背景音樂 : 哭泣遊戲


歡迎睇我任何一日私日記!
1999
2000
JAN
FEB
MAR
APR
MAY
JUN
1/7/2001
2/7/2001
3/7/2001
4/7/2001
5/7/2001
6/7/2001
7/7/2001
8/7/2001
9/7/2001
10/7/2001
11/7/2001
12/7/2001
13/7/2001
14/7/2001
15/7/2001
16/7/2001
17/7/2001
18/7/2001
19/7/2001
20/7/2001
21/7/2001
22/7/2001
23/7/2001
24/7/2001
25/7/2001
26/7/2001
27/7/2001
28/7/2001
29/7/2001
30/7/2001
31/7/2001


1/7/2001

時間真係過得好快, 轉眼間又到七月喇, 即係暑假又就到喇! 今日都冇咩特別, 係出過去行過下買下野咁啦, 天氣又反常, 落勁大雨!
就是這麼愛你 --> 默默的!

返回


2/7/2001

今日唔開心, 原因唔講喇, 不過大家唔洗擔心O既, 好快會開心番架喇! 飲完茶返左屋企, 之後都係執屋同埋做下功課咁啦, 不過今日好靜呀, 有少少唔習慣! 唔知係咪假期關係, 好多朋友都打左電話俾我, 心情都OK!
你知道我在等你嗎? --> YOU KNOW?!

返回


3/7/2001

今日亦冇咩特別, 都係做功課啦, 因為尋日做果D全部用唔著, 因為我個 PARTNER 改左少少野, 所以要再做過, 好彩都唔算太難, 大約做左兩三個鐘啦! 相信聽日同後日都冇咩時間做功課, 因為要幫個朋友手, 都好丫, 可以賺番少少外快, 做做 PART TIME!
不相愛的好處 --> 起碼你可以同我傾下心事!

返回


4/7/2001

今朝九點幾就起左身喇, 因為今日要返 PART TIME, 好準時咁返到去, 不過經過八個半鐘O既工作之後, 得到左二個字 --> 悶 + 累, 好在返埋聽日O者, 以後O既日子我未必會返, 一來係以上兩個字啦, 二來係請我果個人O既態度好差, 三來就係因為我驚我身體頂唔順呀, 因為可能會發"毛"!
終身美麗 --> 我諗係早睡早起身體好, 自然會美麗啦!

返回


5/7/2001

今朝起身果陣好鬼眼訓呀, 好準時咁返到工, 但係真係好激氣呀, 因為一D原因, 可能令到我第日呢個人再叫我幫佢手我都唔會再幫! 終於八號風球, 不過好平靜, 就好似暴風雨前夕咁!
終生情人 --> 係自己!

返回


6/7/2001

今日都好平靜, 因為十二點起身(前兩日返工太累, 所以俾自己訓耐少少!)! 都冇落過街呀, 本來夜晚要返學架, 不過真係落好大雨, 所以我地全組人決定唔返! 對住份 PROJECT 好唔想做呀, 因為好煩, 要執好多野, 不過都係要做架啦, 只係希望可以如期攪掂啦! 不過好想去書展呀, 可能冇時間去呀, 不過真係好想去!
好想好想 --> 去書展呀!

返回


7/7/2001

今朝一早就去左銀行喇, 之後去買下野食咁, 返左屋企一陣之後, 就落左地鐵站, 因為約左個夜校同學拎D野, 好快就返左屋企喇, 都係掛住整下野食咁啦, 今晚O既晚餐係沙津呀, 好正!!
雨一直下 --> 今日不斷咁落雨呀!

返回


8/7/2001

今日都冇落過街, 因為尋晚做功課做到三點幾, 今朝都訓到十二點半呀, 不過唔出街都好架, 起碼唔洗用錢嘛! 前幾日返工之前去左葵青劇院行, 發覺原來而家有好鬼多好睇o既野做(例如: 話劇, 音樂會咁), 但係完全冇睇過有宣傳喎, 唔怪之得話會蝕錢啦, 其實有時間去睇下呢D節目都好架, 因為真係幾好睇架有時, 唔洗成日都係去睇戲呀唱K呀咁!
是否 --> 夏天真係要咁熱? 涼少少得唔得呀?!

返回


9/7/2001

今日十點令起左身啦, 都係冇咩特別, 不過睇左一套戲叫做<自從他來了>, 係悶左少少, 不過個意義幾好喎, 係"教學", 唔係"教書", 睇黎好多老師都要反省一下! 夜晚我就用左大約一個鐘頭時間去整理亞敬個網頁, 雖然唔係改左好多野, 不過比未改之前滿意, 總算係好事!
不要怕 --> 大膽D有時係好架!

返回


10/7/2001

今日都冇咩特別事發生, 不過就真係好鬼熱! 睇電視知道曾志偉俾人襲擊, 發生得都幾突然, 當然我唔知發生咩事啦, 不過呢件事令我有少少驚, 因為確實幾得人驚!
很好 --> 生活過得很好呀!

返回


11/7/2001

呢幾日都好眼訓呀, 唔知點解喎, 已經好早訓架啦, 但係總係訓唔夠咁, 希望快D可以精神D啦! 今朝起身之後落左街喎, 因為幾日冇落啦, 都要去買下野, 收下信咁, 我仲去左租碟添, 因為有張券可以平十蚊架, 最後我用左五蚊去租左<楝篤燦>, 先前都唔係太大期望架, 不過睇完之後真係好感動, 雖然笑就唔係好笑, 但係的確好感動, 睇到我喊添呀, 而且仲勾起我好多回憶, 因為佢紅果陣, 我都有睇佢D節目架, O係個 SHOW 度佢唱番好多以前攪笑節目O既歌, 令我突然好似返番去十年前咁, 真係令人懷念O既時間!
不必剎掣 --> 沅沅呢首歌好聽呀!

返回


12/7/2001

今日真係好眼訓喎, 雖然十一點未夠就起左身, 點知到左五點幾竟然訓著左都唔知喎, 仲訓到七點幾先醒添! 諗番起原來我仲有十日到要 PRESENTATION 喇, 其實到家下都唔知有咩講, 我諗都係"也也嗚"架喇, 聽晚返學都要同D組員傾下呢個問題先, 驚又真係有D驚, 不過驚都要 PRE 架啦!
你說得對 --> 我相信只要有信心, 冇咩係做唔到O既!

返回


13/7/2001

今日都幾特別架喎, 除左係黑色星期五之外呢, 仲係同某人第一次通電話, 夜晚就返學啦, 本來我地係最後一組傾架, 不過好彩冇人返, 我地打左尖, 不過亞 SIR 話我地二十三號個 PRESENTATION 應該係第一組喎, 都好O既, 起碼唔洗咁驚嘛! 八點鐘走得喇, 但係我去左第二度, 因為亞敬有野做, 所以約左兩個朋友去食下野咁啦, 聽日下晝又約左佢地, 因為真係好耐冇一齊傾下計咁!
我估不到 --> 我真係估唔到北京申辦 2008 年奧運成功喎!

返回


14/7/2001

今朝好早起左身喇, 之後就去左鑽石山O既荷里活廣場, 食完野又去左旺角喎, 但係又坐錯車喎, 所以去左大角咀, 因為咁而有機會帶我表妹去買下野食咁啦! 之後就行旺角啦, 不過真係好多人, 夜晚食完野就去左我屋企玩, 不過好攪笑呀, 傾左好多攪笑野, 亦都有好多內心o既野, 就好似去 CAMP 咁! 仲 FAX 左去點歌聽! 傾到成七點幾!
玉蝴蝶 --> 霆鋒呢隻歌真係好正, 好唔似霆鋒 STYLE !

返回


15/7/2001

話說傾到七點幾啦, 之後訓左一陣, 之後就去左我附近個商場行左一陣, 不過無端端又落大雨喎, 我未夠四點就返到屋企, 本來好鬼死眼訓架, 不過返到屋企又唔眼訓喎, 所以今晚要早D訓去補番先得! 基本上尋晚好難忘呀, 因為我真係完全冇諗過可以同識左咁短時間O既朋友去傾左好多野, 好投契架真係, 希望我地友誼永固啦!
我們有一整夜 --> 我相信呢一晚大家都唔會忘記, 因為真真正正係好朋友!

返回


16/7/2001

今日都好早起身喎, 不過都冇咩做過, 依然係好擔心個 PRESENTATION , 因為真係唔知講咩好!
花花宇宙 --> 更多更多渴求, 會有更多報酬 ... OEO OO OEOOO !

返回


17/7/2001

今朝收到一個消息, 就係我亞姨養果隻狗仔今朝過左身, 其實真係好唔開心, 不過係要面對O既! 本來今日諗住約人食飯, 不過都係等下星期過左個 PRESENTATION 先好D, 約左D組員聽晚出黎傾下呢個 PRESENTATION, 不過我真係唔多知要講D咩, 希望合格啦! 今日不停咁落雨呀, 好彩唔洗出街咋, 我好唔鍾意落雨出街架!
擔心 --> 除左擔心個 PRESENTATION 之外, 仲有少少擔心我亞姨佢地!

返回


18/7/2001

今日又訓到成一點半喇, 可能呢排真係多野諗, 所以個思想好累啦, 識我耐O既朋友都知我成日都係咁, 遲D又會正常番架喇! 夜晚就約左幾個組員O係我屋企附近食飯順便傾下個 PRESENTATION, 當然都係唔知有咩講, 不過總算係分左四部份, 一人講一部份啦, 我果 PART 都算幾易, 不過要講兩至三分鐘可能會有少少難度, 因為好少野可以講, 希望大家都成功啦!
盡全力 --> 只要盡全力, 咩都會掂!

返回


19/7/2001

今日竟然訓到兩點呀, 因為實在好眼訓喎, 唔知係咪仲補緊上次冇訓一晚呢, 未來幾日真係唔可以訓到咁晏呀, 因為星期六同星期日都要早起身返學, 絕對唔可以遲到架! 聽晚都開始要返新O既一科喇, 不過要返上環呀, 對我黎講上環絕對係一個好遠O既地方, 所以我聽晚都要早成個半鐘出門口呀, 因為未去過嘛, 要預早D O既! 至於個 PRESENTATION 確實係冇咩頭緒, 希望其他組員可以幫幫我啦!
煙雨濛濛 --> 不停咁落雨, 的確係幾有詩意O既!

返回


20/7/2001

今日都算係呢幾日最早起身O既一日, 我未夠十一點就醒左喇, 雖然實質冇咩做過, 但係個腦都無時無刻諗住星期一晚個 PRESENTATION, 今日又唔係十分驚, 不過係唔知講咩好咁O者! 夜晚就返學, 今科返上環呀, 我預早個半鐘頭出門口, 不過原來一個鐘就去到喇, 所以我都特別O係附近行左一陣, 因為都要睇下有咩食架嘛, 聽日要同D同學仔去食飯嘛, 不過原來都係得大家樂同埋大快活架咋! 今晚果堂真係幾悶呀, 因為都係講番少少網頁係咩黎呀, 亦教左少少寫 HTML 啦, 不過我都識哂啦, 所以好悶, 不過呢一科應該係最有用O既一科喇, 黎緊要做三份功課, 一個 PRESENTATION 同埋一次考試O既, 相信都算係多功課O既一科, 不過我諗我對呢一科好有興趣呀, 因為我都想為我D仔仔囡囡(網頁)做番D野嘛!
今天你生日 --> 我媽咪今日生日呀, 祝佢開開心心, 身體健康啦!

返回


21/7/2001

今日真係返學日呀, 上左三個鐘頭好悶O既LAB啦, 因為佢都係叫我地照住份 NOTES 打, 再去睇下做出黎O既網頁效果, 講真呢D我真係好熟, 所以真係好悶! 五點鐘就放 DINNER BREAK, 去左大家樂食下午茶餐, 不過唔係太好食, 之後上左個令鐘頭 LECTURE 啦, 其實都係解釋番今朝LAB寫果D野, 之後果個令鐘又係上LAB, 都係照打咋, 所以基本上今日係好悶O既! 今日有幾個朋友去左書展, 如果我今日唔洗返學我都會一齊去架, 不過要返學呢, O係呢度都想同亞嘉瑩講:"唔好咁激氣啦, 一切會似一道橋!", 夜晚十點幾返到屋企, 睇番今日錄果D帶, 我真係呢幾日先知原來中學派位係男女分開派位架喎, 有關方面解釋話係因為女仔早熟過男仔, 死喇! 我當然係第三志願, 咁係咪應該可以再好D呢? 其實真係男女永遠都唔會平等, 因為每個人都唔同架嘛, 今日呢個節目話男仔對數學好D, 而女仔就對語文好D, 但係我真係由細到而家都係對數學有興趣過語文喎, 咁係咪其實我係男仔自己唔知O者? 唔可以咁樣指定左邊個性別一定對咩好架喎, 好似我咁, 我對數學好過語文O既, 但係派位計分又係語文科佔分高過數學, 咁真係對我好唔公平喇! 不過過左去就算啦, 況且果陣間中學都唔差呀, 話哂都有少少名氣架! 再者如果我當然冇入到呢間學校, 咁我又點會識到我而家兩位好朋友呢? 不過我覺得呢個問題一定要解決!
吶喊 --> 上LAB真係悶到想吶喊呀!

返回


22/7/2001

今朝都係一早起左起身等返學啦, 星期日返學真係麻麻地, 因為週圍O既人都係去玩, 有好多節目咁, 不過今日呢三小時O既堂都OK, 因為教果D野我用過但係冇去睇過點解要咁寫, 基本上我都學到野架! 睇黎遲D得閒少少同埋學多D野O既時候, 我都會改革下我D網頁先! 聽晚要 PRESENTATION 喇, 家下唔多驚, 可能要到聽日先會驚, 但相信正式果陣真係豁出去, 會反常咁唔驚架喇, 只係希望一切順利!
不容錯失 --> 其實 PRESENTATION 都係練大膽O既一個方法, 不過我情願去參加歌唱比賽!

返回


23/7/2001

今日心情都幾怪架喎, 基本上冇咩理過 PRESENTATION 要講O既講詞, 平平冇奇咁過左D時間, 當然一如以往, 我 PRESENTATION 之前都係勁聽英文歌啦, 亦當然係我最愛O既 CRANBERRIES 啦, 今日我預早左出門口, 因為第一組 PRE 唔想遲! 不過我就落車果陣某人打黎話佢到左學校喇, 估唔到佢咁早喎又, 一去到佢一身O既打扮的確係令我眼前一亮! 因為佢今朝見完工冇去換衫, 好難形容有咩感覺, 可以話幾得意o既! 本來定左 18:40 開始個 PRESENTATION O既, 不過冇咩人, 所以七點先開始, 成組人都一反常態喎, 平時係拎住張紙黎講又驚又震咁架嘛, 今次竟然四個都冇睇到張紙喎, 亦都好唔驚咁 PRE 完, 幾攪笑架, 我都唔知仲咩我一出到去就好 HIGH 咁喎, 所以真係好攪笑呀! 基本上好開心呀! 不過冇早走到, 唔知煔解竟然到十點先走喎, 奇怪!
你永遠都最重要 --> 唔好亂估呀! 我講O既係"信心"!

返回


24/7/2001

今日都好早起身, 之後約左個好耐冇見O既朋友去行街街! 好多謝佢幫我O係書展買左本書! 行左好多地方呀, 首先係旺角, 我仲買左 CDR , 因為就用哂喇, 所以咪入番D貨囉! 仲好開心咁見到一個想搵左好耐O既 GAME , 之後仲買左一隻好平O既韓文碟, 因為真係想聽下唔同類型O既音樂! 之後就坐車去左尖沙咀, 行文化中心啦! 行到七點到, 就去左我平時返學隔離果間餐廳度食野, 麻麻地好食啦, 不過價錢唔算貴O既, 之後我地就各自返屋企喇, 返到黎之後就玩 GAME 啦, 仲發生左一件邪事添! 夜晚就同嘉瑩妹妹傾電話, 估唔到亦係傾左成三個鐘都有架! 可能都有成兩個星期冇見啦, 所以都好多野傾!
成人禮 --> 我相信呢一首係我識唱O既第一首韓文歌, 我會努力!

返回


25/7/2001

今朝十一點起身到啦, 冇出過街呀, 因為八號風球(玉兔), 不過都幾好架, 我有煮飯食啦, 睇完一本新書啦! 都算利害呀, 我用左三個小時去睇哂本書, 好開心! 之後亦係聽歌啦, 今日聽左好多次果隻韓文碟, 我終於知道佢個名點讀喇, 佢個譯名係"朴志胤(音:印)" , 我發覺幾好聽喎, 不過完全唔知係講咩o既, 好想知添!
忽然之間 --> 雖然一早明白, 但總會不甘心!

返回


26/7/2001

今日都冇出到街呀, 都係睇下書, 玩下 GAME, 當然仲有聽韓文歌啦, 我發覺原來音樂真係通語言黎架, 因為我唔明白韓文, 但係從音樂中, 我明白到佢首歌個意景喎! 所以我真係覺得音樂好奇妙!
不可愛的時候 --> 究竟係幾時呢?!

返回


27/7/2001

今朝都冇咩特別野, 落過街, 仲租左隻<大逃殺>VCD睇添! 不過睇完之後好驚, 驚O既除左係個故事內容之外, 原來發覺人係好脆弱架, 經唔起考驗, 而且相信人真係好難, 如果唔明O既話, 去租黎睇下, 可能都有同感! 當然故事其實好簡單, 一如以往北野武O既戲咁, 用盡所有好嘔心O既方法去殺人, 不過今次佢對人性描寫幾好, 經唔起考驗O既感情係一個悲劇, 但未必代表經得起考驗就係喜劇, 我睇完之後我都有諗過, 如果自己都有份參與呢個BR遊戲(睬過自己把口!), 相信我一定係第一個受害者, 因為我真係做唔到殺人, 而且仲係你識O既人, 不過我諗要參加「遊戲」比死更慘, 因為就算俾你嬴左, 相信你日後都唔會有好日子過, 正所謂: 比死更難受! 講番夜晚返學先啦, 果個香港 TUTOR 真係好唔掂呀, 講英文差都算喇, 冇備課呢樣真係差丫嘛, 同學問佢野佢又問非所答, 跟住落黎都唔知點算, 唯有靠自己啦! 因為今晚要返學, 我錯失左一個去睇亞敬O既機會, 其實都唔係真係有 SHOW O既, 只係亞敬拍左套福音電影<當生命遇上生命>, 佢客串咋, 王喜先係主角, 不過我都真係幾想睇喎, 因為我知道睇左一定有所得著, 不過家下唯有等出VCD啦!
想一想 --> 俾D時間我諗下好唔好報果個 FULL-TIME COURSE, 報左你唔讀咁我咪好悶?!

返回


28/7/2001

今朝都十一點幾起身, 之後就坐車去左我舅父屋企, 因為我亞姨帶隻新狗仔出黎睇醫生, 我又好得閒, 所以咪去下囉, 隻狗仔幾得意架, 好細隻, 我敢抱佢喎, 你可想而知佢幾細隻! 夜晚就十點令返到屋企啦, 都好累呀真係!
愛一個人原來不易 --> 我覺得迷惘!

返回


29/7/2001

今日都冇咩特別, 算叫做左第一份功課, 不過硬係覺得冇理由咁簡單! 夜晚睇電視播O既<真情舞台劇>, 都算幾好睇咁啦, 可能真實啦, 不過下星期日開始有我等左好耐O既一套日劇< HERO >, 木村呀!
有效日期 --> 究竟係咪咩都要有一個有效日期呢? 感覺都要?!

返回


30/7/2001

今日都冇出到街, 因為天氣實在太熱喇! 都練過琴啦, 終於完成左第一首作品喇, 不過因為我唔係好識五線譜, 所以整首 MIDI 都怪怪地咁! 夜晚就玩"心跳回憶" GAME 啦, 終於追到個女仔喇, 不過唔知點解追到之後 SAVE 唔到喎, 所以家下個進度都係之前玩進度, 未追到咁, 真係激死人呀!
有你是榮幸 --> 唔知講咩好添!

返回


31/7/2001

今日好早起身呀, 不過又係冇出到街, 因為天氣真係好熱呀! 今日心情唔錯架, 所以轉左隻新O既洗頭水, (我呢個講法係咪怪怪地呀?)! 好想去睇<百萬富翁>同埋<一筆 OUT 消>添, 但係點拎入場券呀?!
風箏 --> 天上的風箏那兒去了, 你知不知道?!

返回


inserted by FC2 system