背景音樂 : BEAUTIFUL LIFE
1/10/2000 |
今朝一早諗住去拎番D相, 點知竟然未曬好喎! 所以就返左屋企, 之後就出門口喇, 因為約左班朋友去燒野食!
諗諗下都有成幾年冇燒過野食喇! 大約三點幾就入到去屯門蝴蝶灣O既龍鼓灘, 幾方便架喎, 因為咩都唔洗帶去,
今日公眾假期, 所以貴少少, 每人 $60 任食, 不過真係食唔到幾多野, 六個人都係食左兩大碟野O者, 不過好開心,
因為大家可以坐低一邊食野一邊傾計, 果然係傾左好多野, 好難忘! 仲一齊睇番以前影O既貼紙相, 發覺原來大家個樣都變左少少喎,
佢地話我塊面瘦左喎, 都好似係! 本來燒完野食諗住約埋另一個朋友去飲野架, 點知搵唔到喎, 所以我未夠九點就返左屋企,
返屋企之前又諗住去拎相, 點知已經休息, 冇計啦唯有聽日先去拎番! |
2/10/2000 |
今朝一早落去拎番D相, 其實都係上次<貼身拉闊>D相黎O者, 因為要曬番俾我兩個朋友! 返到屋企都有做功課架,
因為星期三果堂要分組討論D問題, 所以要預先答左先! |
3/10/2000 |
今日本來都冇人約架, 不過 CONNIE 下晝果陣打電話約我去行旺角喎, 實在太好開心喇! 我地行左一陣,
我就買左一件衫, 而佢就買左一件褸, 大家都好開心! |
4/10/2000 |
今朝都訓到十二點幾先起身, 不過都冇去行街, 因來都想去旺角花園街買番尋日見到O既一件衫,
不過天氣太熱又懶, 所以冇去到! 夜晚就返學, 本來分組討論架嘛, 唔知點解佢傾傾下就冇理到我喇! 攪到我好似唔存在咁,
之後我都係同佢D朋友討論同埋傾計咋, 總之就硬係唔多順利咁! |
5/10/2000 |
今日訓到十二點呀又, 係俾一聲跌野聲嚇醒左, 原來我舅父唔小心將我部手提跌左落地下, 好彩都冇壞到!
成日都冇出到街, 因為成日都O係屋企做功課, 下星期又要交功課喇, 好彩我都做起左分功課O者! 我仲有時間整左一個袋仔添,
其實都麻麻地靚咋, 不過好過冇啦! 但係就發生左一件好邪O既事, 我一邊做功課一邊聽CD, 點知聽聽下唔多對路,
因為轉唔到第二隻CD, 一開番個唱盤時, 竟然發覺唔見左隻CD喎, 原來部機轉碟時轉得太勁, 將隻碟飛左落部機裡面,
嚇得我丫, 我用左成半個鐘先夾番隻碟出黎咋! 呢件事係咪好邪呢? 好多年前我有一個朋友試過咁樣, 今日發生O係我身上,
實在太不可思議喇! |
6/10/2000 |
今日都係差唔多十二點先起身呀, 之後就同我舅父落左街食晏, 之後就行左一陣啦, 都買唔到野,
因為我想買樣野俾我表弟呀, 佢成個月前生日我到而家都仲未諗到買咩俾佢好! 呢幾晚上網都唔多順利,
勁難 DIAL-UP 之外, 仲失驚無神斷左線, 而係我唔知架喎, 你話邪唔邪丫? |
7/10/2000 |
今朝七點幾起左身, 因為我舅父買左早餐俾我食, 不過食完又訓到成兩點先再醒喎, 所以真係訓得多過頭!
今日都冇出到街, 只係O係屋企車左一件衫, 都唔錯架, 可以話係出得大場面見得人架! 呢件係用類似恤衫但係用牛仔布整O既,
本來我仲想用第二塊布車過第二件架, 不過因為屋企冇"集骨車", 但係另外O既布一定要用到(牛仔布唔洗用, 因為可以用衣車O既某功能代替),
所以冇車到囉! |
8/10/2000 |
尋晚訓覺O既過程中, 醒左起碼醒過五次呀, 因為太熱! 尋晚發生一件事令我好唔開心, 因為果部食碟 HI-FI,
終於O係尋晚食完隻碟之後成個唱盤壞左! 真係黑開有條路, 天呀, 點解屋企D野約埋一齊壞架?! |
9/10/2000 |
今朝都成十一點幾十二點先起身, 大約一點令就去左大家樂食野喎, 真係好耐都冇食過大家樂午餐,
我就食左一個大碗飯, 真係幾有日本風味架! 之後都冇去行街, 因為都係O係屋企無無聊咁咋, 天氣熱係一個好重要O既原因,
希望天氣可以涼番D, 最好就快D凍添啦! 仲有呀, 今日係我個表妹仔生日, 祝佢生日快樂啦! |
10/10/2000 |
今朝十點鐘就起左身喇, 食左野之後都係整理下D功課, 點知到左一點鐘未夠果陣, 突然勁眼訓喎,
仲O係梳化度訓著左添, 到左兩點幾先醒, 呢次醒係真真正正咁醒, 係勁精神果隻! 夜晚就約左幾個朋友,
因為亞敬又有 FUNCTION 喇! 好開心, 可以同佢影左張相同傾左幾句! 我送左支綠茶同埋頸鍊俾佢添,
希望佢鍾意啦! |
11/10/2000 |
今朝起身果然係肥左少少, 所以食得多係冇益O既, 基本上今日係冇咩特別野做過, 都係聽下收音機咁,
夜晚就返左學, 還番隻CD俾佢喇, 其實有少少係因為幾嬲佢, 不過今日返到學又係咩事都冇囉, 所以話天蠍座O既人真係難以觸摸,
我自己都係天蠍座, 所以我非常之明白! 上堂都係討論過幾條問題, 傾得都幾開心O既! |
12/10/2000 |
今朝竟然係訓到兩點先醒, 因為尋晚好大風, 成晚都訓下醒下咁, 又冇較鬧鐘喎! 之後落街食下午茶(其實係我O既午餐),
之後就拎左一張2R相去過膠(當然係我同亞敬O既靚靚合照啦!)! 返到屋企做左一件我自己之前都估唔到自己真係做得到O既事,
我竟然係拆開左部唱機整, 而竟然係俾我整好左少少喎, 起碼個唱盤唔會自己走出黎先, 但係就的確仲會食碟,
呢樣我整唔好, 因為係D零件有事! 不過注意, 我係好安全咁拆開部機架, 咩制都冇插架, 電就梗係冇啦! |
13/10/2000 |
今朝都算早起身, 之後就去左大家樂食大碗飯呀! 基本上冇咩特別事, 夜晚就返左學, o係呢度要多謝一個同學先,
佢幫我錄左盒錄影帶(由 PAL 錄做 NTSC), 仲知我幾時生日, 的確係嚇親我O既! 返學當然亦見到佢, 而佢係坐左O係我後面O既,
不過全晚只係講過幾句野O者, 反而我同佢D朋友就勁講左好多野! 今日個喉嚨有少少痛, 可能係食得太多麥當當! |
14/10/2000 |
我今朝較左鬧鐘九點架, 點知我九點半先醒喎, 之後就同左我舅父去左我亞姨屋企, 好好玩呀, 因為原來我幾受小動物歡迎O既,
兩隻狗狗都好好玩, 其中有一隻係我第一次見O既, 佢仲成日行埋黎同我玩添, 幾乖架都! 今日亞敬有活動,
不過因為我去左我亞姨屋企而冇去到囉, 希望快D有機會再睇亞敬O既 SHOW 啦! |
15/10/2000 |
呢排發D夢都好亂, 攪到我都唔知係咩黎, 所以成個月冇"私夢記"囉! 今朝的確係訓到一點正先起身O既,
不過都冇咩特別, 本來想做功課架, 因為星期五又要交功課喇, 不過我仲未搵到有用資料做, 所以要等同學們O既幫助,
搵到料就好快可以做起! 尋晚睇左<雷霆第一關>大結局, 睇完之後我有好幾個問題, 好想知答案: |
16/10/2000 |
今日可算係好好訓, 尋晚十二點就訓左喇, 都好耐冇試過咁早訓, 而今朝成點幾先起身呀, 因為近排的確好累!
今日成日都係睇下有咩資料做功課, 不過依然係冇得著, 又攪到唔能夠開始做份功課! 今晚TVB做新劇集<新鮮人>,
本來冇諗住睇架, 因為做主角果幾個都勁憎(例如: 容袓兒, 徐子淇), 但係又想睇谷德昭喎, 不過我主要係睇卓韻芝,
即係 芝 SEE 姑 BI 呀, 我覺得呢個女仔好叻架, 佢十四歲就考到入商台, 今年都只係廿一歲咋, 但係做DJ都做左好多年喇!
我而家都有聽佢做節目架, 我好欣賞佢O既諗法! |
17/10/2000 |
今日又係冇出過街o既, 因為成日都係o係屋企諗下點做份功課, 都有少少頭緒o既, 不過相信都有排做,
希望星期五交到啦, 因為下星期唔洗返學, 原因係因為十一月一日晚就要考試, 一來要溫書啦, 二來下星期五係我o既大日子嘛,
所以約會自然會多左! 恐怕係冇咩時間做功課, 所以黎緊呢兩日都要奸爸嗲喇! |
18/10/2000 |
今日係開始做份功課喇, 因為聽日約左人去行街街, 所以好希望今日可以完成, 總算O係返學之前完成左三份之一!
收到日本筆友O既信, 好開心呀, 因為佢送左兩個"愛情符"俾我, 好靚架, 一個就掛左O係個手提度, 另一個就放左O係銀包放相果個位度!
真係好靚, 我好鍾意! 要講一句: "SPECIAL THANKS TO YUMIKO!", 返學其實都冇咩野教, 都係返去分組討論一下咁,
今日都同某人傾過下計啦, 可能我果晚O係 ICQ 同佢講過一句話, 令到佢同我傾計掛, 我O既天蠍座本色又出現喇!
都係唔好諗咁多好! |
19/10/2000 |
今日好開心呀, 因為我約左個以前 YWCA O既好朋友 CATCAT 去行街街, 行哂成個旺角咁滯, 不過就冇買到衫喎,
但係就買左隻二手CD, 係亞敬O既"吳國敬 & FRIENDS 演唱會", 不過個封面原來俾人分左屍! 都有影左張貼紙相架,
由於未經當時人准許, 所以就 CUT 左自己個頭出黎俾大家睇下! 真係要O係度同 CATCAT 講一聲多謝,
因為我今日收到今年生日第一份禮物(見下圖), 我真係好鬼鍾意呀, 佢地會晚晚陪我訓架喇! |
20/10/2000 |
今日返學之前都係勁落雨架, 所以咪要帶傘返學囉! 基本上冇咩特別O既, 上堂都係分組討論一下題目咋,
當然討論之餘都有傾下計講下笑咁啦, 其他O既唔講咁多喇, 總之今日好開心啦! <新鮮人>呢套劇個題材真係唔錯,
因為世界上的確有好多人係對精神病係有好大O既誤解, 亦好抗拒佢地, 其實政府有一句口號講得好好"歧視不存在, 世界更可愛",
係就係好似好老土咁, 如果大家將歧視他人O既力量變成接受別人O既勇氣, 咁係咪更加好呢? |
21/10/2000 |
今朝九點幾就醒左喇, 因為唔想訓咁多, 之後點令鍾就同幾個朋友去左荷里活廣場度睇 SHOW, 我咁專登去睇O既,
梗係有亞敬啦, 好彩都同到佢傾幾句, 我地仲送左果本自己整O既<貼身拉闊回味>俾佢, 佢一邊睇一邊好開心咁笑,
因為佢估唔到我地會整本野俾佢! 大約五點幾就去左唱K喎, 好攪笑, 因為好似開亞敬演唱會咁, 大半都唱哂亞敬D歌,
到左夜晚八點到啦, 都有去影左張貼紙相架, 因為識左佢地一段時間都未一齊影過, 都好靚架, 不過大家就冇眼福睇喇!
O係呢度我一定要讚一讚亞敬O既助手 FELIX 呀, 因為佢實在太好人喇, 好多時都係佢主動問我地有冇野要俾亞敬簽,
又自動幫我地影亞敬相喎, 真係好多謝佢! 黎緊亞敬會出好多 FUNCTION 添! 由於好多人都對我O既"愛情符"好有興趣, 所以有相睇! |
22/10/2000 |
今朝本來諗住十一點起身架, 點知鬧鐘響左後再訓番, 終於係一點幾先起身O既, O係屋企溫左少少書啦,
真係好少咋, 因為天氣好熱, 攪到我坐唔定, 希望快D凍啦! 夜晚就同我舅父食飯, 佢整左一餐好好味O既晚飯,
所以我而家好滿足! |
23/10/2000 |
今日當然都係溫書啦, 不過溫左成兩個鐘都唔係溫得好多野, 希望快D可以溫哂啦! 今日都係冇咩特別,
都係成日O係屋企行行企企咁啦! |
24/10/2000 |
今朝好早醒左, 因為有個同學打電話黎問我功課, 之後都係o係屋企溫下書, 聽下收音機咁! 夜晚就去左旺角新世紀唱K,
因為約左我兩個家姐, 本來約廿七號架, 因為過去幾年都係正日先去, 不過今年佢地要參加婚禮唔得閒, 所以咪約今日囉!
基本上都係我勁唱左幾十首歌, 玩到大約十一點就返到屋企喇! 仲O係坐車返屋企之前撞到我以前O既男朋友添,
不過我靚女左, 佢見唔到我, 我覺得我好開心, 因為見番佢個心已經冇感覺喇! 今日收到份好靚O既生日禮物呀(見下圖),
多謝二家姐! |
25/10/2000 |
今朝較左鬧鐘九點架, 點知成九點半先醒喎, 之後就去左我亞姨度同佢飲茶! 五點幾果陣仲好突破咁去左街巿買野,
大家有所不知喇, 我由細到大都好驚行街巿架! 夜晚就食左一餐好好O既晚飯! 十一點幾先返到屋企呀! |
26/10/2000 |
尋晚終於作病喇, 唔知點解每逢考試之前一定病病地架喎, 真係邪! 今日收到幾個朋友O既祝褔電話呀,
因為大家都驚聽日搵唔到我! 其實我家下仲未有人約我聽日呀, 不過可能可以見到亞敬, 都係聽日先知架!
真係好多謝大家O既祝福同埋禮物, 真係令我好感動! |
27/10/2000 |
大日子呀, 今日係斯斯O既大日子呀, 首先要多謝各方好友O既留言同埋電話O既祝福, 我真係好好好開心呀,
雖然冇出到去同D朋友玩, 不過夜晚我其中一個亞姨都黎同我出左去食飯, 真係多謝哂佢地喇! 基本上我今日都係同D NOTES 為伴,
但因為作病O既關係, 都溫唔到D咩! |
28/10/2000 |
今日本來係好開心O既, 但係估唔到俾人欺騙左, 呢個人真係衰, 我地唔會再信佢架喇! 呢幾日都有溫書架,
不過仲有好多未溫, 我未來幾日都要努力架喇! 尋日朝有個女仔打黎祝我生日快樂, 但係講左一句就收左線,
我諗到而家都唔知果個係邊個喎, 我驚就驚係果個人以為我 CUP 佢線嬲我咁就慘喇! |
29/10/2000 |
今朝好早醒左, 中午果時就去左天水圍, 因為約左兩個朋友去睇 SHOW , 當然亦係有亞敬啦, 其實都有少少唔多順利O既,
不過我地會寄望下一次! 之後就去左行旺角, 我七點幾就返到屋企喇, 當然亦有溫書啦, 未來三日我都會閉關溫書架喇,
因為星期三晚考試, 我相信我做得到! |
30/10/2000 |
尋晚溫下書執下野, 攪到成四點幾先訓, 所以今日成點幾兩點先醒, 而今日都冇咩特別活動,
都係溫書咋, 後晚要考喇! 尋晚我發現左某人有個新網頁喎, 我仲O係佢網頁度寫左個留言添, 佢個留言版好得意架,
可以留完言再用 MOUSE 畫公仔架! |
31/10/2000 |
今日主要O既節目係溫書, 總算叫做溫完, 不過聽日都仲要溫多一次, 同埋要溫D PAST PAPER, 信心都有少少O既,
不過我始終都覺得考試係要靠少少運氣O既, 不過大家請放心, 我一定會全力以赴做到最好! |