首＜留住我吧＞, 真係見到佢地個個好唔開心, 果刻我心諗, 真係唔知幾時再有咁O既機會睇佢地個 BAND SHOW! 其實睇 BAND SHOW 好開心架! 因為佢地 SALE O既唔係舞步, 亦唔係形像, 而係真真正正O既音樂! JOEY 話遲Ｄ亞 PAT 會出個人大碟喎, 真係好好好呀! 當然太極都就黎出碟啦! 呢Ｄ碟一定要買呀! 因為呢Ｄ先係真正O既音樂! 樂壇先會有希望! 大家記住喇! 其實今年草蜢都係十五週年! 本來草蜢會上台架! 但係可能唔知上去做乜, 所以冇上到囉! 最後佢地真係攬埋一齊, 果刻我有少少眼濕濕, 因為好感慨架, 挨左咁多年, 香港樂壇始終咁唔健康! 但係都有我呢Ｄ支持左佢地咁耐O既朋友, 樂壇一定會好過黎O既! 走之前我仲影左佢地個台添! 因為我太鍾意佢地個台喇! 仲有仲有, 唱最後一首歌時, 我地全場O既人一齊搖手, 果刻係最美O既! 我最希望亞 PAT 快Ｄ結婚啦! 因為佢地大多數都結左婚咯! RICKY 同 ALBERT 仲要有埋仔女添! 之後完場坐巴士返屋企! 十二點半到返到喇! 我今晚真係好開心呀! 因為的的確確係有好好O既得著!
"我也願意信有那麼一天, 世界不分膚色不分你我! 但到了那一天我在何?

今日成點鐘先起身呀, 因為尋晚太開心喇, 成四點幾先訓, 所以咪訓到咁晏囉! 成日都冇做過Ｄ咩, 溫下書, 食下野咁! 想唔肥都幾難呀(我係指體重, 絕對唔係考試!), 之後都幾回味尋晚個 SHOW 架! 其實我都唔知仲有冇機會再睇到一個咁正O既 SHOW! 其實我可以話係聽太極O既歌而大架! ＜紅色跑車＞果陣雖然我只係得五六歲! 但係果陣我爸爸都聽太極架! 所以我由細到大都好鍾意 BAND SOUND , 如果大家未聽過 BAND SOUND 或者未聽過太極O既話, 大家係永遠都唔會知 BAND O既勢力! 由其係尋晚, 我親眼見到長大左O既太極, 作品好有成熟味道! 而且好有 FEEL , 好多新歌都令到我感同身受! 我發覺我同亞 PAT 有少少相似, 無論係思想或者係做法! 我都覺得我同亞 PAT 一樣成長左! 以前O既我都係好似佢咁, 好情緒化, 好易發脾氣, 完全都唔會理人地O既感受, 遇到唔公平, 我都好似亞 PAT 咁一定要講左自己O既不滿出黎! 尋晚O既亞 PAT 已經成熟左好多, 而O係席上O既我, 亦都同佢一樣成熟左好多, 起碼做任何事之前會諗下後果, 諗下人地O既感受, 所以話呢! 有時迷偶像未必係壞事, 只要你唔係麻木咁去追捧就ＯＫ喇! 就好似我咁, 其實我鍾意太極, 亞敬, 草蜢同埋 SAMMI , 唔多唔少都因為佢地各有材華! 太極同亞敬, 唔洗講, 一定係音樂材華同埋 BAND 勢力! 至於草蜢同 SAMMI 係勁舞之人! 其實佢地同時對音樂都有要求! 所以我鍾意佢地! 完全係實力取勝!!! 好多人都話過我好另類, 因為我絕對係迷上另類人架! 好似我好鍾意＜亞龍大＞O既, 雖然我冇買佢地Ｄ ＣＤ, 不過好鍾意佢地果種獨有O既 BAND FEEL , 又好似我好鍾意 CRANBERRIES , 好少人會接受到佢地架, 因為比較另類, 可能大家覺得我怪, 不過我的而且確係一個怪人!
其實我係好想好想夾 BAND 架!

今朝真慘, 五點幾俾個雷嚇醒左! 仲要係好抵死咁嚇左好多好多次! 今日主要係溫書, 因為就要考試喇! 今日都仲係冇出到街呀, 因為唔想用錢嘛! 不過, 約左兩個家姐聽日去唱Ｋ, 不過都係幾經濟O既! 今日幾眼訓架, 因為對住本書多數都會眼訓O既, 今晚應該會早Ｄ訓架, 因為聽朝要早起身! 仲有呀, 今日織左條手繩呀! 好耐都冇織過喇! 好靚架!!!!!!
尋晚發夢又見到亞敬喇! 夢境成真就好LU!!!!

今朝九點幾就醒左喇, 因為我感覺到天氣轉變左, 轉涼左少少, 好正o既感覺! 我好鍾意呢種天氣架! 如果有得俾我揀, 我一定會揀十五度至二十度O既天氣之下生活, 因為我唔鍾意熱, 亦唔鍾意著太多衫, 所以十五至二十度係最完美O既! 不過可惜, 一到十二點就回升番去二十五度喇! 熱死人! 約左兩個家姐去唱Ｋ喎, 唱得好開心呀, 主要係唱到自己一直想唱O既＜插曲＞同埋＜發熱發亮＞! SAMMI 勁正呀! 仲有唱左太極兩首歌啦, 又唱亞敬啦, 仲有好多數之不盡O既正歌! 最正係重溫番當年安仔同 SAMMI O既＜非一般愛火＞, 真係好好好正架, 由其係佢地好襯, 又好串咁唱喎, "須可偷偷的愛, 但是並沒做錯, 某某人要來理為何?", 直情講哂佢地O既心聲啦! 唱到五點幾走, 不過走果陣我地三個都有一個問題, 就係 ... ... 見到一個我地完全分唔到佢男定女O既人, 雖然我地唔應該咁樣去睇人, 但係真係諗唔到, 係一件奇遇黎O既! 實在叫人難忘! 我發覺到一樣野喎, 其實我好鍾意玩, 係勁爛玩果隻, 因為成日個腦都掛住玩! 一有得玩我好 HIGH 架玩到! 係一個幾典型O既女仔! 之後我同左大家姐去行左一陣街, 因為二家姐佳人有約! 好耐都冇試過同大家姐行街街! 仲有呀, 我發覺而家Ｄ明星好唔信得過, 除左鄭伊健, 方中信, 曾偉權, 近期最新O既成龍啦, 信唔過! 不過好彩有蘇永康呀果ＤO者, 當然亞敬同太極都唔會咁唔重情義!
大家要珍惜眼前人!

今日真係勁訓呀, 一直訓到四點幾, 雖然尋晚都好早訓呀, 但係可能係太太太眼訓, 而且平日訓都唔定時, 所以係時候要充下電咁! 起左身無幾耐就落左去買野喇! 因為成屋只係得排麥麭, 好怪架排麭, 好有生命果隻呢, 明明上次買一粒麥都冇架喎(留意, 係麥麭), 今次再買竟然多左幾十倍喎! 不過落一落超級市場同埋街市, 又用左百幾蚊喇! 不過唔係買到好多野咋! 瓜+生果+肉+汽水+沙律醬+蛋, 咁就百幾喇! 仲有喎, 大家幫我留意一下, 邊度Ｄ"道地綠茶"平丫, 細細支果支呢, 我見到平極都要 $7.2 一支, 幾貴囉! 幫下我夾價喎!! 仲有呀, 今日係我爸爸o既生日呀, 要祝佢生日快樂同埋身體健康o既!!!!!
希望人人都幸褔!

今朝都好早起左身喇, 因為要溫書嘛, 聽晚要考試喇! 不過冇咩信心, 因為唔係好知自己溫左Ｄ咩, 你話幾慘呢? 不過我諗都ＯＫ掛, 都要睇下佢出Ｄ咩題目先知掂唔掂架喎, 希望出正我識果Ｄ啦! 不過真係幾冇信心, 但係我會盡力O既! 一直溫到六點幾就煮飯食喇, 今晚好多野食呵! 之後我一上網就收到封令我幾嬲O既 EMAIL, 係一個唔知咩人 SEND 黎架, 大致上係話我個網頁冇深度, 又話我網頁幾差喎, 但係佢又講想同我做朋友喎, 叫我 SEND EMAIL 俾佢, 不過佢又唔知幾時先 CHECK 喎, 佢叫咩名就冇謂講喇, 因為我覺得佢好無聊, 用英文寫黎, 但係Ｄ文法錯哂! 所以我亦都回左一封 EMAIL 俾佢, 話我年紀細所以冇深度, 不過佢大可以唔睇我網頁架! 又冇人迫佢睇, 同埋我話我唔想有一個佢咁O既朋友, 唔同 LEVEL 係溝通唔到架嘛! 你話呢個世界真係咩人都有, 俾著大家我諗都費鬼事理佢, 我都唔知點解我會回佢 EMAIL, 最初有少少嬲架, 不過諗諗下, 我地應該接受同埋原諒一Ｄ同自己唔同 LEVEL O既人, 佢都唔想自己咁低 LEVEL 架! 原諒佢啦! 大家係咪都覺得我有時講野有少少衰呀? 不過我係咁架喇, 犯到我就一定唔會俾面對方! 相信有好多成日睇我日記O既人都會知道我呢種性格! 冇犯到我O既人真係可以咁都傾一餐, 但如果犯到我的話, 我一定幾倍奉還! 記住: 我係好記仇架!!!!! 哈哈哈!!!!!!!!! 仲有呀, 我好支持吳綺莉架, 唔係因為佢做未婚媽媽, 而係佢肯承擔呢個責任, 計我話唔好理成龍O者, 最緊要係綺莉同埋ＢＢO既往後生活! 希望大家放過佢啦, 唔好再煩住佢喇!
聽晚 ... ... 要考試喇!!!!!

今朝好早醒左溫書, 因為最後機會喇! 好好彩咁, 我有溫到上年份 EXAM PAPER, 因為今晚份卷差唔多, 分別唔係好大! 應該會合格O既! 之後用左幾蚊坐左一次"無軌過山車", 即係小巴, 真係好得架! 坐過包你唔會再玩過山車呀! 見住佢逢車過車, 簡直係將自己同車上十幾人條命放埋一二角呀! 大家有機會真係試下, 不過之前最緊要買定保險, 咩都有得賠果隻先好買喎! 最好受益人寫我啦! 講下笑O者, 因為到而家都仲未有事發生! 不過而家隻手指尾好鬼痛呀, 梗係唔係坐車坐到痛啦, 你估咁攪笑咩, 而係不停咁寫左三個鐘頭字, 仲要寫寫下手指抽筋喎, 有少少攪笑架! 而家睇緊ＴＶＢO既＜爆笑急轉彎＞呀, 好攪笑呀, 佢地要湊仔呀! 一睇就知佢地三個唔識湊仔! 佢地話可以寫信去要求佢地做野喎, 可唔可以寫去想同亞傑簽名, 影相, 行街, 睇戲, 食飯咁過生日得唔得呢? 仲要亞傑送份生日禮物俾我又得唔得呢? 我真係好想喎, 不過我唔會寫信去架! 快Ｄ有人幫我寫啦! 其實最好送亞傑俾我, 因為起碼唔洗驚冇好野食, 又唔驚冇靚湯飲丫嘛! 唔係喇, 諗諗下, 送埋亞敬同太極俾我好喎! 不過我真係好鍾意亞傑架! 雖然都好鍾意亞敬同太極, 睇開Ｄ啦, 少女情懷係咁架喇!
可能有一日我會同佢地有緣咁O係街撞到架!!!!

今朝本來較左鬧鐘八點起身架, 不過我七點半到就醒左喇! 之後我自己整早食呀, 都好耐冇食過早喇, 所以好正呀個 FEEL, 之後九點幾出門口, 因為約左我舅父一齊入屯門我亞姨屋企, 點知佢等唔到車, 我等左佢九個字佢先到! 都幾慘架, 不過係佢等唔到車O者, 唔關係事O既, 入到屯門十二點正, 去左飲茶喇, 如果早兩個字到, 我就可以去接我細表妹放學喇! 不過可惜遲左丫! 之後就上左我亞姨屋企玩喇, 幫佢整左個網上 GAME, 等佢地唔洗咁悶嘛! 一直同我細表妹玩左好多野喎, 佢好攪笑架, 好識令人開心! 食完晚飯之後冇耐就坐車走喇, 因為費事咁夜返屋企嘛! 我十點鐘就返到屋企喇, 係咪好早呢? 不過好累呀, 因為同細表妹玩左咁耐, 佢又好動, 不停咁走黎走去! 聽日會同個朋友去睇電腦呀, 因為佢想買電腦, 不過最忙都係聽晚, 因為後晚我有一班朋友黎我屋企同我預祝生日, 所以聽晚一定要勁執屋, 希望到時多Ｄ人黎啦!
唔知點解今日勁諗住亞敬喎!! 唔通 ... ...!!!

今朝雖然冇尋日咁早起身, 但係都十點幾就醒左喇, 因為今日要執屋呀, 一直執到下晝兩點幾呀, 所以執到好乾淨囉! 之後我個朋友打黎約我去同佢揀電腦, 點知都睇唔到想要果Ｄ, 所以就去左行下街, 睇下野咁喇, 佢買左件好靚O既衫呀, 最衰冇第二個色好睇Ｄ, 得佢買果件白色先至靚, 咁唔想同佢一樣嘛, 咪冇買到囉! 之後佢帶左我去食十蚊碗麵, 真係好平呀, 之後又飲左杯青蘋沙冰喎, 真係好正呀, 好平好抵食! 之後再行左一陣就返左屋企喇! 好早返到呀, 八點鐘就返到屋企, 即刻沖左涼仲要執埋Ｄ野; 仲有呀, 今日本來諗住去信和睇下有冇＜太極十五週年演唱會＞Ｄ相, 點知一張都冇喎, 真係失敗喇, 咁正O既 SHOW 都冇去影, 係真真實實O既大失敗! 不過見到尋晚＜SAMMI i-CONCERT＞O既相, 好正, SAMMI 身形好好呀, 唔知幾時先好似佢咁正呢? 不過我越黎越欣賞安仔喇! 因為佢有情有義, 我睇過康仔個專欄, 曾經講過安仔對情專一, 女仔都唔望一眼, 真係難得O既好男人, 雖然佢唔靚仔, 但係真係絕頂好男人, 又孝順, 又好仔, 同 SAMMI 勁合襯, 所以真係好想佢地快Ｄ結婚, 有好結果啦! 呢樣野係我估唔到架, 因為講真呢個娛樂圈好男人真係一隻手數得哂! 安仔係其中一個, 學友係第二個! 其他真係諗唔到仲有邊個喇! 不過相信亞敬都唔會係太差O既, 但係真係好想佢快Ｄ搵到個適合佢O既女人, 今後蘇永康都會係好男人之一, 因為佢對亞康嫂好好, 我真係好羨慕佢地, 尋日 DOWLOAD 左佢首＜我女人＞, 真係好感人, 令我好感動, "來做我女人好麼?", 嘩!!! 勁正啦! 大家話係唔係???
尋晚發夢見到亞 PAT 同亞敬喎, 我 ... 中 ... 毒 ... 喇!!!

今朝好早起左身等Ｄ朋友電話喇! 之後大約兩點幾就去左行下街, 再買左蛋糕就返左屋企整野食喇! 到左晚上八點幾就去左食晚餐, 再行左陣就返左我屋企玩, 食下野, 切下蛋糕咁, 再打麻雀玩下啤牌咁, 玩到晚上兩點幾, 其中一個就走左喇, 其實好開心架, 因為佢地送一隻 SAMMI O既＜很愛很愛鄭秀文＞ＣＤ俾我, 好好好開心呀, 而家其實係凌晨四點鐘, 諗住一陣去飲早茶! 好耐未試過咁玩法, 傾左好多野, 死啦, 而家好精神添, 佢地訓左喇! 好耐冇O係一日裡面食咁多野, 真係好開心!
要O係呢度多謝 CONNIE, SUZAKA 同埋 CINDY!!!!!