背景音樂 : 麻醉 (鳴謝好友小馬制作正 MIDI)
| 1/1/2002 |
|
新O既一年新O既希望! 我先祝大家有個好開始, 開開心心, 健健康康啦! 今朝收到個祝賀電話, 好開心呀, 亦好溫暖!
亦係因為佢我諗清楚左好多野! 今年我相信我係好開心O既, 雖然尋晚有個小插曲, 好彩冇事喇而家, 我要同我好姊妹講聲
"今年拜托你喇!"! 夜晚一如以往都係聽叱吒頒獎禮啦! 好感動呀, 好有意思, 我聽到喊, 因為好多人拎到獎之後講果番說話真係好感動!
我最愛O既 SAMMI 終於拎到叱吒樂壇女歌手金獎, 等左十年終於得到喇, 而許志安拎到叱吒樂壇男歌手銀獎,
但係佢講果番說話真係令我好感動! 作曲人陳輝揚話佢日日睇報紙只係見到人人去講論一Ｄ唔識O既人O既不是,
點解唔可以好好咁同人溝通, 佢呢番說話真係令我好感動, 佢講得好 ARM ! 而叱吒樂壇組合銀獎O既"有耳非文"(高郁斐),
我好欣賞佢, 佢真係好勇, 其實可能大家到家下都唔知佢係邊個, 不過相信有聽開 903 O既人都對佢有少少印像,
佢做O既音樂幾夠膽架, 而佢上台講果番話我亦會記住, 希望快Ｄ有唱片公司簽佢啦! 以上只係我記得O既幾個感動位!
今次呢個頒獎禮唔係頒獎禮咁簡單, 我真係有所得著! 當然我好開心"臨記"可以得到叱吒樂壇新力軍組合銀獎啦,
因為呢排先聽佢地O既歌, 好有意思, 佢地O既音樂類型叫做"SHEUCKCORE", 有機會大家留意一下丫! |
2/1/2002  |
|
今日係溫書日, 因為後晚考試喇, 我都好希望可以順利啦, 今日就溫左好耐下書架, 相信聽日係我O既努力日,
因為最後一日溫考試嘛, 亦都係我呢個學位課程O既最後一次考試, 因為下一科唔洗考試O既! 我會努力加油!
雖然只係考一晚, 不過正如你所講"就算考一晚都要努力!"! 今日睇番好多尋晚頒獎禮o既電視片段, 原來安仔果番說話都令到在場o既 SAMMI 感動落淚,
不過又難怪O既, 尋晚我都聽到眼濕濕, 今日聽"森美小儀", 有一個聽眾問個頒獎禮會唔會出 VCD , 以往咁多年睇頒獎禮,
我從來都覺得冇咁O既需要, 不過今年O既叱吒真係好值得出一個 VCD , 因為裡面有好多好有意思O既說話! 尋晚發左個怪夢呀,
大家可以去"私夢記"或者噤日記日子隔離果個咁可愛O既"訓覺 QOO"就可以睇到架喇! 原來我成年冇寫過"私夢記"喇,
今年我會努力Ｄ去記下自己發過咩夢架喇! 而亦因為呢個夢, 我作到我今年第一段歌, 我尋晚定下左今年目標喇, 我會好努力咁去做架喇! 你地又定左今年大計未呀? |
| 3/1/2002 |
|
今日都係好努力咁溫書, 聽晚考試喇, 我會好努力架喇! 落過街買野, 因為好幾日冇煮過飯, 所以都要煮番餐食!
溫書溫左幾個鐘, 都算係咁喇, 不過都要睇下聽晚份 PAPER 對我好唔好先知! 但我相信我有信心做得好! |
| 4/1/2002 |
|
今日都好似平時咁起身, 食野再溫左一陣書O既, 好早返到學校, 返到去都冇咩溫到書, 因為都唔知有咩要溫,
一如以往考試都係勁寫野, 今次考兩個鐘咋, 所以都過得好快, 寫就寫左好多野喇, Ｄ字仲好似開 PARTY 咁飛黎飛去添,
冇計啦, 因為真係勁寫字呀要, 家下隻手有少少痛添, 至於識唔識答呢? 我真係唔知呀, 真係唔知, 不過我諗合格掛!
之後返屋企前就去左買野食, 叫做賀下自己考完試啦! |
| 5/1/2002 |
|
今日十一點起身睇左一陣電視, 之後就坐車去旺角, 因為約左我亞姨飲茶呀, 行街呀咁, 之後去我舅父屋企坐左一陣,
其實都係睇下電視咁咋, 之後就出左去食埋飯再行一陣先返屋企喇! 返到黎睇到少少 TVB 轉播番叱吒頒獎禮,
一睇到 SAMMI 拎獎我又睇到眼濕濕喇! 今日天氣唔算凍但又唔熱, 不過就好乾燥, 因為我隻手乾到好痛添呀,
攪到我沖完涼要拎住成支 CREAM 黎勁搽! |
| 6/1/2002 |
|
今日冇咩特別呀, 冇出過街, 因為星期日一定好多人, 所以又係留O係屋企睇電視同埋執下房咁O既, 因為我每次考完試之後,
間房一定有番咁上下壯觀! 呢幾日都好慘呀, 因為果間話"一世唔洗月費"果間公司又有新招, 就係無論你駁線駁幾耐,
都一定上唔到網, 迫你用貴 PLAN , 幾衰呀! 我今日就係試驗一下要幾耐先駁到線, 但試過不停咁駁左六個鐘,
都仲係駁唔到, 睇黎我真係要轉過間服務好Ｄ O既公司先得, 不過相信唔太難, 因為我相信出面間間O既服務都一定俾呢間好!
我呢兩日都將Ｄ考試後遺症發揮得好好, 就係冇記性同埋傻傻下咁! 不過聽日到相信會變番一個精靈ＢＢ架喇! |
| 7/1/2002 |
|
今日真係好開心, 因為夜晚約左我兩個契姐食飯, 雖然十一月頭先見過面, 不過今晚我知道左一個好開心o既消息,
真係等左好多年喇, 好開心, 我好衷心咁祝褔你! 今晚去左食越南野呀, 我好耐冇食過喇, 以前o係九龍城返學果陣就成日食,
今晚我再去到九龍城, 真係好多野唔同左, 攪到我好似初到貴境咁! 另一件開心事亦係發生o係呢個地方, 我見到一個十一月頭見過o既好朋友,
雖然只係兩個令月冇見, 不過又真係好似好耐咁! 行左一陣啦, 之後就去左食甜品, 因為我同兩個契姐都好少咁樣傾計,
各有各忙嘛, 所以今晚好開心! |
| 8/1/2002 |
|
今日雖然表面上冇咩特別, 但係我今日心情好好, 可能真係好多野好開心啦! 收到一個令我好精神O既電話,
真係好多謝打呢個電話黎O既人, 雖然尋晚先見完, 不過真係好掛住你架O者, 可能知我者莫若你啦! 夜晚係食麥記O既,
其實先前冇諗住食架, 不過我今日好懶唔想煮, 所以就買番屋企慢慢食! |
| 9/1/2002 |
|
今日成日都O係屋企咋, 因為冇地方想去, 執下屋咁啦, 唔知係咪累得滯, 五點令果陣突然間不知不覺咁訓左,
仲訓到七點幾先起身添, 夜晚好開心呀, 因為整左鹽焗雞脾, 好耐冇食過喇! |
| 10/1/2002 |
|
今日執房呀, 因為好想執下Ｄ野, 實在太亂喇! 聽晚開始要返學喇, 真係幾好, 雖然將會幾累! 不過返下學都好O既,
聽日我諗都係執屋, 因為都真係幾多野想掉, 我呢Ｄ係病黎架, 鍾意買野亦鍾意掉野, 係咪好攪笑呢? 不過醫生話冇得醫架! |
| 11/1/2002 |
|
今日日頭冇咩特別架, 不過夜晚就要返學, 亦因為咁, 發生左一件令我覺得自己好有問題O既事, 話說我今次返學係返長沙灣O既,
因為我呢頭有兩架巴士可以去長沙灣O既, 一架就要坐大約半小時, 另一架就要成個幾鐘先得, 我就諗左好耐究竟半小時係邊架呢,
我真係今日諗左成日, 終於決定左坐其中一架巴士啦, 坐呀坐呀坐呀, 坐坐下唔多對路喎, 點解坐左成個鐘都未到架呢?
望下個手錶, 嘩, 夠鐘上堂添! 又心急又好不安咁啦, 點知我又望望下條街, 大件事, 未見過O既! 之後我發覺我自己坐左要個幾鐘先到O既巴士,
攪到我成六點十先返到課室, 好彩因為第一堂所以七點先開始上堂, 我Ｄ同學仲話覺得奇怪, 因為我冇咩遲到過,
經過今晚呢個錯處之後, 我往後返學就識坐邊架巴士喇, 因為放學坐果兩架都返到屋企架嘛, 真係衰! 尋晚聽"嘩嘩嘩打到黎",
原來日前田蕊妮O既哥哥發生左件大事, 不過我聽完, 我都好驚, 原來我地分分鐘都會無端端俾人拉架, 真係驚呀,
攪到我今日坐車都唔係好敢望街添! |
| 12/1/2002 |
|
今日日頭好多野做呀, 又要執屋又要煲糖水! 之後夜晚就要返學, 不過塞車呀, 好慘呀, 坐左架快車都要成九個字先到,
仲要行返學果陣見到隻老鼠, 好得人驚! 上堂上足三個半鐘, 我揀左功課個 TOPIC 喇, 就係 BLUETOOTH ,
不過都要聽日返學先知係做呢個 TOPIC O既邊一 PART ! 今次份功課真係好大份, 因為 TOTAL 要寫大約五千字,
仲要做一個 PRESENTATION , 我又真係有少少驚O既, 不過最後一科冇理由咁放棄, 我要努力! 今日上堂都有一個小插曲,
就因為呢件事我知道我改變左, 話說今日要交份功課, 其中一題係要寫你揀咩 TOPIC , 咁我只係寫左個題目數字,
之後個 LECTURER 同全班講話有幾個人只係寫左個數字係唔夠O既, 如果以前O既我, 我一定會好唔開心, 但係我今日冇唔開心喎,
之後我地要出去講俾 LECTURER 知最後要咩 TOPIC , 佢問我咩係 TOPIC 4 , 咁我咪講俾佢知囉! 之後我仲講左一句:
"SORRY ABOUT THAT!", 佢之後答我話:"OH, DON'T SAY THAT, BECAUSE YOU'VE DONE THE RIGHT THING, IT IS MY MISTAKE,
NO NEED TO SAY SORRY!", 聽完呢句真係完全冇哂事添呀! 所以我覺得大家唔好太睇得起自己, 同埋有時唔好諗埋一邊,
有時煩惱真係自找架, 知嘛?! |
| 13/1/2002 |
|
尋晚做功課做到成四點呀, 雖然唔多野做, 但係真係唔知答咩咁! 今朝十一點令起身仲要繼續做功課,
做完功課食左少少野又要返學喇, 不過好笑呀, 我竟然將一塊白朱古力當成牛油咁用, 因為個樣真係好似牛油,
但覺得好難食, 怪怪地咁, 後來我先知原來係白朱古力黎架, 真係激死人呀! 今日上左三個幾鐘頭堂, 其實真係好辛苦,
可能以往三年幾讀呢個課程都唔太多野做, 但呢一科真係迫你做好多野! 所以一下子適應唔到, 而之後就要做幾份大野,
希望我頂到啦! 好奇怪喎, 坐車返黎時突然諗起某一個人會唔會打俾我, 點知返到屋企, 我媽咪話佢真係搵過我喎,
呢Ｄ係咪叫做第六感呢? 夜晚出左去食呀, 好耐冇試過 LU ! 聽晚又要返學喇, 希望唔好咁大壓力啦! 夜晚睇左少少"金曲頒獎禮",
好開心安仔終於拎到男歌手金獎, 好感動呀! |
| 14/1/2002 |
|
今日食完野去左行街街, 因為要買雪櫃呀! 夜晚都要返學, 不過等車等左成半個鐘, 又遲到, 不過好彩只係少少O者!
今晚返學依然係好忙呀, 不過真係仲唔多知道做咩 TOPIC 好, 今星期五要交份 DRAFT 喇, 點算好呢? 尋晚安仔拎左男歌手金獎,
今日我都依然仲諗番尋晚安仔拎獎O既片段, 真情流露, SAMMI 仲喊得勁過安仔, 真係好開心, 希望下年都係佢地兩個拎哂啦!
YEAH!!! |
| 15/1/2002 |
|
今朝好眼訓呀, 可能天氣凍所以唔願起身啦! 都係執野啦, 之後點令鐘就落左去飲茶, 飲完之後就又返屋企喇,
不過尋晚開始發覺我個 CTI 真係完全上唔到網喎, 連貴 PLAN 都完全上唔到, 唔知佢想點呀真係, 但係我星期五交份功課要上網做 RESEARCH,
所以我打左去俾一個好朋友問佢借佢個上網 ACCOUNT 俾我用住先, 其實真係唔多好意思架, 不過我知道佢唔介意,
O係呢度要多謝佢救我一命先! 今日搵寬頻, 不過仲未搵到呀, 大家有冇好介紹呀? 而份功課我仲未決定到寫咩好,
因為我唔知邊Ｄ為之一個細 TOPIC , 我好驚做錯, 因為一錯就真係大件事, 希望今晚我Ｄ好同學可以幫一幫我啦,
其實今次呢科真係好大壓力, 真係驚架, 因為唔想畢唔到業呀, 但係呢個的確係一個好大O既挑戰, 希望會順順利利啦! |
| 16/1/2002 |
|
今日食完飯之後就去左圖書館, 因為都要借番少少書黎做功課, 死啦, 今日仲未知做咩 TOPIC 好呀, 真係好大件事呀,
再唔知就唔掂架喇, 星期五晚交, 我得番聽日做架咋! 尋晚等到兩點先拎到個上網 ACCOUNT , 不過真係好唔好意思呀,
因為佢咁夜返到去仲要攪掂我單野先至整得佢自己O既!野, 所以要同呢個哥哥講聲多謝你! |
| 17/1/2002 |
|
今日落左街飲茶, 好耐冇食過蝦餃喇! 之後返到屋企都係勁諗題目啦, 不過真係好驚呀, 聽晚交喇! 打過俾一個同學,
不過原來大家都係唔知點算好! 因為聽晚交冇理由咩都唔做架, 所以我諗到一個題目黎做住先, 不過好有可能係唔 arm 架,
不過好過咩都冇做過, 聽晚返去問下亞 SIR 先得, 希望我呢個題目可以用黎做功課同埋 PRESENTATION O既 TOPIC 啦,
其實就算得都唔多知之後可以點做, 希望順利過渡就夠喇! 尋晚聽到一句好好笑O既劇集對白, 我笑左好耐呀,
就係"伙記, 唔該凍奶茶走奶!", 你話好唔好笑呀? 我覺得幾好笑喇! |
| 18/1/2002 |
|
今日冇咩特別, 返完學, 亞 SIR 話我個題目唔太好, 因為驚我寫唔到咁多字, 所以我家下又煩緊做咩題目好,
但係好唔好彩, 黎緊呢個星期五晚就要 PRESENT 喇, 我都唔知點算好! 夜晚成十一點幾先返到屋企呀, 不過作病呀又!
個喉嚨好唔舒服呀! 個背又好痛! 我希望快Ｄ定到個題目啦, 因為真係冇咩時間做喇! |
| 19/1/2002 |
|
今日訓到十一點幾先起身呀, 因為唔知點解好眼訓, 之後就去左飲下午茶, 再之後就同我Ｄ表妹去左我屋企玩喇,
當然亦一如以往我間房係好亂, 同佢地睇左"老夫子 2001"O既ＶＣＤ, 其實我今朝 CHECK EMAIL 亞 SIR 回左我個 TOPIC ,
不過我今日都未開始做呀, 因為咁多人O係屋企點做到呢, 其實我都唔係好 SURE 個 TOPIC 可唔可以, 亦唔知可以有咩寫到,
不過黎緊個星期五晚要 PRESENT 喇, 起碼都要講五分鐘野, 仲要驚俾人問問題喎, 問左唔識答就死喇! 仲要做到好有信心咁,
信心我有冇呢? 我諗如果你叫我唱五分鐘歌就可以, PRESENT 五分鐘都可以O既, 不過你係完全會見到我係好驚囉,
我亦唔知道有冇咁多野講添呀, 諗諗下都冇咩時間添, 聽日要真真正正咁開始好努力咁做喇! |
| 20/1/2002 |
|
今日都未開始寫份功課, 只係寫低左有咩 POINTS 要寫O者, 相信如果冇意外的話, 星期五晚係可以順利咁 PRESENT O既!
夜晚去左將軍澳同舅父亞姨食飯, 打邊爐呀, 好開心! 尋晚有發到夢架, 不過又係惡夢! |
| 21/1/2002 |
|
今日同左樓上個姨姨去飲茶, 之後就返黎做功課, 不過我發覺原來幾千字好難寫架, 我都仲未係好清楚星期五晚個 PRESENT 點講好添呀,
相信五分鐘唔難講, 不過我覺得Ｄ資料好似好散咁, 我驚做得唔好呀! |
| 22/1/2002 |
|
今日又係勁寫份功課, 試講過幾次, 不過都講得唔係咁好, 都成十分鐘呀要講, 其實到家下都仲未知係咪寫果Ｄ野,
不過問過亞 SIR, 佢話自己覺得係就係喇喎! 未來幾日我都要努力Ｄ去記下講詞, 希望到時可以講得好Ｄ啦!
今日收到我個日本朋友寄左隻ＣＤ俾我呀, 係我好鍾意O既 FAYRAY 最新ＣＤ, 多謝哂! |
| 23/1/2002 |
|
今日起身一陣之後去飲茶啦, 之後就去左行左一陣, 返到屋企都成四點幾五點 LU , 睇過下份功課啦, 不過大件事,
因為我地Ｄ題目唔可以一樣, 但係我竟然發現有一個人同我做同一樣O既題目, 我點都唔改架喇, 因為冇時間改,
所以家下都唔係會點! 最衰係果晚 PRESENT 係佢先過我喎, 咁人地會錯覺覺得係我抄佢嘛, 但實際又唔係喎!
夜晚去左打邊爐呀, 食左好多野, 好開心! |
| 24/1/2002 |
|
今日冇咩大事發生, 都係預備聽晚個 PRESENTATION , 其實就唔係話好驚, 只係覺得好可能會講到唔係好咁,
因為我冇背到我要講O既野, 只係記住Ｄ POINTS 有咩講, 諗住到時會講得出掛! 希望唔好 PRESENT 得咁難睇就夠喇! |
| 25/1/2002 |
|
今日都冇咩特別事, 日頭去左飲茶啦, 之後就返屋企等夠鐘返學喇! 夜晚 PRESENT 時都好順利, 總算過左一關,
不過黎緊要交果兩份就未開始做! 今日我亞姨同我兩個表妹黎左我屋企玩呀! |
| 26/1/2002 |
|
今朝好早起身呀, 因為俾我表妹整醒左, 之後O係屋企食完野之後就同左我爸爸去銅鑼灣買野, 買左好多野呀,
最開心係我終於買左我想買左好耐好耐O既一隻ＣＤ, 就係我最愛O既 BAND - THE CRANBERRIES O既 "WAKE UP AND SMELL THE COFFEE",
好開心呀真係, 夜晚就去左將軍澳打邊爐, 的確食得好飽! 夜晚返到黎又執下野咁, 我表妹地又冇走到, 可以玩多一日!
勁歌改左做 LIVE 呀, 好睇左好多, 不過如果換番唔係趙學而做主持就更好! |
| 27/1/2002 |
|
尋晚好好訓呀, 可能因為前晚訓得唔係咁好啦, 之後就又一大班人去左飲茶, 飲完茶之後我亞姨地就走左喇,
之後我就行左一陣啦, 見到有平手提號碼 PLAN , 本來想出架, 不過Ｄ號碼的確好差, 所以冇出到囉, 遲少少等佢多Ｄ號碼揀先再出過啦! |
| 28/1/2002 |
|
今日開始寫果兩份 PAPER 喇, 不過都未正式開始寫到Ｄ咩, 因為都未知寫咩方向好! 只係去左圖書館借多左本書,
不過我真係落後喇, 原來可以打電話或者上網續借果Ｄ架喎, 我今日先知道同埋用過咋! 真係大開眼界喇! 夜晚睇『彩色世界』,
講起果個人學整 Tirumisu , 令我諗起遲Ｄ有機會食一個好特別O既 Tirumisu! |
| 29/1/2002 |
|
今日喉嚨痛呀, 之後食完晏就出左去旺角行街街, 好多人, 買左少少野啦, 本來想順便轉埋寬頻架, 不過都睇唔 ARM,
所以都仲未諗到轉邊間好! 夜晚O係屋企打邊爐, 好多野食呀! 而家就寫緊份 PAPER, 希望快Ｄ完成啦! |
| 30/1/2002 |
|
今日喉嚨唔痛喇, 不過好似作感冒咁, 希望快Ｄ好番啦! 一早起左身, 因為去屯門呀! 好忙呀今日! 首先去飲茶,
再去左我亞姨度, 再去我契媽度, 玩左成日呀, 十點幾返到屋企喇, 都係開始要做功課架喇! 同埋我今日收到個好消息,
過幾日有地方去玩 LU, 太好喇! |
| 31/1/2002 |
|
今朝起身病病地呀, 因為呢幾日都作病咁, 所以今日冇出到街, 只係o係屋企做功課, 其實都唔知做成點呀,
經已盡左力咁寫左幾千字, 不過總係有難度! |