恭喜恭喜, 千年蟲冇O係我屋企發作! 尋晚過十二點果一刻我係傾緊長途電話O既, 唔知大家又點過果一刻呢? 話咁快又新O既一年喇, 唔經唔覺我呢個＜私日記＞都一歲大啦喎, 所以都改一改個 LOOK 先! 而且特別揀左＜抬起我的頭來＞黎做背景音樂, 希望新O既一年開始, 大家都可以抬起頭做人啦! 相信大家睇電視都勁播第二Ｄ國家點迎接千禧架啦, 你地有咩感想呢? 我就覺得美國好成功喇! 唔講大家可能唔知, 美國O既 TIMES SQUARE 共做左廿幾個鐘O既迎年禧活動, 佢地係當第二Ｄ國家過十二點果陣, TIMES SQUARE 就會用果個國家O既特色黎慶祝, 所以我覺得幾有諗頭, 幾好睇添! 至於香港, 我尋晚就O係電視睇左三個倒數, 分別係 TVB, 跑馬地同埋 TIMES SQUARE , 其中睇得最開心O既係跑馬地果場所謂O既煙花, 真係好鬼死似一個好肉酸O既大大大蛋糕, 仲要係標哂煙果隻! 你話幾富娛樂性呢? 原來O係英國電視都有直播跑馬地果場生日蛋糕架喎, 不過正就正在有 SAMMI 表演! TVB 果個節目都算失敗喇, 雖然佢地個意念好好, 破下紀錄咁, 不過就係爭咁Ｄ睇頭囉, 成日搵Ｄ五音不全O既藝員唱歌, 真係戥班藝員慘呀! 反而 TIMES SQUARE 果個幾好睇喎, 請左個外國女歌手黎唱歌, 係唱番Ｄ好有意思O既歌, 例如: HEAR THE WORLD 咁, 起碼有溫暖O既感覺! 今日我都係睇下電視, 溫下書(我終於睇哂咁多個 TOPIC 喇, 有Ｄ印像啦, 未來幾日再溫番就ＯＫ喇!), 到左五點幾就落左街買野煲湯, 亦都係我千禧第一次落街呀(我都要學下Ｄ人咁, 今年咩野O既第一次都要好開心咁講下), 大家今日又去左邊玩呢? 尋晚我收到一個令我幾擔心O既消息, 不過希望快Ｄ可以解決到啦!
唔知點解好想講句: 恭喜發財!

今日成日都好唔舒服呀, 個頭又痛, 個肚又痛, 都唔知攪咩! 今日都係主要溫書啦, 都溫到幾好掛! 不過都仲要努力加油! 今日溫書之餘我都o係有線電視電影台睇左套幾好睇O既戲喎, 其實我諗都唔係電影黎O既, 因為佢好似未O係戲院上過, 而且係好似實驗電影咁, 都幾新架, 吸引到我睇O既第一個原因係個戲名, 個戲名叫做＜死蠢＞, 我先頭以為係果Ｄ好無聊O既戲, 點知原來幾有意思架喎, 我識O既演員有陳國邦同埋袁偉豪O既, 套戲係講有一個女學生 GIGI, 因為男朋友袁偉豪同左第二個一齊, 好唔開心, 又覺得屋企人唔關心佢, 所以起左死O既念頭, 呢段時間佢俾一隻鬼勸佢自殺, 因為隻鬼頭搵替死鬼, 之後呢個女仔終於跳樓死左, 隻鬼俾左部 CALL 機佢, 當有人想死O既時候, 部 CALL 機就會響, 睇住自己爸爸覽住佢O既屍體O既時候, 佢先發覺原來佢屋企人係好鍚佢O既, 做鬼O既第一日佢認識左做鬼O既陳國邦而知道要O係八日裡面搵一個想死O既人做佢替死鬼, 咁佢就可以投胎喇, 如果過左八日就要一世做野鬼, 到左佢頭七果晚佢返左屋企, 令佢感動O既係佢感受到屋企人對佢O既愛, 佢亦都好後悔自殺, 由於只係得番幾個鐘頭去搵替死鬼, 所以佢都好想快Ｄ投胎, 就O係呢個時間, 佢收到一個專線 CALL(即係想死果個人係佢識得O既), 佢知道唔可以再心軟, 去到目的地先發覺原來果個係袁偉豪, 佢坐左O係佢媽媽O既墓前(佢媽媽死左十年), 原來係佢女朋友飛左佢, 諗番好多唔同O既唔開心事, GIGI 好想佢死, 因為佢覺得係袁偉豪害死佢O既, 不過最後 GIGI 都諗通左, 亦都成功勸到袁偉豪唔自殺, 之後 GIGI 好失落咁去搵番陳國邦, 因為佢投唔到胎喇, 過左八日期限喇! 出乎意料之外, 陳國邦同佢講投唔到胎唔緊要, 可以上天堂丫, GIGI 話:"得咩? 我自殺死架喎, 點上天堂呀?", 陳國邦再解釋話:"以前就唔得, 不過而家唔同左喇! 你變左做一個有愛心, 善心, 而有悔意O既好女仔黎架喇!", 原來陳國邦係一個叫 ANGEL O既天使黎O既, 佢就同 GIGI 一齊上左天堂喇! 而且 GIGI 亦叫做 ANGEL 添, 個個O係天堂O既人都叫 ANGEL O既, 陳國邦話:"會知道嗌你架, 你估真係有咁人肯咁大犧牲咩, 其實只要Ｄ人肯放棄投胎話, 呢個投替死鬼O既遊戲就可以 CUT , 唔會變成一個惡性循環啦!", 故事就係咁喇, 我真係睇到喊, 雖然唔係咁宗教電影, 亦係一個幾天馬行空O既故事, 但係我覺得好有意思, 大家有機會都睇下, 尤其係有想死念頭O既人!
我聽左尋晚 903, KELLY 女歌手金獎(離哂譜!), 不過安仔拎男歌手金獎真係實至名歸(恭喜!)!

今朝十點幾就起左身喇, 都唔知點解咁知醒, 不過尋晚兩點幾果陣聽到有幾個人勁大聲咁傾計喎! 可能我間房有個窗對住個公園, 所以咁應聲啦! 今日食完野之後就溫書喇, 溫左成三個幾鐘, 叫做有Ｄ成績啦! 大家要支持我同埋為我祈禱喎! 今日睇左＜基督 2000＞, 我知道點解神唔俾人賭錢喇! 因為賭就即係貪! 仲有呀, 我聽左一首叫做"月未老"O既現代頌讚O既歌曲! 真係好感動, 其中有一句係咁O既: "這晚讓我們禱告, 若有淚祂不會不知道", 真係好感動, 大家有機會都聽下丫!
今晚套新劇集有洪天明呀!

今朝發覺左原來朝早ＴＶＢ播番＜師奶強人＞喎, 有克勤同忠仔做果套呢? 睇番又幾好睇, 仲幾好笑添! 都有溫書架, 今日溫左四個鐘啦, 因為最後機會! 唔知點解今日個電話咁旺場喎, 有三個朋友搵過我, 主要都係傾下計, 同埋諗住約出黎咁啦! 聽日就考試喇! 好似冇咩壓力咁, 唔知係好定係唔好呢? 希望聽晚順順利利就ＯＫ架喇! 踏入左千禧年, 好似唔開心野多左Ｄ, 主要係身邊O既人O既煩惱, 令我好擔心!
希望我擔心O既事快Ｄ解決到啦!

今朝十點幾就起身食野再溫書喇! 溫到三點幾就開始俾個腦休息, 因為讀得太多太緊張, 好辛苦呀! 聽左一陣歌, 上左一陣網咁啦! 夜晚考試其實都ＯＫ, 因為都寫都Ｄ野出黎, 合格唔難O既, 我早走左喇, 因為三個鐘真係太多喇, 答五題之嘛! 返到黎一身鬆哂! 不如講件開心野俾大家知丫, 我尋晚同到我夢中情人傾計呀, 邊個? 咪亞敬囉, 雖然我O既夢中情人都有好幾個, (亞敬, 亞傑, 亞 PAT, 天明), 講番件事先, 尋晚亞敬O係 STAREASTNET.COM 接受訪問, 我就好有幸咁問到佢幾個問題, 佢仲有同我 SAY HI 添呀(只係 HI 我一個咋!), 我問左佢一Ｄ音樂同埋夾 BAND O既野, 亦都知道佢個幾月後會出碟, 聽完佢講佢用電腦作曲O既事, 我都心郁郁想買番 SET MAC 機同 KEYBOARD 作下曲咁, 不過真係要搵到份工先實現到喇! 真係開心架, 你估咁多機會問到亞敬咁多野架咩? 所以我覺得好好好開心!
今日我條腰有少少痛添!

今朝十點幾醒左睇電視, 其實都冇咩做過, 係落過街買野食同埋買用品咁啦! 我今日買左草蜢隻新ＣＤ, 雖然得四首歌, 我識唱三首, 不過都好正囉! 誠意推介蘇生蘇太唱O既＜愛得小心＞, 就係我夢中情人作曲O既, 咪係亞敬囉! 正野呀, 各位拍緊拖以及結左婚O既男女都應該咀嚼下Ｄ歌詞! 之後我又去左商台拎舞台劇O既飛, 俾我見番一個我幾年前識O既ＤＪ, 不過可能我靚左啦, 佢唔係咁認得我, 加上佢做緊野, 所以我只係同佢笑左一野O者! 我仲見到譚詠倫添喎, 好近距離(兩尺多Ｄ啦!), 不過都係同佢笑左一野咋! 因為我等左果個人拎飛等左半粒鐘, 我今日又著左條短裙, 所以坐得唔係太自然! 到左七點幾就齊人去左麥當當食野, 因為今晚去睇 SHOW , 八點正入到場, 點知睇哂佢所謂三份一O既內容, 我真係 GET 唔到佢果 MESSAGE , 佢個 SHOW 就叫做 ＜遠離瘋狂人群之瘋狂指數自我測試之夜＞係林奕華作品, 相信大家都會覺得係有關＜瘋狂人群＞咁啦, 我 GET 到＜瘋狂＞亦 GET 到＜人群＞, 但係完全 GET 唔到＜瘋狂人群＞, 佢想帶出果Ｄ MESSAGE, 我自問真係意會唔到! 好彩只做三份一, 如果做哂全部, 我睇完真係會變＜瘋狂人群＞, 可能佢就係要咁掛, 之後有個研討會, 林生所講果Ｄ, 唔知係我未到佢個層次, 仰或我已經超越左佢個層次囉! 我會覺得有好大部份佢表達O既場面, 係可以做得更好, 令人更加明白, 我頭先一邊睇一邊只係覺得＜亂＞＜煩＞＜悶＞呢三個字, 雖然我冇資格評論人地Ｄ藝術, 不過呢Ｄ係我個人意見囉, 下次再有佢Ｄ表演我真係唔會再去睇, 因為我了解唔到佢O既藝術層次!
希望我個朋友快Ｄ解決到佢O既煩惱啦!

今日唔洗鬧鐘都起到身喎, 不過睇電視睇到兩點幾就落左去買野煲湯, 都冇咩特別呀今日, 本來今晚約朋友食晚飯架, 不過都係改下星期好Ｄ, 尋晚好唔開心呀, 因為我個好朋友有Ｄ煩惱, 同佢傾電話傾到凌晨一點幾, 但係我收左線之後我一直訓唔著, 到左四點半過後先訓到一陣! 我真係好希望佢可以快Ｄ開心Ｄ啦!
我呢幾日又瘦番五磅喎!

今日訓左好耐呀, 因為尋晚好累, 因為我凌晨果陣睇番尋晚錄O既＜人體漫遊＞, 睇到我喊左好耐, 因為佢呢集講死亡, 訪問左個人佢患左癌, 剩低日子唔多, 所以佢俾＜人體漫遊＞拍低佢死亡O既一刻, 好唔開心呀睇完, 雖然我覺得死亡唔可怕, 但係我睇到當身邊O既人同你一齊面對死亡, 身邊O既人真係好難受, 我一邊睇一邊喊, 睇完之後我足足喊左半個鐘先訓得著, 所以好累! 但係有一刻我好驚架, 因為我喊哂果陣, 有一刻完全吸唔到氣, 真係有死亡感覺, 不過都過左去喇! 其實有準備O既死亡並唔可怕!
希望一切都美好!

今日訓到三點幾, 真係唔知點解可以訓咁耐? 之後六點幾我個朋友打電話約我食飯同埋下街, 不過都唔係行左好耐, 行到九點幾十點就走喇! 之後返黎都冇咩野做過, 係睇過下電視咁啦! 不過冇睇到＜仁濟＞喎!
星期二晚去唱Ｋ呀!

今日好早醒左, 不過都係冇落到街, 因為太唔想落街喇! 近排我部電腦都唔知仲咩, 慢左勁多喎, 攪到好唔想上網就係咁解喇! 都唔知點解咁樣架! 突然間咁喎, 大家知唔知咩原因呀? 今日都依然冇咩特別, 都係休息啦, 因為星期五開始又要返學喇! 今日睇到娛樂版, 我真係覺得果個洪Ｘ瘋, 好冇同埋好冇風度, 我成日都話分開左唔好憎恨對方, 佢仲要數到而家添, 唔好理個女方 ARM 唔 ARM , 咁樣數人地不是就係唔 ARM ! 所以開講有話"面就人地俾O既, 假就自己掉O既", 完全中哂啦佢! 我覺得如果我係佢朋友呀, 真係要搵個山洞過我下半世呀! 所以話人不可以貌相, 帶眼識人呀以後!
今晚做套新日劇喎, 唔知好睇唔好睇呢?

今朝好早起左身喇, 因為要落街買野, 不過人黑起上黎就真係有個譜架, 竟然去到超級市場想買麵麭, 我見到O既, 竟然係一個麭都冇喎, 係完全俾人買哂, 而新貨又未到, 係咪好黑呢? 之後返左屋企聽左一陣歌, 都係聽亞敬囉! 夜晚就同左三個朋友去唱Ｋ, 發生左Ｄ幾攪笑事O既, 唔知點解今晚唱Ｋ唱到好 HIGH , 好好玩, 唱左好多歌, 仲食左好多野添呀, 唔知係咪有＜暴食証＞呢? 四個人嗌左四碟野一齊食, 佢地三個都食左少少, 但係我就清哂其他果Ｄ野, 真係有少少誇張! 唱到十點鐘就去飲野, 仲要同埋其中一個朋友O既男朋友, 第一次見佢, 都唔錯掛, 唔係咁深認識啦! 希望佢地好好地啦!
好想要麥記Ｄ得意磁石, 但係我唔係好想食麥記, 有冇人幫幫手?!

尋晚我發現左一件事, 令我非常開心架, 就係我上 STAREASTNET.COM 睇到亞敬O既網頁, 仲有 LINK 埋我寫果個亞敬網頁添! 真係好開心架, 因為咁樣即係代表亞敬有機會睇我寫果個網頁嘛, 我一直都冇機會話俾亞敬知我個網頁O既存在! 今日我冇咩做過, 只係好累囉, 唔知係咪尋晚訓得唔係咁好, 所以攪到我要訓晏覺, 可能近排Ｄ空氣唔係咁好, 有少少傷風O既感覺, 唔係流感下嘩!
我真係希望可以健康Ｄ!

今朝一早起身左街買野食呀, 唔知點解突然間好想食意粉喎, 咁咪買左包意粉同埋一罐忌廉湯, 諗住煮白汁意粉囉! 先頭諗住食麥記架, 不過太多人喇, 同埋果間Ｄ磁石送哂, 真係慘喇! 我真係好想要架! 今日收到封令人振奮O既 EMAIL 呀, 就係我上次補考果科 PASS 左, 唔洗 RE-TAKE 喇!
今日精神左少少, 不過聽晚又要返學喇!!

今朝好早醒左, 睇左一陣電視再聽左一陣歌, 夜晚就返左學, 今次佢坐得好近呀! 好不容易放學喇! 不過我上到地鐵果陣, 竟然見到我以前個男朋友喎, 不過佢應該見我唔到, 可能我靚左啦! 不過算啦, 見唔見到都係咁! 尋晚睇完＜記憶失控＞o既節目, 我發覺到記憶呢樣野係好脆弱但係又好強, 係咪好矛盾呢? 其實係咁o既, 我覺得記憶脆弱係因為有個人被人催眠而入左一Ｄ假O既記憶! 點解記憶都係強呢? 因為果個人之後雖然知道記憶係假O既, 但係果Ｄ記憶依然係好深刻咁O係個裡面!
聽日又要返學喇! 仲要返全日添!

今朝一早又要準備返學喇, 今日返全日學添呀, 上晝果堂坐遠左佢少少, 因為唔知係咪有預感, 食完晚飯之後又要上堂喇, 初初果半個鐘都見唔到佢返, 之後佢就都有返仲坐我後面添, 放 BREAK 時, 唔知好彩定唔好彩, 我依稀聽到佢Ｄ朋友話好羨慕佢有個咁好O既女朋友喎, 聽完之後唔知點解硬係集中唔到精神咁, 冇理由架, 明明知道會有咁O既一日, 不過真係集中唔到! 唔通一直係我表錯情, 收錯 MESSAGES ? 我仲傻到差Ｄ去問佢係咪有女朋友添呀, 不過我O既理智多過感性少少!
點算好?!

今朝好早醒左呀, 尋晚都訓得唔係咁好! 又要返學喇, 準時兩點返到去, 亦都要見到佢啦自然, 唔知係我多心定丫, 定係唔知為乜, 佢今日望左我好多次, 唔通我個樣今日有Ｄ問題? 唔知點解我今日個心硬係覺得我尋晚聽錯野, 因為我發覺到佢Ｄ朋友唔知點解今日都望下我咁, 放完 BREAK 我入番課室, 咁 ARM 佢又企左O係入口附近, 我唔係好敢望佢, 不過我行過佢身邊果陣, 我真係知道佢望緊我架喎, 究竟攪咩我會咁架? 放左學之後我同左個同學去買書, 又用左成三百蚊買左本唔知用唔用得著O既書喇! SAMMI O既＜插曲＞得到＜金曲金獎＞, 我開心到同 SAMMI 一齊喊!
腦中有呢句歌詞"請不必再繼續懷念往昔溫柔, 要是愛人離去沒法可補夠"!

今日十點幾起身睇電視同埋睇錄影帶, 其實都冇咩做過, 因為前幾日都要返學, 今日個腦就放下假咁啦! 其實就黎又 TEST 同埋交 ASSIGNMENT 呀, 我諗呢幾日都要埋頭苦幹喇! 尋晚 SAMMI 得到＜金曲金獎＞, 我到今日都仲係咁開心, 因為真係估唔到, 不過我見到安仔一樣都係咁感動咁開心O既!
今日O既心情狀況: 平靜如水!

今日好早醒左呀, 因為天氣凍左少少, 本來諗住去圖書館借書做 ASSIGNMENT 架, 點知我婆婆打電話話聽日同我飲茶, 所以今日要做哂本來聽日先做O既野, 就係去買食物同埋日用品, 所以星期四先去到圖書館喇! 今日O係條街度見到好多人叫人登記做選民, 不過唔知點解一個都冇叫我喎, 死啦, 係我個樣唔似夠年齡定係睇我個樣就知我唔係一個熱心O既市民呢? 頭先上網, 竟然見到某個搜尋器評我寫亞敬果個網得 12 分(分五樣野評, 總共 25 分), 有冇攪錯呀? 雖然係簡單左少少, 不過 USER FRIENDLY 嘛, 不過算啦, Ｄ人支持我都唔會睇呢Ｄ唔知點計出黎O既分O既! 講起上網我好激氣呀, 原因係咁O既, 我上左公共圖書館個網度, 諗住睇下樓下間圖書館有冇我想借果幾本書, 點知當佢出緊結果果陣, 竟然斷左線喎, 之後再上過仲要話我個 PASSWORD 錯喎, 都唔知攪咩, 所以冇再查囉! 唯有夜Ｄ用過第二個 ACCOUNT 上啦, 今晚唔上網唔得架, 因為 STAREASTNET.COM 個 CHATROOM 又有亞敬講音樂呀, 我一定要到啦!
今日O既心情狀況: 平靜如冰水! (因為天氣凍左嘛!)

尋晚三點幾先訓, 因為上網搵料做功課, 點知今朝八點幾就要起身, 因為我亞婆落黎同我食飯, 唔知係咪食唔慣果Ｄ野, 我食完之後好唔舒服, 真係好唔掂, 夜晚返學果陣, 發覺我竟然發燒呀, 嘩! 真係驚呀, 越坐越熱, 塊面就越坐越紅, 最後要幾個人一齊討論問題, 我就同佢以及佢Ｄ朋友一組, 係咁易傾下! 我唔知點解會有咁O既動力, 今日星座話無論學業/愛情/生活/事業都唔會咁易放棄喎! 唔知係咪星座指引我呢? 另外我上堂果陣發生左一件好邪O既事, 就係我想搵某個 TOPIC 啦, 第一次翻到 P.444 , 第二次 P.222 , 第三次 P.111 , 真係一翻開就係連續呢三頁, 我真係覺得好邪呀, 所以我冇再睇喇! 仲有就係尋晚同亞敬 CHAT 呀, 學到樣野"才華唔係天生, 而係類積番黎O既!", 另外好認同亞敬講"作歌有抄到人地, 不過唔好抄得咁 CHEAP !", 正如我今日睇報紙話克勤O既＜櫻花＞抄人, 林敏聰講左我心底話"克勤抄得好過雷頌德!" <-- 我非常認同!
今日間接同佢講左幾句野!

今日訓到一點幾先醒, 因為尋晚發燒, 燒到 100 度, 所以食左粒退燒藥, 起左身之後食左野, 都冇做Ｄ咩野, 因為成日好累咁, 只係係咁易搵過資料做功課, 不過仲未開始寫份功課! 今日我搵番我隻＜ ALEGRIA ＞ＣＤ出黎聽喎, 我發覺到原來同＜ SALTIMBANCO ＞同一樣係"CIRQUE DU SOLEIL"(索拉其藝坊)所演出O既, 攪到我好想睇＜ SALTIMBANCO ＞添, 因為果陣睇過＜ ALEGRIA ＞, 真係勁正! 不過冇錢睇丫!
同我亞姨講聲"生日快樂"先!

今日又訓到一點幾, 因為病嘛, 之後都係勁聽英文歌咋, 等自己聽多Ｄ英文追步Ｄ嘛! 夜晚要返學, 點知張八達通唔知仲咩過唔到閘, 攪完一大輪先攪掂, 遲左少少返到課室! 一入課室就睇到佢望住我喇! 唔知係我多心定係佢有心, 成日都望住我, 攪到我唔知點咁! 尾升果陣又要分組討論問題, 我地七個人一組, 我有嗌埋佢地架, 不過佢個朋友話唔洗喎, 我又望到佢成日望我! 點會咁架? 仲有呀, 尋晚睇有線電視, 竟然突然間見到我夢中情人三號(亞 PAT)呀, 好開心呀!
今日好似仲有少少燒!

今朝一早起身落街買野同埋去圖書館, 冇計啦, 雖然我咁多年冇去過圖書館, 但係為左搵料做功課, 都要落一次架喇, 我唔鍾意圖書館O既原因係因為圖書館幾唔乾淨架, Ｄ書幾 DIRTY , 但係一定要搵料, DIRTY 都要一次啦! 好彩我都搵到少少我想要O既料! 我買左隻＜天使之城＞ＶＣＤ諗住送俾我亞姨做生日禮物, 點解?! 因為我覺得呢套戲好值得睇, 有好多得著, 而我亞姨果陣冇機會去睇, 所以買隻ＶＣＤ俾佢囉! 今日我終於知道點解Ｄ人俾人抄野咁唔開心喇, 今日我發現左有人抄我亞敬果個網頁, 先頭我睇果陣都唔覺架, 不過睇睇下, 除左佢Ｄ料同我果Ｄ一樣之外, 我發覺連我自己修改過同埋自己寫果Ｄ意見, 都完完全全一字不漏咁出現O係果個網頁度! 第一個反應係"有冇攪錯呀!", 之後我睇番邊個人寫, 原來果個人曾經同我通過 EMAIL , 但係俾我O既感覺同以上一樣, 都係"有冇攪錯呀!", 呢個人好難頂架, 成日話自己點叻, 我係一個好記仇O既人(大家都應該知道架啦!), 我覺得抄我唔緊要, 但係最起碼話聲我知丫, 同埋抄人都要有技巧囉, 有咩理由抄埋人地O既私人意見去丫? 由此証明左佢完全冇睇到內容, 就咁搬字過紙啦! 所以我有少少睇唔起佢呢個做法! 希望佢睇到之後可以細心咁諗下佢做過O既過份野!
幾時我O既夢想先會實現呢?

今日雖然十一點幾先起身, 不過都幾叻喎我, 今日用左三個幾鐘頭就做掂左份功課喇, 其實唔知掂唔掂架, 但係總算寫左成千字, 講哂自己要講O既野, 可能亞 SIR 唔明我想講咩架, 但係唔理 LU ! 有時幾佩服自己可以坐O係度幾粒鐘做份功課, 我個人係咁架, 一做就唔停得, 本來尋晚做左少少, 諗住做埋先訓架, 但係頂唔順, 一邊打字果陣一邊頭暈, 所以一定要訓醒先再做埋佢囉, 但係以後我諗都係一次過做哂好Ｄ, 因為今日再做果陣又要由頭再睇過自己寫左Ｄ咩, 幾浪費時間架!
聽日要開始讀書計劃喇!

今日訓到十二點, 因為尋晚個腦用得太多喇, 成晚個腦都諗番份功課內容! 今日本來約左我亞姨去行街街架, 不過就因為落大雨, 所以取消左, 不過唔緊要啦, 過多幾日咪有機會囉! O係呢度要多謝ＫＡＺＵ尋晚陪我傾左一陣電話!
今日冇溫到書添!

尋晚幫ＫＡＺＵ做佢份功課, 因為佢唔識做, 我咪上網幫佢搵資料囉, 不過搵到成三點幾先訓得呀! 但係都開心O既, 幫到人嘛! 今日個電話好旺呀又, 成日都冇停過, 今日主要係溫書啦, 不過真係好多野要讀, 死啦, 好驚唔夠時間讀添!
今晚又有機會同亞敬傾計喇!

尋晚唔知點解失眠, 成四點幾先訓得著, 今朝一早醒左就落左街買野同埋還書, 本來我想買冷織頸巾架, 不過去到賣冷O既地方, 點知俾生意佢做仲慘過求佢俾生意我做咁! 所以我就冇幫佢買囉! 今日溫過下書咁啦, 不過真係唔係全心咁去溫, 所以聽日要努力加油喇! 夜晚本來要返學O既, 但係由於要去睇＜遇上 1941 的女孩＞舞台劇. 所以做左逃學威龍, 我真係覺得好值得我睇O既一套劇, 因為套劇實在太太太正喇! 本以為只係一套愛情劇, 但係真係好有得著, 講愛情之外, 其實佢想帶出"千萬不要放棄理想", 好感人呀, 今次係我第一次親身睇舞台劇, 但感覺十分好! 呢套劇令我好感動, 我真係睇到喊, 故事同意義真係太好! 完左之後好開心, 因為呢套劇O既部份演員幫我地簽名O係本場刊度, 真係好開心, 我都忍唔著要同佢地講:真係做得好好! 唔知係咪仲有少女O既心景, 幾年前我曾經鍾意過男主角(譚偉權), 事隔幾年, 今晚再見番佢O既演出, 再加上同佢近距離接觸, 我真係有少少心動, 所以今晚起, 我夢中情人 4 號就係 GARY 喇! 如果大家真係有機會O既話, 呢套劇真係值得睇! 包你值回票價, 仲有賺添架!
好難忘O既一個晚上!

尋晚又再一次失眠喇, 可能係因為尋晚套劇幾影響我心情, 因為太有啟發喇! 而今日除左溫書之外(雖然都仲未知自己聽日掂唔掂!), 就係同間屋大掃除喇! 原來一個人清潔成間屋係幾辛苦架, 我整左成兩個幾鐘呀! 不過之後睇番間屋咁乾淨, 又真係幾有滿足感o既, 不過代價就係唔知o係邊整損左隻手指囉! 聽收音機知道日前有位學生上堂突然暈左, 做完手術到現在仲未醒, 希望大家可以為佢祈禱!
聽晚＜全線大搜查＞有亞敬, 記住睇喎!

由於尋晚太開心喇, 所以成四點幾先訓, 訓到今日十二點幾先起身, 之後成家人落左街飲茶! 之後就行左一陣街, 到左五點幾就準備返學喇, 我今晚著得好掂架, 係短裙加長褸, 仲好正咁返學, 返到去一陣, 佢就入課室喇! 咁 ARM 就對望左一陣, 我見到剪左頭髮O既佢, 佢又見到咁掂O既我, 感覺有Ｄ怪, 我 FEEL 到佢見到我係幾開心架喎, 今日主要係要測驗, 不過有好多第二班O既人好奸咁出貓, 我地講左俾亞 SIR 知架喇, 咁唔公平O既事係唔可以發生O既, 不過亞 SIR 好似唔係好知點算咁! 我見到佢望左我好多次呀! 究竟點解呢?
原來住家飯係咁正架喎!

今日亦都勁晏先起身喎, 因為尋晚睇電視囉! 今日冇落街呀! 而家睇緊有線電視O既＜怪談＞, 其實唔係咁想睇呢類節目, 因為同我O既宗教信仰有衝突, 主動接觸靈介真係唔好!
肥左少少添!

今日都訓左好耐, 因為太夜訓喇! 其實冇咩特別, 所以今日冇咩野可以寫!
新年有咩節目呢?!

話咁快又到左一月最後一日喇! 大家有咩感覺呢? 我就覺得幾無聊咁啦! 係我O者, 大家唔會似我O既! 今日主要落左街飲完茶, 之後就主力執屋, 因為我個ＣＤ架爛左, 咁我爸爸就幫我整番好佢咁! 都冇咩特別! 今日有個網友睇左＜遇上 1941 的女孩＞, 佢都話好正! 最衰我睇果晚冇帶相機啦! 如果唔係我一定同夢中情人 4 號影番張相放O係銀包!
不過我會搵左 1 號影左先!