好容易又到月頭, 人地有工返月頭就好開心, 不過對我黎講都係冇咩特別! 今朝算早醒, 因為約左亞姨同舅父地去將軍澳飲茶, 飲完就行左一陣, 因為唔見左張單, 所以抽唔到獎添! 之後就見到任賢齊喎, 可能我早Ｄ會見到巧音架, 但係緣慳一面, 行左一陣就開始遊車河喇! 最衰冇哂Ｄ"七福神熊貓餅", 賣哂呀, 真係激死人! 遊車河就去左西貢、馬鞍山、沙田 ... ..., 當然去西貢時特別留心車牌啦, 不過冇發現! 夜晚就去左沙田食上海野, 好好味!

羅生門 --> 記唔記得咩叫羅生門事件?!

今日好早起左身, 因為有電話呀, 好擔心我張學生証呀, 希望快Ｄ收到啦, 好趕呀! 今日去左飲茶, 不過就遇到一大班好嘈O既中學生, 真係勁嘈果隻! 之後都係咁啦, 一次過睇左 ER 、 SUMMER SNOW 、 DOMOTO BROTHERS, 好正! 學好多日文同埋好攪笑! 今日其實有少少唔開心, 因為覺得自己有時真係幾冇用! 事緣係有個爸爸o既朋友打黎問我識唔識會計, 如果識就有工介紹, 但我又唔識喎, 唉, 都唔記得推左幾多份工喇, 真係冇用豬呀!

誰願放手 --> 好鍾意其中一句: "誰得到過願放手, 誰精彩過便挽留 ... ...", 好正呀Ｄ歌詞!

今日好眼訓, 唔知係咪尋晚訓得唔太好呢, 不過尋晚又係算早訓架喇喎! 真係奇怪! 所以五點幾都要訓一訓!

心肝命椗 --> 好鍾意: "無人能搶走我心肝命椗", 正!

今日同左我亞姨去飲茶, 飲完茶之後仲坐車出左去旺角行街街添! 買左一件衫呀, 本來想買番個熊貓銀包, 點知賣哂, 所以唯有等下次啦! 而家好累好眼訓添!

難道你都記不起 --> 其實人同人之間o既感情有時真係可以好脆弱, 以往任何野都可以完全忘記, 仲可以踩你一腳推你落海, 完全唔覺得係咩問題!

今朝一早起左身出街 LU, 因為約左好友 CATCAT 同埋佢細佬去玩呀, 雖然第一次見細佬呀, 但係都玩得好開心, 就好似自己做左佢家姐咁! 哈哈! 之後行街街, 買左少少野, 不過銅鑼灣真係好多人呀, 但好多地方都冇行到呀, 一路行到去灣仔, 本來想買一隻 VCD 架, 不過無喎! 好累呀今日! 今日終於買左幾本教科書喇, 但係仲差一本無貨, 激死!

從前 --> 唔可以成日諗番以前, 展望未來先係好!

今日食完午餐就坐左車去行旺角喇, 好開心呀, 因為買到隻超抵O既 SAMMI CD, 好開心呀, 不過仲係唔係太捨得買 TSUYOSHI 隻碟, 一定會有一日我捨得買O既! 不過返左黎就開始頭痛喇! 夜晚食完晚飯又落左去買野, 買左兩大包蝦條! 好正!

驚恐症 --> 人好多時都好易患上呢種驚恐症架, 咩都驚一大餐, 其實輕鬆Ｄ啦香港人!

今日冇咩特別事發生, 去行下街, 買下野, 今日買左好多野呀! 好開心呀, 因為拎到一本最新O既 SAMMI (SK II), 好靚架!

無奈那天 --> 無奈感覺係會有, 但我覺得真係要開心Ｄ, 有時要學下點令自己開心Ｄ, 亦要學識點樣 LET GO! 世界上冇永遠O既朋友亦冇永遠O既敵人, 但係我始終相信"凡事留一線, 日後好相見", 呢句係真架, 因為你唔知幾時需要別人O既幫助, 再者唔係朋友亦未必會變成敵人! 曾經有人話過敵人O既敵人就係自己O既朋友, 但係我覺得點解要辛苦自己去憎恨人呢? 放開Ｄ唔係會開心好多咩?!

今日食完午餐坐左一陣就去左街喇, 今日目的地係將軍澳, 嘩! 人係多左少少, 不過真係好多野睇呀, 幾行左兩個幾鐘都行唔哂, 好開心呀, 因為我用左一個無敵平價買到 BECOMMING SAMMI O既 POSTER, 太太太開心喇! 最衰我冇咩時間睇, 因為勁多 POSTER , 但係我又冇咩心機去慢慢搵, 希望下次再去可以少Ｄ人又可以多Ｄ時間搵! 不過去完街都係勁頭痛! 尋晚睇報紙, 知道日本 R & B 天后 -- 宇多田光就黎結婚, 真係估唔到呢, 亦好戥佢開心呀, 因為我一直都幾欣賞呢個女仔架! 感覺上佢唔同一般O既日本女仔, 可能佢係O係美國出生長大O既關係啦! 敢愛係一種好好O既表現, 因為世上有好多人每一分鐘都浪費O係唔敢表現之上, 都幾浪費架, 因為人生匆匆幾十年, 都唔知幾時會死(因為真係冇人會知道), 咁點解唔好好咁去享受生活? 享受愛情呢? 如果我真係好愛一個人我真係會講, 但好可惜呢個人仲未出現, 但我冇因為咁而唔開心, 因為我相信O係我出世之前已經註定左我呢一生係點! 我視一切所經過O既唔開心事都係磨煉, 其實做人真係要開懷Ｄ, 唔好成日因為別人而令自己唔開心, 可能幾年後你長大左, 諗番起而家其實都幾好笑, "有一天會為這首曲微笑"! 互勉之!

今天你生日 --> 係我表弟亞康O既生日, 祝佢開開心心, 生日快樂!

尋晚訓之前睇左一套好好睇O既電影 -- 《見鬼》, 其實睇之前完全都係覺得我唔會俾佢嚇到, 但係呢套戲的確令我呢個好耐都冇俾鬼片嚇過O既小熊貓為之驚嚇, 真係幾恐佈, 但係果隻恐佈又唔係話每秒都好驚好核突果種恐佈, 而係佢用一Ｄ好估唔到O既情況之下嚇你一嚇! 真係嚇到我好驚! 但呢套真係一套幾好O既電影, 拍攝手法好新, 亦好好, 所以值得推介, 不過膽小鬼就唔好睇喇! 因為我睇完尋晚都發夢呀, 睇完唔敢做好多野架, 不過我今日有撘 LIFT 同埋食叉燒, 不過都有少少餘悸! 今日去飲茶, 同埋去左行街街, 仲買左好多 VCD 添! 同埋買左一張《孤男寡女》O既 POSTER , 好靚呀! 同埋又買左未買果本教科書, 仲激氣呀, 真係好想同個店員講"今時今日咁O既服務態度係唔夠架!", 事緣係因為我俾錢O既同時間見到我有張咭可以有九折, 咁我咪即刻問佢係咪再俾埋果張咭佢啦, 點知佢態度奇差咁指住一個位話"呢度寫左話要俾錢前出示架喎!", 但係確實佢指住果度係話要買滿二百蚊先可以簽得咭, 我就答佢"你呢張 POSTER 貼黎呢度我剛剛先睇到就俾你, 呢Ｄ唔關我事!", 之後佢就好似有少少不滿咁, 但又幫我整番九折, 之後佢仲好似想話我咁! 之後我咪話"你張野貼O係呢個地方, 你係咪想人地睇到架?", 之後我就走左喇! 因為佢Ｄ態度真係勁差, 佢用咩態度對我我就用番咩態度對佢! 幾公平! 如果呢件事係我有錯的話, 咁佢仲咩要俾番九折我? 真係唔知講咩好! 夜晚就睇左《百萬富翁》, 因為有亞敬丫嘛, 都幾攪笑喎, 不過Ｄ問題真係幾深咁!

無數個明天 --> 呢首歌我尋日先第一次聽, 但係幾鍾意Ｄ歌詞, 其實真係有"無數個明天", 所以要做到最好!

今日係清潔日, 因為成間屋都清理得勁乾淨, 亦都打開左一個成半年都唔開得O既窗, 事緣係因為呢半年時間個窗外面(大廈外牆)有工程, 而呢幾日就拆左棚架, 所以可以"重見天日"喇! 不過呢兩年我窗外O既景色都變左, 因為無端端起多左幾座樓, 令到我個 VIEW 冇以前咁正, 而家拎住部相機都影唔哂成個天, 真係可惜! 三點令鐘就落左去買野, 因為近排都好多野要買! 而今晚亦有睇《百萬富翁》明星足球隊特別版, 雖然亞敬尋晚已經出左, 不過今日都有少少佢呀, 仲表靈左佢好鍾意馬呢種動物添! 而夜晚無意中聽到 TSUYOSHI O既訪問, 好開心, 係勁開心先 ARM ! 發覺我了解左佢多左! 亦發覺自己原來都識幾多日文生字架喎! 勁呀, 好愛佢呀, 哈哈!

街 --> 呢首歌好鍾意, 睇埋個ＭＶ仲鍾意, 勁正, 好感動添!

今日好大風, 大風到打風添呀, 八號風球, 其實都幾舒服架, 雖然八號風球, 但係都有去飲茶同埋行街! 反而好鍾意呢個感覺添! 不過成日都係就返學就打風落大雨咁, 希望聽晚唔好落咁大雨啦! 另外睇左子華o既《一蚊雞保鑣》, 都幾好笑架喎, 不過唔太鍾意個女主角! 今晚《一觸即發》有亞敬哥哥呀, 睇下先! 今日個電話傻哂, 攪到我差少少上唔到網添呀! 今朝仲慘連手提都用唔到! 屋企電話要成七點先用得番! 今日係 911 o既悲哀日子, 其實時間過得真係好快! 但當我呢幾日再睇番一Ｄ片段時, 我個心真係好唔舒服!

雨ソ MELODY --> 落雨真係幾好架, 可以令到自己詩意多一Ｄ!

今日終於冇打八號風球喇, 但係依然幾大風, 好舒服O既天氣! 食完野落左去行街街, 買左一隻令我好開心O既 VCD, 其實都幾無意中睇到架咋, 估唔到有呢套戲, 因為我完全未聽過有呢套戲, 而個男主角更令我覺得出奇又開心! 不過唔話俾大家知係邊個, 等你地心思思, 總之個男主角會令我諗番起好多往事, 又好開心架啦! 今晚係大日子, 因為今日係日文班O既第一堂, 抱住少少緊張O既心情, 個地址都幾難搵咁! 呢班都幾多人讀喎, 雖然今日只係教左少少野, 但係都幾有趣, 因為個亞 SIR 都幾風趣, 所以學得都好開心, 但黎緊好多功課、測驗同考試, 不過係好架! 唔迫又點會學得好呢? 我要靠日文去打我天下 (~哈哈~)! 知道亞敬有出現o係"獎門人"錄影, 其實真係幾失望, 因為冇得去睇! 少許傷心, 多多失望!!

FLOWER --> "KANAWANAI YUME WA NAINDA" <-- 沒有實現不了的夢想!

今日冇咩特別丫, 不過我係有少少野令到我o係屋企發脾氣, 真係幾嬲架呢件事, 覺得點解會係咁! 所以幾個鐘都冇出聲講到野! 好多想講但又費事講o既問題同埋 points! 唉, 唔通我真係咁難令人了解咩?!

我有權投 --> 我知大家都係想我好, 但係點解冇從我角度去諗下?!

尋日o既事已經過左去喇! 而今日本來就自己煮野食架, 點知原來冇水喎! 所以就諗到入將軍澳同舅父舅母飲茶喇! 嘩, 好抵食又好好食喎! 之後就勁去行街街喇! 不過就幾唔開心, 因為搵唔到我想要o既 POSTER ! 而且仲見到隻 BECOMING SAMMI O既特別版, 不過都預左佢會出第二版架喇! 但今次都好Ｄ, 因為只係多一隻 AVCD , 但又冇 POST CARDS 喎! 真係難取捨喇! 仲買左貼紙啦, 好多好多野! 返到黎點知我睇開O既韓劇已經就黎做完, 真係錯過左添! 今日好累呀!

人不為己天誅地滅 --> 呢首歌好正! 又講出少少現實! 不過要睇情況O既!

今日食完野睇電視啦, SUMMER SNOW 終於大結局左喇! 但係冇預期O既效果, 因為我一早上網睇左個結局, 早知唔上網睇啦, 因為冇哂驚喜添! 不過個結局都好好, 不過好唔捨得佢完! 之後去左行街, 租左幾隻碟, 夜晚就去左將軍澳食 PIZZA, 都好耐冇食過 PIZZA 喇! 食完再行左一陣將軍澳啦, 我發覺而家我成日都去將軍澳添! 但係真係好多野睇喎! 但係冇收穫, POSTER 都唔 ARM O既, VCD 又唔捨得買住! 遲Ｄ一次過掃貨嘛! 由尋晚開始我左眼 ... ... 緊係唔係見到鬼啦! (我睬!~) 係我左眼好鬼痛! 都唔知點解突然間咁樣! 今日都有少少痛, 希望快Ｄ冇事啦!

假扮的天使 --> 好多人都好鍾意扮自己成為天使, 唔會承認自己衰啦, 又唔會承認自己心地幾咁壞! 其實我覺得做"假扮的天使"不如做"真正的魔鬼", 起碼會開心Ｄ!

今日隻左眼好左少少, 但係仲係有少少痛! 依然落左街飲茶, 不過連場大雨令到都好唔方便, 又好潮濕喎! 不過天氣就好涼! 之後返屋企睇下電視咁, 但又發覺部電腦 WRITE 唔到碟, 所以用左幾個鐘去重組, HARD DISK 大嘛, 所以要用耐Ｄ時間, 幸好而家冇咩事喇! 不過就好累呀!

魔鬼愛奢侈的眼淚 --> 哈哈, 呢首歌同樣係尋日首歌O既同一隻碟(徐若瑄), 我覺得都講得幾 ARM , 好得意呀, 我覺得呢首歌係"假扮的天使"O既續集!

今日約左亞姨去飲茶! 其他冇咩特別, 不過知道左一件事令到我地都好擔心, 同埋好唔開心!

其實我很擔心 --> 你知嘛?!!

今朝一早俾電話嘈醒, 但又訓番! 落左去行街同埋買 VCD , 哈哈, 買左隻想左好耐o既 VCD , 又平喎! 但係諗下諗下, 原來我有好多 VCD/CD 都想買但又唔捨得買住! 我成日都諗, 如果我搵到野做, 相信第一個月O既人工都係去左買 VCD/CD ! 今日依然好擔心尋日果件事! 其實我地O係香港就幾被動O既, 真係想幫, 但又做唔到Ｄ咩!

回來我身邊 --> "我勇敢, 我膽怯, 我不忿", 唉!

今日食完飯就去左旺角一帶行街街, 仲行行下撞到一個同亞敬有關o既人, 但係佢果Ｄ面口, 口黑面黑咁, 都唔知Ｄ人個腦用黎做咩架! 又唔係同佢有仇, 所以我本來諗住笑住咁同佢 SAY HI! 不過而家可以慳番! 行完街之後就返第二堂O既日文, 好開心呀學得!

講一套 --> 其實我真係希望唔好講一套做又另一套! 咁樣我地好辛苦架! 不如真係好好咁諗下係咪要返黎仲好啦! 如果唔努力去爭取O既話, 咪即係冇用!

今日一早醒左, 之後去左飲茶, 飲完茶之後去左銀行同埋超級市場! 夜晚就去左行一陣街, 仲好攪笑咁去左我住果度攪o既一個中秋迎月晚會! Ｄ人唱歌好鬼死難聽呀真係! 抽獎又抽唔中, 哈哈, 下年都咪攪我!

點解你係咁 --> 有時真係好想幫你! 但係始終都要你地作左一個好肯定o既決定, 我地先可以幫到你地!

今日係中秋佳節, 首先祝各位中秋節快樂! 今日都冇咩大O既特別, 當然有去行街街啦, 仲買左隻《嫁個有錢人》 VCD 添, 係咪覺得好怪, 點解咁遲先買, 我係咁架, 好多野都覺得唔洗咁急趕住買, 你驚第時冇? 哈哈! 夜晚就去左我姨丈個家姐屋企燒野食, 好靚O既村屋呀, 果Ｄ唔知係咪真係叫村屋呢, 但係如果有一層咁樣O既樓係自己O既, 都唔錯呀! 燒到凌晨一點幾先返到屋企, 好彩燒完野食先落大雨咋! 真係夠運呀!

奇蹟 --> 係"瀧澤秀明"o既新歌, 好感人呀, 唱得幾好聽!

今日平常咁起身, 傾完長途電話, 之後食完野又落左街, 因為附近有間唱片店大大大減價, 而今日就買左一套日本恐佈片《女優靈》, 好似幾好睇咁!

RAINY DAYS --> 最緊要唔好成日落雨!

今日唔知點解覺得暈暈地, 又凍凍地咁! 可能又作病添! 今日好開心呀, 因為收到日本朋友O既信, 仲有好多野添呀, 有一隻我一直好想買O既 CD 啦, 一本雜誌啦! 我而家識讀大部份O既日文架喇, 解都識解架!

GET DOWN --> 係"今井翼"O既處男作品, 不過冇"瀧澤秀明"果首好聽!

今日好凍呀, 所以我都要著左件風褸先出去行街! 都係行左一陣咋! 之後就返黎睇 VCD ! 不過真係好鬼凍呀! 我擔心O既事都依然未攪掂! 唉, ... ...!

今天你生日 --> 今日係嘉瑩O既生日, 祝佢生日快樂啦, 都好耐冇見喇, 不過只要你開心就得啦!

今日天氣又熱番少少喎! 真係奇怪喇! 去左飲茶, 再去左行街, 不過買唔到想買o既野! 另外去左測試骨質, 原來都唔錯喎, 不過可以再好Ｄ! 所以要再注意下吸收鈣質! 尋晚睇劇集, 覺得有一句好到 POINT 架! "呢個世界好多野都係假架! 錯, 就錯在我對人太過真!", 其實我覺得係架, 好多時人夾人緣係好 ARM 架! 我同你唔夾唔代表大家係衰人, 呢個世界好多人好多時都係為左自己而不擇手段, 對人太真真係幾危險, 因為呢種天真O既心態, 可能會造成一Ｄ惡果, 不過諗深一層對人好係錯架咩? 就算係算, 都係因為對一Ｄ傷害自己O既人好先係錯! 仲要係大錯特錯! 對自己好Ｄ, 對人真Ｄ, 咁唔好咩? 如果對方唔受落唔鍾意, 就算啦, 對自己再好Ｄ再認真Ｄ, 令自己開心Ｄ好過Ｄ! 就夠啦!

街 --> 嘩! 呢首歌真係好感人呀!

今朝都算正常時間起身, 之後坐巴士入左將軍澳同舅父舅母同埋亞姨飲茶, 傾左好耐, 再行下街咁, 就坐地鐵去尖沙咀返學, 不過返學前去左行街街, 人真係幾多喎! 今堂係第三堂, 兩個半小時真係太短, 因為好開心! 返黎原來家人等埋我先食飯, 真係感動喇!

煩 --> 今日係咁, 聽日又唔同, 拿你地沒辦法呀真係, 真真正正咁決定啦!

今日冇咩特別事呀, 係五點幾落左去, 本來諗住又去唱片店掃貨, 點知關門大吉左 LU ! 我仲諗住佢開埋呢個星期日添, 點知原來已經成為過去式喇! 真係可惜喇, 因為真係好多野想買! 今日買左個架呀, 因為要換下屋企O既擺設!

好 --> 我覺得近排呢首歌都 OK , "好, 多得你迫我好!", 不過真係唔係太喜歡佢唱Ｄ歌!

今日亦係去左將軍澳飲下午茶! 行左好耐呀, 仲好開心咁買左幾 SET 信紙, 好靚架! 之後返左屋企附近都行左一陣! 其他冇咩特別事喇! 本來今晚就有地方去架, 不過因為其中一個超級好朋友好忙, 所以改左期! 不過佢都忙得好開心O既! 開心野嘛!

命中註定 --> 我相信一切都已經註定左! 或者經歷左咁多煩野, 只係想我更加珍惜身邊O既野, 包括家庭同埋朋友, 有一Ｄ真係會知道呢一生呢一世都會好好朋友, 真係好感激佢地咁真心咁對我!

今日食完午餐就落左去行街, 因為有野要買嘛! 都行左一陣啦! 最攪笑就係去左睇中醫, 個中醫仲話我身體健康唔洗食藥! 返左屋企一陣之後, 就開始頭痛喇, 所以訓左一陣, 而家都仲有少少頭痛!

變 --> 好多野都會變, 而且我地亦係控制唔到!

今日亦去左將軍澳同舅父舅母同亞姨飲茶, 飲完茶之後就坐地鐵去旺角, 因為約左好朋友 CATCAT 去街街! 今日都可算係 LUCKY DAY ! 首先免費地鐵去到旺角啦! 之後買熊貓貼紙, 個老闆仲送左一張熊貓貼紙俾我添呀, 真係多謝哂呀! 我仲用好平好抵O既價錢買到一隻全新 SAMMI CD ! 仲買到隻想搵左好耐O既 VCD , 實在太太太開心喇! 晚餐雖然係麥記, 不過只要同好朋友一齊食, 咩都冇所謂啦! 食完飯之後又行街街, 十點先返到屋企, 雖然好累, 但係真係好開心! 當然仲要多謝 CATCAT 幫我一個咁大O既忙, 等我可以得到一Ｄ我 DOWNLOAD 唔到O既資料! 多謝哂!

開心最緊要 --> "一生裡其實有幾多次願你確係真歡笑, 願你莫忙記, 開心確係最緊要"!