今日都算係豐富咯! 因為我表弟表妹地黎左我屋企食飯! 玩左成日都冇停過! 有少少累架都! 今日同我表弟傾番套舞台劇, 原來佢同佢Ｄ朋友都好似我咁想睇多次, 因為實在太好睇喇! 之不過我 CHECK 過原來剛剛做完左! 我諗要等起碼一年先有得再做! 最衰咁遲先知有人同我一樣想睇多次丫, 如果唔係都仲趕得切睇O既! 因為個劇本真係太正, Ｄ人做得真係太好喇!
真係點解我果日唔帶相機呢?!

今朝都幾早醒左, 因為尋晚我亞姨地O係我屋企訓, 所以我訓廳, 都冇咩特別野做過, 落街行左一陣啦, 之後就要返學喇! 不過我今日早走左, 因為亞 SIR 講果Ｄ野自己睇書好過! 返去交左份功課喇! 見到佢呀又, 硬係怪左少少咁, 唔明白呢種感覺!
天氣都唔係太凍O者!

今朝同我媽咪同埋亞姨傾計傾到三點幾先訓, 十二點幾就起身食野喇! 之後我就未停過咁執屋, 因為年廿八洗 DIRTY 嘛! 不過仲未執好哂架, 我個書櫃都未執! 仲有兩日就年初一啦喎, 有咩好節目先? 我就冇喇! 唔知係好事定係唔好事呢?
今日我有少少掛住佢添!

今日依然冇時間執個書櫃O既, 過多幾日先算喇, 因為呢幾日都幾忙下! 今日落街買野有少少不滿, 不滿O既係我發覺越黎越多人冇公民意識, 我落左去行左幾步, 就已經有成三個人吐口水落地下, 有好多人行果陣係冇定向架喎, 即係一時左一時右, 一時又會無端端向後行, 我行緊果陣有少少懷擬自己係咪隱左形, 因為大大話話有廿個人撞我喎, 行超級市場果陣, Ｄ人直情推住架購物車輾過我隻腳都仲冇反應喎, 有Ｄ就撞到我之後仲要話我好撞到佢架車, 呢個真係咩世界呢? 講真一句我真係好嬲, 點解攪到咁架? 香港已經人多架啦, 咁多人仲係冇公民意識, 咁樣真係得個"亂"字架O者! 我記得有一次我等過馬路果陣, 我俾個亞婆推我, 差少少我就過唔到年架喇! 呢一方面我就真係唔係太明白!
新年願望: 人人都有公民意識!

一早起身就要去拜年喇! 首先去左我婆婆屋企, 順便食佢最拿手o既湯丸, 我食左三大碗, 之後就去左我爺爺屋企拜年再加食晚飯喇! 唔知係咪我成日食得太多野, 成晚個胃都好辛苦下! 不過最重要o既係我終於執好左個書櫃!
恭喜大家發大財, 最緊要係身體健康!

今日一早起身就勁睇電視, 之後我爸爸就煮左上海年糕, 真係好好好好食! 今日唔洗去拜年! 都唔錯架, 因為我唔係好明白點解人要到左新年先去拜下年, 探下親戚朋友咁, 平時唔得架咩? 所以唔明白囉!
今日係夢中情人２號(亞傑)生日! 生日快樂!

今日成一點先起身, 不過都唔夠訓咁, 因為作感冒呀又! 頭又痛左成日! 都唔知點解! 我亞姨地又黎左我屋企玩, 不過冇帶隻ＰＳ O既ＤＤＲ碟, 所以冇得玩, 仲諗住有得玩添! 因為我咁大個女都未玩過!
真係作病呀!

今朝九點幾起左身, 因為一早起身食左野, 我亞姨佢地就走喇! 我就一直睇電視睇到三點幾, 之後又再訓過! 一直訓到七點幾, 可能一來病, 二來唔夠訓啦! 尋日朝早有個人打電話俾我, 果個人就係我以前男朋友o既朋友(女仔), 其實我唔想再同佢傾架, 但係佢又當我做朋友, 講真丫, 我真係 DELETE 左佢個名好耐, 又唔好意思咁直接同佢講喎, 我曾經講過我同佢地係唔同類O既人, 係做唔到朋友架! 點解呢個女仔唔明白呢? 真係希望佢以後唔好再打黎啦! 雖然聽落我好似好衰咁, 但係如果我一直埋沒良心, 用個假面具同佢做朋友, 咁咪仲衰! 希望佢明白啦!
今日天氣凍左少少!

今朝六點幾醒左一醒, 所以唔係好夠訓! 之後落左街, 因為前幾日出左張新手電咭, 果個人話今日會用到, 點知今日仲未用得, 打去問, 點知佢話個號碼俾人用左喎, 所以咪要落去間電話店度攪番掂佢囉! 係呀, 我又出左個新手電號碼喇! 平丫嘛, ＄３８一個月(120 分鐘), 幾抵用呀, 所以各方好友記住問我新電話號碼呀!
有少少乾燥添!

今朝一早去左飲茶, 其實都冇咩特別野發生! 所以都唔好寫咁長O既日記喇! 當然都好開心咁過左一日啦!
我今日打到一分鐘五十個倉頡中文字呀!

今朝一早喉嚨痛喎, 不過好彩飲完杯甘吉蜜糖之後就冇事喇! 之後就落左去銀行, 因為要取消Ｄ咭各樣! 五點鐘出門口, 因為要返學, 不過, 之前就又要去商台拎禮物; 之後我好準時咁返到學校! 但係收到一個壞消息呀, 就係我上次交果份功課答錯題目, 都可以話係讀左書咁多年第一次答錯題目咁瘀喇! 所以攪到份功課唔合格(都好彩唔係好唔合格果隻!), 亞 SIR 話唔止我一個人答錯, 不過黎緊果份功課, 一定唔會再答錯喇! 所以我聽日一定要去圖書館借書, 準備二十三號交功課! 今次一定唔衰得架喇, 如果唔係我就 DIE HARD (死硬)咯! 如常地返學梗係見到佢啦, 今日都有笑下咁, 不過始終冇進展!
今年情人節又冇情人一齊過喇!

今日十二點幾先醒, 因為尋晚訓得唔係太好(答錯題目O既不安!), 下晝三點幾就去左圖書館借書做下一份功課! 真係幾難為我架, 因為合用O既書真係好少, 成間圖書館大約得三十本呢一科O既書, 而合我用O既只係得三本, 死啦, 我仲未夠料做功課添架! 睇黎要搵網頁啦, 我未開始作文呀, 因為要準備好哂一次過打先掂! 我有一個壞習慣, 就係做野一定要做到完結為止先可以停到, 換句話講, 如果我今日開始做, 我一定要做完份功課所有野先會去訓, 所以唔多掂, 我諗住聽日或者後日做啦, 相信今次唔會再咁失敗架喇! O係我O既生命中, 相信上次亦會係最後一次答錯題目, 我唔可以再衰架喇, 因為我真係唔可以再唔合格!
不過圖書館Ｄ書真係好 DIRTY !

今日又喉嚨痛喇, 都唔知點解成日咁樣! 之後就成家人去左行街, 點知俾我撞到我個舊同學喎, 就係教我寫 HTML 果位朋友喇, 傾左幾句啦! 之後我去左食 TCBY 呀, 好鬼正架O者! 睇左幾部電腦, 不過貴左少少, 但係又幾引喎! 有一部有內置攝影機架, 好得意, 部機又好鬼細喎!
開始要做功課喇!

今日一早醒左, 因為有人黎探我地, 之後就去左飲茶喇, 行左一陣就返左屋企做功課, 講起功課就慘喇, 答左成一千字都唔知答得 ARM 唔 ARM (我諗 ARM 掛!), 我問左個同學, 佢都好似唔係好知答咩咁! 萬一.......唔會O既, 唔會架喇! 一生人衰一次夠皮咯!
祝大家情人節快樂!

今朝好早起左身食野喇, 係食有菠蘿包喇, 可能睇劇集睇得多, 好想食! 之後做左一陣功課, 再同左我媽咪以及佢朋友去左飲下午茶, 食左好多野呀, 唔算太貴! 返到屋企努力左成五個鐘先做掂份功課, 其實都唔知 ARM 唔 ARM 架, 不過照計就應該冇錯架喇, 寫左成二千字多Ｄ, 希望拎高分Ｄ, 唔洗 RE-TAKE 啦, 一定唔可以再 RE-TAKE 架喇, 好浪費時間同金錢!
恭喜海峰同埋 CASS 生尋日左個可愛ＢＢ女!

尋晚同我媽咪睇電視睇到成兩點幾先訓, 今朝十一點幾醒左啦喇! 有一件事發生左, 又係令我幾擔心o既, 不過唔係太方便講俾大家知! 夜晚返學之前我就出左尖沙咀, 因為想親自拎張票去交學費, 驚寄失丫嘛, 交完之後先坐地鐵返學, 平平冇奇o既一晚課堂, 不過最神奇o既事竟然就係放學前一個鐘頭發生, 就係要做題目, 我同我朋友都冇帶書, 所以就同左佢同埋佢個朋友, 四個人一齊睇, 可能佢朋友唔想答, 所以就俾左個位俾佢坐喇, 咁 ARM 就係我隔離啦! 都講左幾句野架, 我有少少手震添!
希望我擔心O既事快Ｄ解決啦!

尋晚改左份功課少少野, 因為加左少少野, 應該會好Ｄ架! 今日冇咩特別野發生, 我尋日擔心O既事, 今日都好左少少, 雖然未完全解決到, 不過起碼冇咁擔心!
今日真係好病咁喎!

今朝起身喉嚨又痛喇! 所以亦係飲左杯柑吉蜜糠o既, 都冇咩做過啦, 成日個喉嚨好熱咁, 不過我發覺O係咁O既情況下唱歌幾正架個 FEEL ! 夜晚亦係要返學O既, 都冇咩特別事, 我遲到左少少, 佢仲遲過我, 由於我唔係太舒服, 所以冇動力主動同佢傾計, 今日未夠九點就走得喇, 因為教哂書, 望左幾眼就落左地鐵站喇, 原來佢真係唔係坐地鐵走架喎! 九點幾返到屋企, 即刻就食左粒藥, 因為病病地嘛!
希望一切平安!

尋晚食左藥, 所以今朝訓到十一點幾; 相信大家都知鄭中基傷人呢件事架啦! 不過我收到消息話佢已經冇事喇, 罰左錢同埋守行為一年, 其實都算好彩架喇! 我希望佢唔好再有下一次啦, 因為唔係次次都咁好彩架嘛! 我今日都冇咩特別啦, 都係擔心緊某件事! 不過今日有少少諗番尋晚放學佢Ｄ朋友O既說話, 唔知係咪我多心定真係講緊我呢?
希望一切平安!

今日斯斯終於病左喇, 感冒o既開始, 所以冇出到街, 成日O係屋企聽下歌, 把聲都變哂, 最慘O既係我聽野唔係咁好, 好似有塊野隔住左咁, 呢Ｄ係感冒O既病徵啦! 希望快Ｄ好番啦!
希望一切順利!

今朝八點幾就起左身喇, 因為有少少喉嚨痛, 所以起身食藥, 本來諗住訓番架, 不過又訓唔著呢, 咁咪起身囉! 不過咁早起身真係冇咩野可以做, 聽歌又怕嘈親鄰居, 打機又好似太早咁(因為咁早打左夜晚又唔想打, 咁夜晚就冇野做啦嘛!), 本來可以溫書o既, 不過又真係好想完完全全休息幾日, 因為襯自己病病地就抖番一陣子先, 咁好番果陣就可以全力以赴啦嘛! 我今日好開心呀, 因為我前幾日擔心果樣野冇事喇, 雖然未係完全解決到, 不過都叫做解決左大半啦!
個病又好似好番Ｄ啵!

今朝亦係九點起左身喇, 因為實在係要去睇醫生, 頂唔順呀, 尋晚咳得幾辛苦! 不過一年冇去睇醫生, 估唔到一年間加左咁多價, 要二百幾蚊呀, 得三日藥咋! 太貴喇真係, 不過冇辨法啦! 但係有一件趣事發生O係睇醫生果陣, 話說我行緊入去坐底O係醫生隔離果陣, 醫生即刻好大聲咁問我: "點呀, 你上次好番未呀?", 我偷睇我張病歷咭, 睇到對上一次睇係 99 年 2 月 2 日, 佢仲繼續問我好番未, 我就問佢: "你想我點答你呀? 上次成年之前啦喎!", 之後醫生知道佢睇錯日子, 所以即轉問題問我咩事喇!
我食左藥好番好多, 不過就訓左成日!

今日十一點幾起身, 食完野食左藥, 睇左套＜化骨龍與千年蟲＞之後, 又再大覺訓, 因為真係好眼訓架! 訓到五點幾起身, 因為要準備返學, 亦因為食左藥, 我冇咩動力同佢傾計, 亦唔係咁想望佢咁(自己知自己事丫嘛, 病到咁樣!)! 不過今日俾我知道佢原來係有近視架, 因為今日佢載左眼鏡, 分組討論時我坐左佢後面個位, 我都問左佢一題架, 因為我 MISS 左個答案!
真係唔知佢究竟係點!

今日訓到十二點幾, 食左野又要食藥, 食左藥又要訓覺, 因為藥力實在太勁, 攪到我成日都唔知仲咩咁! 不過三點幾果陣都落過去租碟睇, 租左隻＜醫神＞, 不過睇左一半就訓左喇, 頂唔順呀!
食左Ｄ藥好辛苦呀!

今日個病好番好多喇, 不過依然係要成日訓, 今日同我爸爸落左街還碟同埋去超級市場買野, 真係幾多人呀, 天氣凍左好多呀, 我Ｄ藥食哂喇, 不過仲好似未好得番哂咁!
大家小心身體喎!

今日都算多野做喇, 除左平時做開果Ｄ之外, 仲要填新學期O既一張入學 FORM 啦, 仲有就係大執房喇, 本來唔會大執房架, 不過幫我媽咪搵野, 搵搵下亂哂, 不如大執下囉! 我今次都真係執得幾認真, 我大大話話掉左一大箱野, 包括以前讀ＴＩ O既野, 仲有好多以前唔捨得掉O既野, 今次都一一掉左! 所以而家條腰有少少痛; 不過最攪笑O既係我媽咪要果樣野我到最後都係搵唔到O既! 呢幾日我都冇街去架喇, 朋友少冇計啦, 不過我都要開始溫書喇, 因為三月八日又要考試, 我今日先將本來放O係衣櫃O既以前教科書(係咪好奇呀? 冇地方擺嘛!), 死啦, 其實到而家都唔係好知呢科有咩係重要O既! 真係希望神保守我呀!
我個病好似好番啦喎!

今日的確係大覺訓呀, 因為尋晚成三點鐘先訓, 今日都未開始溫書計劃呀, 因為好多野做, 除左去超級市場買野之外, 就係去睇電腦喇, 因為我想換過部電腦呀, 起碼個 HARD DISK 大Ｄ, 唔洗我咁辛苦咁, 咩都玩唔到, 一做完功課又要 SAVE 去 FLOPPY 不過仲未睇 ARM 喎; 今朝睇新聞話容袓兒屋企火觸, 希望受今次火觸嚮O既人快Ｄ冇事啦!
張立基出番黎唱歌, 我覺得係好事黎架!

今日冇話訓得太耐, 的確有溫過書, 雖然溫得唔多, 不過好過冇! 如我所預料, 今日無論係港聞版仰或娛樂版, 頭條都係容袓兒, 諗諗下, 只係一單普通火觸新聞, 點解攪到港聞版都頭條呢? 果Ｄ真係又死人又自殺果Ｄ新聞反而細細段呢? 唔通一個歌星屋企火觸而只係財物損失就要上頭條? 呢個新聞界越黎越怪異! 今日落過街買野架, 凍左少少, 大家真係要小心身體呀, 唔好睇少Ｄ病菌, 亦唔好亂食成藥(雖然我都有時會咁!); 尋日日記講開張立基出番黎唱歌, 點解係好事呢? 因為而家Ｄ有Ｄ歌手真係嚇死人, 歌唔洗唱得好(其實唔洗識唱添!), 只要有後台, 或者係女仔, 一定紅硬, 所以張立基唱歌唔係差架, 我都有佢以前果盒"今夜你是否一人?"O既帶, 仲記得我初中果陣佢好紅架, 有個同學係佢超級 FANS 黎添! 話時話喇, 我都有佢親筆簽名架喎! 不過講真我又真係幾多明星O既親筆簽名O既!
唔知幾時黃翊出番黎唱歌呢?!

死啦, 今日冇溫到書添, 只係掛住落街買野同埋訓覺, 實在太唔應該喇! 今日係四年一次O既二月廿九日, 首先祝大家潤日快樂先(雖然怪左少少, 粗粗地收左佢先啦!), 實在太悶喇, 想搵份工做, 又冇人請, 就算是但搵份做住先, 又驚冇時間讀書, 你知啦, 我冇野做都唔係成日溫書咯, 有野做咪仲死! 家陣Ｄ時勢又唔係咁理想, 唉, 真係 ... ...!
我就要考試喇!