今朝本來預左九點半起身架, 點知十點先醒喎, 拿拿聲攪掂哂Ｄ野出門口啦, 連巴士都唔坐, 坐小巴去旺角坐巴士入屯門, 十二點半就到左我亞姨屋企喇! 可能大家會問點解我成日咁遠都去屯門, 丟我答你啦, 今次入去O既目的係拎番個火牛, 同埋呢, 我入去食到我亞姨煮O既飯, 好過成日食自己煮果Ｄ嘛! 又探下我表妹佢地, 仲可以陪下我亞姨傾下計咁, 一舉幾得, 坐左一陣就去飲下午茶喇! 飲完茶之後有奇遇呀, 就係我同我兩個表妹等緊我買緊"送"O既亞姨果陣, 果度有某間保險公司擺緊個填色比賽攤位, 咁有一個外型不錯O既男仔(職員)行過黎, 同我三歲果個表妹喎, 呢位哥哥俾左張填色畫俾我表妹, 咁又問佢幾多歲, 我表妹竟然話自己五歲喎, 之後呢位哥哥主要係問我野, 但係又完全唔係保險問題喎, 係問我係咪佢家姐呀, 住邊度呀, 類似O既問題啦, 唔知係咪我魅力迫人呢?(講笑咋! 唔洗嘔!), 傾左一陣我地就走左喇, 之後都係O係屋企同我表妹玩啦, 嘩! 同細路玩真係好累架, 我每一次對住我表妹我都好眼訓架, 話咁快就到左晚飯時間喇! 其實都有少少唔開心, 因為我亞姨硬係同我表弟唔係好 ARM 咁, 我好明白佢地兩方面O既諗法, 我夾左O係中間, 真係左右做人難, 食完飯之後睇左少少＜香港睇真Ｄ＞, 我表弟就陪我落去等巴士喇, 我就用左呢十幾分鐘O既時間去同佢傾下計啦, 其實我都係盡力架咋, 因為我講左佢地唔做, 都冇方法架! 我表弟係一個好想有私人空間O既人, 但係好多時我亞姨就係唔係太明白呢樣野, 可能係因為對落仲有兩個妹, 我亞姨受O既壓力其實都有番咁上下, 而我表弟真係好忙O既, 就係咁, 佢地都唔願意去溝通, 唔會講自己O既感受, 就係咁樣, 誤會可能每日加深, 就好似我以前同我媽咪O既關係一樣, 但係我學會左溝通, 用左好多時間去同佢傾自己O既感受, 就係咁, 我同我媽咪O既關係真係好左好多, 起碼唔會日日嘈, 我好希望我亞姨同表弟可以好似我地咁, 拋開自己O既身份, 去為對方真真正正咁諗下!
希望神會幫佢地啦!

今日完成左我 PRESENTATION O既講詞喇, 其實都好驚架, 因為唔知係咪少野講得滯, 今日有人話我日日O既日記都好多野講, 其實我都覺, 唔知點解可以講到咁鬼死多野! 真係辛苦大家喇! 唔好意思先! 仲有就係我今日落左去超級市場買可樂呀, 我中左可樂毒, 冇得飲會死架! 另外大家聽晚要睇＜勁歌金曲＞呀, 因為有我O既愛人, 邊個? 咪係太極囉! 靚人加靚歌, 邊可以唔睇喎!
尋晚發夢見到佢添!

今朝俾一個人o既電話嘈醒, 痴線架佢, 連續打左五次黎, 我都講左佢知打錯架啦, 佢仲不停咁打多四次黎喎, 你話佢係咪有病丫? 好唔明白佢點解可以打錯咁多次! 之後我個朋友打黎約我聽日去唱Ｋ, 好丫, 真係好喇有得玩! 不過仲未約實架, 夜Ｄ先知; 諗起星期五要 PRESENT 都驚驚地啦, 驚唔知自己 UP 乜嘛! 不過應該會順利O既! 今日有機會睇番一套好舊O既電影, 就係＜喝采＞, 可能大家都未聽過添呀, 不過我發現左有＜太極＞架喎, 雖然只係背景, 但係都好過冇啦!
今晚要睇＜勁歌＞呀!

今日約左幾個朋友去玩呀, 不過成五點幾先出去, 因為要等一個朋友放學嘛, 首先去左食野, 都係食麥記咋, 抵食丫嘛! 之後去左影貼紙相, 亦由於未經當時人同意, 所以未能俾大家欣賞三個靚女o既靚相! 影完之後就去左唱Ｋ喇! 幾抵唱架, 我地去左 NEWAY, 每人五十幾蚊任唱, 仲要有兩杯野飲, 我地仲有九折添! 非常抵唱! 唱到十點半就又去左影貼紙相, 其實只係影左兩左咋今日! 好靚架! 不過今日o既代價就係把聲沙哂!
我今日鍾意左唱果首＜愛情大魔咒＞呀!

尋晚失眠呀, 未夠一點開始訓, 點知成四點先訓得著喎, 今朝九點幾就醒左訓唔番喇! 唔知點解, 不過今日勁唔舒服呀, 可能係作病啦! 尋晚又玩左成日!!! 今日準時返學, 不過佢就唔準時喇! 成八點先返, 可能係成組人攪 PRESENTATION Ｄ野啦, 星期五就到我果組 PRESENTATION 喇! 我今日好水皮呀, 只係聽 BEYOND O既＜情人＞同埋＜海闊天空＞各一次, 我就喊到收唔到聲喇! 話分兩頭, 我尋晚發夢見到亞敬之餘仲見到佢喎!
我發覺尋日影O既其中一張貼紙相, 係透明底架喎!

今日訓到十一點幾, 因為尋晚太早訓, 所以越訓越累囉! 之後勁睇電視呀, 因為唔想自己成日訓住個 PRESENTATION, 好大壓力嘛, 目前為止, 我今日練習左三次, 其實都係三分鐘講哂我要講O既野, 希望聽日正式果陣唔會打 "CAKE" 啦! 尋日又好開心呀, ＜開心.COM＞又講左我段野喇! 仲問到梁榮忠一個問題添呀!
尋日我先知道原來我無 LALA 同個網友做左媒喎!

今朝勁早醒左喎, 因為樓上好嘈呀, 一早八點幾開始嘈到下晝成四點幾, 簡直係折磨! 今日都冇咩練過 PRESENTATION , 因為太大壓力唔好嘛! 五點半又落樓等巴士返學喇! 點知送車尾喎, 我發覺原來坐遲一班車都唔會遲到架喎, 之後就係我O既 PRESENTATION 喇! 都好順利, MISS 話我聲線夠大喎, 俾人讚真係唔係咁好意思! 當然啦, 返學又見到佢, 真係好喇! 不過失敗啦, 仲未正式講到一句野! 放左學我個朋友打黎話O係學校附近, 所以一齊去左食麥記! 仲有呀, 我今日睇左＜生命"渣" FIT 人＞呀, 好好好睇呀, 我喊左幾次, 同時間今日報紙頭條, 有個中五學生跳樓自殺, 令我好感慨, 我好唔明白點解Ｄ人有勇氣去自殺而冇勇氣去面對, 點解而家Ｄ小朋友都會諗到咁絕望, 我真係好唔開心!
我有少少想睇＜楓華再現演唱會＞添!

今日訓到點幾呀, 因為真係太大壓力, 所以要訓餐飽o既! 午餐都係食麵咋, 費事諗嘛! 之後就洗地執野啦, 再睇左一個講喬宏叔一生o既節目, 好感人呀! 之後落左街買野食啦, 買左我最愛o既威化餅呀! 之後我有機會再番睇＜上帝, 請你給我多一點時間＞o既尾果幾集, 一如以往, 我又喊到收唔到聲, 實在太感人喇! 香港就係缺少左呢Ｄ發人心醒O既作品, 所以我而家完全冇睇劇集! 因為太不知所謂喇!
都唔知點解呢幾日附近有好多狗聲!

今日好左喇, 不過睇電視睇到成點幾先煮野食, 都係食麵咋, 費事諗呀! 之後就又係睇電視啦, 睇左一陣再唱左一陣卡拉ＯＫ, 再聽左一陣ＣＤ, 我舅父就黎左我屋企一陣, 再一齊去左我婆婆屋企食飯! 因為婆婆煮左飯仲有湯添, 所以咪去食下飯囉, 食完飯都係坐左一陣就返屋企喇! 因為我要幫我舅父打求職信, 打到十點半到啦, 就完成左喇! 仲有仲有, 我今日聽到首新歌呀, 係一個新人唱O既, 不過唔係好知個歌名同個歌手名喎, 我只係知道首歌係亞敬作架! 一個字! ＜正＞!
天氣凍喇! 大家小心凍親喎!

今日好好好激氣呀, 我得到一個教訓, 就係唔好再心軟幫人做野! 尋晚辛辛苦苦咁幫我舅父打求職信, 佢一早打黎話有野改, 好! 我都幫佢改, 仲要係改到差唔到做過哂! 咁都算喇! 我同佢講, 我未來呢幾日都有野做, 可能一時間唔能夠幫佢 FAX 去(因為有時佢拿起身要 FAX, 我真係唔肯定), 我唔想因為我去左街, 而令到佢 FAX 唔到去搵工, 所以我同佢講出原因, 點知痴哂線! 佢話: "計番錢囉! 我估唔到你幫我做少少野都咁多野講, 咁耐以黎, 我有邊次要你俾番錢我先? 而家做少少野你咁講野!", 我再同佢解釋, 我真係好多野做, 無幾耐又要考試, 點知得黎O既只係一Ｄ怪你O既說話, 好激氣囉! 又話我唔幫佢, 講真一句丫, 我係唔幫佢O既, 就唔會又再幫佢打過啦, 今次唔係第一次架喇! 呢幾年黎, 我一直係咁幫佢, 到頭來係咁, 我真係冇野好講, 佢絕時我都唯有係咁絕, 所以我叫佢俾佢朋友O既 EMAIL ADDRESS 我, 我 SEND 番個 FILE 俾佢朋友, 以後唔洗煩我! 我好唔想做到咁架! 話哂都叫做係我舅父, 但係我好唔明白點解佢要咁講野, 我份人好老實講, 如果我係有心唔幫你O既, 根本我唔會再幫你打信, 亦唔會再咁幫你! 況且我尋晚已經同佢講左話: "不如 COPY 隻 FLOPPY 俾你, 等你拿起手要用果陣可以去你朋友度 PRINT ", 係佢自己話唔洗O既, 今日又咁講, 講衰Ｄ一句, 搵唔搵到工關我咩事O者, 唔係俾面你, 我根本就唔會再理你任何野! 激到我收左線之後, 我亞姨打黎, 我控制唔到自己勁喊, 我勁想同我舅父講: "如果你係咁需要搵工O既, 就唔會咁多年咩都冇得做啦!", 係就係衰Ｄ架喇! 但係我一直係覺得人地點對我, 我亦會點對人, 不過算啦, 可能我表達有Ｄ問題啦, 我唔會再為佢Ｄ咩架喇! 因為我覺得我講得冇錯就算喇! 所以話呢, 唔好成日咁心軟幫人! 另外呢, 尋晚好感動呀, 事緣係因為ＫＡＺＵ對我太好喇! 雖然識左唔係好耐(年幾啦!), 其實我而家係用緊佢個 ACCOUNT 上網架, 因為我冇錢交 PNET , 前排佢俾左個新O既 ACCOUNT 我用, 尋晚傾開先知, 原來佢申請呢個 ACCOUNT 係俾我用架喎, 以前果個係好多人知黎用架嘛! 而佢自己又唔係用我用緊果個架喎, 真係好感動! 估唔到佢對我咁鬼好! 不過大家唔好誤會, 我地只係好朋友O者!
仲有要多謝二家姐, 因為我尋晚麻煩左佢一Ｄ野!

今日訓到十二點半有電話打黎我先醒喎, 因為我尋晚勁頭痛, 所以食左粒止痛藥, 而呢粒藥係會令人勁眼訓o既, 所以真係訓到唔識醒! 之後我又自己煮下野食咁啦, 本來約左兩個朋友去唱Ｋ架, 不過其中一個朋友今日對眼好辛苦, 唔知發生咩事, 所以就取消左喇! 都唔知幾時再有咁O既機會去玩喇! 因為諗住勁唱架嘛, 不過冇計啦, 唯有靜心等待機會! 聽晚要返學喎, 不過都好似冇咩野咁, 完全唔係好覺得要返學咁! 可能係因為完成左自己O既功課, 只係返學聽少少書咁, 當然又會見到佢啦! 壞消息呀, 我噤錯制, 冇左我舅父份求職信同埋我Ｄ功課, 雖然份功課我交左, 但係我自己冇 BACKUP 呀!
星期四約左二家姐呀!