背景音樂 : To Heart
1/7/2002 |
新一個月喇又, 亦係回歸五週年o既日子, 唔知大家有冇去慶祝一下咁呢? 我就冇喇, 因為今日勁頭痛,
而且天氣非常之熱, 所以冇出到去! 不過都有特別野發生架, 就係無意之中睇到亞視一個節目, 竟然見到亞敬喎,
仲係好 UPDATE, 只係前日O既片段段O者, 不過就錄唔到, 不過冇咩所謂啦, 因為真係無意中睇到, 應該冇咩人會知呢個節目添呀!
今日睇到一句好有意思O既說話"IT IS NOT IN OURSELVES, BUT IN OUR STARS!" (即係指唔係我地能夠主宰, 唯有聽天由命),
呢句說話令我諗起莎士比亞O既一句話"THE FAULT, DEAR BRUTUS, IS NOT IN OURSELVES, THAT WE ARE UNDERLINGS"
(呢個錯誤唔係天意註定, 而係我地一手做成), 雖然呢兩句話係好極端, 但係其實都可以形容現實生活O既我地,
因為總會有D野係覺得各安天命, 亦總有D野係我地一手做成, 不過人都總人鍾意賴個天, 係咪! |
2/7/2002 |
今朝起身當然係睇 DOMOTO BROTHERS 啦! 不過真係好憎 TVB D配音, 因為完全都唔係本身講果D內容, 亂黎O既!
之後去左飲茶, 食左真係好多好多野! 無意中睇到一個古天樂O既網頁, 睇到一番古仔同佢O既 FANS 講O既說話,
佢話:"做人係一件非常之難O既事, 而且非常覆雜! 但如果要一班人相處就更加困難, 我想大家今日可以盡量去學下包容同寬恕別人, ...
但你們要緊記 --- 要講人先要檢討自己, 做人就等如一面鏡咁, 如果你發現人地有問題, 亦即是自己有問題,
我好希望有一日可以見到大家可以團結一致!", 其實呢番說話講得好好, 所以我先寫O係呢度, 其實真係講得好好,
我都認同其實如果問題出現左O既時候, 兩方面都唔多唔少有責任, 唔可以話哂對方唔 ARM , 正如古仔話做人就好似一面鏡咁!
其實講每一句說話都要對自己負責, 而且我覺得唔應該介入人地O既事裡面, 我其實覺得"事不關己, 己不勞心"O既,
當你要去一齊做一D傷害到人O既事O既時候, 不如諗一諗, 如果你係被傷害果個人你會點! 我相信團結就係力量,
但係呢種力量應該去做一D利己利人O既事, 而唔係用黎攪對抗! 我都覺得呢番說話其實好多人都清楚知道, 只係當佢地係團結一致O既時候,
會將呢個 POINT 完完全全忘記! 呢番說話亦講出左我O既心聲! 收到嘉瑩o既 EMAIL, 其實個問題都算解決左!
只要唔再有誤會發生就行喇! |
3/7/2002 |
今朝收到一個中學同學O既電話, 傾左一陣啦, 原來唔經唔覺都好幾年冇見冇聯絡喇, 時間真係不經不覺咁流走左,
其實都係好巧合咁聯絡番呢個舊同學, 事緣係幾日前突然有人O係 ICQ ADD 我, 就係因為佢 INFO O既一句: "培道女子溫柔柔"
而令到我 ADD 左佢, 亦係因為咁, 先發覺原來可以同一D好多年冇聯絡O既朋友仔聯絡番, 係一件好奇妙O既事!
令我有衝動再搵番一D舊同學出黎傾下計咁! 都有去飲茶架, 但係今日又唔知仲咩成日都暈暈地! 唔知係咪作病呢?
收到好幾個朋友O既 EMAIL , 其實真係要講聲唔好意思呀, 因為要令到你地咁擔心我, 我冇事喇, 真係多謝大家支持我同鼓厲我,
有時識得耐唔耐真係唔係一個問題, 就好似 CATHY 咁, 我同佢識左真係唔夠一個月, 但係佢亦都會好關心我,
都會寫個 EMAIL 黎問候一下、開解一下! 真係好多謝你! |
4/7/2002 |
尋晚突然間發燒, 所以好早就訓左喇! 幸好今朝已經冇事喇! 呢幾日都唔係咁如意咁, 真係希望快D可以解決啦,
其實真係好簡單, 真係希望可以結束! (唔想講太多, 因為唔想有人再唔開心啦!), 其實我真係改變緊, 雖然你可能唔發覺,
但係的而且確我改變緊, 可能有時係我被人定左形, 同時亦冇機會去表現俾你睇我O既改變, 但願真係可以仟我安安靜靜咁生活落去,
唔想攪到成日咁唔開心, 況且因為我而令你地咁費神, 真係唔值得! |
5/7/2002 |
今日都有去飲茶, 呢幾日又真係成日去飲茶O既! 飲完茶行左一陣街啦! 不過真係實在太熱喇! 夜晚都有聽左少少《嘩嘩嘩! 打到黎》,
其實又真係講得幾 ARM 架喎! 不過好難講得出佢地係邊幾個 POINT 講得好, 不過我認同! |
6/7/2002 |
今日終於都冇去飲茶喇! 不過就出奇地用左成兩個鐘頭去寫信俾我日本個朋友! 之後就去左買野啦, 又去左交電話費喎!
真係多野做! 夜晚睇左一個叫做《幾許風雨》o既節目, 非常之感人, 其實真係應該令自己o既生活變得更加精彩,
其實當中o既主角都有好多野值得我地去學習架! |
7/7/2002 |
今朝懷住好開心o既心情一早起身睇 SUMMER SNOW, 不過美中不足就係冇字幕, 攪到我冇得原汁原味咁睇,
真係好唔鍾意配左音O既節目架, 唉 ... ... 真係有少少失望添! |
8/7/2002 |
今日都冇咩特別事發生過, 係仲有少少頭暈咁啦! |
9/7/2002 |
今朝幾早起左身呀, 之後都係好平凡咁過左一日啦! 尋晚睇到一個關於基因o既節目, 真係好有趣呀, 因為原來基因呢D咁細咁唔明顯O既野,
真係可以影響到我地好多, 唔止係我地, 甚至下幾代都會有所影響! 而且呢D影響真係可能好深遠! |
10/7/2002 |
今日好忙呀, 因為我舅父亞姨同亞婆都黎左飲茶! 飲完茶之後就去左行街街啦, 不過都係冇買到野! |
11/7/2002 |
今日飲完茶之後就去左行旺角, 好多人呀, 不過真係幾多野睇, 六點幾先坐車返屋企咋, 都好累O既一日! |
12/7/2002 |
今朝都真係好早起左身喇, 因為尋晚真係唔係咁訓得好! 食左早餐之後就同兩個表妹玩下咁啦, 之後就落左去飲下午茶,
再之後就去左行街買野, 行過一D日本潮流商店果陣, 我發覺原來 GACKET 好鬼紅架喎O係香港, 好多人覺得佢好怪,
其實我都覺得佢怪怪地啦, 因為諗唔明點解而家會有人屋企係冇電話O既, 不過佢D音樂作品又好鬼正, 同埋佢份人都好 COOL,
又好有型啦真係, 不過有時佢都幾可愛架! 另外睇到報紙傳木村拓哉同靜香有左第二胎, 雖然唔係好關我事, 但我睇到真係好希望係真架,
因為真係好開心, 一個令我好開心O既消息! |
13/7/2002 |
今日都算早醒左, 因為我表妹仔同我訓, 所以早醒左! 食完早餐之後就等我亞姨黎我屋企, 之後再去飲下午茶,
不過實在太多人喇, 真係又嘈又熱! 之後都係O係屋企同兩個表妹傾下計玩下咁啦, 其實照顧一個小朋友真係好唔容易架!
夜晚特地搵番過往咁多年所收過朋友O既信, 睇番一次之後真係好有趣, 因為有時大家會忘記左以前O既自己係點,
但係睇番以前O既信果陣, 會突然間諗起: "咦, 係喎, 果陣原來發生左一件咁O既事喎!", 其實呢一次睇信過程都記得番好多野,
例如: 原來我過往有成五個筆友架! 又原來我同佢通過信架喎! 嘩! 原來我仲收過好多祝福同埋好多溫暖架!
不過隨住時間過去, 環境O既改變, 可能會好容易忘記左友情O既可貴! 又或者其實係自己懶啦, 又唔係太主動,
所以有好多朋友都成年幾冇見 LU, 但係O係我睇信O既過程當中真係好溫暖, 突然諗番起好多好耐之前O既片段! |
14/7/2002 |
今日勁早醒左呀, 當然係因為要睇日劇啦, 從裡面我學到一樣野, "邊個都冇權去傷害任何人", 不過世界上有好多人唔明白呢個人O既基本,
O係呢個世界上真係有好多人為左自己而去做出各式各樣傷害人O既野, 例如: 有人打劫、用不當O既方法去令人難受等等,
其實真係要反省一下! 我唔敢講我冇做過, 但係起碼我明白邊個都冇呢個權力, 反而大家係有義務去愛身邊O既人,
相信人人都會唔鍾意一D人一D事物, 不過點解要排除自己唔鍾意O既人呢? 正所謂: "歧視不存在, 世界更可愛",
對嘛?! |
16/7/2002 |
今朝一早上網呀, 因為要同我表弟試下隻"眼仔"! 基於今日勁落雨O既關係, 所以冇落到街! 天氣咁差都影響左心情咁,
不過落下雨又冇咁熱喎真係! |
17/7/2002 |
今日終於都收到日語課程O既資料喇! 我估都好大機會會讀! 不過當然最好有人陪我去讀啦! 今日去左飲下午茶,
之後就去左買少少野! 夜晚唔知仲咩突然又暈暈地! 希望冇事啦! |
18/7/2002 |
今日算好早起身呀, 因為約左個好朋友去書展, 其實年年書展都係同佢一齊去架 (除左上年我要返學所以去唔到之外),
大約一點鐘到就開始行書展喇! 真係好正, 人都唔算太多O既! 買呀買呀, 行呀行呀, 就係咁不停咁行到六點到先走,
真係好開心呀, 因為D書真係平左好多, 我收穫都算幾好架! 所以真係好好好開心, 雖然行左幾個鐘冇停過,
都好累O既, 但係都好好好開心! 行完之後我地就坐電車去銅鑼灣, 行左剛剛開O既一間日本十蚊店, 實在太多野鍾意喇,
不過最後都冇買到, 因為諗住等下次去多D新貨先至買! 之後我地就去左一間餐廳食晚飯, 我地都算係咁喇,
坐左成兩個幾鐘頭, 就傾足兩個幾鐘頭, 其實都好耐冇同呢位朋友傾計喇! 朋友真係幾奇妙架真係, 雖然咁耐冇傾過計,
都有幾個月冇見, 但係一傾起上黎又真係好似日日傾住咁, 好開心、好感動, 原來大家冇見O既呢幾個月都發生左好多野,
亦都令到大家都成長左! 食完飯之後就坐車返屋企喇, 好累O既一日! |
19/7/2002 |
今日落左去飲茶呀, 之後就行下街買下野咁啦, 好開心呀, 因為買左一支靚靚唇膏, 正! 今日對腳都好累呀,
因為尋日行左幾個鐘! 其他都冇咩特別囉! |
20/7/2002 |
今日係一日好特別O既日子, 原因係因為今日係我媽媽O既生日, 所以一早就約埋我亞姨同兩個表妹仔同表弟以及佢女朋友仔去飲茶,
之後就返左屋企一陣, 再落左去行街街, 我好開心呀, 因為我今日買左一張好靚O既 POSTER ! 之後大約六點令就再約左舅父舅母同埋另一個亞姨一齊去左沙田食上海野,
真係好開心咁食左一餐飯! 之後就入左屯門一轉, 再之後先車我地返屋企! 剛剛就落大雨喎! 好彩有車唔洗整濕咋!
我兩個表妹不約而同都送左有關熊貓O既野俾我! 真係好多謝佢地呀! 今日講再見之後可能要有一段時間先可以再見到,
所以我都好珍惜今日O既時光! O係呢度我祝福佢地以後開開心心, 順順利利啦! 其實人生真係最重要係開心架咋! |
21/7/2002 |
一早就去左將軍澳飲茶, 之後就梗係行下街街咁啦, 仲見到幾隻熊貓公仔, 不過係非賣品黎o既! 之後就行左一間新開o既十蚊日本店,
買左兩盒熊貓餅餅, 之後我先知原來每盒都有一款熊貓福神公仔架! 夜晚就去左舅父舅母屋企食飯! 未夠十點先返到屋企咋! |
22/7/2002 |
今日就成家出左尖沙咀同朋友飲茶, 之後就坐船過海, 嘩! 不過今日好大浪, 架船都幾得人驚! 之後再坐電車去銅鑼灣,
當然都係行街街, 兩間日本十蚊店都有行, 不過就只係好忍手咁買左一隻熊貓公仔, 本來仲想買另外一隻架,
但係只係得番兩隻, 而果兩隻都整得唔太好! 之後就坐地鐵返左屋企附近, 再去左大家樂食飯, 原來夜晚都幾多人去大家樂食野架!! |
23/7/2002 |
今日都係不停咁訓覺, 真係好累呀, 可能係關天氣事架, 所以由兩點幾一路訓到成六點半先起身! 尋晚聽收音機,
得到一個消息, 就係我最愛O既 CRANBERRIES 會O係八月十五日黎香港開一場演唱會, 聽左之後真係開心到彈起呀,
但係隨之而黎O既係勁唔開心, 因為門票要成九百蚊呀, 如果我有工做緊我一定會去睇, 因為真係好難得! 上次我去英國時,
又睇唔到佢O既巡迴, 我真係好想好想可以親身睇一次, 因為真係會好正! 不過我相信今次都冇可能自己買飛睇 LU,
唯有希望睇下有冇奇蹟出現啦! |
24/7/2002 |
今日去左飲茶, 之後就行街! 今日都好眼訓, 所以睇睇下電視都訓著左! |
25/7/2002 |
今日同左樓上個姨姨飲茶, 之後就返屋企喇! 今日係一個大日子! 吾, 都好唔開心, 因為都唔知幾時會再見!
亦都有好多野擔心o既! 尋晚聽到一個幾得人驚o既消息呀, 就係天文學家發現左一粒叫做"2002 NT 7"O既星體,
17 年後有機會撞向地球, 其實你都咪話唔關我地事呀, 都幾得人驚架! 心水清O既你都會知道近呢幾年地球真係變左好多,
病毒多左變種啦、生態唔同左等等, 中哂世界末日O既預言! 所以大家要珍惜所有野, 同埋把握一切機會! |
26/7/2002 |
今日都算早起身, 食左少少野之後就坐車去左商台, 因為拎飛呵, 真係好開心呀拎到飛! 之後就同左個好朋友去左行旺角,
不過真係落好好好大雨呀! 一路行行行, 睇左好多野 ... ! 之後就去左食飯, 傾下計呀咁, 真係幾開心架喎!
返到屋企都十點 LU, 好累呀! |
27/7/2002 |
尋晚發左個好怪又好得人驚o既夢呀, 不過因為太得人驚所以唔寫出黎 LU ! 今日落左去行街呀, 不過都冇野 ARM 買!
其實得閒行下都好架, 唔洗一定要買野! 其他時間就攪下電腦咁啦, 不過好奇怪呀, 我始終都係得唔番某個軟件,
好唔方便添! |
28/7/2002 |
今朝好早左身, 因為要去一個好特別O既地方, 我都係第一次去架咋! 好好玩, 氣氛好好, 不過就得唔到我想要果D禮物,
有少少失望啦, 不過我信我只要有信念, 一定有朝一日我可以得到! 雖然好早返到屋企咋, 不過真係玩得好開心,
係一次好特別O既經驗! 不過亦因為咁令我唔記得左去一個地方添, 不過唔緊要啦, 我都有信念嘛! |
29/7/2002 |
今朝有個朋友打電話俾我呀, 原來都有好一段時間冇見過喇! 我仲諗緊去唔去果個約會好呢, 要認真咁諗下先!
其實係驚果晚唔得閒有野做咋, 因為我一直都係一應承左人就一定要做, 唔想因為咁樣而失信於人! 另外,
好奇怪地, 我買左張柏芝一隻舊CD, 主要係想聽D歌O者! |
30/7/2002 |
今日都係落街飲下午茶啦, 都冇咩特別事發生! 同個朋友傾左一陣電話, 都幾攪笑喎! 夜晚有個夜校同學打俾我,
原來係話我知黎緊有一個同學聚會, 其實都幾好架, 因為話哂都做左四年同學啦, 真係幾珍惜呢份友誼!
可能同學大多都係比較成熟, 所以會珍惜身邊o既人同埋每一樣野! 呢樣值得學習架! |
31/7/2002 |
今日都係落街飲下午茶啦, 之後去左銀行, 好鬼多人同埋好鬼耐! 不過今日都暈暈地, 可能真係貧血呀,
所以暈呀, 又想訓咁啦, 所以都訓左一陣! |