背景音樂 : BEAUTIFUL LIFE
| 1/9/2000 |
|
今日依然係溫書日, 當然亦係果句: "有排未溫完!" 今日係好多人O既開學日, 唔知大家有咩感覺又有咩特別野發生呢?
今日發覺自己記性都唔係太好, 所指O既係讀書O既記性, 真係麻麻地, 記其它野又勁記得喎! 頭先睇＜廟街、媽、兄弟＞,
有一個形容詞好 ARM 形容我架, 就係"節日孤星"! |
| 2/9/2000 |
|
今日中午果陣同左個住樓上O既鄰居飲茶, 飲完之後就同左佢地去買野, 再上左佢屋企打左一陣機, 返到自己屋企差唔多四點半啦,
之後就溫左一陣書; 我個信箱今日收到一張廣告, 睇落係幾攪笑, 但係我又覺得幾離譜咁, 大標題如下: "意想不到的遊覽勝地,
給您意想不到的黃金驚喜", 相信你點都估唔到呢個係咩廣告, 原來係叫人O係沙田寶褔山為先人安靈位或者為在生者預訂骨灰靈位,
而且最攪笑O既係而家憑贈券去訂O既話, 仲送你 999.9 足金金牌添! 睇完之後真係得一個大問號O係個腦裡面!
首先我覺得一個幾百無禁忌O既人收到呢張傳單, 個心都會有唔自然O既感覺! 而且我完全諗唔到訂靈位同足金金牌有咩關係,
係, 係會有人用得著, 但係的確有少少過份! 仲有呀, 今日係我亞妹生日(唔係親妹妹啦梗係!), 祝佢生日快樂,
生意興隆啦! |
| 3/9/2000 |
|
因為生左粒痱滋好痛, 所以要一早落街買藥, 不過真係幾貴喎, 但係冇計啦! 之後返到屋企就即投入溫書計劃,
今日總算溫哂全部內容啦, 不過都唔係記得太清楚, 原因係 OPEN BOOK EXAM , 唔洗咩都背哂O既, 而未來幾日我要溫下Ｄ題目,
因為答題真係唔多識! 今日睇新聞又發生左一件令我覺得"有冇攪錯"O既事: 話說有一個由越南黎旅行O既女人,
俾人偷左護照, 報警後獲得一張証明, 正等待補發護照, 三番四次咁去求証係咪真係唔會當過其居留, 有關當局一直話冇事,
直至尋日佢竟俾人拉左話佢過期居留喎, 而O係落口供果陣個女人話俾個翻譯聽話俾人偷左護照, 但係口供竟然話佢承認過期居留喎,
如果呢件事真係真的話, 真係人神共憤, 離哂大譜添啦! 又再一次要反省下啦唔該! |
| 4/9/2000 |
|
今日我收到一個唔開心O既消息, 就係我中學O既校長O係８月３１日在主內安息, 聽到呢個消息之後覺得太突然,
一下子腦海空白, 慢慢諗起果陣O係培道中學讀O既時候校長O既一Ｄ片段, 不過校長永遠都會留O係我地O既心裡面O既!
其實講起我校校長, 都好深刻架, 佢一直都主張母語教學, 亦主張有教無類說法, 雖然幾嚴, 但係的確得益不少!
真係希望佢安息啦! |
| 5/9/2000 |
|
呢幾晚都唔記得發過咩夢, 所以＜私夢記＞係欠奉O既! 今日成日都溫書, 因為聽晚考喇, 都有少少緊張架, 不過我有信心,
希望聽晚冇咩特別事發生啦! 基本上今日除左溫書都冇咩做過, 樓上部冷氣依然勁滴水, 投訴左架喇, 不過佢話呢個星期會換過部冷氣,
我諗住忍多幾日, 如果星期日仲未攪掂的話, 我就會打去食物環境衛生處投訴, 到時要罰錢的話, 千其唔好怪我,
因為大家要明白, 當你無時無刻都聽到滴水聲, 係唔停咁好似落雨, 相信幾有耐性O既人都忍受唔到! |
| 6/9/2000 |
|
尋晚醒左幾次, 唔知係咪緊張過頭呢? 今朝十一點起身, 食過午飯後就開始溫書喇, 基本上都係溫番以前Ｄ考試題目咋,
一直溫到四點再食野沖涼, 五點幾就出門口喇, 正式考果陣真係好緊張架! 不過都好在Ｄ題目同以前Ｄ考試題目差唔多,
所以我照住份答案答就攪掂, 不過大部份都係抄書架咋, 希望合格啦! |
| 7/9/2000 |
|
呢兩日都用唔到我朋友借我用果個上網戶口, 唔知點解呢! 今朝一早去左親友屋企, 飲完茶之後,
我去左文具店買左一支好得意O既筆, 寫出黎Ｄ字係彩色架, 雖然我表弟話已經係好耐之前興過, 但係我的確第一次見,
真係好得意! 夜晚十點鐘就開始返屋企, 好攪笑, 坐坐下車唔知點解諗起夜校個班長喎, 點知我Ｄ直覺真係好準,
一落車過馬路就見到班長排緊隊坐車喎, 真係有少少驚自己O既直覺添! |
8/9/2000  |
|
今朝訓到十一點, 太好訓喇, 因為記憶中係冇中途醒過! 今日完全係休息日, 仲拎番盒＜美麗人生＞出黎睇,
當然冇出過街啦! 大風左, 太好喇, 因為唔洗咁熱! |
| 9/9/2000 |
|
今日冇咩風, 可能個颱風減弱左掛, 所以又熱番少少喇! 當然今日都係休息啦, 本來就去玩O既,
但係有幾個朋友都唔得閒, 咁咪過多排先約過囉, 今日用紙黏土整左好多野呀, 雖然唔多靚, 但係我相信我係有進步O既,
仲有呀, 今日幫上次整果個紙黏土蛋糕油光油, 點知Ｄ光油溶左我寫左O係蛋糕面O既歌譜, 而家我仲諗緊點算好,
整過個我又唔想喎, 有咩方法呢? |
| 10/9/2000 |
|
今日主要都係為我Ｄ紙黏土製成品上色, 至於尋日果個甩色蛋糕, 總算俾我攪掂番喇, 不過硬係好似唔多靚咁,
不過總算過得去O既, 希望收果個會鍾意啦! |
| 11/9/2000 |
|
今日可以算係幾黑O既一日喇, 因為我一早落街買菲林, 點知部相機上唔到菲林喎, 應該係冇電, 搵哂全屋Ｄ電都唔夠電,
所以又再一次落街買相機電, 成廿五蚊粒, 真係貴! 入左粒電部相機就掂喇, 咁入菲林啦, 點知唔知仲咩佢將我筒菲林條尾券左入去,
再噤多兩噤, 部機壞埋添, 咁唯有搵過第二部啦, 點知另一部就要兩粒相機電, 咁冇理由咁貴都買多粒架! 咁再次搵到第三部相機,
不過呢部相機係未用過架, 抽獎抽番黎, 個樣幾大部而又冇得 ZOOM 果Ｄ呢, 冇計之下唯有用呢部啦, 希望影出黎Ｄ相都靚啦!
因為我聽晚有個約會對我黎講好重要架! 至於果筒菲林, 我幾經辛苦先夾番條菲林尾出黎, 相信頭果幾張都影唔到架喇,
因為入左光! 唉, 真係一個好黑O既星期一! |
| 12/9/2000 |
|
今日係中秋節, 大家去邊度玩呢? 斯斯就過左一個好難忘O既中秋節喇, 因為夜晚我約左幾個朋友去沙田睇 SHOW,
有亞敬架, 由於我朋友識亞敬, 所以今日埋到佢身呀, 好開心! 我拎哂Ｄ黑膠碟同埋ＣＤ同埋相俾佢簽呀,
仲送左份生日禮物俾佢添, 雖然佢生日過左成三個月! |
| 13/9/2000 |
|
今朝校左鬧鐘八點架, 不過我成九點四先醒喎, 好在唔係太遲O者, 好快就去到目的地喇! 之後就去左飲茶同埋行左一陣啦,
今日終於影哂筒菲林喇, 不過由於我十點幾先返到屋附近, Ｄ舖頭收哂, 所以要聽日先拎得去哂, 希望哂得出就夠喇,
當然靚都重要啦, 不過千其唔好咩都哂唔出, 如果好似上次咁, 我真係冇咩好講! |
| 14/9/2000 |
|
今日起身冇幾耐就落左街買野, 仲拎埋筒菲林去曬, 星期六先有得拎, 希望真係唔好有咩意外, 真係好驚架!
之後返左黎屋企一陣, 住附近O既朋友打左電話黎, 因為佢部電腦有少少問題, 所以咪上去佢屋企睇下囉! 另外,
我尋晚上網同某人傾左好耐計, 當然係開心啦! |
| 15/9/2000 |
|
今日一早俾樓上O既裝修聲嘈醒, 所以就一早醒左喇, 不過都冇咩特別野做過, 夜晚就返左學, 不過就聽到一句令我唔多開懷O既說話,
至於係咩我就唔想講喇, 始終都過左去丫嘛, 大家千其唔好誤會, 呢句野唔係某人講O既! |
| 16/9/2000 |
|
今日十一點先起身呀, 因為尋晚失眠, 成四點先訓得著! 起身之後即刻去洗頭, 因為想自己醒Ｄ,
食完野之後就返學喇, 返學之前去左拎相, 都話抽獎係冇好野架啦, Ｄ相係就係曬到出黎, 不過質素就的確好差,
所以都諗住拎去填海好過! 返完三個鐘頭學之後有 DINNER BREAK, 咁 ARM 又同佢O係同一個地方食飯喎!
食完飯之後仲要上多三個鐘頭堂, 都唔錯O既! |
| 17/9/2000 |
|
今日都係十一點起身呀, 基本上都冇咩特別野做過, 本來諗住落街買綠茶架, 因為好想好想飲,
不過又唔係咁想落街喎, 咪諗住聽日先去買囉! 夜晚都係要返學O既, 都冇咩特別事發生, 不過我個好朋友講左一句說話令我覺得好鬼好笑架喎,
佢問我點解咁厲害可以同某人傾 ICQ, 佢話平時見到佢好似唔識講野咁, 粒聲唔出! 哈! 聽完之後我笑左好耐,
因為某人的確係咁, 就好似我咁, 唔識我O既人覺得我好 COOL, 但識落又會俾我笑死! |
| 18/9/2000 |
|
今日自己一個人去左行街街, 買左好多野, 用左好多錢呀, 不過所有野都係必需架喎, 唉, 物價高漲,
真慘! 返到屋企都五點鐘喇, 基本上都幾鍾意O係屋企架, 因為好 FREE! |
| 19/9/2000 |
|
今日亦自己走左去行旺角, 因為想買少少野, 不過竟然行左四個幾鐘都搵唔到我想買果樣野! |
| 20/9/2000 |
|
今日好開心呀, 因為放學之後約朋友出街, 仲見到亞敬添! 仲有一樣野我係估唔到o既, 亞敬竟然認得我,
仲知我係"斯斯"添, 真係估唔到佢咁快記得我! 仲同佢影左一張企得好鬼埋o既相添, 佢仲同我講左一Ｄ好攪笑O既說話,
真係好開心佢記得我, 因為完全估唔到! 亞敬仲話我應該改個易寫O既名: 就咁英文字母 ＣＣ 咁啦, 易寫Ｄ!
所以佢幫我簽Ｄ相有幾張都就咁寫ＣＣ, 我冇咩所謂! 而且O係未見到亞敬果陣, 太極O既亞德出左黎同我地傾計,
其實聽完佢一番說話之後, 我的確係覺得幾感動架, 我亦都明白到對音樂有冇 HEART 係好重要! |
| 21/9/2000 |
|
中午時約左兩個朋友食飯等, 竟然又俾我地見到亞敬喎, 睇到亞敬O既眼神我知佢真真正正認得我!
佢去左 STAREAST 採排之後, 我地就去左尖沙咀及樂富行下咁! 到左六點鐘就去 STAREAST 排隊喇,
事關今晚亞敬會O係度做＜貼身拉闊＞, 我地排頭位添, 七點幾亞敬就入場, 之前採排完佢竟然去左剪頭髮喎,
因為個髮型唔同下晝果陣! 未入場之前, 商台工作人員突然一個飛身行埋黎話要訪問我喎, 佢問左我幾個問題：
最鍾意亞敬邊首歌、點解咁鍾意亞敬、有咩說話要同亞敬講, 排完一次之後果位哥哥仔叫我自己拎住支咪對住鏡頭講喎!
佢話只係俾亞敬睇, 我驚緊佢會放上網! 八點鐘到就入得場喇, 我地企第一排好近, 我仲送左份禮物俾佢添,
佢認得我當然好開心, 不過有件事仲令我開心添, 因為佢一出場我就見到佢戴左我尋晚送俾佢O既頸鍊, 係獨一冇二自己穿,
雖然好便宜, 有一粒星星代表 SUPER STAR! 個 SHOW 只係做左一個鐘頭咋, 之後我其中一個朋友被抽中可以貼身訪問亞敬,
不過我同另外個朋友冇得入後台, 等左一陣亞敬就走喇, 仲同佢影左相添, 遲Ｄ俾大家睇下! 不得不講一句,
亞敬真係好好, 佢見過我一次後就記得我喇, 仲有求必應, 我會覺得大家係朋友, 佢仲會回信添, 又珍惜送俾佢O既禮物!
我同佢合照果陣仲差Ｄ忘左形, 因為我話佢知條頸鍊係我送O既, 一邊講一邊想掂落去, 不過好彩冇掂到! |
| 22/9/2000 |
|
今日一早落左街曬相, 今次選擇左一小時, 因為實在等唔到聽日先拎! 實在太正喇Ｄ相, 不過美中不足O既係完 SHOW 後我同佢果張合照影得我麻麻地,
因為實在係好熱呀, 話哂出左街成日, 梗係冇朝早咁掂啦, 又有少少睡意, 笑容又有少少倦意咁, 真慘! |
| 23/9/2000 |
|
今日好開心呀, 因為約左兩個契姐去玩呀, 其實真係好耐冇見過佢地喇, 我地又去左以前中學時代成日去食野O既越南餐館食野,
又去唱Ｋ, 又去行街同影貼紙相咁! 非常開心! |
| 24/9/2000 |
|
今日同幾個朋友去左睇 SHOW, O係會展咩 ORANGE 極速唔知咩 SHOW, 去睇係因為有亞敬, 亞敬因為趕時間,
所以就冇傾計呀咁, 但好彩佢都知我地去支持佢, 佢就正啦, 去完個 SHOW 有一部最新款手提電話同埋電話鍊,
真係好靚架部手機, 我都想換手機! |
| 25/9/2000 |
|
今日成日都冇出到街, 因為前幾日都出左街, 攪到未做功課, 所以今日留左O係屋企做功課, 終於做起喇,
不過係唔知做得 ARM 唔 ARM, 不過算啦, 我覺得 ARM 就ＯＫ! 呢個網頁搬左屋, 我覺得好過之前果度,
因為以前果度成日都 UPLOAD 唔到野, 所以大家要更新一下個 BOOKMARK 喇! 其實最好就記住 http://i.am/szeci !
我今日終於 SCAN 左果晚＜貼身拉闊吳國敬＞O既相喇, 大家睇下靚唔靚, 佢戴住果條頸繩就係我整架喇, 仲有一扎紙百合同埋一隻米奇,
我實在太開心喇! |
| 26/9/2000 |
|
今日都係冇出到街, 因為一出街就要用錢, 所以咪唔出囉! 其實今日O係屋企都幾忙架, 除左執下屋之外,
其實仲開始整緊一本野, 呢本野係我同兩個朋友夾份整O既, 係諗住遲Ｄ送俾亞敬, 我都俾左好多心機同靈感去整架,
整好之後影張相俾大家睇下丫, 再過幾日就勁多街要去喇, 因為呢幾日都有朋友約我去聚舊, 講開又講, 有好多個都好耐冇見喇! |
| 27/9/2000 |
|
今日我一早落去買野, 一去就買左成百幾蚊野食返黎, Ｄ錢真係唔見駛! 亦都將我部手機貼上幾張貼紙相,
雖然想換手機, 不過一日未換到一日都係最鍾意呢家呢部O既! 夜晚就返左學, 亦都帶左我屋企最後一樽綠茶返去飲,
原來唔凍O既綠茶係冇咁好飲架喎, 本來某人應承左帶Ｄ野俾我架, 不過佢話唔記得左, 真係好笑呀,
因為佢上次記得帶果陣我又走得好快, 我仲專登帶左本亞敬O既相簿俾佢睇添, 都傾左幾句架! |
| 28/9/2000 |
|
今朝未夠九點就有個人打錯電話嘈醒左我, 攪到我訓到成十二點先起到身! 不過都冇落到街, 只係O係屋企睇電視,
本來諗住影下黃昏O既夕陽架, 不過幾日都唔記得影喎, 你話我幾冇記性呢? |
| 29/9/2000 |
|
今日基本上都係冇咩特別事發生過, 因為平凡人就梗係得平凡事架啦! 夜晚要返學, 不過好好笑呀,
我O係屋企掛住執野, 差Ｄ唔記得左要返學, 所以遲到左十分鐘, 不過都仲未開始上堂! 今日都有分組討論呀,
都係同佢Ｄ朋友一組, 基本上佢地都幾好架, 都幾傾得埋! 而佢就借左佢隻 SAMMIＣＤ同埋一支筆俾我,
不過幾攪笑囉, 佢竟然問"你係咪要隻碟呀?", 梗係要啦, 唔要就唔會問啦, 不過硬係攪到Ｄ氣氛尷尷尬尬咁,
當我拎左隻碟再問佢趕唔趕住要番, 佢話唔趕住, 我就話"咁我慢慢先還番俾你!", 點知我講呢句果陣佢就已經行開左喇,
攪到我成個傻婆咁自己對住空氣講野! BREAK 果陣我O既好朋友嘉倫仔仔打電話俾我喎, 因為我地約左聽日出黎聚下舊,
諗諗下都有成年冇見喇, 不過其中兩個朋友聽日見完星期日又約左同埋其他朋友去燒野食喎! |
| 30/9/2000 |
|
今朝一早起左身落街買禮物呀, 因為下晝約左三個朋友, 其中兩個都係呢幾日生日, 所以就要去買喇!
好彩Ｄ禮物佢地都幾鍾意! 出到黎都唔知做咩架, 所以都係去左唱Ｋ, 一共唱左三個幾鐘, 你都咪話唔累!
唱完Ｋ之後就去左食果Ｄ類似健康食品O既地方食晚飯, 價錢唔算貴, 亦幾好食! 食完之後就一齊去左影貼紙相,
基於我Ｄ朋友唔讚成我放上網, 所以大家就冇眼褔睇喇, 都影得幾靚架喎! 十點幾就返到屋企喇, 都幾早喎!
不過諗諗下, 原來我冇見嘉倫仔仔成年幾兩年喇, 其他果兩個朋友都冇見成年咯, 時間真係過得快! |
