背景音樂 : BEAUTIFUL LIFE
| 1/8/2000 |
|
今日個頭好鬼痛呀, 我真係唔知係咪又作病呢, 天氣涼左好多, 不過就不停咁落雨, 但係我都覺得唔錯, 只係希望聽晚返學果陣唔好落雨就ＯＫ喇!
今日都冇出到街, 因為落雨嘛, 所以成日O係屋企冇所事事, 不過就一口氣翻睇左張小嫻O既＜再見野鼬鼠＞,
其實好耐都未試過睇書會喊出黎, 試過冇數次眼濕濕, 但係今日睇完成本書真係喊到收唔到聲, 好感人呵!
尋晚訓唔著, 心血來潮咁拎番本日記出黎睇(真實版日記, 唔係 CYBER 日記!), 睇番幾年前O既我係好鬼傻架喎,
想做就去做, 但係自己又偏偏負唔起後果, 係典型O既蠢女人! |
| 2/8/2000 |
|
今日天氣唔好, 因為不停咁落雨, 不過好彩我返學果陣冇落過雨(但係我有帶傘), 返到學校都係會見到佢架啦,
不過我今日O既狀況麻麻地, 唔知係咪前幾日都訓得唔好, 我今日條頸有少少痛, 唔知有冇關係架呢?
尋晚上網諗住去"博學堂"訂書, 點知 ... 執左笠喎! |
| 3/8/2000 |
|
今朝俾一連串O既雷聲嚇醒左, 落雨O既情況更加係嚇人! 訓到十點令就俾個電話響醒左, 其實都訓得唔係咁好架喇!
所以傾完個電話就起左身喇! 尋日好開心呀, 因為收到一位日本少女O既 EMAIL, 識我O既人都可能知道我非常鍾意日本呢個地方,
我亦好希望能夠同呢位日本少女做到好朋友啦! |
| 4/8/2000 |
|
今朝好早起左身喇, 但係成身都好累, 相信係作病喇, 希望快Ｄ好番啦! 基本上今日都係勁落雨, 夜晚係返學時間,
當然亦見到佢啦, 放學O既時候, 佢同佢Ｄ朋友行我後面, 出奇地今日佢坐地鐵走喎, 唔知係約左人丫, 定係地鐵可以返到佢屋企呢(只係平時唔係坐地鐵)? |
| 5/8/2000 |
|
我尋晚上網果陣發現左一個好正O既野呀, 就係可以用電話留言再O係 EMAIL 收聽到, 真係太正喇! 方法如下:
1)用電話打: (852) 8102 1400 |
6/8/2000  |
|
今朝好早起左身, 因為約左兩個朋友去行街街, 但係好可惜佢地兩個都遲到(遲左十個字), 梗係嬲啦我, 不過算啦!
行左好多地方呀, 我仲買左三件衫添呀, 其實仲有勁多件衫我好想買架, 不過貴丫! 仲有買左梁芷珊O既＜我愛的人愛我的人＞,
不過遲左一步丫, 如果早Ｄ見到我就會買張小嫻O既＜麵包樹出走了＞(因為係我勁鍾意O既＜麵包樹上的女人＞O既延續,
不過遲Ｄ一定會買O既! 大家知唔知今日係咩日子呢? 今日係"七夕"(即係牛郎同織女一年見一次面O既日子),
唉, 我幾時先唔洗一個人過呢? |
| 7/8/2000 |
|
今朝好早醒左呀, 唔知點解呢, 尋晚我睇梁芷珊本＜我愛的人愛我的人＞睇到成兩點幾, 因為確實幾好睇,
雖然呢本書係好多年前寫O既, 文筆冇而家咁好, 不過Ｄ內容幾好睇; 今日收到我夜校同學個電話, 知道左本教科書送左去佢屋企喇,
不過要等佢家姐得閒先拎去佢公司, 然後我先可以去佢公司拎(因為我呢位同學而家唔O係香港), 不過真係希望快Ｄ拎到手啦,
因為又要做功課, 又就黎考試! |
| 8/8/2000 |
|
今朝訓到十一點幾, 可能係尋晚夜訓左少少啦, 不過今日起身都唔係咁舒服, 硬係好似好唔自然咁O既, 唔通係因為天氣太熱?
講起天氣, 我真係覺得天氣比起女人更難以估計, 完全可以無端端落大雨, 無幾耐又出哂猛太陽咁, 善變!
聽日就係會考放榜O既日子喇, 唔知各會考生有咩心情呢? 我諗應該係幾緊張O既, 諗番起幾年前我放榜前夕,
真係會訓唔覺架, 壓力當然會有啦, 因為可能成世都冇機會再讀書架嘛, 不過大家唔洗咁緊張, 因為都已成定局喇,
盡左自己能力問心無愧咁就得啦! |
| 9/8/2000 |
|
我雖然唔係應屆會考生, 不過我尋晚都係失眠左成晚, 攪到今朝五點幾先訓左一陣! 今日可以用一個成語表達到,
就係"悲喜交集", 話明係悲O既就無謂去講, 只係希望快Ｄ平平安安過渡! 而喜O既事, 其實都同件悲事有少少關係,
夜晚返學果陣個腦就勁擔心件悲事, 一直唔知點算, 咁諗諗下我諗"佢"可能幫到搵到Ｄ資料, 幫到件悲事,
所以我幾厚面皮O係放學果陣請佢幫我搵Ｄ資料, 好彩佢都好肯幫我, 其實幾感動架, 因為我覺得咁樣去問一個平日連計都冇咩傾過O既同學,
請佢幫我一個忙, 其實佢可以唔幫我架, 但係真係好多謝佢肯幫我呢個忙, 總算踏出第一步! By The Way, 我今日去左行旺角喎,
一落車就見到馬德鐘o係度買緊Ｄ假O既花, 呢一次係我人生第二次見到佢真人! |
| 10/8/2000 |
|
尋晚真係成三點幾先訓得著, 可能係擔心啦, 真係希望快Ｄ解決件事啦! 今日成個人都唔多自然, 睇黎都似就黎病喇,
斯斯真係唔爭氣, 成日都咁易病! 唔知咩原因呢幾晚都俾我一種好靜O既感覺, 好似冇咩人氣咁, 唔知係咪因為暑假,
附近O既人都出國旅行呢? |
| 11/8/2000 |
|
今日心情唔錯, 可能係尋晚同到"某人"傾左成晚 ICQ , 知道佢同我一樣係勁鍾意 SAMMI , 真係幾開心! 其實我都有少少驚佢會睇到我O既日記,
因為一來驚嚇親佢啦, 我直覺覺得佢應該知我留意左佢好耐, 但係我真係好驚佢睇完會同我講佢其實對我冇感覺,
我係一個好典型O既天蠍座女仔, 個腦一定唔會停咁亂諗野! 原來我O既直覺真係有番兩度呀, 佢真係有女朋友,
佢仲好似知道左添, 佢會唔會仲同我做朋友呢? |
| 12/8/2000 |
|
呢幾日都冇"私夢記"呀, 因為連覺都訓唔到, 更何況發夢? 尋晚果件事其實仲有下文架, 攪到我都唔知點算好,
應該夢醒定發落去呢? 佢講O既說話真係好"玄", 只係問佢有冇女朋友, 答完攪到我頭都大埋! 尋晚一直眼光光到今朝五點幾,
心情係幾唔知點咁, 想喊又喊唔出(因為唔知為咩要喊!), 想好好訓一覺又訓唔到(因為又唔係咁安心!), 總之成晚個腦都唔知仲乜咁!
今朝未夠十點就醒左喇! 今日都一早出左去個親戚度, 剛剛返到屋企冇幾耐咋, 所以都有少少累! 其實今日個腦就好似失落點唱機咁,
不停不由自主咁響起歌曲, 例如: 宿命主義, 內心戲, 我好想他, 眼淚, 對一個愛錯 ... ...! 唉, 除左呢個字之外,
相信冇第二個字更貼切咁形容我而家O既心情! |
| 13/8/2000 |
|
尋晚亦係一個失眠夜晚, 直至今朝四點幾先訓得著, 可能因為已經有好幾日冇覺好訓喇, 所以今日訓到成一點,
本來諗住落街買Ｄ野, 不過冇乜心情去, 所以成日都O係屋企冇出過去! 只係O係屋企睇電視, 唱下歌咁又一日喇,
今日有機會翻睇幾個月之前我曾經讚過好睇O既一套實驗電影＜死蠢＞, 實在好有意義, 攪到我呢個淚管閉塞o既人,
頓然間變作一個淚人, 之後突然間好想唱歌喎, 所以又勁播自己鍾意O既唱片, 點知又唔知仲咩又勁喊,
可能我尋晚寫完"寫我心"裡面O既＜眼淚配額＞, 上天真係配多Ｄ俾我掛! 如果係的話, 個天真係待我不錯! |
| 14/8/2000 |
|
今朝鬧鍾響我都冇反應呀, 直到十一點幾有個朋友打黎約我去飲茶我先知醒咋, 飲完茶之後我就去左行文具店,
我好多年冇行過喇, 最後買左一包紙黏土, 因為突然間好想玩, 返到屋企即刻玩, 終於O係個幾鐘頭O既努力之下,
整左兩個生日蛋糕出黎, 因為就黎有朋友生日喇, 咁咪諗住試下整得靚唔靚囉, 等個蛋糕乾左就可以上色喇,
本來我想買埋盒水彩架, 不過估唔到而家Ｄ水彩咁貴架喎, 最衰果陣掉哂Ｄ水彩啦, 因為果陣讀 FASHION DESIGN
好少用得著水彩, 多數用 MARKER 同埋粉彩, 不過屋企仲有幾支油彩, 唔知夠唔夠色油呢? |
| 15/8/2000 |
|
尋晚總算訓得幾好, 不過都成三點鐘先訓得著; 基本上我今日都冇出到街, 因為天氣都係熱左少少, 而且我冇咩 MOOD 行街,
所以咪O係屋企無聊下囉, 尋日整O既紙黏土蛋糕乾左喇, 所以我試驗同油彩上色, 點知原來係唔靚架, Ｄ色太實,
攪到好假咁, 我諗都係要去買盒水彩先得喇! 呢排都有寫文章, 今日都唔例外, 大家有興趣的話, 請按(回憶包袱) |
| 16/8/2000 |
|
呢幾日訓得都唔錯, 起碼唔會再眼光光等天光, 不過夢就欠奉喇! 尋晚好慘呀, 因為有隻小強探訪我呀,
我真係俾"佢"嚇到半死咁滯, 又冇人救到我喎, 最後困左"佢"O係洗手間, 我就用殺蟲水攻勢, 今朝好驚咁開番度洗手間門,
但係搵哂成個洗手間都唔見任何野喎, 希望"佢"放過我啦, 唔好再O係我面前出現啦, 求求"你"啦! 之後有個朋友黎搵我,
因為佢想買電腦, 一睇之下先發覺原來而家Ｄ電腦都幾多野架喎, 又多野送, 仲可以分期付款添, 我買呢部新機果陣都冇O既!
夜晚亦係要返學, 終於都等到呢一晚喇, 見到某人, 換左個新髮型喎, 基本上冇傾過計, 感覺怪怪地咁, 我亦感覺到佢覺得我有少少尷尬,
其實真係唔係咁想出現呢個情況, 但係冇計啦, 佢又唔肯講有冇女朋友, 我唯有係控制一下自己O既感情! |
| 17/8/2000 |
『祈求天父做十分鐘好人 賜我他的吻 如憐憫罪人 我愛主 同時亦愛一位愛人 祈求沿途未變心 請給我護蔭』一早都應該知道自己O既直覺係好準確, 應該一早相信! 一直以黎驚O既事尋晚終於發生左喇, 不由得我不相信自己O既直覺, 佢向我暗示佢已經有女朋友, 一下子知道呢個消息, 除左唔知點樣面對之外, 個腦只得一片空白! 我發覺原來一早預知O既結果, 一早諗定O既應付方法, 到真正要發生一刻係完全用唔著, 尋晚對住部電腦唔知為乜, 就連同好朋友傾計O既心情都冇埋, 咩都唔想講, 夜晚完全訓唔著, 只係望住個應該好靚O既月光發呆, 到左凌晨三點幾, 不覺間不停咁喊, 就連自己都唔係咁明白自己, 成晚都冇訓到, 充滿左不安O既感覺, 相信大家會有好一段時間見唔到我上網, 只係會睇到我O既日記, 希望大家呢幾日都唔好搵我喇, 我需要靜一靜, 不過大家唔洗為我擔心, 因為相信係我自己傻, 千萬唔好影響到大家O既生活! 以往就算失戀都冇試過呢種感覺, 真係發覺原來自己係好唔了解自己! 但我會好傻咁選擇『等』! 『然而天父並未體恤好人 到我睜開眼 無明燈指引 我愛主 為何任我身邊愛人 離棄了我下了車 你怎可答允？』『等待』雖好像沒有用途，但這是我的選擇，請見諒！ |
| 18/8/2000 |
|
我Ｄ失戀後群症又出哂黎喇, 雖然今次唔係失戀咋, 但係仲勁過以前果兩次失戀呀, 失戀後群症包括:
一係失眠, 一係訓到好似死左咁; 一係勁食野, 一係見到野食會作嘔反胃; 平日完全唔食辣野架, 但係無端端又食勁辣;
情緒好極端 ...; 夜晚返學呀又要, 當然亦會見到佢啦, 無同佢傾過計呀, 因為見佢個樣都幾唔掂, 我覺得佢有唔開心O既,
不過算啦, 唔知呀! |
| 19/8/2000 |
|
今朝一早起身沖涼洗頭, 因為約左幾個親人去飲茶, 見番一個有一段日子冇見o既舅父, 飲完茶之後就同兩個亞姨去左行街街,
不過就發生左段插曲, 都幾驚心架, 識我o既人都知我絕對唔係一個會歧視人o既人黎架啦, 但係就o係行某商場時,
突然間我同我表弟俾一個精神有少少問題o既青年人跟住, 仲要有少少惡添呀, 嚇到我地真係笑都笑唔出呀,
幾經辛苦先冇事咋, 其實真係唔知點解無端端會咁樣, 希望以後唔會再有呢Ｄ事發生啦! |
| 20/8/2000 |
|
今日我發覺左最有效O既減肥方法, 並唔係節食做運動, 而係唔開心, 我今日磅過, 竟然比起上星期輕左成八磅,
短短呢幾日真係完全唔吸收, 因為呢幾日真係唔開心! |
| 21/8/2000 |
|
今日開始做功課喇, 因為無論心情如何都係要做O既, 而且我仲要早少少做起再溫考試, 呢份功課要寫大約二千字啦,
今日寫左一千字, 但係都好似未到正題咁, 仲要講好多野, 但係又唔知點講好, 其實都係驚答錯題, 因為做左一半之後,
我都唔係好知自己答左Ｄ咩, 真係唔得掂, 不過希望我會做得掂啦! 呢幾日O既新聞都唔係咁好, 入境處處長無辜犧牲,
俄羅斯O既潛艇相信冇生還者, 呢Ｄ新聞聽完之後真係好唔舒服! 尋晚睇某節目, 原來香港每一日都有數以千噸計O既食物垃圾,
睇左之後真係覺得好折墮, 大家諗下每一秒鐘都有人餓死, 冇啖好食, 但係只係一個香港, 每一日都有咁多食物係浪費架!
唔該果Ｄ浪費食物O既人反省一下, 真係會折褔架! |
| 22/8/2000 |
|
呢幾日我Ｄ惡性循環又發入喇, 前幾日失眠, 呢幾日訓到好似死左咁, 十幾個鐘冇醒過, 你都咪話唔驚;
今日冇做過份功課, 因為真係想諗清楚Ｄ先再做埋佢, 我希望呢幾日可以完成到啦! 心情好番Ｄ掛, 時好時壞咁,
其實我都唔知幾時先會冇事, 不過一切順期自然啦! 今日睇新聞話俄羅斯隻潛艇O既核子對香港冇影響, 我聽完之後第一個反應係好不安,
因為覺得好似講風涼話咁, 唔通真係『事不關己, 己不勞心』, 不過呢件事令我幾唔開心, 因為國家面子問題,
而令百幾人死亡! 住我樓上果家人個冷氣機又勁滴水喇, 係滴到好似落微雨咁, 投訴極都冇用, 唉! |
| 23/8/2000 |
|
今日天氣真係麻麻地, 除左落雨之外, 仲要行雷閃電添, 希望今晚訓著左之後唔會俾Ｄ雷嚇醒啦, 因為我會嚇到喊架,
呢樣係真事黎O既! 基本上冇咩點做過份功課, 因為仲未知仲要寫Ｄ咩; 夜晚要返學, 仲要係呢一科最後一堂, 都係講下考試Ｄ題目咋,
不過, 佢冇返到學, 我直覺話我知佢近排有Ｄ事發生左, 不過係咩事我就唔想去諗喇! |
| 24/8/2000 |
|
今日都係依然冇做到功課, 因為我真係冇咩 IDEA 去做, 不過訓醒左之後就落左街買野, 買左隻＜孤男寡女＞O既ＶＣＤ,
真係好鬼好睇架, 好好笑, 真係值得睇! |
| 25/8/2000 |
|
依然係冇咩點做過份功課, 因為實在唔知仲有咩要寫! 其實呢幾日都將Ｄ野諗番轉頭, 不止十次諗番佢同我講O既野,
究竟係咁意思, 唉, 我就黎諗死架喇! 今日都有落街, 因為要買郵票寄信俾我一日本O既筆友, 都唔錯架, 可以學下日文,
佢又成日話Ｄ日本新鮮野俾我知! 買郵票果陣發生左件幾好笑O既事喎, 話說我去到郵局, 問果位人兄寄去日本幾錢啦,
佢就話係 $3.1 , 之後我話：『咁你可唔可以俾五個我呀?』, 點知佢笑住咁話：『梗係可以啦, 點解唔可以呀?』,
之後我又覺得自己問得好攪笑, 咁我就笑笑口咁走左喇! 相信我呢兩個星期都係冇覺好訓架喇, 因為除左某件事煩之外,
仲要做功課, 更加要預備考試, 我真係冇咩信心添, 係呢三樣野都冇咩信心!
|
| 26/8/2000 |
|
今日十一點幾起身, 其實都冇咩特別架, 我做功課做到五點鐘到啦, 之後就落左街買原子筆, 因為我用開果支用完,
本來仲有其他筆O既, 不過硬係唔夠我用開果隻牌子果隻款好用, 所以都要落去買番支囉! 份功課仲未做完架,
不過就仲未知仲可以寫Ｄ咩! 呢幾日我成日都 UPLOAD 唔到個網頁喎, 都唔知係 HONGKONG.COM 有事定係我 UPLOAD 軟件有事,
其實可能係我有事? 希望盡快冇事啦! 尋日又聽到一個好唔開心O既消息呀, 亞敬佢出埋呢隻個人大碟之後唔會再做幕前唱歌喇,
只係會專注幕後作曲監製呀咁, 夾下 BAND , 再出碟相信只有等佢隊 BAND 出碟先有機會! |
| 27/8/2000 |
|
今朝十一點令俾一個電話響醒左, 係我間手電公司打黎, 因為我由四月尾申請自動轉賬, 但係竟然到而家都未做到,
手電公司又話係銀行問題, 但係試問如果一間銀行收到呢Ｄ指示, 會唔會唔理果Ｄ表格呢? 我真係好嬲架,
因為大大話話成三個幾四個月啦, 我亞姨遲過我出號碼, 上個月都攪掂左啦! 今朝個電話果個人仲要推左個責任俾銀行,
但係我問過銀行話冇咁O既資料喎! 激死! |
| 28/8/2000 |
|
今日訓到十點令十一點啦, 因為呢幾日都眼光光望到四點幾五點先訓到一陣, 所以唔好以為斯斯成日掛住訓!
係咁易拾完屋之後, 就開始做我份功課喇, 真係好耐冇試過拎住本字典勁查左成幾個鐘, 查完一大輪字典之後,
當然係要寫份功課啦, 好慘呀, 我今日做左幾個鐘都仲未做完, 仲慘過上次讀 MANAGEMENT 做果份功課, 果次都係幾日做哂啦,
今次做左咁多日, 要寫O既都寫哂喇, 仲未夠字數, 真係勁諗都諗唔到仲要寫Ｄ咩, 希望我快Ｄ可以完成到啦! |
| 29/8/2000 |
|
今日開始溫書喇, 不過都係溫左一陣咋, 因為硬係覺得份功課未做完咁, 總之就得個"驚"字啦, 相信我聽日都要由頭再睇多次份功課先得喇!
基本上今日都半休息狀態, 因為未來呢一星期都會為考試而作準備, 亦都係希望順順利利啦! 呢幾日都不停聽到好多人濫用藥物,
話好鍾意 HIGH 左之後果種感覺, 但係我好想講, 唔好再濫用藥物喇, 如果要果種 HIGH O既感覺, 唔該用第二種好Ｄ O既方法,
飲少少酒都得, 記住係少少! 最好O既梗係咩都唔用, 就咁用開心O既心情去自然咁 HIGH ! |
| 30/8/2000 |
|
今日大致上咁睇過份功課一次, 亦都冇咩要加喇, 決定就交呢份啦! 同時亦係溫左少少書, 不過梗係未溫哂啦,
相信黎緊呢個星期都要加倍努力喇! 我今日落街買野食果陣, 原來我樓下果條街道仔之前發生左少意外,
我諗大約係有架貨車撞親個婆婆少少掛, 因為我只係見到個婆婆坐埋左一邊, 而個救護員就幫緊個婆婆决油,
之後仲大陣仗呀, 直情截住哂Ｄ車唔俾過, 有位警察仲拎左部相機勁影條路添! 不過好好笑, 亦因為有咁多警察,
攪到平時泊滿哂成條街O既車(當然係唔合法咁泊啦!)完全失蹤哂, 反而我好鍾意呢種乾淨感覺! |
| 31/8/2000 |
|
話咁快聽日又係開學日喇, 不過對於我呢個冇暑假放O既人黎講, 冇咩特別! 呢幾日發生左一件好奇怪O既新聞,
就係一個十五歲O既智障男仔竟然俾入境處O既人竟然因為查唔到佢O既資料, 以為佢係偷渡黎港而送佢去深圳,
而家過左幾日都仲未搵到佢, 我一聽到呢件事, 我真係覺得好過份, 點解會有咁O既事發生架? 我真係希望快Ｄ搵番佢啦!
我覺得今次入境處真係要負上大部份責任, 平時要佢地將過期留港O既人送番上去又唔見做到, 今次面對住一個十五歲而唔識講野O既男仔,
竟然話咁快就送佢上去? 真係有冇攪錯呀, 唔該反省一下啦! 今日我都係溫書咋, 不過有排都未溫哂, 黎緊呢幾日我都要閉關先掂喇! |