背景音樂 : BEAUTIFUL LIFE
| 1/12/2000 |
|
今朝較左鬧鐘十一點半架, 但係起唔到身喎, 到左十二點幾我朋友打電話黎我先醒咋! 之後都係平平冇奇咁睇下電視聽下收音機咁咋!
夜晚係要返學O既, 但係我遲左出門口, 所以遲到左少少, 好彩影響唔大! BREAK 果陣都有同朋友傾下電話呀,
幾百分鐘點用得哂喎, 咪傾下囉! 之後都有同Ｄ組員傾下份功課方向, 傾得唔錯幾好! 放學坐地鐵果陣撞到亞 SIR 喎,
咁咪一齊坐車走囉, 都傾左好多關於學習方面O既野! |
| 2/12/2000 |
|
今朝十點幾醒左喇, 因為隔離屋一早就裝修喇! 之後就去左行旺角, 其實都唔明點解條街成日都咁多人架!
真係大大話話俾人撞親成百幾次! 仲有呀, 坐巴士去旺角果陣仲黑仔呀, 坐我隔離果個女人想落車啦, 點知佢一起身架車無端端郁左一野,
佢O既手爭就中左落我隻右眼度喇, 我真係怪唔落佢呀, 因為佢都唔想架嘛, 佢勁同我道歉, 不過只怪自己黑啦,
家下隻右眼眼圈位有少少瘀左! 好痛呀! |
| 3/12/2000 |
|
今朝八點幾起左身呀, 因為約左幾個好朋友去食早餐同埋睇 FUNCTION O既, 大家都知實有亞敬我先會去架啦,
好多年都冇食過麥當當早餐喇, 都幾好食喎! 之後太好笑喇, 竟然又見到亞敬又見到亞 WAYNE 喎! 亞敬唱左一首歌,
之後就同我地傾左一陣, 又影下相咁, 真係好開心喎! 不過即影即有果Ｄ同唔到亞敬影呀, 因為幾趕時間, 但係同到亞 WAYNE 影(見下圖),
雖然硬係影到我個樣怪怪地! 當然影呢張相果陣都發生左一件唔係太好o既事啦, 係咁就無謂講喇, 費事果個人睇到我話佢,
之後又同我地爭影相啦! 亞敬真係唔話得呀, 對我地好好, 真係好感謝佢! 夜晚睇左＜ＣＡＳＨ創作大賽＞,
二號果個女仔成日幫亞敬唱和音架, 佢作果首歌都幾好, 好可惜填詞同唱得比較唔太好! 我好鍾意其中三首歌架喎,
分別係: 歐倩怡唱O既＜足夠＞、李成唱O既＜花衣裳＞同埋冠軍之作王菀之O既＜是一場誤會沒什麼可悲＞,
呢三首歌好正, 不過可惜貼中左一首O者, 冠軍果首真係好好聽, 個 FEEL 好正, 唔知會唔會出碟呢首歌?
我覺得好 ARM 王菲唱! |
| 4/12/2000 |
|
今朝都成十二點先醒, 之後仲睇番今朝預錄O既＜寵物情緣＞添, 真係幾好睇架喎, 而且我仲發現左下晝又做番＜千里姻緣兜錯圈＞,
睇番又真係好好笑喎, 蔡少芬真係做得唔錯! 我今日 MISS 左個電話添, 唔知邊個打黎呢? 夜晚收到學校電話,
話今個星期三晚果一堂因為亞 SIR 有事要取消喎, 我都唔知咩事咁重要要取消, 仲唔知有冇得補番添呀,
上次亞 SIR 先話都教唔哂Ｄ書, 你話點算丫? |
| 6/12/2000 |
|
今日本來心情極好架, 點知真係黑都冇人有, 其他野就唔好講喇, 六點幾收到個電話, 係學校打黎話要我下星期六晚去考番之前我唔合格果一科喎,
真係令我摸不著頭腦喇, 有咩理由十日唔夠話俾人知要考試架O者, 果一科仲要係兩年前讀架喎, 當然果個人係勁寸咁同我講野啦,
內容係咁就唔好講喇, 但係果個人Ｄ態度真係要改下囉, 你估我家下受佢恩惠咩, 我都要俾錢讀架! 所以家下我就好慘咁,
要用唔夠十日o既時間去溫一科兩年前讀o既書, 考完之後仲要用一星期去溫番我本來讀緊果一科, 因為十二月廿三日我又要考試! |
| 7/12/2000 |
|
今朝未夠十一點起左身喇, 之後睇左一陣電視再食埋午飯就開始勁溫書喇, 足足溫左五個鐘頭, 之後落街買野,
再食左晚飯, 又再次溫書喇, 呢兩日都係將好多張 NOTES 再自己寫番Ｄ簡短Ｄ O既 NOTES 黎溫書, 因為冇可能溫得熟成百幾張 NOTES!
所以我將佢地縮短成廿幾張幾, 希望我會成功順利考得成功啦! |
| 8/12/2000 |
|
今朝都係差唔多十一點令起左身啦, 都係食完飯就開始溫書喇, 今日冇好似尋日咁溫咁耐, 大約溫左兩個鐘到啦,
但係仲有好多未溫, 所以未來呢幾日我將會忘我咁溫書! |
| 9/12/2000 |
|
今朝一早去左銀行, 之後就返左屋企溫左一陣書, 同食野, 不過食食下我亞姨打俾我話同我去舅父間新屋,
十二點幾去到, 之後就去左飲茶喇! 大約夜晚八點幾返到屋企啦, 都係溫書咋! 因為聽日去街街, 所以今日溫埋聽日果份囉! |
| 10/12/2000 |
|
今朝都好早醒左, 因為都係要溫書O既, 點幾鐘出到去尖沙咀, 因為要去交補考費, 果個人好冇禮貌囉,
不過算啦, 呢Ｄ人真係唔會做得耐! 之後就去左睇 SHOW, 因為今日亞敬有兩個 SHOW, 第一個就係街頭 BAND SHOW,
有三隊不為人知O既 BAND 唱歌, 其實都幾有特色架喎! 亞敬早到左, 所以去左行街喎, 佢行完街到左會場之後勁同我地傾計,
最攪笑就係佢今日戴左個紅色鏡片眼鏡, 尋日我舅父送左個紅色鏡片眼鏡俾我喎, 咁我就戴住同亞敬影相啦, 點知影完之後,
亞敬同我講:"借我戴下丫!", 咁我就即刻除左俾佢戴, 佢仲一野將佢果副俾我拎住喎, 之後我同兩個朋友仲戴住亞敬果副同亞敬影相添,
個果一刻大家都諗住亞敬係試戴啦, 點知佢戴上台喎, 因為我果副新買, 所以比較緊, 但係亞敬果副真係好鬆!
當然好好笑啦, 遲Ｄ曬左相一定俾大家睇睇, 不過今日都有張即影即有睇下(見下圖)! 之後四點令就去左食少少野啦,
再五點幾就去左佐敦亞Ｂ哥哥個 GOLF 場, 當然又係有亞敬啦, 又同佢傾計影相咁, 今日佢心情勁好, 對我地三個好好,
其實今日好多開心事、趣事, 亦有唔開心O既事(係關於一條眼線! 至於係咩就冇謂講!), 不過梗係開心多Ｄ啦,
最開心O既係亞敬個助手對我地都好好喎, 又自願幫我地影相, 唔似得條眼線迫人地幫佢! |
| 11/12/2000 |
|
今日訓到十一點半到啦, 之後當然又係一邊睇＜寵物情緣＞一邊食飯啦, 之後就溫書溫到三點幾四點就落左去曬相,
仲收到今年第一份聖誕禮物添, 好開心呀! 之後返到翟企亦溫左個令兩個鐘頭書! 當然仲有好多未溫熟啦! |
| 12/12/2000 |
|
今朝成十二點先醒呀, 因為實在太好訓喇! 之後都係食左飯就溫書, 基本上呢幾日都係咁! 晚飯之前就落左去拎番Ｄ相,
不過睇左Ｄ相之後有少少失落, 因為今次Ｄ相影得麻麻地, 唔知係咪影相果日唔夠訓呢? |
| 13/12/2000 |
|
今朝都係十一點令起左身, 之後指定動作→溫書! 夜晚就返左學, 不過之前就拎左Ｄ相去整貼紙相,
希望會靚啦! |
| 14/12/2000 |
|
今朝九點幾俾樓上裝修聲嘈到醒左一醒, 之後好辛苦咁先訓到十一點幾, 不過唔知點解冇＜寵物情緣＞做O既,
之後都係食完野溫書, 溫到七點鐘到啦, 都溫得七七八八架喇! 之後都有落到街買野; 打左個電話俾個好朋友,
點知原來發生左一件好令到人氣結O既事, 我聽左之後都覺得一早應該同事件中果件蛋撻反面, 因為呢次絕對唔係第一次令到我同埋兩個朋友好嬲,
呢件撻真係令到我地三個損失左幾多O既野, 不過今日之後, 可以唔洗再煩喇! |
| 15/12/2000 |
|
今朝都係十一點令起身, 都係食野, 溫書啦! 溫到六點幾都有落過街拎番Ｄ相同埋貼紙相O既, 仲去埋超級巿場買埋野添!
另外, 好開心呀, 我收到日本筆友O既信, 佢仲送左盒錄音帶俾我添, 裡面有好多日文歌, 好鍾意, 而且仲教多我幾句日文添!
希望遲Ｄ可以讀日文啦! |
| 16/12/2000 |
|
今朝十點起左身喇, 因為下晝約左人食飯, 所以早少少起身溫下書咁啦! 食完飯之後就去左商台喎, 因為今日亞敬上＜餓 LAN 之 VAN＞訪問,
我當然溫掂書先去啦, 我好有分寸架, 所以可以放心! 不過好好彩呀, 個節目接電咶玩遊戲, 我地三個一齊打都接左其中一個呀,
仲估中左亞敬O既最愛歌曲添, 所以得到禮物, 係一大袋 SINGLE 呀, O係呢度要多謝好友 CINDY 先, 因為佢將呢袋禮物同我地一齊分享!
我地都有送聖誕禮物俾亞敬呀, 希望佢識做分少少獎門人嬴O既獎品俾我地啦! 夜晚就要去考試喇, 原來好多同班同學都要補考呢一科架喎,
所以突然間好有親切感, 本應諗住得一個同學咋嘛, 數起黎有成五六個喎! 最後我以極速答完份卷, 相信會合格O既!
我都唔諗咁多喇, 因為下星期六仲要考 MARKETING , 而我聽日會休息一下O既, 諗得多都冇用啦, 因為試係考左, 已成定局,
不過我有信心O既! |
| 17/12/2000 |
|
今朝訓到差唔多十二點呀, 因為今日係俾自己個腦休息下O既一日, 聽日先開始溫星期六考果科! 亦因為係休息日,
所以我自己一個人落左去行街街, 人都幾多架喎, 除左買左野食之外, 仲買左幾舊冷, 因為想織多條頸巾俾自己!
天氣雖然唔係太凍, 不過我諗總會用得著o既! |
| 18/12/2000 |
|
今日屋企個電話好旺呀, 起碼響過十次, 唔知係咪近聖誕, 所以Ｄ朋友都開始打黎問下聖誕有咩節目咁! 不過我都仲未知有咩節目架,
好想去同一大班朋友傾下計咁, 我諗都要過幾日先知有咩玩! 今日開始溫 MARKETING 喇, 不過我發覺原來好多都係 COMMON SENCE 黎架喎,
例如 PROMOTION O既手法咁, 所以溫得都比較輕鬆! 天氣又熱左喎, 咁呢個聖誕咪可以去游水? 講笑O者, 不過應該真係會幾熱! |
| 19/12/2000 |
|
今朝訓到十二點幾先起身食野, 之後溫書啦, 溫到六點鐘就出門口喇, 因為今晚要去電視城睇節目, 當然大家都估到一定係有亞敬啦,
去到錄左好耐先完, 好慘架都, 因為亞敬只係唱左＜理想年代＞一首歌, 同埋講左幾句野O者! 之後都見到佢走,
但亦因為落雨O既關係, 所以冇傾到計, 但係都開心O既! 十點半返到屋企, 去電視城悶左幾粒鐘都得到幾多禮物喎,
最正係張龜靈糕券! |
| 20/12/2000 |
|
今日如常咁起身睇電視再食飯之後就溫書, 呢幾樣野亦會係未來兩日O既主要活動! 溫左成日都唔係太知溫左咩啦!
但係我都會全力以赴! 有落到去買野呀, 不過好慘呀, 買汽水可以加錢換個可樂熊仔玻璃球, 不過換哂喎, 唔制呀,
好靚架果個玻璃球! |
| 21/12/2000 |
|
今日都係溫書啦, 不過真係有少少驚, 因為的確好多野都識, 但又驚會唔識答喎, 人生幾矛盾呢! 十二點果陣我婆婆黎左我屋企一陣,
因為今日係冬至, 所以拎Ｄ野黎囉! 仲有幾日就係聖誕節喇, 都唔知有咩野節目, 不過我只係希望開心咁就夠喇,
換句話講, 如果果陣我O係屋企係覺得開心O既, 冇街去都冇所謂! 好想去旅行添, 歐洲呀, 日本呀咁, 等我下次問下亞敬肯唔肯俾果張歐洲旅遊卷我先,
希望佢肯啦, 因為佢都冇時間去! |
| 22/12/2000 |
|
今日竟然訓到點幾兩點喎, 不過都好努力咁溫書O既, 都好希望聽日考試順順利利過關啦! 冇出過街呀,
因為真係要努力咁溫書! 夜晚睇番前幾晚去錄影O既＜歡樂今宵＞, 不過 CUT 左好多喎! |
| 23/12/2000 |
|
今日好好彩冇唔知醒O者, 起左身之後都係一邊食野一邊溫書, 一點半返到學校等開考! 我算係識掛,
因為識O既野都答哂, 所以早走左! 之後就去左買野啦, 本來想去約朋友食下野架, 不過都係返屋企好Ｄ,
因為一邊考試果陣一邊肚痛喎意然! 返到屋企都冇咩特別架, 只係睇下電視咁啦, 不過買左＜鬆根 SHOW 2000＞ＶＣＤ,
目前為止係未睇O既, 因為睇緊勁歌季選! 今日收到嘉倫仔仔張聖誕咭呀, 多謝哂! |
| 24/12/2000 |
|
平安夜O既日頭, 我竟然係訓到差唔多兩點, 因為實在太好訓喇, 天氣又涼涼地喎, 所以訓左咁耐! 起身之後冇即刻食野呀,
可能訓飽左掛! 做完一大輪清潔工作之後先煮野食! 本來今日有街去O既, 不過最後都取消左, 其實節日唔一定要去街架嘛,
正如我幾日前日記所講, 只要覺得開心, O係邊度過都冇咩所謂! 其實今日收到一個消息, 呢個消息本應令我開心至係O既,
不過知道左之後好矛盾, 可能黎得太過突然啦, 又唔係話完全唔開心, 因為果件的確係好事黎O既, 只係人係唔喜歡離別,
但畢竟係好事, 所以我亦會接受, 只要給我多一點時間＜LOVE AND BE SILENCE＞! 睇左＜宇宙無敵獎門人＞, 有亞敬,
真係笑死我呀, 因為好攪笑, 同埋估唔到佢竟然嬴左喎! 夜晚終於睇左＜鬆根 SHOW 2000＞喇, 比預期中冇咁好睇,
可能係攪笑成份多左好多, 以前O既＜鬆根 SHOW＞都有攪笑, 不過都會有所得著, 今次呢個 SHOW 都有得著, 不過少左少少! |
| 25/12/2000 |
|
我今朝五點幾先訓得著呀, 又再一次眼光光等天光喇, 最慘仲係發左個好驚O既夢, 我夢到俾一個人勁打,
仲要成張桌"車"埋黎, 夢中我勁喊架嚇到, 不過醒果陣都有少少眼淚, 因為個夢實在太真實喇! 訓到十一點令起身,
因為約左人飲茶, 不過都成點幾鐘先去到我舅父屋企, 坐到兩點幾就去飲下午茶喇, 之後飲到四點到啦,
再去佢屋企坐一陣就一齊去左我屋企喇, 夜晚就食左一餐聖誕大餐, 有聖誕蛋糕添呀! 不過家下我好牙痛呀,
唔知係咪出知慧牙呢, 聖誕節牙痛, 真係唔知講咩好! |
| 26/12/2000 |
|
今朝都係四點幾先訓得著咋, 所以呢幾日個眼圈真係似熊貓! 基本上今日都冇出到街, 因為紅假一定多人架嘛,
費事同人迫啦, 或者過兩日先去玩! ＜戀之神樣＞呢套日劇真係幾值得睇, 雖然故事唔係真係好吸引, 不過的確係有意思O係套劇O既背後O既,
其實我最想番睇O既係＜OVER TIME＞, 因為果陣係朋友借 VCD 我睇O既, 呢個故事係吸引好多, 同埋真係好感人囉!
唔知點解呢排睇咁少日劇, 自從＜BEAUTIFUL LIFE＞之後都冇咩大作吸引到我唔睇唔得, 希望快Ｄ多Ｄ好睇O既日劇啦!
我今日雖然冇去街咋, 不過都計劃左下一年O既目標, 當然唔止一個啦, 不過我每一日都會向住自己定下O既目標行前一步O既,
俾Ｄ時間我啦, 一定掂! |
| 27/12/2000 |
|
今朝總算正常時間起身, 不過都係冇咩做過咋, 因為聽日先有街街去! 食完晚飯之後無幾耐, 竟然勁肚痛喎,
所以訓左一陣, 家下完全冇事喇, 真係嚇死人呀! |
| 28/12/2000 |
|
今朝一早俾個電話嘈醒左, 所以十點就起身喇! 好少聽到我咁早起身呢! 之後約左個朋友兩點幾去行旺角,
其實本來諗住去第二度架, 但係的確兩個人都諗唔到去邊好, 所以又係旺角一日遊! 今日可以話收穫大呀, 其實好耐冇試過買野喇,
所以大家唔好鬧我呀, 我今日買左三隻ＣＤ(SAMMI-->愛是-->$86／SAMMI-->去愛吧-->$40／子華-->我有小小強-->$18),
點解咁平? 因為有兩隻係二手碟黎O既, 仲買左一本張小嫻＜三個 A CUP 的女人＞, 不過原來有一頁訂裝果陣訂爛左,
有少少唔開心啦, 因為我買果陣冇留意到, 成日就係咁大意架喇我! 行到九點令啦, 其實今日都幾攪笑架, 搵果樣野冇果樣! |
| 29/12/2000 |
|
今朝十一點令起左身睇＜寵物情緣＞下星期二大結喇, 果陣我都冇睇大結局, 所以今次一定要睇番先! 之後約左個幾個月冇見O既朋友去街,
兩點鐘就開始行喇, 第一站係去左旺角百老匯戲院買飛睇戲, 好好彩咁, 我地有兩張"換票証", 可以免費換兩張飛睇戲,
我地就揀左睇＜阿虎＞, 本來想睇＜薰衣草＞架, 不過唔知呢間戲院有冇味聞(因為全港有七間戲院有得聞薰衣草),
所以睇＜阿虎＞, 我的確好推介俾大家去睇呢套戲, 因為實在係好感人, 我同我朋友都強忍眼淚, 因為真係好感動,
不過在場大部份人好明顯都唔明個故事, 因為戲中感動O既位置, 要了解演員內心戲果場, 我覺得最感動果一場,
大半部份人竟然係當笑話咁睇, O係度勁笑, 所以我覺得係一個唔好O既地方, 成個故事好好, 我真係忍徥好辛苦先冇喊到咋,
Ｄ眼淚差少少就流出黎喇, 好彩冇咋! |
| 30/12/2000 |
|
今朝十點令起左身喇, 因為我亞姨打黎叫我一齊去舅父度, 所以我就起身去喇! 不過等車都等左成大半個鐘,
真係唔明白點解Ｄ巴士一班車要等咁耐! 玩左成日, 我條電話繩又斷左喇, 不過唔係上次斷果條, 都唔知點解成日都斷架,
不過家下我整番好喇, 因為唔想又拎去亞妹度整番, 佢唔肯收番我錢呀, 所以唔好意思囉, 家下總自整番,
不過仲未諗到點掛去個電話度, 因為呢個電話係冇位置掛電話繩O既, 我驚用番以前個方法會又斷過就慘喇! |
| 31/12/2000 |
|
一年最後一日, 我朝早十一點幾就醒左喇, 因為我個朋友打電話約我去街呀, 不過都成兩點幾先出黎呀! 行到七點幾就趕下場喇,
我就去左銅鑼灣時代廣場倒數, 好開心架, 不過大家就要留意下 2001 年 1 月 1 日O既日記喇, 因為開心O既事係發生O係凌晨十二點後架,
所以大家要留意喇! |
