話咁易又一個月喇, 時間真係唔多見洗咁, 所以真係要好好咁珍惜每一日! 今日都係做功課, 因為好想今日交到, 終於有成果喇, 就係做得掂份功課而夜晚返學亦交到功課! 返學之前仲拎左份功課去釘裝, 真係唔多抵呀我果份, 因為得幾頁紙咋! 呢幾日可以休息一下先, 因為要等亞 SIR O既意見, 之後就可以執下份 ASSIGNMENT 2, 咁三月頭我就有功課交喇, 不過仲諗緊邊個有 LASER PRINTER, 因為外國個亞 SIR 好煩呀, 一定要 LASER PRINT, 如果唔係就唔改份功課, 你話係咪麻煩丫!

我好感動 --> 終於睇到一個朋友有所改變, 真係好感動!

今日去左飲茶喎, 其實一家人去飲下茶係好開心架! 五點鐘到就出左去, 因為今日係大日子, 我個不可多得O既好朋友間舖開張呀, 所以我就同左嘉瑩去恭賀一番喇! 好開心呀, 因為好多熊貓呀, 下次我要再去掃貨! 到場有好多嘉賓呀, 當然亦好開心見到 103 樂隊齊哂人啦! 雖然另外兩個唔識我地, 不過都覺得我地熟口面, 都有同我地笑下咁! 大家都多Ｄ去幫襯下丫, 就O係九龍城廣場O既原宿新地帶 13 號舖, "IITENKI", 大家一齊好天氣啦! 我今日當然好開心啦! 不過都有尷尬野發生啦, 你會發覺自己唔受一Ｄ人O既歡迎, 不過唔緊要啦, 每個人有佢地自己O既想法! 我知有人明白我就足夠喇! 夜晚就食麥麥呀, 有玩到急口令呀, 好攪笑架!

心領 --> 有好多野唔洗講出口! 我知架!

今日冇咩特別呀, 都係平平凡凡O既一個星期日! 夜晚我契媽地黎左我屋企坐左一陣喎! 天氣又凍左喇! 所以又再一次病病地!

我太好人 --> 有時係咪我真係太好人呢?

今朝俾個電話嘈醒左, 之後都冇出到街呀, 本來今朝約左嘉瑩去玩架, 不過都係改左星期五, 希望到時去得成啦! 而家要上網好唔方便, 我真係想快Ｄ搵到間 ISP 轉寬頻, 因為真係好唔方便嘛!

無條件為你 --> ... ...!

今日個喉嚨好唔舒服, 不過又唔係痛喎, 所以都唔知仲咩! 今日係一個好唔平常O既星期二, 因為今晚要返學呀, 原因好簡單, 因為加左堂囉, 不過返到去真係好悶呀, 因為都只係聽日 PRESENT, 完全坐足成晚都唔知仲咩, 睇黎都要諗下跟住兩堂有咩做至得喇! 我發覺原來我又識多個人識打鼓喎, 真係太好喇, 睇黎我都要向我音樂理想進發, 加多幾把勁先得喇! 其實想O係度同ＤＪ森美講一句說話, 雖然佢一定睇唔到, 不過我都想同佢講聲多謝, 因為佢的確無形中咁幫我唔少架!

好心害了你 --> 我唔知道原來可以咁架!

今日個喉嚨依然有少少唔多舒服, 所以食左粒喉糖, 好左少少咁啦! 夜晚出左去呀, 因為亞敬有野做呀, 九點令鐘去到啦, 要同我Ｄ同伴講一聲唔好意思, 因為我遲到! 都有成個幾兩個月冇見過亞敬喇, 今晚見到佢好開心, 不過唔見菲菲就有少少出奇喇, 希望下次會見到菲菲啦! 同亞敬影左相, 雖然今晚個 PARTY, 佢只係唱左一個鐘到, 不過真係好開心, 雖然都真係唔多夠架喇! 有佢今次張 POSTER LU, 仲有呀, 要再一次同亞敬講聲多謝呀! 佢對我地真係好好!

怯 --> 走之前我做左一樣野, 希望可以救到某一段友誼, 但係我好怯!

今日都係同平時差唔多, 都有少少作病咁, 因為我一作病就會變雙眼皮架喇! 去左飲茶, 之後就o係屋企坐左一陣喇, 再之後就返學, 係呀, 今晚又要返學呀, 因為又加左堂囉! 不過我今日上堂聽 PRESENTATION 時, 終於又再一次証明某個人係好有問題, 我覺得大家讀得呢個 COURSE O既人都應該係成熟架喇, 不過呢個多咀O既同學, 估唔到佢成四十歲人都唔識咩係尊重, 人人出到去 PRESENT 都會驚架啦, 今晚其中一個 PRESENT O既同學仔, 雖然真係O係字眼上係有少少出錯, 但係係一個人都應該唔會好似呢個四十歲O既所謂人咁樣好大聲好開心咁笑人地打錯左一隻字! 呢Ｄ人配讀 BACHELOR 咩? 就連基本"尊重"都唔識, 佢咁樣做唔係講俾人知佢好叻唔會犯打錯字O既錯誤, 佢咁做係要好大聲咁話俾人聽佢係一個唔識得尊重人、 好大聲咁話俾人知佢係一個冇ＩＱ冇ＥＱ亦都冇ＳＱ O既人, 佢白過左幾廿年! 我本人就好不滿佢當時取笑人O既反應, 相信好多同學都有同感, 所以當呢位同學仔 PRESENT 完之後, 佢係得到最大聲、最真誠O既掌聲! 經過呢一件事之後, 我真係覺得呢個多咀怪好可笑, 可笑O既係佢完全唔覺得佢自己有問題, 我真係祝佢好運! 放左學之後, 我就坐地鐵去左尖沙咀, 不過好攪笑喎, 一上地鐵車箱, 竟然俾我撞到一個幾個月冇見O既好朋友, 傾左一陣啦, 知道佢近排都好忙, 大家都希望快Ｄ有時間出黎食餐飯再傾下計咁! 亦好感動佢竟然好關心我O既煩惱, O係呢度同佢講聲多謝哂! 之後大約十二點返到屋企喇, 得知道我個好姊妹唔多舒服, 希望佢早Ｄ訓, 我地聽朝去玩!

玻璃鞋 --> 正如我所知, 每一個女仔都曾經相信過呢個童話, 我到而家都仲覺得每一個女仔都會有為佢地度身訂造O既玻璃鞋!

今日一早出左去喇, 因為約左個朋友去玩, 傾下計, 行下街咁, 一直行到六點幾就直接返學喇, 係呀, 今日又要返學呀, 都係聽人 PRESENT, 不過果個多咀怪又係好乞人憎, 都唔知佢個腦咩構造架! 不過好彩對埋佢今日, 對佢多一分鐘我都驚我會破戒鬧佢呀! 我有個同學好厲害呀, 竟然用左個幾鐘就睇完成本小說喎! 坐車果陣同個同學傾音樂, 傾得好開心! 不過成十一點幾先返到屋企呀, 因為今日成十點先至放學! 今日聽左兩次"好心害了你"! 真係幾好聽, 不過如果唔係 KELLY 唱就會仲好Ｄ!

有福氣 --> "忘了你, 還有你, 還愛你"!

今日去左行街呀, 雖然都只係屋企附近, 不過都好開心, 但係我又唔多明白新年同平時有咩唔同, 點解要過得特別呢? 我今日有個"蘋果批鎖匙扣"喇, 好開心! 不過掛住玩, 唔記得左入帶錄韓劇!

幻滅時間 --> 時間真係過得好快架, 所以大家真係要好好咁珍惜呀!

今日都唔算早起身呀, 之後去左尖吵咀行左一陣, 飲完茶就返屋企喇! 其實都冇咩特別, 因為條街真係幾多人!

孖寶 668 --> 就黎新年喇, 我就祝大家孖寶 668, 一路發啦!

今日係蛇年O既最後一日, 大家有咩新年願望呢? 其實我都係希望身體健康, 因為健康真係好緊要! 我硬係覺得我訓極都唔夠咁, 所以健康係非常之重要, 我希望馬年健健康康!

大家靜一靜 --> 希望來年安安靜靜, 順順利利!

年初一, 首先恭祝大家馬年行好運! 尋晚一踏入馬年就收到祝賀電話喇, 多謝哂你咁有心! 不過尋晚都唔係咁好受架咋, 無端端睇到凌晨O既電視, 點都認得樣啦, 算啦不過, 學哥哥話齋如果係自己控制範圍之外O既話, 就由佢啦, 冇錯! 你講得好 ARM ! 今日就訓左成日呀, 因為難得清靜, 過左一個好平淡但係又滿足O既年初一! 夜晚睇"星期二檔案", 我覺得好真實呀, 因為而家Ｄ後生仔女真係唔多投入去做事, 如果我讀書果陣, Ｄ亞 SIR 會幫我地攪下年宵, 我相信我一定係最投入果個, 因為冇理由咁大個人做一件事都唔投入架嘛, 其實好多機會係要自己去爭取O既, 而且大多數O既機會過左去都唔會再返轉頭!

流年 --> 馬年我O既流年都幾好架! 大家又點呢?

今日都係好平淡咋, 因為都冇出街, 始終都係新年嘛, 所以唔多想出街囉!

利是屬於你 --> 今年冇去拜年, 所以利是欠奉!

今日都只係落過街租碟睇咋, 不過條街真係冇咩人, 靜得幾得人驚咁! 下晝睇到一個頒獎禮, 都幾開心架, 因為聽到好多平時聽唔到o既音樂類型, 而且 SAMMI 仲拎到香港最受歡迎歌手獎添!

愛你一萬年 --> 其實一萬年只係一個代號, 可能只係一剎那O既感覺, 亦可能係永永遠遠!

今日食左野就落左去行街街, 仲得到一個今日新鮮運到O既薯條形鎖匙扣添, 之後又去租碟, 因為我發覺原來我好多戲都未睇過架! 夜晚就好熱鬧, 因為我亞姨同舅父都黎左食飯, 我表弟仲帶埋女朋友仔黎添! 今日收到一份禮物! 亦收到一個電話, 係一個我好掛住O既人打黎架! 咁夜先放工真係辛苦哂, 好多謝你O既祝福!

秒秒鐘歡聚歡笑 --> 其實同家人一齊開開心心咁食飯係最開心O既!

今日都係冇出到街, 因為真係好驚人多, 可能靜左幾日啦, 人一多就有少少驚咁! 夜晚想 PRINT 野, 又發覺本來好番少少O既 PRINTER 又壞壞地喇, 其實又好奇怪架喎, 明明 PRINT 到架嘛, 點知換完 COLOR INK 之後就連個黑色都 PRINT 唔到喎!

讓愛 --> 安仔新歌, 好感動!

今日算叫做早起身啦, 食完野之後就睇左一陣間書, 之後就落左去買野, 都冇咩特別事!

我信 --> 我信一切會好!

今朝一早六點鐘就起左身喇, 因為今日係我參加O既"省港澳美食三天豪華團"O既開始, 我地就O係藍田集合, 之後就坐旅行團O既直通車由黃岡口岸過關入深圳, 認識左當地O既導遊小姐(慧青), 首站就去左祈福新村會所食午餐, 之後就去左會所行左個圈, 再去到"觀音蓮花苑(番禺蓮花山望海觀音)", 亦O係呢度食左一碗好出名O既"沙灣姜埋奶(=姜汁撞奶)", 好好味呀, 又平喎, 只係人民幣 5 蚊一碗! 之後就去左"藍天蜂蜜園"睇蜜蜂亦了解左蜜蜂O既生活等等! 大約五點幾就到左"華南碧桂園"食晚餐喇, 咁早食係因為夜晚O既活動, 食完亦參觀左會所! 食完飯之後就去到新開O既"長隆夜間動物園", 入場費就係人民幣 140 蚊, 雖然好似好貴咁, 不過真係值得架, 因為第一站就去演藝場度睇俄羅斯馬戲表演, 剩係呢個 SHOW 就值回票價喇, 睇完呢個 SHOW 之後就去左睇澳洲滑水表演, 其實應該幾好睇O既, 不過其他觀眾實在係太投入, 所以一到有滑水表演果陣就企哂O係度, 所以基本上我唔係太睇到! 之後就去坐小火車去探險, 一路上就睇到幾十種唔同O既動物, 當然有我最愛O既熊貓, 當然O係排隊等小火車果陣都有一件趣事, 由此知道左同團O既公公婆婆都好厲害, 因為行得仲快過我亦好精神, 心景好開心咁架, 好可愛架! 坐完小火車之後就走了, 由於我一入場果陣見到一間精品店有熊貓毛公仔架, 一心諗住走果陣先去買, 點知走果陣間精品店就已經關左門喇! 之後就坐車返酒店喇, 入住左"廣洲大廈"喇, 間酒店非常之靚! 第一日O既行程就係咁喇!

第一次 --> 今次可以話係我第一次去內地旅行, 亦係第一次同舅父舅母去旅行!

今朝一早七點鐘起身, 七點半就食左一個好好味O既中式早餐, 第一站就去左珠海睇"漁女風姿", 好多紀念品架, 不過我冇買到, 因為唔係太靚! 之後就去左珠海梅溪牌坊旅遊區O既"金鹿苑"睇鹿仔, 不過Ｄ味道又真係好臭! 之後又到左附近O既"香記工作坊", 呢間係一間好出名O既蛋卷公司黎O既! 下一站就係去食飯喇, 就去左"好味海鮮酒家"度食飯, 好好味呀真係, 不過間野有野食, 雖然我見唔到, 但係感覺好得人驚! 食完飯之後就去到拱北口岸度過澳門一日遊, 大約去左澳門O既景點啦, 不過果邊個導遊莫小姐就真係好差喇, 應去O既地方又唔去, 去果Ｄ地方都唔係太特別, 同埋佢只係掛住叫你幫佢買紀念品, 真係好差呀! 去過幾新O既"聖母觀音"、新果個紀念塔、運來手信公司(買手信O既)、主教山O既"媽袓廟"、金蓮花廣場、四面佛等等, 不過都唔係太好玩, 都係個導遊莫小姐做得好差! 之後就由潢琴口岸度返番珠海, 返到珠海六點鐘到啦, 就即刻坐車去橫琴島其中一個蠔場度食晚餐, 係打邊爐, 不過同幾個唔識O既團友一齊打邊爐, 總係唔多自然咁! 食完飯就返酒店喇, 係入住"聚龍酒店", 返到酒店房大約八點半, 咁早返到去係因為俾我地放低行李之後就去酒店O既俱樂部O既夜總會睇表演, 好好睇呀都, 除左唱歌、跳舞之外, 仲有一個七歲O既小妹妹表演雜技, 真係好厲害, 不過同時我又覺得佢好慘, 因為小小年紀就受咁多苦去練咁危險O既表演, 我地大約睇到十一點幾就返左房喇! 原來O係澳門寄信返香港係只要 $ 1.5 , 我本來諗住去每一個地方寄一張 POSTCARD 俾自己架, 不過冇 COINS 同埋身上冇咩野寄到返去, 所以冇做到! 第二日O既行程就係咁喇!

祝君好 --> 好可惜, 今次澳門遊, 可以話好多名勝都冇去, 有機會要再去過!

今朝一早七點半鐘起身, 八點食左一個西式自助早餐, 第一站就去左中山地區O既田七專門店度了解一下田七啦, 之後就去左一個叫做"泉林娛樂城", 裡面有好多野玩架, 例如:滑草、騎馬、機動遊戲等等, 不過就係好舊下架都, 我咩都冇玩到, 因為呢度好得意, 入場要買飛, 入到去咩都要俾入場費, 好彩入場費包埋唔洗自己俾! 午餐就O係裡面果間"和平飯店"度食齋, 出奇地好好味, 真係好似肉味架, 唔似香港Ｄ齋一食就知係假, 呢間飯店O既齋O既味真係幾可亂真架! 食完之後就去左中山市五桂山O既"五桂山龍珠茶場", 可以睇到茶葉啦, 又試過親自炒茶係點O既, 茶葉係有好多好多唔同味, 聽果位採茶姑娘講, 原來都係同一樣O既茶樹葉黎架, 只係同唔同炒茶方法同埋唔同O既料加入去炒, 仲有就係炒茶師傅O既手勢去改變茶葉味道同埋形狀! 唔記得左講, 去緊茶園果陣, 俾我地O既導遊慧青姐姐拉左出去唱左首"朋友", 真係唱得唔好架我, 不過好彩各位團友都聽得好開心! 去完茶園之後就坐車去深圳, 因為完成哂行程喇, 大約六點鐘就過左關, 都係O係黃崗口岸返香港, 其實我都幾唔捨得走架, 因為慧青姐姐真係好盡責, 大家都玩得好投入好開心, 而且行程真係好順利, 完全冇危險, 所以真係有少少唔捨得, 話哂都對左成三日嘛! 過完關就坐車返去將軍澳, 因為約左我爸爸去打邊爐, 食到八點令就坐巴士返屋企喇, 其實我而家好眼訓架, 不過都希望一口氣寫番呢三日O既日記, 因為我真係冇咩記性, 好多時當日去完O既地方做過O既野我都會唔記得! 所以襯住有寫低日記果陣就打番去電腦先! 第三日O既行程就係咁完滿結束喇!

友誼之光 --> 歌詞好 ARM 我地呢Ｄ萍水相逢O既團友, 多謝哂咁多位!

今日成十二點先起身, 其實就未訓夠O既, 不過都要食架嘛! 食完野過左一陣就落左去租碟睇呀, 租左套＜男歌女唱＞, 其實完全都係因為有黃子華做先租架咋, 不過就唔太好睇, 有少少都好笑O既! 睇完之後好眼訓喎, 不過就冇訓到, 因為驚今晚訓唔著, 不過而家對眼同埋個頭都好痛呀, 都仲係好眼訓呀! 係呀, 我未講我跟邊間旅行社去旅行喎, 因為今次旅程幾開心, 所以要推介下俾大家, 就係叫做"中業旅行社"喇! 仲有呀, 我前晚入住果間"聚龍酒店", 我突然間諗起, 我個幾月之前發夢見過同當晚我住果間房架, 真係一模一樣!

再見了 --> PRINTER ! 再見喇, 冇辨法喇, "你"始終都 PRINT 唔出野!

今日都十二點令起身啦, 又係落左街行下咁, 都係冇咩特別, 夜晚就要返學, 係成個 COURSE O既最後一堂, 都有少少唔捨得架, 今晚返去係聽個 TUTOR 對 ASSIGNMENT 1 O既 COMMENT, 我果份都算係咁掛, 不過要加好多野上去, 三月八號前要交, 慘就慘在一定要用 LASER PRINTER 喎, 試問邊個會有丫, 但係又一定要用喎, 唔用 LASER PRINTER PRINT O既就唔改, 真係要諗諗計!

一二三四五六七多勞多得 --> 呢幾日我會好努力咁改好份 ASSIGNMENT, 絕對唔可以肥架!

今日一早等我亞姨同埋兩個表妹黎, 咁我就同佢地去左食麥當勞! 之後就返左屋企玩左成日! 所以而家好累呀, 不過又要上網搵下料做番份功課! 不過相信今日都寫唔到Ｄ咩!

從頭認識 --> 我要再從頭認識我份功課O既題目先!

今日對住部電腦幾粒鐘都係為左再寫過份功課, 加左好多野落去, 亦改左好多野, 不過就仲要再執下先! 大家請支持我, 因為我好要一Ｄ精神上O既支持去過呢一關, 因為呢份係我O既畢業論文, 實在係有壓力!

風扇 --> 給在暗變苦海遇溺也不哼一聲的你/妳!

今日又係落過街行左一陣, 又租左隻＜愛君如夢＞, 都幾好睇架喎! 食完晚飯都係對住部電腦改功課, 其實都唔知做成點, 又唔係好知差Ｄ咩咁! 所以幾 "CAKE" 手!

HOW I MISS YOU --> 哈哈!

今日都冇咩特別, 下晝果陣就同屋企人去左紅磡碼頭果個"春季嘉年華"睇下, 行左一陣咋! 行過吉之島見到有樽蘋果 QOO, 本來想買架, 不過又冇野送, 因為另外兩種味有野送, 唯獨是蘋果味冇野送, 所以冇買到! 仲見到一支新O既檸檬味 QOO, 不過係 1.5 公升O既, 唔知好唔好飲架呢? 夜晚返到屋企好頭痛呀, 唔知點解喎, 而家都係好頭痛呀!

戀愛大過天 --> 今日係中國O既情人節(元宵), 祝大家開開心心丫!

今日去左飲茶,. 之後就坐車出左去旺角, 因為要買 PRINTER, 終於都買到喇, 係 HP O既, 我都好滿意呀, 原來 HP Ｄ PRINTER 好Ｄ架, 因為佢盒墨係包埋個噴咀, 所以Ｄ墨就貴少少咁, 但係我以前用果 ESPON, 佢盒墨冇連噴咀, 即係由頭到尾都係用果個噴咀, 所以就壞左囉! 原來個舊 PRINTER 都用左成四年幾五年囉, 希望呢部新 PRINTER 以後多多指教, 希望"佢"以後生生性性, 我倆合作愉快啦! 另外我都自己織左條電話繩, 好靚架, 所以我今日心情好好!

黑衣人 --> 係"有耳非文"O既新歌, 好好聽!

今日去左圖書館還書呀, 不知不覺呢幾本書都借左成個幾月喇, 都係為左份 ASSIGNMENT O者! 雖然還左書, 不過份 ASSIGNMENT 都仲差少少咁, 黎緊呢幾日真係要"奸爸嗲"先得喇, 八號要交喇!

多謝 --> 今日我爸爸買左個叮噹鎖匙扣俾我, 好可愛架!