新一個月開始, 就如一個終止的開始咁樣, 有Ｄ事應該完結, 新O既開始就要理一Ｄ新O既野, 舊事已過, 一切都變成新的了! 今日日頭都係做功課, 不過部電腦呢排唔知仲咩事成日都 HANG 機, 我真係好想知點解會咁樣! 六點令就出左去, 因為同嘉瑩去拎Ｄ野! 不過好唔好彩咁跌左粒手提天線仔! 所以即刻都買番粒, 好彩唔貴咋! 之後就去食野咁啦, 九點令返到屋企 LU ! 聽晚係大日子喇! 一切都順利再加成功! YEAH! 好開心你都會o係呢個咁需要休息o既時間諗起我地, 我地會支持你到底架!
最愛演唱會 --> "明天開演唱會", 聽晚我同嘉瑩一定會好開心, 睇住黎丫, 必要時會出殺手柬, HEEHEE !

今日勁開心, 因為我有個朋友出 SHOW 呀, 真係好開心呀! 我同嘉瑩都有去到睇, 我地仲有三個朋友一齊去添! 當中仲有我兩個契姐添! 今晚個 SHOW 好正呀, 不過唔係全部都正O既, 呢個 SHOW 係介紹三隊新 BAND O既, 分別係: 103, CLICK IN 同埋廿四味! 我朋友果隊就係１０３大家要留意下, 真係正架, 唔係 HARD SALE 架! 佢地今晚好掂呀, 一開始第一隊就係佢地, 中段又係佢地, 連最後壓軸都係佢地! 睇得好開心呀, 仲有 POSTER 同 CD 送添呀, 好開心好開心好開心呀! 最好笑O既就係有人送花俾曹永廉O既時候, 曹生突然講左一句: "嘩! 咁大扎花剩係你先拎到架!", 可能大家唔多明白啦, 不過我保証大家如果在場O既話, 一定笑到肚痛! 完 SHOW 之後好開心呀, 因為我知道佢地真係關心我同嘉瑩O既, 佢地當然係指夾 BAND 果兩位朋友啦! 其實我真係覺得, 我知道我O係佢地心目中有個位就夠, 我唔會再去計較究竟排第幾, 大家同唔同意我都係咁覺得架喇! 之後本來諗住返屋企架, 但係我幾個朋友之後話不如去亞敬唱果間 BAR 喎! 咁所以就去左喇, 好開心呀都, 因為亞敬見到我同嘉瑩之後好開心, 佢 BREAK 果陣又坐過黎同我地傾計喎! 仲請我地飲野添呀! 仲話第時佢地有咩活動, 我地唔洗買飛, 佢會叫埋我地去玩, 正! 我地今日又識到一個人喇! 未見呢個人O既真人之前覺得佢唔多靚同埋好痴線! 但係今日識左之後覺得佢幾怕醜咁喎! 呢個就係仲春菲仲小姐喇! 佢真係幾怕醜咁喎, 不過我都同亞敬講話佢開心就得架喇, 亞敬都知我地戥佢開心架, 佢對我地好好喎, 真係好似佢個女咁樣, 好多野真係好難用文字去講, 但係我真係好感動架, 起碼我覺得亞敬唔係只係當我地係 FANS ! 亞敬頭先摸我個頭呀, 仲好支持同明白我地咁, 其實真係好感動架! 所以今日真係好開心架, 可以咁多件開心事O係同一日發生, 太好喇!



未忘樂與怒 --> 呢首係１０３ O既歌, 我真心希望佢地成功, 大家一齊努力!

今日都訓到十二點呀, 因為尋晚好夜訓(其實應該係今朝好早訓先 ARM !), 所以咪訓晏少少囉, 因為尋晚真係好開心, 玩得夜左少少咁啦, 同埋返到黎又洗頭, 又要等個頭乾左先訓得架嘛! 原來人開心Ｄ真係會咩都好Ｄ架! 起碼細胞冇死得咁多同咁快! 命都長Ｄ啦! 基本上今日都係做功課, 因為就快要交喇, 我地每個組員都好努力咁去做好份功課, 不過都有少少累喇, 因為分組做功課我覺得都幾浪費時間架, 因為大家唔係日日返學, 平時只係靠 EMAIL 去講下做左Ｄ咩同埋差Ｄ咩未做咁, 有好有唔好O既! 不過下一科都好似又係要分組做功課, 都唔知好定唔好! 尋晚發左個好奇怪O既夢, 本來想寫下＜私夢記＞架, 因為都好耐冇寫過啦嘛, 不過又唔知點寫好, 因為個夢怪得黎好混亂架, 我驚我寫完都唔知點左Ｄ咩, 所以都係唔寫喇! 七點果陣落左街買野, 近日愛上左食麥當勞O既蘋果批喎, 其實以前我點都唔知架, 因為好多年前我食過一啖就覺得勁難食, 但係早排又去買黎食, 又覺得好好食喎, 可能果陣甜得滯啦, 家下幾好味! 不過始終都好想佢出番果個菠蘿批, 真係我O既"批中至愛"呀! 唔知我果個煮野食好掂O既好朋友識唔識整呢? 識整就太好喇, 我只係知佢識整蘋果批咋! 等我下次問下佢先! 唔知大家覺唔覺得斯斯開心左好多呢? 好多野都睇開左好多, 相信都係關一個人事O既, 以前O既我真係可以因為人地一句無心O既說話而嬲好耐架, 不過而家睇開左好多 LU , 個腦真係冇咩記憶體嘛, 所以唔開心O既野就同佢講聲 GOOD-BYE , 只係記住開心O既事, 咁O既人生你話幾美好呢? 所以我好鍾意呢種無咩煩惱O既生活, 好安靜呀, 諗諗下以往果幾個月每一日都一定有幾個電話打黎問下你Ｄ你唔想講O既野, 諗番起真係要一笑而過! 不過果陣都好開心O既, 雖然一切都告一段落! 前面O既路先最緊要! 係咪?! 仲有呀, 尋晚O係 BAR , 許志安都O係度架, 果然係亞敬O既好兄弟, 佢都俾亞敬迫佢唱左一首歌, 就係一首我好鍾意O既英文歌"DESPERADO", 正!
今天你生日 --> 今日係ＫＡＺＵ生日呀, 雖然我尋晚十二點打左電話俾你講左生日快樂, 不過禮多人不怪嘛!

我今日好開心呀, 因為尋晚好好訓, 真係好夠精神! 之後都係做下功課, 同埋無無聊聊咁聽下歌啦! 不過我今日真係好開心呀, 因為收到一個意想不到O既電話, 果然守諾然, 話幾時打黎就真係打黎! 多謝哂呀, 你都令我明白左好多野! 我今日突然覺得自己好叻呀, 因為我竟然無端端識織英文字母手帶喎, 真係自己諗下諗下咁就織到喇! 我O既好朋友們都將會收到我為大家特製O既呢份小禮物, 不過真係要俾Ｄ時間我! 另外我夜晚果陣終於都睇到我最愛o既 BAND "THE CRANBERRIES" O既音樂特輯, 好開心呀, 雖然唔係最新果個, 不過我真係好開心呀!
千千萬萬個我 --> 對得起自己, 對得起人地, 有咩唔可以?!

尋晚真係冇咩安靜, 有咩理由又攪Ｄ野出黎丫, 不過冇架喇, 因為睇開左好多, "情感那可傷到我, 我很震定", 我知道你地明白我就夠架喇! 人地點講由佢地啦, 我對得住自己! 今日天氣凍左好多呀, 我諗聽朝開始仲凍呀, 我好鍾意冬天天氣架, 正! 原來有人以為我得廿一歲咋喎! 真係要請佢飲茶呀!
忘了你是誰 --> 小姐貴姓呀? 我識你架? 冇咩印像喎!

今日天氣凍左好多呀, 大家小心身體喇要! 今日都冇咩特別野做過, 只係勁彈琴咋, 雖然都係彈成咁啦, 不過用一個好開心P既心情去彈就一定好聽架啦, 係咪? 我今都勁聽我朋友隻碟呀, "誰不喜愛 ROCK & ROLL ...", 好想將呢首歌放上黎俾大家聽, 不過由於我係一個尊重版權O既人, 所以大家等下啦, 相信好快大家可以聽到佢地O既歌架喇! 夜晚我煮左我最鍾意O既白汁意粉同埋叉燒醬雞翼, 唔食過唔知原來自己整O既意粉好好食喎, 哈哈! 有機會整俾各好朋友食下先, 只要大家敢食就得喇!
好想好想 --> 好想學琴同埋鼓添, 不如搵朋友教兩招咯!

尋晚本來諗住早Ｄ訓架, 點知好唔開心咁, 我又有個朋友入左醫院喇, 真係好希望佢快Ｄ冇事啦! 今朝十一點到醒左, 之後去左我舅父度, 因為要陪佢買Ｄ野, 咁就梗係順便食埋晚飯先走啦! 近排我部ＰＣ真係唔多掂, 點解呢?!
唉聲嘆氣 --> "不想唉聲嘆氣, 陪你一起... ...!"

今朝十一點醒左喇, 之後我個好朋友打黎, 每一次同佢傾親電話都好開心架, 因為佢唔知點解次次打黎都唔講話搵邊個架, 好奇怪喎, 佢竟然知道一件明明另一個人話唔可以俾佢地知o既事, 而且仲要係果個人自己講佢知架喎, 世界真係無奇不有架o者! 傾左一陣, 知道佢又病病地, 真係希望佢快Ｄ好番啦, 唔好成日都病病地先得架, 最好笑係我話佢知我呢排成日都訓唔到, 佢竟然話叫我做下運動會好訓Ｄ喎, 可能都係真O既, THANK YOU 哂呀! 今日天氣又熱左咁, 我真係好鍾意前日果Ｄ天氣, 我果日成日都著住件風褸, ARMARM 好咁, 但係今日就熱呀! 之後都諗過下份功課, 但係到左三點幾就好眼訓, 先前諗住聽住收音機再諗下野咁, 點知就由三點幾訓到成七點先起身, 所以我真係要放鬆Ｄ唔好再咁緊張先得! 今晚一放早訓, 為左自己, 為左家人, 又為左各位好友, 我要身體健康!
搖控先生 --> 每個人都唔同架, 唔好以為可以控制到人先得架!

今日又訓到十二點幾喇, 越訓越累咁, 我真係要諗下解決方法先得! 今日都冇咩特別事, 落過街買野, 之後又執下屋咁咋! 今日都好開心架, 因為嘉瑩打俾我話果個朋友出左院喇, 精神仲好好添, 所以我都安心左好多!
唔好殺我 --> 呢首歌幾正架, 係一隊叫"臨記"o既 BAND , 係講要環保架!

今日都係一個好平凡中帶點不平凡O既星期六, 平凡O既係我依然係落下街, 執下野, 做下功課咁啦, 但係不平凡O既就係我今日勁頭痛, 同埋發覺自己重左幾磅喎, 好唔正常呀真係, 有咩理由一星期可以重成四磅丫, 再係咁真係唔掂呀, 好驚我會變肥肥呀, 睇黎都係呢排食得野太多, 我真係要控制一下食量先得! 但係又奇怪O既係我今日去左買麥當勞食(你話唔肥都幾難喇), 因為我見到隻 SNOOPY 好靚架, 咁咪去食開心樂園餐囉, 不過呢Ｄ真係有人換俾我就好喇, 我今日換左隻係"太空 SNOOPY", 我睇中左另一隻係"畢業 SNOOPY"同埋"心心 SNOOPY"(SNOOPY 攬住個中紅心), 不過呢兩隻都好似過兩個星期先有得換, 唔知有冇人咁好送俾我呢? 哈哈! 今日真係勁頭痛呀, 唔知點解呢, 可能係前朝起身噤熄個鬧鐘果野撞左一野落個電視架度! 可能係咁痛痛地掛, 不過大家放心, 我冇撞 SHORT 左, 仲不知幾正常添! 希望聽日冇事啦, 因為我最驚係頭痛呀, 一頭痛個腦好辛苦, 又怕光又怕聲, 好似吸血彊屍咁, 所以希望快Ｄ冇事啦! 關心自己之餘, 我當然會關心埋身邊O既家人同好朋友啦, 天氣凍左, 記住小心身體呀, 你病左呀? 休息多Ｄ呀, 雖然你冇去睇到醫生, 但係如果過兩日仲係咁, 就要去睇架喇, 雖然我知道你唔睇醫生O既原因, 不過唔好令我擔心嘛, 知冇?! 其實我都好驚自己唔知有咩病架, 因為呢排訓極都好眼訓咁, 同埋食多左好多野, 都唔知飽o既, 不過相信都係我多心o者, 大丈夫!
要求太高 --> "即使我說話總會留餘地, 我對著你毫無禁忌... ..."!

今朝十一點醒左喇, 之後就同嘉瑩去左一個地方, 之後我都冇同佢行耐Ｄ, 因為我要返學嘛, 其實返到去真係唔知做咩架喎, 同亞 SIR 係咁易講兩句, 之後就都係自己傾野, 不過我地發覺到我地個 PROGRAM INSTALL 果度有少少問題, 希望快Ｄ攪掂啦! 放學之後都係返屋企咋, 不過今日都算失敗囉, 出去果陣, 竟然去到地鐵站閘口先知冇帶銀包喎, 所以又要行番屋企拎番個銀包, 真係豬O都! 返到屋企冇咩特別事, 不過就打左一個電話, 但係竟然俾人 CUP 線喎, 竟然仲有Ｄ咁冇禮貌O既人, 真係摸不著頭腦! 係呀, 我今日又換左隻 SNOOPY 喇, 不過我同自己講過, 我呢個星期唔會再去食架喇, 因為唔要變肥肥嘛, 變肥左仲得了!
愛之初體驗 --> "如果說你要離開我, 把我的相片還給我... ...", 拎番自己Ｄ野唔應該架咩?!

今日都冇咩特別, 因為功課果度我果 PART 完成左喇, 所以得閒少少啦! 下晝收到佢O既電話, 好攪笑喎, 佢又冇話搵邊個, 真係俾佢激死! 知道佢好番好多都安心Ｄ, 不過佢同我一樣都係勁頭痛, 真係可能係天氣轉會係咁, 真係希望我同佢O既頭痛都快Ｄ好番啦, 其實好多時一個電話問候就好夠喇, 當然成日見住仲好啦, 不過而家咁樣我都滿足架喇, 佢應承左整蘋果批我食, 真係好喇! 亦好多謝你明白我啦, 你講O既野我真係有用心記住架, 睇下我幾乖女! 我突然間好驚肥呀真係, 可能係睇左"瘦身大激鬥"啦, 所以我要做運動! 我要瘦得黎健康! 其實我寫日記本來係想有咩想寫都寫, 不過我知道有好多人都睇, 我唔係話唔夠坦白, 而係如果大家睇完之後歪曲我講過O既野, 咁就對我冇咩好處, 我諗遲少少啦, 攪掂埋Ｄ手尾, 我又可以再次暢所欲言, 大家等我呀!
神化 --> 我係咪好神化架呢? 其實我呢Ｄ叫可愛O者, 呵呵!

今朝都訓到十二點幾, 真係唔知點解咁早訓都咁眼訓, 一定有問題! 之後嘉瑩打黎傾左幾句啦, 其實我都唔敢打俾佢住, 因為佢要考試嘛! 之後都冇咩特別事, 因為今日都係勁頭痛, 真係好痛, 又唔敢食藥, 因為佢話食得藥多會冇記性, 我不嬲都冇咩記性架啦, 再冇咁Ｄ唔得了架! 日日都好掛住一個人, 唔知點解呢? 我今日係第三晚有做運動喇, 我要堅持落去, 每日都做半個鐘頭運動, 咁我就會好健康喇! 雖然只係做左三日運動, 不過我都感覺到運動O既好處, 大家有時間都試下每日做少少運動, 健康得黎又可以瘦身! 正!
感激是 --> 身邊有愛我O既家人之外, 仲有好朋友(敏如/兆怡/嘉瑩/貓貓/業業/強強 ... ...), 我真係要講聲我愛你地呀!

今朝都算早起身喇, 係十一點正O既! 我諗日後真係要再早Ｄ起身先得, 不過今日天氣凍左好多好多, 其實尋晚都凍架喇, 我都要戴住條頸巾訓, 大家可能唔知, 戴住條頸巾訓係可以減低氣管毛病架, 我上年冬天就係咁過架喇! 天氣凍左咁多, 我就連落街O既念頭都打消左, 因為我O係屋企都凍都震呀! 正如ＤＪ森美所講, 二十度以下O既天氣最 ARM 係用黎掛住人O既, 我今日都有諗起好多好朋友呀, 好想打個電話俾佢地叫佢地小心身體, 不過我冇做到, 主要係因為我明白大家都好忙咯! 不過我尋日下晝有 CALL 到一個好朋友, 個 CALL 仲好攪笑架添, 希望佢收到我呢份溫暖啦! 今日頭痛好左少少啦, 不過好過前幾日痛到喊呀真係! 今日電話好旺場, 亦有一個意想不到O既人打黎俾我, 我真係嚇左一跳, 佢都好耐冇打過俾我喇, 不過就一星期見一兩次到啦, 其實好多謝佢對我咁好, 仲要多謝佢星期日果日幫我搵番一隻對我好重要O既ＣＤ! 尋晚我真係慘喇, 因為我部電腦中毒呀, 唔 SCAN 都唔知中左添呀, 不過好彩而家冇咩咋, 不過尋晚我都整左好多先攪掂! 點解我Ｄ電腦奇才朋友唔係住我附近呢? 一個住屯門, 另一個住香港果邊, 真慘! 不過我希望係最後一次中毒啦, 因為部電腦有咩冬瓜豆腐我真係死得架喇(不過我唔係咁易輕生O既人, 你可以放心!), 因為咩功課呀, 相呀, 咩咩咩呀, 都O係哂部電腦度, 冇 BACKUP 架! 所以電腦呀電腦, "你"要乖乖地呀!
我會掛念你 --> 人與人之間就好似一面鏡, 你掛住我時, 其實我都掛住你架!

尋晚唔記得左噤鬧鐘添! 今日都冇咩特別, 仲好笑啦, 本來諗住落去拎信, 所以只係拎左張身份証落去, 點知落到去咁 ARM 又派緊信喎, 咁咪唯有上番屋企拎番少少錢去買野囉! 去左買左未來幾日O既晚餐啦, 同埋去左惠康買左兩大支 QOO , 好開心呀! 今朝一起身就一隻眼雙眼皮喎, 認識我耐O既人都知道我一雙眼皮就係病O既先兆, 所以我家下都好驚架, 可能會病倒! 而且未來三日都要返學, 所以休息同運動會相對減少, 希望我冇事啦, 關心我O既人為我祈禱啦! 今日真係凍左好多呀, 所以攪到我要成日茶住支 CREAM , 連潤唇糕都用完一支添呀, 家下開左一盒我好鐘意O既士多啤梨潤唇糕, 為呢個秋冬做好準備!
溫暖的詩句 --> 輕輕的問候, 帶來我深深的關心, 天氣轉涼了, 大家請為我愛自己!

今日都冇咩特別丫, 因為夜晚要返學, 所以我將個運動時間搬左去日頭! 夜晚返學果陣, 我真係覺得我做左幾日運動真係有用架喎, 因為行步路都快Ｄ, 同埋唔會再上氣唔接下氣咁! 雖然體重上未見有減, 不過我諗遲少少會可以做到! "努力"呢兩個字, 雖然好平常, 不過出自唔同o既人口中就有唔同o既效果! 就如一個簡單o既電話, 突然講"我地一齊努力丫!", 雖然係一句好 LEUNG O既說話, 不過好有動力, 出自唔同人口中有唔同O既動力, 呢句 LEUNG O既說話出自佢口中, 更加有動力啦, 呢Ｄ係解釋唔到O既!
嫌棄 --> 如果你唔嫌棄O既話, 我地一齊努力丫!

今日都可以話係創紀錄呀, 我足足上左七個鐘頭堂, 仲要坐得好辛苦, 雖然係有好多 BREAK , 不過真係提起都怕怕, 我條腰好痛添呀! 放 DINNER 果陣去左食麥當當啦, 本來都諗住換 SNOOPY 架, 不過唔知仲咩突然唔想換喎, 又想食蘋果批, 所以就食左第二Ｄ野喇! 其實 DINNER BREAK 果陣我打左一個電話, 其實都幾無聊架, 只係突然想聽下佢把聲, 點知佢又未放工喎, 真係唔好意思喇, 正如我所講, "輕輕的問候, 帶來我深深的關心, 天氣轉涼了, 大家請為我愛自己", 本來想講俾佢聽, 不過我驚笑死佢咋! 今日早左放學呀, 不過唔係好事, 明明話放十點架嘛, 攪到我約嘉瑩十點七, 因為我地又相約去捧亞敬哥哥場, 佢見到我地兩個梗係好開心啦, 仲請我地食野添, 多謝哂呀真係! 今日同亞敬傾左好多野呀, 我終於都同到菲菲傾計喇, 仲影左張相添! 之後好快咁返到屋企, 點知我先知發生左件事, 不過呢件事聽日可以解決到, 同時亦會係一個終止的開始!
愛很簡單 --> 愛就愛, 唔愛就唔愛, 有幾難o者?!

今朝好早訓同好早起身, 十二點令醒左喇, 之後就攪掂左尋日我話果件事, 好順利, 不過我深深咁體會到數學差有咩後果! 好彩我不嬲Ｄ數都唔差! 今日勁唔夠訓呀, 個樣簡直係得人驚! 今日都要返學, 不過就返四點到五點半, 因為編左兩班人上 LAB , 好衰唔衰, 等人地唔夠訓先話要影相, 因為個澳洲 MISS 要我地用數碼影自己個樣同埋一組人又要影張喎, 真係攪笑! 放左學之後就返屋企喇, 之前都去左買米粉, 因為突然間好掛住某牌子O既米粉, 咁咪今晚食囉! 都冇咩特別事啦, 只係知道自己真係作病, 又頭痛, 又發熱咁, 今次真係發熱發亮呀! 近排心情好怪呀, 好平靜但係又好開心, 但又平靜喎, 真係難以筆墨形容呀! 近排身邊O既人對我好好喎, 可能呢個世界係公平架啦, 前排拎走左我身邊O既一Ｄ野, 咁就俾番一Ｄ好野俾我, 太好喇!
愛上你 --> "愛上你愛得不輕鬆, 愛得太另類沉重, 進佔我的心胸, 還要狠狠的開個洞"!

今日都冇咩特別啦, 下晝果陣聽森美小儀, 佢地開左個題目幾得意架喎, 就係如果聽日外星人要捉走你, 而你今日就要洗哂你Ｄ錢, 咁你會點洗呢? 我都有 FAX 去呀, 森美都有讀! 我會將一半捐去慈善機構, 之後用一部份錢包一間餐廳同我鍾意O既男仔食晚飯, 剩番果Ｄ就會約家人打牌之後專登輸哂俾佢地! 因為橫掂都被外星人捉走, 咁點都要留番Ｄ錢俾家人架嘛! 森美仲好笑喎, 佢讀完我張 FAX 之後講左一個更好笑O既方法,　佢話：『如果我係你就約果個男仔食飯果陣, 問佢你鍾唔鍾意我, 如果佢話唔鍾意就用剩番O既錢搵人打個男仔!』, 我聽完之後笑到我肚痛咁滯呀, 佢真係好攪笑呀, 咁都俾佢諗到, 可以諗諗喎, 哈哈哈! 我夜晚好開心呀, 因為又收到佢O既電話, 不過佢又病左, 同我都差唔幾, 我今日都係頭痛, 仲流鼻水添, 你話點算好呢? 同佢傾計真係好舒服好開心, 佢仲鼓勵左我好耐添, 令我好有動力呀! 不過我都希望佢快Ｄ好番, 多Ｄ休息咁啦, 真係好想見到佢, 聽到佢把聲好溫暖呢! 不過同時間我都覺得自己好似多左少少醋意咁, 唔好再係咁啦, 我唔想好似好唔大方咁, 不過真係好掛住佢! 呵呵! 尋晚冇睇到流星雨, 聽講好精彩, 雖然你話流星雨係唔好o既, 但係我始終都想睇一次, 不過下次獅子座流星雨要等三十三年後, 但係我都好希望同你睇一次!
衝口而出 --> 好想同你講：『好掛住你呵!』!

今日好忙呀, 唔係因為功課, 因為都未開始理Ｄ功課住, 係因為要攪間屋, 點幾鐘食完野就落左去買少少野再行左一陣, 之後三點幾鐘就返到屋企開始執下攪下間屋喇, 由三點幾執到八點幾呀, 你話幾誇張丫? 好多野唔同左啦, 我間房好靚呀而家, 大家有機會就黎睇下啦, 我睇到間房靚左咁多, 我都好開心呀, 而我張床果Ｄ公仔都換左第二Ｄ, 不過因為咁樣我整爛左一樣野, 家下都唔知點算好, 今次一定有排攪! 食晚飯之前ＫＡＺＵ打過俾我喎, 原來都好耐冇傾過計 LU, 所以話真正O既友誼係唔需要日日傾住電話同埋日日見住O既, 係咪?! 我今日買左一盒聖誕咭仔, 返到黎開黎睇, 嘩! 有好多張都好靚好得意, 但係其中有一張我睇完之後笑左好耐呀, 唔捨得送呢張咭俾人添, 因為真係好好好得意架! 呢幾日都係食米粉咋, 因為唔知點解突然好鍾意食喎, 真係好好食! 係呀, 我尋晚訓之前望左個天好耐, 因為好希望見到一粒流星都好丫, 終於俾我見到一粒, 綠色尾架, 都好開心, 因為記憶中係第一次見到流星!
就是這樣 --> 我性格就係咁, 妒忌我天真得起? 天真唔好咩? 我就是這樣!

呢幾日都好夜先訓得著, 所以唔多健康咁樣, 我一定要改善! 今日都有落過街, 之後返黎又係執下屋咁啦! 不過家下成手都損哂, 因為天氣凍, 整親都唔知, 不過家下好痛! 天氣真係好乾燥呀, 攪到我家下成日拎住樽 CREAM, 相信好快可以用哂一樽! 今日突然諗到一樣好好玩O既野! 希望有機會玩下啦!
今天你生日 --> 今日係我夜校同學 SIMON O既生日, 祝你咩都順利啦!

今日冇咩特別, 不過就真係凍左好多咁! 我都有落過街架, 仲買左我最鍾意O既車厘茄, 真係好好味架! 今日要早Ｄ訓先!
病人 --> 頭痛呵!

尋晚真係好早訓, 點令鐘就訓左喇, 但係今朝竟然都訓到點幾, 足足訓足十二個鐘! 今日隻手好痛呀, 唔知係咪尋晚壓住隻手訓呢? 兩點幾又收到佢個電話, 傾左一陣, 當然好開心啦, 不過佢真係病左, 我真係好希望佢去睇醫生, 不過佢真係太忙喇! 返學之前我都專登去睇下有咩醫生收夜Ｄ, 因為佢成日收工收得好夜, 希望佢真係睇到醫生啦, 其實我都想睇下醫生, 因為真係有Ｄ唔妥咁, 不過我自己睇又驚驚地, 所以遲Ｄ先算啦! 夜晚就要返學, 不過都唔知仲咩, 個亞 SIR 講番上幾堂個外國 MISS 講過O既野, 往後果七堂都係俾我地自己 PRESENTATION 同埋 DEBATE, 真係慘, 不過我相信係會好順利O既! 原來一轉眼我又就畢業喇, 感覺好怪! 今日把聲好沙呀!
知道的請告訴我 --> 有冇咩病係成日要訓架? 又成日頭痛架? 知道話我知啦!

今日把聲好左少少啦, 不過都有少少沙! 今日就冇落過街, 因為想O係屋企囉! 今朝七點正醒左一醒架, 唔知點解係好精神果隻, 但係之後亦因為咁早起身冇咩做而繼續訓! 不過我發覺星期六係冇咩電視好睇架喎, 所以都係聽下ＣＤ咋! 不過我發覺到 ATV WORLD 有韓語劇場, 我今日就睇左喇, 果套真係好好笑架喎, 睇到我笑到肚痛添! 大家有興趣可以留意下O既, 同埋Ｄ韓文好攪笑架, 佢有Ｄ詞語O既音就似日本, 但係多數都唔知點發到果Ｄ音咁架, 同埋我今日睇果套都係處境喜劇, 所以睇完之後心情好開心!
忽然之間 --> 突然好想食叉燒飯, 唔知點解呢, 但係真係好想食!

今日一起身條頸好痛呀, 可能都係尋晚太好訓冇郁到而引起架啦, 希望快Ｄ冇事啦! 今日都依然冇出到街, 星期日邊度都多人架啦, 所以唔想同人迫! 我發覺到剪短左頭髮就會越剪越短架喎, 我家下都剪得算短架(以我黎講), 不過唔知點解年年都係熱就留長頭髮, 一到天氣凍先想剪短頭髮O既, 不過短頭髮好呀, 唔洗點理, 我諗我呢幾個月都會 KEEP 住短髮, 睇落可愛Ｄ嘛! 哈哈! 夜晚又睇左＜熱帶雨林蜜月狂奔＞, 其實最初都覺得Ｄ人冇野搵野黎攪, 玩Ｄ咁危險O既野, 不過我覺得都幾有意思架, 因為佢地呢次O既經驗, 我地好可能係呢一生人都唔會有架! 正如幾年前我被迫參加一個 CAMP, 當時要玩 TRUST FALL (背向樹跳樹一棵樹), 當時好驚架, 亦好唔明白點解要玩Ｄ危害我生命O既野, 但係而家諗番起, 其實都係一個經驗, 雖然我唔清楚家下成日腰痛關唔關果次事, 不過有時諗番起我都唔相信自己可以做到, 我亦相信往後O既日子我唔會再有呢Ｄ體驗O既機會!
大包蒸多兩籠 --> 大家有冇聽過呢首歌仔呀? 聽講遲少少麥嘜同春田花花會上大銀幕, 我就睇左呢首歌O既ＭＶ, 真係好攪笑!

今朝一早起身, 因為又要去屯門 LU, 九點令鐘起左身, 之後去到就飲茶啦! 之後行左一陣啦, 我今日睇左醫生喇, 我唔可以令自己再病落去, 我要愛自己! 不過我唔知點解今日有時睇野好唔清楚咁, 唔知係因為病定係開始有少少近視呢? 希望唔係有近視啦, 因為我戴眼鏡個樣好傻架! 我夜晚十一點幾先返到屋企, 因為陪左我舅父去睇野!
PROMISES --> 我記得你應承左去我畢業禮架, 唔好唔認數呀!

今日勁好訓, 因為尋晚食左藥先訓, 不過今日成日都唔敢再食, 因為尋晚食果一次攪到我今日都勁勁勁眼訓! 都唔知點解Ｄ藥力咁厲害! 所以都係訓之前食好Ｄ, 我今日由四點幾訓到成八點先起身食野, 因為真係好眼訓! 今日都唔知做咩架喇, 下畫就打爛左隻湯碗, 仲因為咁整損左隻腳添, 真係黑! 夜晚都係上左一陣網咋, 因為真係冇咩精神! 知道佢好番好多我都安心Ｄ, 因為工作忙而且又病係好辛苦架!
不如睡一睡 --> 病就最好訓幾訓, 身體好快好!

今日冇咩特別, 都係好眼訓, 但係因為夜晚要返學, 所以冇得訓晏覺! 夜晚返學都幾無聊架, 因為都只係睇Ｄ同學 PRESENTATION 同埋 DEBATE , 不過好攪笑喎, DEBATE明明係一邊正方一邊反方, 講左大家O既論點之後就正反兩邊辨論架嘛! 但係家下係正反兩方講完自己論點之後, 就有五分鐘俾台下O既觀眾去問問題, 而正反兩方係唔需要去辨論O既, 真係奇怪! 其他冇咩特別事啦, 係返學之前去左一個"高危"O既商場, 不過我諗冇事掛, 真係唔驚得咁多呀!
Close To You --> 其實大家身邊都有好多野係存在, 但係被我地遺忘, 不如用心Ｄ諗下係Ｄ咩!

今日都係冇咩特別事, 因為尋晚Ｄ藥力仲未散, 真係成日都好眼訓, 所以本來諗住今日要 SEARCH 下星期三 DEBATE O既野, 但係的確頂唔順, 好眼訓呀真係! 我真係唔想成日訓架, 不過真係Ｄ藥力太勁, 有咩理由過左成日都唔散架, 今晚都唔敢再食喇!
叮噹 --> 家下O係"至叻小人類"有得睇呀, 不過配哂新聲同埋新名, 唔係太好睇!

今日都依然係冇咩特別, 日頭咪上網搵下資料做 DEBATE, 不過冇咩得著咁, 夜晚就要返學啦, 不過都早放左好多, 因為Ｄ同學 PRESENT 同 DEBATE 哂咁咪走得囉, 下星期三晚到我地組 DEBATE 喇, 其實都仲未諗到有咩可以講, 希望黎緊兩日可以搵到料啦! 今日都好眼訓, 因為我尋晚都有食藥, 因為實在係傷風, 所以一定要食埋佢先, 不過我發覺冇食Ｄ咳水係冇咁眼訓O既! 今日聽到消息知道 Beatles o既 George Harrison 癌症病逝, 唔知點解我對佢冇咩認識, 只係聽過下佢Ｄ歌, 但係我聽到之後覺得好可惜! 而睇有關報導話佢臨死前只有一個心願: 大家彼此相愛, 睇左之後, 我覺得感覺好奇怪! 我突然間覺得呢個世界好覆雜, 個個人o既願望都可以係天馬行空, 但係其實有一樣野好簡單, 大家都可以做到, 而又會令到呢個世界更靚! 就係大家彼此相愛, 就係咁簡單, 但係大家試問下自己做唔做得到? 我相信大家做到愛自己愛o既人, 但係又有邊個可以愛自己唔鍾意o既人呢? 原諒一個對唔住你o既人又做唔做到呢? 大家試下丫, 我呢排都心情好平靜, 我發覺咁樣對自己對人地都好好多, 所以"愛"其實係好重要, 而又好易被人忘記o既一樣野!
有沒有那麼一首歌會讓你想起我 --> 我希望唔係"犯賤"呢首歌啦!