今朝都依然係九點鐘起身返工, 其實呢份工幾開心架, 尤其係當自己設計左一Ｄ電話繩O既款式, 有客人話想照番果個款整, 滿足感真係好大架, 當我地整好左之後, 有Ｄ客人會同我地講句："嘩, 真係好靚呀!", 果一刻真係好開心架! 總括黎講大部份O既客人係好好人架, 今日仲有一個伯伯整完一條電話繩之後俾利是我地喎, 果一刻真係有少少唔好意思架, 不過佢話一定要收, 因為要多謝我地幫佢整左條咁靚O既電話繩, 等佢可以送俾佢個女喎! 我地就用左伯伯呢封利是去買左兩個叮噹公仔整O係自己條電話繩度, 雖然只係做左三日, 我都發覺我大膽左喎, 起碼同唔識O既人講野都順左好多, 不過我而家驚三月頭 PRESENTATION 果陣, 會講番開工果陣講O既說話 (隨便睇丫, 手工全免喎!), 如果到時係咁就攪笑喇! 因為我第一日做完坐巴士返屋企, 我都差Ｄ同坐我隔離而唔識O既人講："隨便坐丫!", 好彩冇講到O者, 如果唔係真係嚇死人呀! 不過總括黎講, 真係好開心架, 因為有好多人真係好好人, 好似識左好耐咁, 可以傾好多野咁, 希望往後都順順利利啦! 但係今日都收到一個唔好O既消息, 家下我地幾個都幫緊亞妹諗方法解決!
今日出左第一期糧喇, 所以好開心!

今朝起身好似病病地咁, 好在都起到身返工, 亦都準時返到工, 不過慘就慘在檔口幾凍架喎, 因為商場有一個門壞左, 所以攪到好大風! 今日都幾多客喎, 大部份係好好人O既, 不過我都遇到幾個好寸同埋好冇禮貌O既客人, 不過冇所謂啦, 顧客點唔好都冇所謂, 因為都係對佢幾分鐘O者, 冇謂激親自己嘛! 聽日開始返大埔喇, 大家得閒去幫襯下啦!
天氣唔好咁凍啦!

今朝依然係一早起身番工, 不過一起身就知我終於病左喇, 以我經驗所知應該係感冒, 可能前幾朝返工凍親掛, 因為嘉瑩妹妹O既病徵都係同我一模一樣, 原來由我屋企番大埔都只係四十分鐘唔洗喎, 都算叫做快架喇! 今日冇咩生意喎, 唔知點解會咁O既, 不過中途我地走左出去一陣, 又係因為去見亞敬囉, 好彩都見左佢一見啦! 不過我發覺佢瘦左好多喎! 之後就又返番工喇, 其實都算係幾淡囉, 本來諗住九點半收架, 點知想收果陣又究然間勁多人喎, 所以最後都收十點半, 最後成十一點幾先返到屋企呀, 冇計啦, 工作係一定辛苦架喇!
快Ｄ病好啦, 家下個鼻好塞呀!

難得一日放假, 加上又病左, 所以一覺訓到十二點幾先起身食野, 之後就食左藥, 再執左幾日後返學O既 NOTES, 冇幾耐之後, 可能藥力發作啦, 所以都訓左, 訓到七點半起身睇"獎門人", 之後又食左野, 又食左藥, 家下好好多喇, 而家Ｄ天氣又凍凍地, 又朝濕咁, 有時又落微微雨喎, 再加上病菌週圍都有, 所以病左囉, 我希望聽日冇事啦, 因為今日都好過今朝起身架喇, 我希望快Ｄ好番!
天氣再好Ｄ就好喇!

今朝好準時醒左呀, 可能係尋晚好早訓啦, 亦都如常咁返大埔, 今日好順利, 不過冇咩生意就係真O既, 之後大約三點果陣就去左"哈迪斯"買下午茶, 實在太抵食喇, 十二蚊(包括: 中汽水, 芝士飽同埋薯條), 本來今日收六點O既, 不過因為下一更O既朋友有Ｄ緊要事, 而我個 PARTNER 又趕住返學喎, 咁所以就由我一個人支持左差唔多一個半鐘頭, 其實都冇咩特別O既, 我都掂架! 不過今日都係有人整完哂之後話貴而唔要條電話繩O既, 不過公司規舉係要收番繩錢O既, 不過都幾唔開心架, 因為果個人好多要求架, 我果兩條電話繩足足串左成三四次佢先話ＯＫ, 點之又話唔要喎, 冇計啦!
今日好番好多喇!

唔知係咪習慣左返工呢, 所以今日放假都九點幾自動醒左, 不過最後都訓到十一點起身, 之後就落左街買野, 冇計啦, 一定要買番Ｄ野食咁, 唔知點解張信用咭用唔到呢, 不過次次都係惠康先用唔到咋喎, 真係衰! 今日生活都冇咩特別, 又係可能食左藥, 所以無端端O係梳化訓著左! 夜晚食完飯想錄下ＣＤ咁啦, 點知唔知點解整唔到喎, 我唔知係Ｄ MP3 問題定係Ｄ碟有問題呢? 仲諗住聽日返工聽添, 家下計劃要延遲喇!
返左一星期工之後我發覺我肥左五磅呀!

今日係要返工O既, 等車等左成兩個字先有車黎, 之後先發覺原來我亞妹O係我之後果架車喎, 真係攪笑喇! 夜晚係要返學O既, 明明記得係返太古架嘛, 點知轉左兩程車去到先發覺原來係返尖沙咀喎, 攪到我又要坐十幾蚊地鐵去尖沙咀, 仲要返到去尖沙咀原來係自己上網搵料做 PRESENTATION 喎, 個亞 SIR 又好唔掂, 我懷擬佢連自己教緊邊科都唔知, 呢個亞 SIR 令到我地知道原來 CHAN 係姓"殘", 真係唔得佢死呀! 身為中國人連 CHAN 咁基本都唔識讀! 所以今日八點半到就走左喇, 因為都係要返屋企搵資料先做到個 PRESENTATION , 其實我都幾驚架, 因為 PRESENT 果個題目我完全唔知係咩黎, 大約知少少咁啦, 不過好在我果組有一個人係做緊呢類O既工, 所以佢話佢俾料, 做完個 PRESENTATION 就算喎, 唔洗話有咩特別野咁, 不過每人講五分鐘, 真係幾驚架, 我覺得我講唔到咁多, 上次 PRESENTATION 我一個人講左成十分鐘, 我到而家都好佩服自己架, 因為有咩可能講到咁多野丫! 三月十六號之前又要交份 MAJOR ASSIGNMENT 喇, 亦都搵左少少料啦, 不過仲未知點寫份 REPORT 好!
點解我今日會返錯學??????

尋晚同一個好朋友傾電話, 不過一路傾一路幾唔開心, 因為佢受太大傷害喇! 但係佢又當局者迷, 不過希望佢快Ｄ醒啦! 今朝十點鐘起身之後就入左屯門, 飲完茶就去左睇醫生, 我終於都睇左醫生喇, 不過Ｄ藥令到我好眼訓, 夜晚十點未夠就返到屋企喇, 不過O係架巴士果陣我差Ｄ訓著, 不過好彩冇訓著, 因為太危險喇!
聽朝又要返工喇, 希望我唔會唔知醒啦!

今日我好早醒左喇, 可能係實在太好訓啦! 好準時返到工, 今日都唔係太多生意, 希望日後會好Ｄ啦! 坐車返屋企果陣又係好眼訓喎, 冇理由今朝食左一次藥到六點幾仲眼訓架!
唔知點解成日唔見哂Ｄ郵票O既?!

尋晚食左藥一覺訓到今朝, 之後就返工喇! 呢種生活其實都唔錯架, 份工又冇咩野做咁! 不過就睇到一Ｄ幾奇怪O既人, 可以好唔講理由O既, 不過冇咩所謂啦, 又唔係對佢地成世! 夜晚本來收九點架, 不過次次都係一想收檔就勁多客人, 所以十點三先收工, 好彩一程車就返到屋企O者!
我今日食左好多野添!

今日休假一天, 不過都係九點醒左, 可能習慣左呢個時間起身掛! 上過網搵資料做 PRESENTATION , 不過好可惜, 係一Ｄ都搵唔到O既, 所以就搵資料做 ASSIGNMENT 喇, 好彩都有少少, 不過未足夠我開始做呢份 ASSIGNMENT , 所以唯有過幾日夠資料先開始做啦! 收到一個 ICQ O既 MESSAGE , 睇完之後體會到人生O既矛盾, 我明白學業重要, 不過承諾同樣重要, 如果我一個人有能力做到就冇咁煩惱啦, 我夾左O係中間, 唔想我O既朋友難做, 但同時我又要做到我應承過O既野, 所以我好希望大家都可以守承諾啦, 雖然週圍有好多因素影響, 不過我唔想因為咁樣而影響到大家之間O既友誼, 各有所難, 希望互相都體諒到對方, 唔好只係諗自己, 要為別人著想一下!
好眼訓呀, 所以我有訓到晏覺!

尋晚好早訓左, 今朝好早醒左返工, 不過等車等左好耐, 所以攪到我遲左幾分鐘! 不過都好順利, 不過中途嘉瑩妹妹唔舒服喎, 唔知係咪食錯野, 希望佢冇事啦! 返到屋企, 好氣結呀, 部錄影機傻傻地, 只係錄到"美麗人生"咋喎, 其他全部錄唔到, 真激死人呀, 又冇較錯時間, 但係唔知點解冇錄到!
冇咩特別添!

今日休息, 先前諗住同ＫＡＺＵ食晏架, 點知佢冇打到黎喎, 所以攪到我冇街街去添, 之後亞妹打過黎, 問我四月得唔得閒返工, 不過我的確唔知到時忙唔忙, 所以都唔敢應承佢住, 只係答應佢做到三月十日先, 你知啦, 雖然斯斯做野好有計劃, 不過往往Ｄ計劃唔會多過一個月, 所以四月果陣都唔知咩事啦, 所以要到時先知, 希望亞妹唔好介意啦, 因為我真係唔想應承左你之後有咩改變, 我真係唔想影響到你架, 希望你明白啦! 本來諗住今日做 PRESENTATION 架, 不過肚痛左成日, 所以亦都訓左成日, 好彩今日唔洗返工咋, 如果唔係都唔知點算呀!
聽日情人節喇, 冇人約添!

今朝都好準時起到身返工, 好準時咁返到去啦, 情人節都算幾好生意啦, 好開心添! 不過隔離檔果個人突然唔見左個手提喎, 一定係俾人"撻"左, 因為果度都試過幾次有人"撻"野, 所以我地不嬲好小心自己Ｄ財物, 不過我同嘉瑩明明見住佢果檔野冇人經過過架喎, 但係真係好快唔見左個手提, 唔知點解咁快冇左囉, 佢真係幾黑仔! 今日收六點, 就返到屋企果陣收到個朋友電話, 本來約去食飯架, 最衰佢O係旺角我又就返到屋企啦, 如果唔係情人節就唔洗一個人過啦!
情人節快樂呀!

今朝都係差唔多時間起身啦, 今日係返九龍城o既, 好攪笑喎, 等緊車果陣, ＫＡＺＵ打俾我話O係附近喎, 所以就等埋佢一齊囉, 不過好慘呀, 等唔到車, 攪到要坐的士返工, 要佢俾的士錢真係過意唔去喇! 最衰佢趕住返屋企啦, 因為我諗住請佢食野架, 不過一定有大把機會O既, 等我放假果日再約過啦! 今日都幾悶架, 因為唔係太多人行! 我今日又收到消息尋日檔口隔離果檔又有人唔見手提呀, 所以你都咪話唔驚呀, 所以以後會更加小心自己O既野! 希望果個成日偷野O既人, 會有應得O既報應啦!
原來成年幾兩年冇見過ＫＡＺＵ喇喎!

好耐冇寫過"私夢記"喇! 今朝真係幾忙架, 好準時咁返到大埔開工, 點知收到亞妹電話, 話有緊要事要我去一去九龍城, 所以又坐車去左九龍城喇, 去到成點幾兩點先開始返大埔, 本來係收六點架, 不過又攪到收六點半, 我今日仲聽到一件驚險O既事, 係關於尋日偷電話O既過程, 係隔離檔果個人話我知架, 不過真係好驚呀佢, 佢一路講番一路想喊咁, 不過同佢地都好好傾, 因為次次返大埔都見住佢地O既, 成日幾個鐘, 大家又差唔多年紀喎, 所以得閒咪傾下計囉!
個 PRESENTATION 仲未攪掂添!

一個平凡O既星期六, 發生左好多不平凡O既事, 今日我返九龍城喎, 人唔算太多, 一直到下晝五點令啦, ＫＡＺＵ又好好咁黎探我喎, 真係不枉我送左條電話繩俾佢O既, 雖然佢好快走左喇, 不過佢真係好好人喎, 因為佢勁趕時間都專登黎一黎探我, 真係多得他呢! 佢走左冇幾耐, 仲攪笑, 我串緊俾個客果陣, 突然見到我兩個契姐喎, 果一刻真係勁開心架, 因為都有一段時間冇見喇, 雖然只係傾左一陣, 不過真係好開心, 可能見番老朋友, 感覺真係好, 我地仲約左下星期食飯添! 不過都發生左一件唔開心O既事, 可能個人一忙就會唔太理性, 差Ｄ同嘉瑩妹妹鬧大交! 大家雖然冇鬧交, 不過都有一排冇講過野, 情況幾怪架, 好彩而家冇事, 希望佢都唔好介意啦!
今日唔小心跌左個手提落地下呀, 家下個手電傻傻地呀!

今日休息日, 想搵料做 PRESENTATION 不過都係空手而回! 之後我舅父黎左我屋企, 夜晚仲請我食飯添! 天氣又好似熱左喎, 真係好喇, 因為太凍又真係好辛苦!
我發覺家下朝早一到九點就會自己醒架喇, 放假都唔例外!

今朝起身就成身都痛喎, 可能尋晚太好訓冇咩點郁過, 所以幾痛! 今日都幾忙碌架, 因為又係返到去大埔之後, 又要去九龍城廣場交鎖匙俾人! 其實今日都唔錯O既, 除左有少少頭痛之外! 其實我都發覺大埔交通幾方便架喎, 好多地方都有巴士去到, 所以都係一個幾好O既地方!
聽日放假呀, 約左兩個家姐去街街!

今朝好難得訓到十二點鐘, 因為難得一日放假! 起身之後係做左資料搜集, 用黎做 PRESENTATION , 都搵到少少啦, 不過都係搵到少少咋, 都唔係太合用添! 夜晚就去左九龍城同兩個家姐唱Ｋ, 之前仲見到亞妹添, 傾左一陣啦, 夜晚十點令就返到屋企喇!
要恭喜ＫＡＺＵ搵到工!

今朝九點鐘鬧鐘響之後竟然訓番喎, 好彩都冇遲出門口, 不過坐巴士返工竟然遇著大磡村失火, 令到我架車有二十分鐘係冇郁過O既, 好彩都好準時返到去! 放左工之後都去左一轉九龍城! 夜晚有個朋友打黎同我傾左好耐電話, 都係傾下近況, 同埋睇下幾時約出黎食下飯!
希望我份 PRESENTATION 同埋 ASSIGNMENT 快Ｄ攪掂啦!

今朝好早醒左, 不過唔知點解又咳咳地喎! 之後早左去到等巴士, 好驚呀, 我竟然用左半個鐘就去到大埔喇, 平時要九個字架, 個司機成日都衝紅燈添呀! 返工過程都幾順利, 不過隔離賣飾物果檔果個人就好煩, 因為佢成日都未停過講野, 仲要勁同Ｄ客講話冇賺Ｄ客錢喎, 做生意冇錢賺? 我相信唔係太可能掛! 最煩O既係佢不停咁問我地賺幾多, 又問點解成日唔見我地, 又問好多公司內部O既問題, 相信當一個人無時無刻咁望住你, 又無時無刻咁去問你一Ｄ你唔會答O既野O既時候, 精神上的確係幾煩惱!
幾時有人陪我食飯呢?!

今朝又作病喇, 所以返到工無幾耐都要去買藥食, 不過果間惠康真係好唔掂, 咩感冒藥都話冇貨, 所以要去第二度買! 總算不錯啦! 今日放早左少少喎, 因為有特別行動, 真係幾攪笑, 好似Ｄ特工咁! 食左藥好眼訓架原來! 另外 PRESENTATION 真係好唔掂, 到目前為止係冇進展, 所以日子越迫近, 個心肝仔就越驚!
把聲都變變地添!

今朝都差Ｄ起唔到身呀, 因為尋晚訓之前食左藥, 所以好好訓, 不過好彩都冇咩遲到! 基本上今日都幾悶架, 人唔算多, 都唔知點解星期六都咁淡! 不過我今日幾多奇遇架喎, 就例如幾日前黎整電話繩O既一班飛型少女啦, 今日又再一次出現喇, 依然係好「孝順」咁週圍去問候人啦, 不過真係勁冇禮貌! 另外亦都遇到好多好冇禮貌O既客, 講真丫, 人係一塊鏡黎架喎, 人點對你你就點對人, 果Ｄ客好似當你係亞四咁呼呼喝喝, 基本上我地冇野做緊架, 佢話要整電話繩, 叫我地執Ｄ字母喎, 咁我咪話字母要自己執之後我地幫你整, 如果佢Ｄ語氣有禮貌少少O既話, 我地非常樂意幫佢搵Ｄ字母架, 不過佢Ｄ態度仲慘過同佢做牛做馬咁, 呵呵, 所以佢咪搵得勁辛苦囉(真係抵)! 不過都好順利咁收九點鐘, 之後仲行左一陣添! 講番我一直令我牽腸掛肚O既 PRESENTATION , 都依然係好唔掂, 數數下仲有六日咋, 你都咪話唔驚呀!
我今日終於知道亞妹叫咩名喇!

今日依然要返工, 為兩餐真係冇計啦! 今日總算順利過渡! 基本上凍左好多喎, 最後一日返大埔喇! 聽日又返第二度喇, 有少少唔捨得大埔添!
PRESENTATION 點算呀?????????!

今日返工囉, 都冇咩特別野, 七點鐘收工之後就同左個朋友去行左一陣街, 不過冇買到野! 今日諗番起一件奇怪事, 我突然覺得其中一個朋友可能做左Ｄ奇怪野, 係咪有誤會呢? 我真係唔知呀!
PRESENTATION 依然冇料, 點算呢?????????!

今朝先發覺原來坐地鐵好辛苦架, 因為實在唔鍾意坐地鐵, 我鍾意坐巴士, 不過地鐵就勁快到! 今日好悶呀, 因為基本上係冇咩做過, 所以都好順利咁放工!
聽晚返學, 不過個 PRESENATION 仲係 ... ...

呢排都好眼訓呀, 朝早都要成半個鐘頭先起到身! 今日真係勁悶呀, 又冇咩野做咁! 夜晚返學啦, 不過都冇咩做過, 只係返去同個 PARTNER 傾下 PRESENTATION 咁啦, 不過其中一個 PARTNER 冇返到, 所以家下好驚呀, 驚會攪唔掂做 PRESENTATION 囉! 不過我會好努力架喇!
仲係有少少咳添!