今日有好多人都開學喇! 不過我完全唔受影響喎! 因為我不嬲都冇假放架啦! 日頭都冇咩做過, 因為真係冇野做嘛! 晚上要返學喇! 今次呢個亞SIR好唔掂呀! 講野又細聲, 一舊咁, 都唔知佢講咩, 又係拎住份筆記讀! 自己睇筆記仲明過聽佢講! O係學校都發生左一件幾攪笑O既事, 不過唔話你地知! 仲有呀, 今日好開心呀! 因為有一個O係溫哥華O既朋友話遲Ｄ寄亞敬Ｄ相俾我呀!
SAMMI十月開演唱會, 我好想睇呀!

今日一早就落銀行喇! 之後仲去左買野同租碟添! 講起租碟都係麻煩架喇! 果個人今日同我講話我張信用咭過左期, 要更新番Ｄ資料, 但係要我媽咪張信用咭, 因為佢係主咭喎, 但係有好多原因好麻煩啦! 之後佢話下次再租果陣如果仲未更新資料, 就唔可以再租喎, 又話如果要租O既話就可以用二百蚊做按金喎, 真係麻煩死人喇! 我唔租又唔得喎, 因為我由而家到下年二月, 每個月都有一套免費架嘛! 無形中我咪要用二百蚊做按金, 嘩! 我已經冇咩錢用架喇喎, 真係煩死人呀!
晚飯食左黑椒牛肉, 食到有少少頭痛!

今日都好早起左身喇, 但係亦係冇咩做, 晚上亦要返學o既, 今日上ＬＡＢ呀, 但係好不滿呀, 有咩理由亞SIR當我地個個UNIX神童咁, 一坐到埋機就一定識做ＬＡＢ咁, 問佢佢又唔識答喎, 你話啦, 交咁多學費, 得到一連串咁O既堂! 唉, 太差喇!!!!!!!!!!!!!
今日買左林曉培隻ＣＤ呀, 正!

今朝本來較左鬧鐘八點架, 不過我九點先醒喎, 未夠十點就出門口去屯門喇! 大約十二點就到喇! 基本上今日都冇咩好寫o既, 一日裡面都做左好野呀, 仲教左我表弟寫 HTML 添, 希望我O既表達能力好好啦! 晚上未夠十點就返到屋企喇! 足足出左去十二小時! 不過戲玉黎喇! 我沖涼果陣發生左一段好嚇人O既事呀, 令到我好好好驚呀! 沖沖下涼, 我竟然見到一隻好大隻O既"小強", 仲要係識飛果隻添! 唉, 冇計啦, 一定係我對付佢架啦! 不過我勁驚呢家野架嘛! 咁我咪用個花灑勁對住隻野淋佢囉! 我覺得我都幾殘忍架, 不過冇計啦, 呢個世界係咁架啦! 當我不段咁淋左佢大約五分鐘, 佢就有反肚O既情況出現左喇! 所以我要幫佢收屍啦, 不過好驚, 所以我用左一塊地布去執佢, 之後好快咁沖左佢走, 我驚到連塊無辜O既地布都唔敢要番, 已經掉左喇!
真驚險!

今日大約十二點我表弟打黎我先醒喎, 因為尋日o既行程令我太累喇! 起身食左少少野之後, 就開始做功課喇! 大大話話都做左成三個幾四個鐘架! 但係當中有好多唔識答, 所以都係要問下人先得喇! 最衰未有書啦, 因為有書就一定會識答架嘛! 其實今日冇咩特別事, 不過好想講俾大家知我而家o既心情, 而家我完全係單身一族, 冇錯我曾幾何時係有"薯片仔"o係我身邊, 但係, 由於好多原因, 令到我唔再稀罕呢一段所謂o既感情, 絕對唔係第三者或者其他野影響, 基本上我根本唔可以話係拍拖, 甚至連朋友都不如, 所以o係呢度我要講一講, 我單身囉!!! 或者大家覺得我好似好兒嬉咁, 但係我好肯定一樣野, 勉強係冇幸褔o既, 我一生人到目前為止都未有過一段正常o既感情關係, 但係我知道神已經為我有所安排, 所以我而家好平靜!
好希望真命天子快Ｄ出現, 但我會好安心咁等待!

尋晚好早訓喇, 十二點幾就訓左喇, 但係唔知係咪太早訓, 我凌晨三點幾醒左喎, 仲要係訓唔番果隻添呀! 之後六點幾又醒下, 九點幾又醒下咁, 如是者醒左好多次, 攪到我終於成一點先起身, 我真係怪喇! 之後去左買野啦, 估唔到係咁易買少少野都用左成幾十蚊, 真係唔化算喇! 返到屋企做功課啦! 今次仲要幾唔好咁要上網做功課, 因為係做番果晚ＬＡＢO既野, 所以要用 TELNET 駁番去學校個 UNIX 果度做, 但係都唔係好知做緊Ｄ咩囉! 今日我都終於 UPLOAD 到Ｄ日記喇! 因為前兩日唔知做咩 UPLOAD 唔到野喎, 要大家等真係唔好意思喇! 不過講真都唔知有冇人日日黎睇架O者! 另外我想介紹一隻正ＣＤ俾大呀, 就係＜貼近盧巧音＞喇! 真係勁正呀, 成隻碟我最鍾意以下歌曲, 大家有機會都聽下啦! 推介歌:"絲路", "聽雨的歌", "麻醉", "蝴蝶吻"以及"新陳代謝", 呢幾首歌好有深度架, 其中有幾隻仲係巧音作O既曲添, 其中我好鍾意"絲路"O既歌詞, 真係好好!
好多謝ＫＡＺＵ借左佢個上網 ACCOUNT 我用呀!

今日好早就醒左喇, 可能因為我今朝好早就熄左部冷氣掛! 冇計啦, 要環保嘛, 但係又熱喎, 所以咪開少Ｄ囉, 今日基本上都係冇咩做, 唉, 開始諗緊有咩工適合我做, 但係而家經濟又唔好, 真係好難諗, 冇法子啦, 我諗都係搵唔到日校收我讀電腦架喇! 唯有馬死落地行啦! 但係落到地又唔知行去邊! 真係煩, 而且好迷惘添啦! 我又知道神為我安排左往後O既路, 但係又的確唔多清楚去向喎! 有咩理想工作? 實有少少係我O既夢想啦, 不過完全唔知點先可以實現, 亦可能只係O係"夢"裡面先"想"到啦! 我好唔明白香港係一個咩社會, 我敢講句係一個有病態O既社會, 的確存在有好多O既不公平, 唉, 大家有咩好提議俾我呢?
基本上今日好懊惱!

今朝ＫＡＺＵ打黎約我食晏喎, 不過我太眼訓, 所以冇去到呀, 又冇人請, 有就即刻仆到去啦! 之後起身都冇咩做, 你話我生活幾唔健康呢! 夜晚又係要返學喇! 但係好失敗咁, 唔記得要交功課喎, 所以唯有星期五交啦, 不過我都唔知做唔做到! 不過我覺得呢個亞 SIR 好呃錢囉, 有咩理由早左成個鐘頭放學丫, 真係唔抵呀! 其實我今日買左本書睇架, 係新城O既廣播劇＜孤男寡女＞O既小說, 佢明明標價30蚊再九折O既, 點知原來40蚊九折喎, 不過算數啦, 冇理由唔要架嘛, 都唔係貴好多, 所以買左喇! 我信得過會好睇O既, 另外又好唔抵O既, 影印左本教科書, 要成110蚊呀, 不過真係好多頁O既, 冇計啦, 不過我真係覺得我唔會睇得好多囉! 仲有喎, 原來 1999年9月9 日(即係聽日), 係一個好重要O既日子黎架喎, 可以叫做千年蟲 PART1, 大家敢唔敢開電腦呀? 我諗我敢架! 不過有時真係駁唔過, 但係冇電腦O既日子, 我點過喎~
大家覺得我適合做咩工呀?

大家今日有冇開電腦呢? 有冇少少驚驚地咁呀? 我就完全唔驚咁開左成日喇! 一早起身就要開黎做功課, 其實係趕功課先真, 因為聽日要交嘛, 點知做做下我就發覺屋企冇 A4 白紙喎, 咁咪茖街買囉, 都好似幾抵咁, $30/500張, 係咪抵呢? 唔知喇, 我呢頭得呢間文具店, 所以就算唔抵都要買架喇! 之後不停咁做左成五個鐘先叫做完成左份功課, 正當我開始印Ｄ野出黎果陣, 有驚人O既發現呀, 我發現左我部 PRINTER 唔知點解 PRINT 唔到彩色呀! 大件事呀, 又唔係冇 INK 喎, 我研究左好耐好耐, 都唔知點解, 又洗過噴咀, 咩都做過喇! 都係 PRINT 唔到, 唉, 攪到我份功課真係跌左好多 LEVEL 呀, 因為我份功課好多好靚O既圖架, 就係因為呢部衰 PRINTER, 攪到我仲專登去買紙俾佢食! 唉, 唯有剪左少少彩色圖片貼上去囉, 不過真係勁肉酸啦! 激死人喇! 究竟部 PRINTER 仲咩事, 到而家都仲係一個迷, 大家有咩意見俾下我咁呢?
有朋友寄左亞敬Ｄ正相俾我喇! 多謝你呀 KELLY!

今朝都好早起左身喇, 我都唔知點解咁早起身, 所以我就用左幾小時o既時間去做ＬＡＢ, 因為唔想今晚做咁耐, 因為我兩個家姐話一齊去行街, 不過當我做哂Ｄ野可以走果陣, 先發覺佢地今日唔得閒, 所以咪冇早走囉, O係學校上下網咁啦! 不過真係幾悶架, 亞 SIR 仲話如果早走, 會當你成日冇到喎! 都唔知佢攪乜, 有野唔明問佢, 佢又點都答你唔到喎, 你話佢幾呃錢呢!
聽日又入屯門喇! 可能大家仲會睇到我寫日記O既!

今朝未夠八點就醒左喇, 食左少少野再上左一陣網, 就出門口入屯門喇! 今日好快入到去呀, 唔知點解呢, 一邊坐車一邊聽住我隻最愛ＣＤ＜貼近盧巧音＞, Ｄ歌真係好好好聽架, 大家有機會一定要聽呀, 入到黎屯門就去左飲茶喇! 我都好耐冇飲過茶喇, 食左幾多野架都!
有個想ＰＫ入我機呀, 好賤人呀, 不過佢實有報應!

尋晚就係我亞姨度訓左晚, 今朝好早就俾我細表妹嘈醒左喇, 之後就去左市中心食野同埋行街街喇! 之後都係留o係屋企啦, 不過發生左幾件幾攪野o既事, 首先返到我亞姨屋企果陣就開始落雨喇, 所以就決定關窗開冷氣, 咁我表弟就講左一句:"嘩! 咁咪密封?", 點知我細表妹就好驚咁大聲嗌話:"救命呀, 有蜜蜂呀!", 咁喎, 笑到我丫, 之後冇幾耐, 隻狗就想食糖喎, 咁 ARM 有一粒糖跌左落地下喎, 咁咪諗住益佢啦, 點知隻衰狗一啖咬左落黎, 好彩冇傷到O者! 大致上今日係咁啦! 不過我今晚仲會O係屯門過夜架, 星期二先會返屋企!
今日有人熱死左呀, 真係慘喇!

今朝依然係一早俾我細表妹嘈醒左, 我諗真係好耐未試過連續幾日咁早醒喇! 中午果陣就去左同我大表妹食飯, 因為佢返學放 LUNCH 呀嘛! 之後就去左行左一陣, 今日大致上只係睇下電視咁啦, 冇咩特別野發生, 所以都冇咩寫喇!
今日都幾涼, 有少少風咁啦!

今朝都仲係七點幾醒左喇! 大致上今日冇咩做過, 夜晚八點幾開始起程番屋企喇! 估唔到只係用左一小時就由屯門番到屋企喇! 你話幾快呢! 我表弟寫左個網頁呀, 大家有時間去睇下啦!＜請按＞; 我發覺原來我幾失敗架, 一直以為好了解人地諗Ｄ咩野, 原來我只係自欺!
希望我表弟同表妹生性啦!

今日都終於可以訓餐飽喇! 訓到成十一點幾先起身, 之後做下功課, 落街買下野咁啦! 大約五點幾就出左去尖沙咀諗住行下街咁啦! 去左ＨＭＶ睇ＣＤ呀, 真係勁多ＣＤ想買呀, 不過最後都只係買左一隻價值二十蚊O既陳慧嫻O既舊ＣＤ, 之後又去拎左隻９０３O既ＣＤ－ＲＯＭ, 好正架, 唔洗錢架, 只要你有９０３ＩＤ咭, 就可以拎架喇! 之後由尖沙咀行去佐敦返學, 遲左ＤＤ喇! 不過發生左一件好怪O既事, 我唔係好明白囉! 事源係因為我遲左少少, 所以我坐開果個位俾果個多口O既同學坐左喎, 咁咪唯有坐第二度啦, 機緣巧合咁坐左O係"佢"隔離, 我都算係咁啦, 我有開口問佢有冇人坐架, 佢話冇我先坐O既, 隔左一陣, 佢竟然坐左去再隔離個位喎, 好唔明白點解囉, 可能佢驚有人講閒話啦(因為有幾個人番果陣都講左少少野), 就係咁, 我有少少唔係太開心, 不過而家冇野喇! 返到黎屋企, 睇完有"洪天明"O既獎門人, 點知"小強"又再出現喇, 又係識飛架喎, 今次我冇咁驚喇, 冇法子啦, 一定又係我處理佢! 我今日突然諗起一句說話, 記得有人講過: "理想O既婚姻就係同一個你愛佢９９分而佢愛你１００分O既人結婚, 咁樣你就可以永遠有一份被愛O既感覺", 但我知道, 我永遠都等唔到呢個人, 永遠都等唔到呢段＜理想結婚＞, 因為我有一個缺點, 就係當我愛一個人O既時候, 往往會越黎越愛佢, 就係咁, Ｄ男仔會覺得好大壓力, 所以往往就唔會長久, 結論亦係唔會得到一段"被愛"O既婚姻! 我係咪越黎越灰呢?!
剛剛聽收音機, 話原來 BEYOND 成日做果個手勢係代表"魔鬼"架喎!

今朝勁早醒左呀, 六點幾就俾Ｄ風嚇醒左, 一直開視睇風暴消息, 估唔到竟然天文台本來話唔會打得成O既呢個風, 竟然會掛到十號咁勁! 今日真係好驚架, 我驚個窗會吹左落街呀, 好彩得個驚字O者! 本來諗住今日落街買燈膽架, 因為尋晚洗手間盞燈燒左呀! 點知十號風, 冇理由仲出街架! 仲有喎, 今日個電話好旺呀, 成十幾個人打黎搵我傾計, 唔通一打風冇事做就傾電話? 不過都好開心, 因為有好多人都好耐冇傾過計喇!
有少少作病添!

今朝都幾早醒左, 原來尋晚十號風球攪到我四份一張床濕左喎, 攪到尋晚即刻再拿野整乾張床! 真係慘! 夜晚都係要返學, 今晚要 TEST UNIX 呀, 好彩我都識少少啦, 之後好慘做ＬＡＢ, 部死人機又衰喎, 整左好耐都安唔到張 NETWORK 咭, 原來係部機有問題, 所以攪到本來九點走得, 但係攪到成九點七先走到! 攪到好似留堂咁!
我約左個舊同學聽日行街呀!

今朝八點幾就起身喇, 因為約左一個朋友下午去行街, 驚唔知醒要人等就唔好啦! 之後我就上左好耐網呀, 因為亞妹俾左個大學上網 ACCOUNT 我用, 所以可以上咁耐網囉, 不過唔知點解佢睇到網頁我睇唔到喎, 大家如果知原因O既話話我知喎! 之後坐巴士出左旺角會合我朋友, 行左成個旺角呀, 主要係想睇下邊間唱Ｋ正Ｄ, 因為我地成班諗住十月一日去唱Ｋ, 梗係搵間正Ｄ架啦, 我地成九個人架! 行完旺角之後就坐車去左尖沙咀行, 同埋食晚飯, 行到好累架都, 不過我見到個人喎, 係一個我幾鍾意O既人, 係邊個呢? 大家估唔到架喇, 因為我未講過俾人知我幾鍾意佢同欣賞佢架! 唔好估喇你地, 等我話俾大家知啦, 佢就係杜汶澤喇! 佢做劇真係好正架喎! 雖然我好少睇亞視, 不過今次係我第三次見佢喇! 仲記得第一次係O係一年多前, O係金鐘地鐵站見到佢, 當時佢望住我笑左一野架! 之後冇幾耐再O係佐敦見到佢同佢女朋友行街, 我又望住佢, 佢又同我笑左一野, 今次O係尖沙咀見到佢同田蕊妮一齊行(唔係拍拖), 同我迎面而黎, 我又望住佢笑, 佢又同我笑左幾野, 然之後同我擦身而過, 感覺上佢真係好正喎! 最衰每一次我都冇機會上前話佢知佢做劇真係好正! 我而家好希望我第四次見到佢果陣, 我有咁O既機會啦!
今日我大表妹生日呀, 生日快樂!

今朝訓到十點幾, 之後做左一陣功課再打左一陣電腦, 之後就食下野咁, 就出左去銅鑼灣, 因為約左以前 YWCA O既同學聚舊, 點知約四點, 都唔齊人喎, 所以就去左加洲紅唱住歌等喇! 其實如果多人去加洲紅唱O既話, 都唔算太貴, 同其他果Ｄ差唔多, 仲有呀, 用 903ID 咭, 仲有八折添! 之後就去左食飯喇! 去左"蕉葉咖喱屋"食, 不過唔係太好食; 再之後就落左 BAR, 真係勁正呀, 我好耐冇落過 BAR 喇! 仲學識左玩"色"盅添, 唔知係咪太耐冇飲過呢, 所以飲得好好好開心, 最衰唔係係我屋企附近啦, 如果唔係可以勁飲啦, 因為驚冇人送我返屋企呀嘛! 玩到大約十一點幾就開始返屋企喇! 原先都冇人送我返屋企架, 因為佢地個個都覺得我呢頭好安全, 但係之後發生左一段小插曲, 所以我好安全咁有兩個男仔送我返屋企喎, 不過佢地好攪笑, 我懷擬佢上我屋企O既目的係借洗手間, 不過都真係好多謝佢地O既, 因為返到我屋企都成十二點半咯, 最衰佢地都有女朋友啦, 如果唔係 ... ... 哈哈! 今日得閒果陣我諗到樣野喎, 唔知大家有咩經歷呢? 我發覺送俾情人第一份禮物好難諗, 其實最難諗O既係送俾佢O既最後禮物, 回想起我以往呢兩段唔正常O既感情生活, 我所得到O既最後禮物不約而同地都係一封信! 當然就好似有一首歌咁, 呢兩封曾經係我O既＜傷信＞啦, 唔知係咪我真係唔聽人講野呢? 所以Ｄ人都要寫信話俾我知唔再愛我? 呢Ｄ傷信, 的確係令我傷心過架, 不過而家有時拎出黎睇番都幾攪笑架, 因為我發覺到佢地兩個都好多錯字, 亦表達唔到個 MAIN POINT 囉! 以前睇住封信, 肯定十包紙巾都唔夠我用, 不過而家睇番, 自己會諗: 果陣要生要死, 我而家咪生活得好好! 所以我覺得我真正長大左喇! 知道咩人適合自己, 唔會再揀錯, 不過正如某電影所講: 感情路一定會行錯, 兜兜轉轉發覺真命天子原來一早就出現左! 可能就係咁, 我地先學會珍惜, 正如我成日所講: 珍惜眼前人!
今日之後我發覺我幾想拍拖!

由於尋晚太夜訓同埋飲左酒, 所以今日訓到成兩點正, 尋晚成四點幾先訓, 因為上網同埋睇下電視咁啦; 最新消息話失業率又升左喎, 死啦, 咁又點有人請我呢? 人工又下調, 呢個咩社會黎架? 仲有呀, 我前幾日咪去左新世紀o既, 我唔記得左講, 我果日見到隻人扮o既麥嘜呀, 好可愛架, 真係想同佢影張相呀, 不過冇相機! 今日都做過功課架, 仲有做運動添! 睇下我生活幾健康! 睇完我表弟網頁o既日記, 我好膽心, 我覺得佢諗埋一邊, 我知佢而家好唔信我呢個表妹架喇! 我好唔明白而家o既年青人點諗野, 自問我冇做過Ｄ咩丫, 十六歲仔, 何必咁執著呢? 咁樣會令到自己好辛苦架!
星期三有測驗添!

嘩! 今朝一起身睇電視, 就睇到台灣地震呢單新聞, 真係嚇死我呀, 因為我有個朋友前幾日去左台灣玩, 所以我就即刻打佢手提睇下佢番左黎未, 點知佢飛左落留言信箱喎, 咁我留話叫佢覆電話俾我啦, 點知等到成三點幾佢先打俾我喎, 原來佢尋日番左黎架喇, 唔記得左飛條線番屋企o者, 嚇得我丫, 佢話本來諗住玩多一日架, 不過佢有個朋友請唔到假, 所以尋日番左黎, 諗諗下佢真係好彩, 因為佢係上星期五先去o既, 果日又剛剛打完十號風球喎, 尋日番到又避過左台灣大地震喎, 真係好感謝神, 不過我都好希望唔好再咁多天災喇! 因為真係好多人死傷呀, 我睇新聞果陣睇到我打冷震同標冷汗呀, 因為真係非常之恐佈! 另外呢, SAMMI 首新歌好好聽呀, 叫做＜插曲＞!
今晚自制壽司, 不過食完之後頭痛!

今朝都一早起左身, 不過係咁睇電視同埋同個舊同學傾電話, 一直到一點幾先出房門口, 不過我發覺今日天氣涼左少少, 睇黎我健康都有少少問題, 因為我好易覺得凍呀, 唔知係咪食冇定時之過呢? 之後就開始溫書喇, 夜晚返學要測驗喎, 但係真係完全考天才, 睇黎完全唔樂觀喇! 不過預左架喇! 因為我真係唔係好識!
就黎中秋節啦喎, 大家有咩節目呀?

今日成朝都係睇電視, 不過下晝有個朋友打黎同我傾左成半個鐘頭! 好攪笑架, 我地傾過幾日約出去邊好! 點知傾左咁耐都冇結果喎! 所以都係果日出到黎先算啦! 大約三點幾我落左街租碟喎, 今日租左隻正戲呀! 叫做＜WHAT DREAMS MAY COME＞, 大家有冇睇過呀? 呢套戲對我黎講好深刻架! 除左個故事好正之外, 其實以前陳奕迅有隻ＣＤ係有佢O既獨白果隻呢? 其中有一段就係講呢套戲架喇! 內容係咁O既:
冇人呢會諗過我地會分開架! 原因? 我唔介意講第 28 次o既......
果日睇完戲 係講一對夫婦死左
原本上天堂o既老公 點都要落地獄搵返佢老婆
行出戲院 佢就問：
「如果佢係地獄 我會唔會一樣唔理咁多去搵佢?」
當時我只係望實佢 唔識答 結果佢梗係好唔開心啦
第二日 我地平時一樣一齊返工、食 lunch
然後佢又等埋我放工 但係我好驚呀
因為Ｄ感覺已經唔同晒
到第四日 我終於都同佢講：「我地要分手呀!」
佢好似有左絕症咁聽我講落去
我話：「果日你咪問我會唔會落地獄搵你o既?
於是我話：『我地已經日日一齊對住啦,
如果係要落地獄, 點會係你去o者?』
然後我就知 我地根本唔係o係一齊......」
做咩呀? 唔明呀? 唔緊要 你同佢仲有好多人都唔明
大家明唔明呀? 我明少少架都! 呢套戲的確好感人, 完全值得睇架!
聽晚我去我亞姨度做節呀, 你地呢?

雖然而家只係早上時間, 但係尋晚o既經歷已經足以寫今日o既日記, 話說尋晚我好開心咁上網呀, ICQ 呀咁啦! 點知突然間我發覺我個 MOUSE 極唔受控制喎, 好驚好驚, 因為一時受控, 一時極唔受控, 所以我以為俾人 HACK 機啦, 點知 OFFLINE 左 BOOT 埋機都仲係咁喎, 所以把心一橫, 將個 MOUSE 由頭再安裝過, 點知 ... ... 安黎安去都安唔番個 MOUSE 喎, 好邪囉! 我好肯定唔係有人 HACK 我機, 亦好肯定我O既安裝方法係冇問題O既, 但係點都安唔到, 所以我打俾 KAZU 求救喇! 點知佢都唔知點解喎, 攪到我好冇禮貌咁 CUP 佢線, 諗番起真係痴線喇自己! O係呢度同佢講聲十分唔好意思! 之後打俾亞妹啦! 佢個朋友話可能係我隻 MOUSE 本身壞左! 諗諗下又似係喎, 亞妹叫我試下用手寫版睇下個 CURSOR 郁唔郁到, 又郁到喎, 即係係呢隻我不嬲好好對佢O既 MOUSE 出左事! 唉 ... ..., 點解我屋企Ｄ野成日都唔領我情架! 一陣我就會去我亞姨度做節喇! 估唔到要帶住呢段"壞鼠"之痛去做節! 大家有咩意見呀? 會唔會有第二Ｄ原因令到隻 MOUSE 咁呢?
祝大家中秋節快樂! 人月兩圈圓!

尋晚中秋節好開心呀, 夜晚落左去賞月喎, 玩到成點幾先返上樓, 好有氣氛呀, 不過最衰睇唔清個月啦, 因為座樓高過頭, 之後成三點先訓呀, 但係好邪喎, 三點鐘有個人打黎, 但係唔知邊個黎o既, 咩都冇講就收左線喇! 訓到今朝十點起身, 再同亞姨佢地去左飲茶呀! 食得非常開心, 之後太約兩點幾就同我舅父坐車出番九龍區喇! 之後我去左買 MOUSE 呀, 果然真係我以前隻 MOUSE 壞左呀, 嚇得我丫! 好累呀而家! 大件事喇! 今個月手提面臨爆鐘呀, 而家只係剩番十分鐘咋! 仲要用到下個月 10 號呀, 救命呀! 點算好呀, 衰啦我, 尋日都用左成 50 分鐘咯! 大件事!!!
又打風喇! 聽日去唔去得成呢?

今朝完全係凍醒, 因為今朝又落雨又好大風喎, 所以凍醒左囉, 但係我好鍾意呢種天氣喎, 好過熱都暈嘛! 本來今日約左人去街架, 不過打風天氣又唔定, 所以取消左, 應該改下星期日, 好過冇得去o既! 而家我睇緊ＴＶＢO既＜送暖到台灣＞, 雖然好佩服香港人O既速度同埋愛心, 但係我有個問題, 我覺得ＴＶＢ有樣野唔應該做架! 是晚入場O既朋友們, 都會得到一個心型汽球同埋電筒仔, 而所有台前幕後人員都會著住一件特別印O既衫, 我O係度諗, 點解ＴＶＢ唔將呢Ｄ錢捐埋去台灣O者? 雖然唔係好多錢, 但係少少無驅嘛! 其實我覺得應該將節目期間O既廣告收入捐埋佢, 因為成日口口聲聲話幾有愛心, 點熱心咁, 咁解得咁少錢先? 大家話係唔係先? 又唔見果Ｄ咩太平坤士出黎勁捐喎, 果Ｄ乜醫院物醫院果陣, 又勁多乜鬼太平坤士出黎交收支票, 簡直係偽善, 唔通唔係捐番去自己醫院, 冇著數, 咁就唔捐? 我好希望如果有呢Ｄ人睇到我呢段野, 反省一下唔該! 唔好剩係掛住去睇六合彩攪珠!
好希望大家捐錢幫下台灣啦!

今日訓到十二點幾呀, 之後有個朋友打黎約十月一日去街街, 之後又有人叫我聽日去見工喎, 不過我覺得都幾難見得成! 但係我會盡我o既力去見o既, 有得見好過冇得見嘛! 之後我落左去銀行喎, 入票同埋捐錢, 雖然唔係捐左好多, 但係都叫做出左一分力嘛! 希望大家都以自己o既能力去捐錢啦, 幾蚊都冇所謂架! 今日食左一餐咋! 都唔肚餓, 唔知點解呢, 可能前幾日勁食啦! 聽晚約左我契姐食飯同買飛呀, 買咩飛? 唔話你地知住, 遲Ｄ先講你地知!
今日少少熱添!

今朝好早起身呀, 因為要預備去見工嘛, 雖然約左下晝三點幾, 但係點都要早Ｄ起身O既, 到左兩點就出門口喇! 因為早到我等佢好過佢等我嘛, 架巴士總站係瀝源, 而我O既目的地係小瀝源, 一心諗住係O係附近, 點知聰明反被聰明誤呀, 地方名差一個字, 原來差好鬼死遠架, 攪到我要轉巴士去, 最後大家估下我幾點先去到? 我三點半先到呀, 好彩冇遲到O者, 去到要填表啦, 之後仲要有個小測驗, 好彩我有七十幾分, 算係咁架喇! 我都係尋晚先學廣東拼音輸入法, 之後要去 CANTEEN 等嗌名, 等到成四點八到先叫我入去面試, 問左我勁多野呀, 例如家庭背景, 工作經驗等等, 又要講英文同普通話添呀, 好彩佢都明我講乜, 有講有笑咁, IN 我果個女人又好好笑容喎, 見到大約五點二到, 就走得喇! 話一星期內會有結果喎, 不過我都覺得應該唔會請我架喇! 因為份工要輪班O既, 果位女仕知我一星期有兩晚要返學, 話好難就時間喎, 我都冇咩所謂啦, 起碼我用盡左我O既能力去見呢份工, 就算唔請我, 我都對得自己O既! 之後唔知好彩定唔好彩, 竟然O係見工果座野對面搵到一架可以到我屋企O既車喎, 有少少激氣架都, 唔洗十五分鐘就返到屋企附近喇! 我仲去行左一陣添, 買左份禮物俾我一個聽日生日O既朋友, 不過我肯定佢唔 ARM 用架! 但係是但啦, 用就用唔用就算啦! 因為都唔知送咩好! 仲有呀, 因為今日見工, 所以改左期去買飛!
嘉倫仔仔又就黎生日喇! 又諗唔到送咩添!

今日訓左好耐呀, 因為前幾日都訓唔好, 所以今日又冇咩特別野做, 咪訓多Ｄ囉! 之後食左個麵咋, 因為唔想落街買野嘛, 食完就洗左地喎, 冇野做咪洗下囉! 夜晚要返學呀, 都冇咩特別丫, 實會見到佢架啦, 今日佢仲坐我後面, 我都有傳張點名紙俾佢架! 睇下我幾乖! 其實改左聽日先去買飛架! 估到我去買咩飛未呀?
今日係我朋友"變態仔"O既生日, 祝生日快樂!

今朝訓到十點幾俾個電話嘈醒左喎, 之後就起身煲左碗粥食喎! 再之後打左一陣機啦, 又聽左一陣歌啦! 之後約左我二家姐去行街同埋買飛, 大家估到我飛未呢? 大家再估下先啦!
今晚二家姐o係我屋企訓呀!!!!!!