今日不過不失啦, 都係同我爸爸落過街買野, 今日冇前幾日咁凍, 不過都要小心凍親! 我去超市買野果陣發生左一件事嚇親我架喎, 話說我地去到呢間話會格價O既超市買雪藏雞脾, 揀左六大隻諗住今晚煮啦, 個職員幫我包緊Ｄ雞脾果陣就話有三隻凍實左, 提議幫我扑開佢地易袋Ｄ, 我就話好啦, 點知我果頭答佢, 佢果頭就將三隻雞脾掉落地下, 之後執番上黎俾我喎, 果一刻嚇到我真正咁"目定口呆"呀, 的確我完全表達唔到我O既不滿, 有咩可能咁架! 仲標榜乾淨第一咁, 直頭嚇鬼死人呀!
今日有溫書呀, 仲溫左三個 CHAPTER 添!

今朝七點幾就唔知點解醒左, 一直都訓唔番喎, 不過都成十二點先出房門, 睇下電視發下白日夢咁, 今日大件事咯, 我剪左頭髮呀, 剪左兩吋幾啦, 有少少唔係好習慣添, 不過新形像都ＯＫ! 不得不提O既就係今日麥記又有 KITTY 換呀, 呢個星期就係太空版, 其實我好想換架, 因為佢地個頭有個野笠住架, 好得意又好攪笑! 但係一來我唔係好想食麥記Ｄ野, 病好冇幾耐, 二來又冇咩錢喎! 哈哈, 冇咩錢O既人最多想頭架啦, 我咪係好例子囉, 希望有人換俾我就好喇! 仲有就係和服版果對都好可愛! 有冇咩地方可以平平地買架(唔洗食野果隻!), 因為前排都食過幾次麥記, 驚驚地, 因為我唔可以食咁油O既野, 食完個肚一定好唔掂, 上次食完又痛左幾日! 唯有望住人地換左啦!
今日都有溫書, 溫左四個 CHAPTER !

今朝都係訓得唔好, 訓下醒下咁, 都唔知做咩! 大致上冇咩特別, 溫左書啦, 雖然溫左成兩個鐘頭書, 不過都係溫番前幾日溫O既野, 溫故之新丫嘛, 不過仲有好多野未溫呀! CONNIE 打過電話俾我呀, 話下星期約出黎唱Ｋ喎, 真係好喇, 又有得去玩, 太耐冇去玩喇! 過埋下星期三考試, 我就可以玩番夠本喇! 今日睇番Ｄ過左期O既雜誌, 我發覺到亞敬遲Ｄ會開拉闊呀, 不過係O係 STAREAST 攪全企位果隻, 要用 idclub.com 果張信用咭分數換飛, 有冇人有呀? 換兩張俾我丫! 最衰我申請唔到果張咭啦, 大家幫幫手丫! 雖然係難Ｄ架喇, 但係我真係好想去睇, 因為亞敬話開埋呢個之後就會停佢自己O既工作, 專心夾 BAND 同埋作歌, 唔會以個人身份出現! 我已經錯過左佢出現"漢洋"O既 MINI CONCERT 架喇! 我唔可以再錯過喇!
天氣熱左好多喎!

今朝十點幾起左身喇, 呢幾日都係一醒左少少就訓唔番(考試壓力?!)! 今日我亞姨同兩個表妹黎我屋企玩呀, 真係幾累架喎, 因為我細表妹成日走黎走去都未停過! 之後有個朋友打電話俾我傾左一陣, 佢近排失戀呀, 希望佢唔好咁唔開心啦, 果Ｄ咁O既人冇左都唔洗恨, 早Ｄ甩咪仲好(我真係講真架!); 今日冇乜溫書呀, 因為陪我表妹地玩都累到死, 而且我今日好唔舒服, 唔知係咪食錯野呢?
溫書考試要順利呀!

今朝好病呀又, 尋晚傷風起咁, 不過今日好左Ｄ啦! 溫過書, 不過仲未溫完, 真係慘, 最慘O既係我又肚痛喇, 一定係食錯野啦, 真係幾辛苦! 又暈暈地咁, 點算好呢?
千其要冇事, 如果唔係點考試呀!

今朝睇＜聊齋 2＞喎, 原來幾好睇架喎, 剛剛呢個故事有郭政鴻喎, 大家未必知佢係邊個, 不過的確佢住O係我附近O既, 幾好人架, 大家留意下丫, 佢做戲都唔差, 不過硬係做唔到一線, 有少少戥佢唔抵! 今日可以話係溫書日喇, 我溫左成五六個鐘頭書, 不過都仲有少少未溫, 不過幾驚架, 因為呢次考試得兩個鐘頭(一直以黎都有三個鐘), 要答五題短答同埋兩題長問題, 得兩個鐘真係唔係好掂, 如果我一有少少唔記得, 我就死硬喇!
今日仲係勁肚痾呀!

今朝食完野之後陪左我媽咪去銀行, 之後我地又出左張手電咭喎, 痴線架, 咁鬼平! ＄１３／１２０分鐘, 雖然用得大約十個月, 不過都係百幾蚊咋喎, 勁抵啦, 我用緊果張係＄３８／１２０分鐘架, 諗諗下, 用埋呢個月 CUT 鬼左佢出過張都抵呀! 當然今日係有溫書架啦, 再唔溫點死喎, 不過都叫做溫得幾掂掛, MANAGEMENT 係要作野架啦, 望就望聽晚唔好咁緊張, 勁作到野就ＯＫ喇! 實在係幾大壓力架今次, 不過真係盡左力架喇! 仲有呀, 我尋晚睇到個電視廣告, 睇完之後我幾唔開心, 果個係＜香港寬頻＞O既新廣告, 其中片段出現左好多已經過左身O既人(例如 : 德蘭修女, 黃家駒等), 我睇完真係好唔開心, 因為我覺得用過左身O既人黎做廣告O既 GIMMIC , 係咪有少少唔應該丫? 我唔知大家睇完有冇同感, 但係我的而且確對呢個廣告同埋呢個寬頻完全冇興趣! 如果有人同我一樣咁諗, 咁佢呢個 GIMMIC 咪即係失敗?!
聽晚考喇!!!!!!!!!

今朝四點幾醒左, 因為個肚又勁痛, 訓唔到! 之後睇下電視再溫左一陣書啦, 黃昏六點鐘出門口, 未到六點九就返到去喇! 開始考果陣有十五分鐘 READING TIME, 我可以話俾大家知我係唔識O既, 因為亞 SIR 話一定出果Ｄ都冇出到, 所以有少少被騙感覺, 而且得兩個鐘頭做, 我唔係好夠時間答題, 不過算啦, 我真係盡左力架喇! 結果係點都冇所謂喇(當然最好係合格, PASS 啦!), 大家祝褔我啦!
我未來幾日會約人玩餐飽架喇!

今朝未夠九點就完全醒哂, 唔知點解訓唔到喎, 尋晚成三點先訓, 唔夠訓攪到我今日傷風又起! 打左電話俾我個朋友, 本來今日去唱Ｋ架, 不過好彩改左下星期先去, 因為某間Ｋ有好平O既自助晚餐, 我下星期就會去食下, 食完話俾大家知值唔值得去喇! 會考又就到喇, 我表弟係應屆會考生, 我想借呢個機會同我表弟講句野! 雖然好多野第一次唔得可以有第二次甚至第三次機會再俾你做多次, 但係點解第一次有機會成功唔理佢, 而要等第二甚至第三次先做呢? 第一次就盡哂自己努力去做, 唔係好過唔盡力而去等第二次先做好佢呢?
青春係唔留人架!

今朝八點正醒過一次, 不過好彩訓得番, 十一點幾起左身, 不過食左少少野咋, 因為兩點鐘落左去飲下午茶, 再去左超市買野, 今日天氣幾好咁喎, 不過又開始凍番喇, 我Ｄ傷風仲未好番哂, 不過相信冇幾耐就會冇事喇!
我覺得＜彊屍２＞冇＜彊屍１＞咁好睇!

今朝訓到十二點幾呀, 因為訓之前食左粒傷風藥, 太好訓喇! 大致上冇咩特別事發生, 我落過街諗住買叉燒俍, 點知冇得買喎, 所以咪返屋企囉! 我今日好想去買Ｄ書學下野, 例如: JAVA 果Ｄ呢, 因為我發覺我只係識 HTML 係唔夠, 而家我網頁果Ｄ JAVA 都係睇人地Ｄ網頁抄下改下咁架咋!
有冇諗過點解而家咁多前一輩O既歌手出番黎唱歌呢?

今朝十點幾醒左喇, 可能尋晚早訓掛! 落過街幾次, 都係買下野咁啦, 我唔想我爸爸成日落街咁辛苦嘛, 聽日約左幾個朋友去唱Ｋ呀, 好耐冇去玩過喇, 呢幾個朋友都成個幾月冇見喇! 尋日日記講到點解咁多前一輩O既歌手出番黎唱, 我覺得有好大O既可能係而家Ｄ歌手一代不如一代, 所以我而家都唔係好想聽新果Ｄ歌手O既歌, 例如 : 張柏芝 / 陳慧琳等(個人意見咋!), 你地可能覺得我有冇攪錯, 不過確實我係另類Ｄ O既, 我聽 CRANBERRIES / 吳國敬 / 太極 / 草蜢呀咁, 好多人覺得怪架, 不過的確又係另類左少少! 近排我幾欣賞"漢洋"喎, 雖然我只係聽過佢幾首歌, 但我覺得佢唔差!
我肥左少少添!

今日去左唱Ｋ呀, 嘩, 好多新歌未唱過架, 不過就貴左少少喇, 都唔係可以成日去唱! 我唱左唔係好多歌咋! 因為我感冒未好得番哂, 唱得最開心O既係 SAMMI 新O既演唱會, 真係好正喎! 仲有呀, 我唱左"漢洋"首"怪你", 我唱得同漢洋差唔幾架, 有機會唱俾大家聽下! 今日出一出街就用左成百蚊喇, 所以唔可以成日去玩! 今日收到封信呀, 原來＜遇上 1941 的女孩＞會O係四月重演呀, 今次O係理工做, 我真係勁想去睇多次呀, 但係的確我 ARMARM 交左學費, 完全冇咁O既錢去睇添, 903 咭有八五折, 要成一百蚊架(原價 $130 <-- 最平), 我的確冇喎, 因為係睇就睇最貴啦( $ 210 , 八五折都要 $178.5 ), 早知我今日唔去玩啦, 唔去玩咪有錢睇囉! 相信都冇人請我睇架喇, 冇咩可能咁O既, 就算有我都真係唔係咁好意思呀! 但係又真係好想睇多次, 因為今次Ｄ歌又有Ｄ唔同左!
點解仲未搵到野做架?!

斯斯今日好嬲呀, 話說我今日收到張信用咭月結單, 點知發現要交 $108 喎, 但的確我冇簽過咭好鬼死耐, 一睇之下係"和記"收架喎, 所以我就打去"和記"問下係咩一回事, 一查就發現我O既"和記"上網戶口要交月費, 但的確我O係三個月前就 CUT 左果個戶口架喇, 完全未用過添, 但係果個人竟然話完全冇收過我話 CUT 呢個消息, 咁我話要 CUT 但係我唔會俾果百幾蚊, 點知佢仲惡過我, 話冇收過話 CUT 係我自己O既事喎! 講左好耐, 佢話叫我寫張 FAX 去話 CUT 戶口, 就計番我半個月O既月費, 即係我要俾 $54 , 但係我真係覺得好唔抵囉, 冇 LALA 要俾錢人喎, 又冇用過, 用過就話抵俾O者! 但係我要交信用咭呢張單( $108 ), 下個月先俾番 $54 我, 到時佢唔認數咁點呀? 總之就煩死人啦, 我以後無論點都唔會用"和記", 咁就冇左幾十蚊, 天呀, 我尋日先話冇錢, 而家又被人呃左幾十蚊!
今日係真好嬲呀!

今日心情好番Ｄ喇, 打左去問過"和記"已經 CUT 左個戶口喇, 不過始終我係有被騙O既感覺, 我一定會追究O既, 不過就要等埋"和記"張支票先(因為信用咭過左我 $108 , 要退番 $54 俾我!)! 今日我都冇出到街呀, 因為冇錢就費事出啦, 其實諗諗下都幾唔抵架, 因為我一時太信任"和記"Ｄ客戶服務員O既辦事能力, 真係痴線!
天氣都熱左少少咁!

今日天氣真係差喇, 攪到我成十一點幾先起身, 因為個天好黑, 唔知已經咁晏喇! 之後都有落去行下街, 聽晚又要返學喇, 仲一連要返三日添; 有線今日打黎叫我去拎獎品, 不過的確唔係好得閒去拎添, 所以我諗住請佢幫幫手郵寄俾我, 我唔知佢肯唔肯架, 不過總要試一試!
今日成日都好眼訓呀!

今日好熱呀, 天氣真係勁變! 冇咩特別野做過, 不過夜晚就返左學, 都幾累架, 因為上左三個鐘頭冇郁過! 今次係上 NETWORK , 今次亦要做 PRESENTATION , 而我O既題目係 SNMP , 我未知係講咩O既, 大家知就話我知係咩黎架喎! 聽晚同後日成日都要返學呀, 希望我頂得住啦!
今日我同佢最近O既距離 --> 0.01 公分!

今朝十一點幾起左身, 之後就去左買 PRITER 墨, 因為尋晚 PRINT PRINT 下 NOTES 就冇哂彩色墨, 攪到我未 PRINT 哂Ｄ NOTES , 所以一定要買, 但係好不易行左五間野先買到, 仲要 $140 添! 夜晚要返學呀又, 今日講左成三個 LECTURE , 都幾多野學架, 但係未明得哂! 今晚成十點幾先食飯呀, 所以而家幾滿足! (唔好話"飽", 因為咁樣幾折墮架!)聽日要返成日學添呀, 我真係驚我頂唔順, 因為今晚都已經遊左雲幾次!
今日我冇同佢有正面接觸添!

今日我咪嗌我先起到身呀, 可能前兩晚都要上堂, 個人就累左少少啦! 今日都係要返學O既, 仲要返全日添, 有時都幾佩服我自己可以頂到連續坐咁多個鐘都冇訓著! 晏晝果堂都係照 NOTES 講書, 本來亞 SIR 話夜晚果堂會俾我地自己駁下 NETWORK 咁, 點知都唔係O既, 係就係上ＬＡＢ, 不過只係俾我地自己上網 SEARCH PRESENTATION O既料, O係一個新O既ＬＡＢ上堂呀, 張桌係有個位放顯示器, 幾得意架, 我坐果行仲要同對面果行面對面咁坐架, 所以睇到哂! 咁 ARM 佢就坐我隔離O既對面, 我唔係好敢望佢, 好怪架嘛, 不過我係咁易望到佢好勤力 SEARCH 資料個樣!
有時我分唔清佢係對我有意思定係驚我!

今日本來唔洗返學, 但係做左樣野仲累過返學, 就係去左兩個地方拎獎品, 第一站就係去左有線電視拎＜九方中文入字法＞軟件, 不過幾長途呀, 去到荃灣地鐵站仲要等左成十分鐘先有接駁車去有線電視大樓, 第一次上到去錄影室附近, 不過真係幾亂喎! 拎完之後又等左十幾分鐘車返返去地鐵站, 我仲去左搵我亞妹添, 佢親手做左條電話繩俾我, 好靚架, 我而家用緊喇! 之後我再坐地鐵去到太古附近拎我第二份獎品, 攪左成日真係好辛苦, 我未夠兩點出門口, 但係成六點幾先返到屋企, 你都咪話唔累!
用過＜九方中文入字法＞之後, 真係覺得勁唔好用!

今日成十二點幾先起身, 可能因為尋晚睇左好耐電視, 但係冇咩好睇架, 只係唔想咁早訓O者! 因為連日O既辛苦, 今日就落左去行街街, 雖然係O係屋企附近行, 但係都好 RELAX ! 仲有呀, 我今日好開心呀, 因為收到份禮物, 係我前幾日寄去抽獎, 抽中左我喎, 有＜彊屍２＞O既電話繩呀, 不過美中不足O既係條電話繩唔係杜文澤個樣, 而係任達華同埋黃卓玲, 不過我都好開心架喇, 因為條電話繩都幾靚架, 而且仲有兩大張貼紙添, 當然有杜文澤啦!(佢演得真係好好睇!) 其實我開始睇佢果陣係O係＜九七變色龍＞, 呢套劇係我第一次好認真咁睇亞視Ｄ節目, 杜文澤真係做得好, 攪到我由果陣就好鍾意睇佢, 而我又O係街見過佢三次, 佢份人都幾好架! 的確係一個好演員, 大家有機會留意下丫!
今日幾熱喎!

今朝十點幾醒左喇, 因為附近裝修! 平平淡淡咁又到左五點幾, 又要坐車返學喇, 今日我好開心呀, 因為得到一個知音人送左兩隻亞敬O既黑膠碟同埋一本亞敬O係九二年做封面O既雜誌俾我, 雖然我冇唱盤, 但係都好多謝佢送俾我留念! 本來我以為我四月尾先 PRESENTATION 架, 但係今日先知我四月七日就要 PRESENTATION 喇! 我仲未開始做呀, 因為我仲未知果個 TOPIC (SNMP) 係咩黎架, 點算呀!
今日廿五度真係熱死人呀!

今日訓到十二點幾, 因為尋晚又睇電視睇到成三點幾, 除左睇番我返學錄果幾套劇集之外, 仲睇左一陣日劇, 所以訓到咁晏; 尋晚返學果陣, 有個同學話我個筆袋好似雪條喎, 幾攪笑呀, 不過睇落又真係幾似o既! 今日冇出到街, 因為真係太累喇, 我仲擔心緊我個 PRESENTATION , 真係冇咩方法攪掂咁喎!
今日好眼訓, 要早Ｄ訓喇!

今朝十一點幾醒左, 可能係熱醒, 亦可能係嘈醒! 都冇咩特別野做過, 只係睇下電視咁就返學喇! 返學之前去左＜商務＞睇下有咩書好睇, 不過睇唔 ARM , 我今日第三個人返到學校, 都算早呀! 其實唔想咁早架, 但係架車又早左喎, 下星期真係要遲Ｄ出門口先得! 話時話我又就要 PRESENTATION 喇! 但係仲未開始做喎, 真係睇下我點死喇呢次, PRESENT 唔係問題, 最慘O既係要交份 1000 字O既 REPORT OF PRESENTATION , 而我果個 TOPIC (SNMP)只有好少野講, 點寫到 1000 字呢? 又點 PRESENT 到七分鐘呢? 呢Ｄ先係我最驚O既野!
放學坐小巴果陣見到個人好似我中學識O既一個朋友!

今日我Ｄ表妹黎左我度玩, 一齊去飲完茶之後就去左行街, 返到屋企都冇咩特別野做過, 只係睇下電視玩下電腦咁! 食完晚飯傾左一陣計佢地就走左喇! 我仲未開始做份功課呀, 不過就快開始架喇, 再唔做就唔掂喇!
今日都依然好眼訓!

今日食完晏就去左行左一陣街, 之後就去左圖書館借書做功課, 不過最慘係咁大間圖書館只係得一本書其中O既兩頁係講我果個 TOPIC , 你可想而知我幾慘, 點樣嘔一千字俾亞 SIR 呢? 點樣嘔十分鐘 PRESENTATION 俾亞 SIR 呢? 呢方面真係要傷傷腦筋!
SAMMI 有歌入季選, 不過今季亞敬好似冇歌喎!

今日冇咩做過, 都係休息下咁啦, 去左一個特別地方, 不過唔會話俾大家知係邊度架喇! 今日冇特別野發生, 所以今日日記完結喇!
聽晚有特別地方去呀!

今日夜晚去左一個好特別O既盛會, 其實都係不外如是, 就係去左睇＜友情歲月＞首映禮, 之前抱住一個睇好戲O既心情去睇, 不過 ... ... 完全令我失望, 除左女主角做得唔好之外, 故事亦不太吸引, 不過呢Ｄ係我個人意見, 好耐冇去過戲院睇戲, 不過頭先爭Ｄ訓著左; 見到幾位主角到場, 但係都遲左開場, 可能係女主角太多野做啦, 等埋佢入場先開到場, 睇完都成十二點喇, 真係好鬼眼訓, 講真一句, 如果要自己俾錢去睇呢套戲O既話, 我真係絕對唔會去睇!
有少少咳添!

今日基本上冇咩野做, o係屋企休息左一陣, 因為有幾聲咳好唔舒服! 夜晚返學時間, 原來我坐六點果班車, 未夠六點三就到左學校啦, 幾鬼快! 今日帶左支水返學, 因為咳飲多Ｄ水好好多, 到目前為止我仲未開始做份 PRESENTATION , 我諗聽日會開始喇, 因為下星期五就係喇! 唔知大家有冇睇過新果三個＜益力多＞廣告呢? 我睇完覺得唔係咁好, 因為我覺得果支＜人型益力多＞好暴力, 一時打爛門一時打爛窗, 又打爛天花板喎, 意識真係唔係咁健康!
原來千嬅有去尋晚個首映喎!

今日咳醒左喎, 空氣真係差左好多, 所以我又病病地喇! 食完午飯就拎左本書去影印, 因為有一個夜校同學 PRESENTATION 個題目同我一樣, 所以互相交換Ｄ料, 影完印之後就同左屋企人去左旺角行街街, 買左幾多野架, 不過仲未開始做份功課, 原因係想過埋聽晚, 等果位同學俾左佢Ｄ料我先一次過完成!
亞敬作左首新歌＜有你是榮幸＞俾新人小雪呀, 好好聽架!

今日真係病左喇, 攪到要去睇左我一生人第一次睇O既中醫, 不過中醫同西醫真係好唔同, 中醫只係把下你脈, 望下你Ｄ氣息, 咁就執左一服藥喇! 夜晚要返學呀, 不過今日就辛苦喇, 病係辛苦架喇, 喉嚨真係痛到死咁滯, 希望一陣食左服藥會好番好多啦, 起碼我下星期 PRESENTATION 之前要好番哂啦, 如果唔係就死梗囉!
空氣差都係我病O既其中一個因素!