背景音樂 : 宿命主義


歡迎睇我任何一日私日記!
1/7/2000
2/7/2000
3/7/2000
4/7/2000
5/7/2000
6/7/2000
7/7/2000
8/7/2000
9/7/2000
10/7/2000
11/7/2000
12/7/2000
13/7/2000
14/7/2000
15/7/2000
16/7/2000
17/7/2000
18/7/2000
19/7/2000
20/7/2000
21/7/2000
22/7/2000
23/7/2000
24/7/2000
25/7/2000
26/7/2000
27/7/2000
28/7/2000
29/7/2000
30/7/2000
31/7/2000


1/7/2000

今朝一早起身肚痛到我死咁滯, 連野都唔想食, 之後訓多一陣覺得好D先食野, 都係飲左一碗字母湯咋, 因為實在太唔想食野喇! 之後都冇咩做, 因為感到暈暈地所以冇出去行街街, 到左五點幾我就電視O既卡通片, 點知六點幾睇睇下"小丸子"我就眼訓到暈, 不過都係訓左九個字到, 七點幾就起身食晚飯喇! 而家都好番好多喇!
七月十日係一個好特別O既日子, 但亦希望時間過得慢DD!

返回


2/7/2000

我發覺我幾鍾意睇小說架喎, 因為我只係用左三個晚上就睇左五份之四本張小嫻O既<麵包樹上的女人>喇, 本來可以兩晚睇哂架, 不過的確唔想咁快睇完, 我真係好想買多幾本佢同埋梁芷珊D書呀, 因為實在太好睇喇! 今日可以話係好忙, 一早去左尖咀同人飲茶, 之後去左行旺角, 返左屋企一陣又出過去同一班人食晚飯, 的確係幾累, 而且呢兩餐的確係幾貴而且完全唔覺得好食, 好唔抵呀, 兩餐夾埋可以買到七隻CD呀, 好食都話丫, 唉!
今日隻手指公好鬼痛呀!

返回


3/7/2000

今朝未夠十點就起左身喇, 仲去埋銀行, 再之後出左尖沙咀同一個我父母O既老朋友飲茶, 之後行左一陣尖咀啦, 再返到屋企附近租碟睇, 本來仲想去買個菠蘿批食架, 點知竟然冇喎! 所以就返屋企睇碟喇!
今日隻手指公仲係好鬼痛!

返回


4/7/2000

今日好開心呀, 因為收到一封信, 係由 GARY FANS CLUB (譚偉權)寄黎O既! 係一隻CD, 裡面係佢套新舞台劇O既歌曲試聽, 雖然只係幾段歌, 但係我都好開心喎! 基本上冇咩野做過, 係行過下CD店, 好想買番隻宇多田光聽下, 我都發覺近排果個椎名林樆幾好聽喎, 其實好想買好多碟, 不過都係遲D有工做先喇!
尋晚凌晨重播<烈火雄心>呀, 正!

返回


5/7/2000

好激氣呀, 日前上網下載左D歌黎聽下, 點知全部 MP3 都跳線O既, 而有一部份 REAL AUDIO O既歌只係聽到前半首, 而其後O既半首 PLAY 唔到添呀, 真係浪費時間喇! 不過我今日都發現左一個用黎錄 MP3 O既軟件, 好鬼快架喎, 唔知係佢本身快丫, 或者係我部機快左?
今日有少少作傷風添!

返回


6/7/2000

今日的確係幾病o既, 因為傷風再加幾聲咳, 希望快D好番啦! 今日我冇出過街呀, 因為實在幾辛苦, 所以要O係屋企訓下, 食左幾次藥好左好多喇! 大家有冇試過將 WAV 轉成 MP3 呢? 用開果個軟件我唔記得左 COPY 黎新機, 又唔記得個軟件名喎, 攪到我要用過第二個軟件黎錄 MP3 , 最慘O既係唔係隻隻CD都錄到, 大家有冇正O既軟件介紹我呢? 要係由 WAV 轉成 MP3 , 即係唔係就咁由CD錄成 MP3 喎, 有的話麻煩大家 SEND 個 EMAIL 話我知邊度有得下載丫!
希望聽日會好番啦!

返回


7/7/2000

今日一早起左身喇, 因為唔知點解訓唔耐, 可能我冇開冷氣訓啦, 因為病病下就費事再凍親啦! 之後我都冇咩野做過, 只係執下我部電腦O既資料; 之後我亞姨地黎左我屋企玩, 因為今晚約左我兩個舅父等食飯, 都係O係屋企樓下食飯O者! 九點幾就食完返左我屋企喇, 佢地坐左一陣就走左喇! 我舅父送左個 EOL O既 MOUSE PAD 俾我呀, 不過冇亞敬張相; 尋晚有個舊同學打電話俾我, 講左好多野我知, 其中一D係關於我第一個男朋友O既, 佢好似追緊某一個人, 本來佢都費事講我知, 話驚我唔開心, 不過我聽完反而為果個女仔擔心, 但係感情呢家野好難講O既, 唯有祝褔佢啦!
頭先諗住 COPY 隻 CD-ROM 俾我表弟, 點知 ... 衰左!

返回


8/7/2000

尋晚訓之前食左藥, 所以今日訓到成十二點幾先起到身, 不過的確訓得幾夠! 天氣唔係咁好, 不過好彩落得出雨, 涼左好多, 不過空氣都係麻麻地!
今日好番好多喇, 不過仲未好得番哂!

返回


9/7/2000

今朝十一點起身, 食左野之後就一心出旺角諗住去換可樂果部貼紙相相機啦, 點知去到佢話換哂, 而且唔會再有新貨喎, 有冇攪錯呀? 開始換左唔係好耐, 但係就冇得換喇, 我真係好唔開心架, 雖然唔係話真係好想好想要果隻, 不過我一心存咁多分想去換, 點知冇得換, 之後想換一D要加錢O既野, 點知佢話只係剩番好少貨, 所以我一氣之下咩都冇換到就返左屋企喇!
聽日係一個特別日子!

返回


10/7/2000

今朝十點就醒左喇, 基本上冇咩特別野, 不過尋晚就發左個好長O既夢!
今日腦海一片空白, 情感 ... ...!

返回


11/7/2000

尋晚本來唔想開冷氣訓架, 不過的確係太熱, 點知開左冷氣之後就開始勁落雨喇, 一直到今朝D雨都係一陣一陣咁落! 今朝未夠十點就醒左喇, 不過都冇咩做, 只係睇下卡通片咁咋! 仲有呀, 尋晚聽903"嘩! 嘩! 嘩! 打到黎", 真係笑到我肚痛呀, 諗諗下, 呢個節目都改左朝早成年, 尋晚第一弝改番夜晚做, 好開心, 不過都唔係好習慣!
食左藥, 好眼訓添!

返回


12/7/2000

今朝十點幾起身, 之後就即刻食野喇, 十二點幾有個朋友約我去行旺角, 行左幾個鐘; 一場出到去, 諗住換可樂果個袋仔啦, 點知果D人又話滿左額唔俾人排隊喎, 真係衰呀! 之後就去左我婆婆屋企食晚飯, 食到我好滿足呀!
成日落雨又唔落咁, 真係激死人!

返回


13/7/2000

其實呢幾日都唔係咁想出街, 因為天氣實在太熱, 再加上好善變, 所以唔出囉! 今日突然諗起一樣野喎, 其實我地好多時會欠缺同身邊o既人o既溝通, 好似同老人家O既關係咁丫, 你地有冇諗過究竟你上一次認真咁同佢地傾計係幾時呢? 所以大家一定要同身邊O既人溝通溝通!
今日終於解決左我同我第一個男朋友剩餘O既問題喇, 真開心!

返回


14/7/2000

亦係一個冇咩特別O既一日, 天氣冇之前咁熱; 下晝聽收音機果陣, 有一件事令我真係好想喊, 因為我感受到個DJ果種無奈! 今日我又諗起一樣野, 其實有時我會覺得同我D朋友唔係咁熟, 就好似我兩個好朋友咁, 有時出黎玩, 我會覺得好似同佢地傾唔埋咁, 可能佢地O係同一個地方工作, 有共同話題, 住得亦好近, 有時我真係幾唔開心架, 唔係因為佢地對我唔好, 而係我好嬲自己, 點解好似完全冇成長到咁, 仲係好似學生妹心態!
今日把聲沙沙地添!

返回


15/7/2000

身為Y2K O既青年人, 真係好唔應該日日坐O係屋企等運到O既, 但係奈何天愛弄人, 我今日想出街果陣, 個天竟然落雨, 所以冇計, 依然在家千日好O既! 尋晚 CHECK EMAIL 果陣非常之開心, 估都估唔到我竟然收到亞敬回俾我O既 EMAIL 喎, 我真係開心到唔知講咩好, 雖然只係短短幾句說話, 但係好開心佢話記得我係邊個喎, 真係勁開心! 可能因為咁, 我竟然自己睇番自己寫果個<吳國敬的主題曲>網頁, 但係一睇之下實在難頂, 原來一年前用 PHOTOSHOP 整果D ICONS 係咁鬼肉酸O既, 相信人地睇到一定笑死人, 所以我就將果D ICONS 通通改過哂, 雖然唔係勁靚果隻, 但係都叫做見得人!
天氣勁勁勁熱呀!

返回


16/7/2000

日日都打風落雨, 攪到我星期日都冇出街, 因為實在係唔想帶傘出街, 我份人係幾貪方便架, 好多時見出門口冇雨落我就就咁出街架喇! 但係我心知呢D天氣一定會落雨, 所以索性連門口都唔出!
雖然打風, 但係都冇咩風喎!

返回


17/7/2000

今朝七點幾俾一場勁暴風雨嚇醒左! 成日都落雨都要出下街行下, 順便去睇下有咩正O既CD值得買, 本來想買亞敬上次個演唱會VCD, 不過我睇果間冇喎! 行左一陣返到屋企, 突然間又諗起想睇番上年O係電視錄, 有亞敬做果套港台短劇<婚姻蜜語>喎, 點知搵哂成間屋都唔見, 死啦, 唔通洗左??? 唔會掛, 千其唔好呀, 錄唔番架喇!
尋日話冇咩風O者, 今日D風竟然勁到嚇親我!

返回


18/7/2000

今日仲係不停咁落雨, 真係咩心情都冇哂!
尋晚睇電視聽到一個唔係咁好O既消息, 希望唔係真架啦!

返回


19/7/2000

好慘呀, 尋晚我又失眠喇, 要成四點幾先訓到, 真係完全唔希望再失眠啦, 不過今次失眠都有收穫O既, 就係我竟然拎起左支筆同埋原稿紙寫左一編文章, 我亦將佢放左上去"寫我心"度, 有興趣去睇下丫! 今日O既天氣都好過前幾日架喇, 不過真係希望唔好成日落雨啦, 我聽日約左個朋友去書展呀, 真係唔好落雨啦, 仲有添呀, 後晚開始又要返學喇!
呢幾晚都唔記得發覺咩夢, 不過尋晚個夢係有亞敬架!

返回


20/7/2000

今日可算係經典O既一日喇! 首先斯斯今日約左一個成三年幾冇見O既朋友去書展, 見番佢確實好開心, 因為平日都係靠 EMAIL; 入到去書展會場, 有個人想俾張指南我朋友, 點知我朋友伸左手去接之際, 唔知點解果個人又縮番隻手喎, 我同我朋友笑到肚都痛埋, 果個人又好唔好意思咁想俾過我地, 但係我地勁笑到冇意識去接; 之後我地周圍行下咁啦, 不過行左成半個鐘都仲未有收穫喎, 未幾, 我發現到一檔賣梁芷珊D書好平架(只記得果間野聽日同後日芷珊會去簽名會咋), 我就O係果度買左一本<尋找最後一個>, 其實有好多本我都想買架, 不過冇咩錢嘛! 之後就行過"尖端出版有限公司"買左李力持新果本<真係笑話(三)>, 聽人講都幾好睇, 所以我都想睇下! 一直再行左好多轉, 其實經過果D漫畫檔真係好鬼驚, 因為隨時會刀劍戰! 之後行左去第二層O既"尖端", 我發現左我朋友極力推介O既<桃子有喜>, 所以我亦有買到, 其實櫻桃子一系列O既書都好吸引, 不過我真係帶唔夠錢出去喎, 所以我今日只係買左呢三本書咋! 原來我仲想買張小嫻O既書架, 不過一來冇錢, 二來睇唔 ARM, 最衰書展咁鬼多人啦, 本來多人我係幾開心架, 因為書展多人代表有文化進步, 不過大家都知道咁多人O既原因唔係因為D書啦, 只係有刀刀劍劍咋, 真係一個幾好笑O既笑話呢! 有D失望啦, 因為梁芷珊唔係今日開簽名會! 行完之後五點幾, 我就坐左車去我亞姨度食飯, 不過只係幾個鐘頭咋, 食完飯再坐左一陣就返屋企喇! 其實今日係斯斯咁大個女第一次去書展, 但係好好笑, 一路行我覺得自己似去左科技展多D!
同媽咪講聲"生日快樂"!

返回


21/7/2000

其實尋日奇遇仲未講完架, 坐地鐵去灣仔果陣一上車就見到個難得一見O既靚仔呀, 係真係幾靚仔架喎! 夜晚入到去我亞姨度食飯果陣一坐底就見到另一個靚仔, 好熟口面, 原來係"胡惠康"(唔知有冇錯字), 原來佢真人真係幾型架喎; 講番今日喇, 其實成十一點先起身, 冇做過咩特別野, 晚上返學果陣見番果陣我 RE-TAKE ACCOUNTING 果陣同我好好傾果個男仔喎, 真係成年冇見喇, 見番佢的確幾開心, 不過有一樣野擔心, 就係呢個男仔今日同我坐, 但係唔知係咪我多心呢, 我竟然見到我對佢有好感果個男仔用一D好怪O既眼神望左我同我隔離個男仔幾次喎, 係咪我多心呢?
聽日都要返學, 其實後日同大後日都要返!

返回


22/7/2000

大家有冇見過警察哥哥當更食煙呀? 我今日唔知叫好彩定唔好彩, 竟然俾我見到喎, 真係嚇到我打左幾個突呀! 今日起身食完野又要返學喇, 好不容易上左三個鐘頭堂, 不過其中都有幾分鐘我係望住佢O既, 因為今日佢坐我前面再前面隔離位呀! 放左學就即刻返屋企喇, 因為條街實在太多人! 尋晚同左一個新識O既亞敬歌迷傾計, 都幾開心丫!
近排發現有一隊叫做"SUPERJET"O既 BAND D歌都幾好聽喎!

返回


23/7/2000

今日亦都係要返學O既, 不過亞 SIR 遲到, 所以亦都遲左放學! 我今日講左個秘密俾一個人知呀, 果個人竟然教我點追男仔喎, 真係幾攪笑! 不過我今日聽到佢聽日就會知升唔升到 YEAR 3 喎! 呢兩日都有手信收呀, 尋日我一個夜校同學, 前排去過台灣, 所以就送左一D我咁大個女都未食過O既鳳梨酥俾我, 真係幾好食架喎! 今日我其中一個亞姨, 前排去過日本玩, 亦買左好多手信俾我, 有食得啦, 亦有用得O既! O係呢度同佢地講聲: 多謝哂!
最衰前晚要返學啦, 如果唔係我可以去搵亞敬!

返回


24/7/2000

今日本來心情係不錯O既, 但係到左夜晚返學果陣, 心情真係幾差, 原因係因為我聽聞佢好似升唔到班, 眼見佢O既狀態麻麻, 攪到我都有少少擔心, 其實我真係希望我聽錯, 唉 ... 擔心死人呀!
呢件事發生之後, 有少少怪自己咩都做唔到!

返回


25/7/2000

呢幾日O既天氣的確熱呀, 不過好彩唔係好似上星期咁成日落雨! 尋晚我將我個手電鈴聲改左呀, 本來係"其實我深深愛著你", 而家改左"感情線上", 咁樣並唔代表我唔鍾意亞敬喎, 只係短時期想改變下, 雖然我個電話都冇咩響過, 不過間唔中換下音樂都不錯丫!
究竟我O既未來會係點呢?!

返回


26/7/2000

今日心情都過得去啦, 亦開始睇梁芷珊果本"尋找最後一個", 都唔錯架, 越黎越鍾意梁芷珊! 夜晚亦係返學時間, 今日果個亞 SIR 我對佢冇咩好感, 唔知點解, 一來係直覺唔鍾意佢, 二來佢教書好唔掂, 亦好似有D自以為是咁! 所以上左三個鐘堂, 真係受難咁呀!
今日同"佢"最近O既距離只有一公分!

返回


27/7/2000

今日O既情緒的確幾不定, 因為我睇完梁芷珊O既<尋找最後一個>, 實在係好認同佢所講O既野! 其中一句佢話: "世界上並沒有『失去聯絡』, 只有『無心維繫』!", 我極之認同, 除此之外, 仲有 "做對方的第一個太沉重了, 以後, 我只想做別人的其中一個。", 大家認同嗎? 當然呢本書對我O既情緒都有好大影響, 因為我一邊睇一邊眼濕濕, 因為實在太認同, 有機會大家真係要睇下!
書展O既『戰利品』已經睇哂喇!

返回


28/7/2000

今日心情OK啦, 夜晚亦係要返學, 其實都係聽一大堆法律案例咁, 因為而家讀緊 BUSINESS LAW, 真係有少少慘情, 因為要買教科書, 仲要O係澳洲訂添呀, 三百蚊只係用個令月咋喎, 唉, 所以真係要搵野做下, 一係就搵個有錢男仔(講笑!)!
原來張小嫻新出果本"麵包樹出走了", 係我勁愛果本"麵包樹上的女人"o既續集黎架!

返回


29/7/2000

尋晚成四點幾先訓得著, 但係今朝未夠九點就好醒喇, 我都唔知點解呢幾晚都諗唔著! 前排聽<嘩嘩嘩打到黎>, 吳君如成日好嬲D人打黎做問卷, 我原本都唔係好明點解佢發咁大脾氣咁嬲架, 但係我今日終於體會到喇! 大家都知我尋日訓得果四粒幾鐘, 係冇可能夠訓架啦, 所以下午五點幾果陣我就訓左一覺, 但係就O係我就黎訓著之際電話響起了, 有一個女仔講左成兩分鐘, 話要做電話訪問, 仲話好好彩咁抽到你電話喎, 咁我就話我好唔得閒, 點知佢仲勁問十分鐘後得唔得, 又話過兩日得唔得, 一直講左一大段野, 之後我真係忍無可忍(因為我覺得佢雖然打份工o者, 咁但係佢都要體量我唔願意做訪問o既心情架, 我一直都對佢好有禮貌, 但係我真係好憎被人迫囉!), 所以就o係佢不斷咁問我幾時得閒果陣, 我就一口氣講"其實我係完全唔想做問卷調查呀, 係咁啦, 多謝你呀, 拜拜!", 之後我就收左線喇! 其實我係好唔想咁樣做架, 但係的確有被迫O既感覺, 而且令我反感, 所以無禮貌都要做一次! 今次之後我好明白吳君如O既激氣原因!
天氣熱左喎又!

返回


30/7/2000

尋晚都依然係眼光光訓唔著O既, 今朝訓到十二點幾, 唉, 係咪身體開始有病呢? 落過街行左一陣啦, 都冇咩特別事發生!
幾時先到冬天呀?

返回


31/7/2000

尋晚依然係成三點幾先訓得著, 究竟點解呢, 晚晚都係咁? 尋晚分別睇左兩套日本戲:<鐵道員>及<三天兩夜>, 其實一直都好想睇<鐵道員>, 因為果陣戲院上果時電台廣告賣得好勁, 尋晚睇左之後, 我發覺個故事都OK, 不過就拖得太長喇, 長到有悶O既感覺; 之後睇左<三天兩夜>, 係由江角真紀子同埋廣瀨壽明(唔知有冇記錯?!)做O既, 反而呢套幾好睇喎, 係講廣瀨O係一次交通意外中死左, 之後死神先發覺認錯人, 如果要廣瀨還陽的話, 就一定要令一個當黑O既人得到幸褔先可以, 呢個當黑O既人就係江角真紀子喇, 如是者發生好多事, 最後江角真紀子因為廣瀨O既愛而得到幸褔! 其實都好感人架喎, 因為愛情呢樣野幾奇妙架, 會O係自己不知不覺之下產生化學作用!
如果而家死神要你離開, 佢俾張紙你寫低最想講而冇講O既說話, 你會寫咩呢?

返回


inserted by FC2 system