 歡迎睇我任何一日私日記!(私日記。WATASHINO NIKKI！) |
1/8/2007  |
|
今日一心諗住睇＜惡作劇之吻＞, 點知直播皇后碼頭O既行動, 雖然的確有Ｄ野係值得保存, 但係唔好浪費咁多警力,
其實警察真係好辛苦架, 而且都係打份工O者, 咁又何必攪到人地咁難做呢?! 而且我覺得呢Ｄ行動, 係有少少唔係太文明,
恕我直言!! 大約 13:45 出門口, 因為約左家姐 14:30 信和, 等巴士時見到藍天與白雲(見圖1), 好靚呀!! 真係好耐冇見過個天咁靚!!
會合左後行左信和, 買左五隻扭蛋玩具(見圖2~3), 好可愛架! $5/隻咋, 真係好抵!! 隻 KERORO 好可愛, 家下打住日記望住佢,
不禁扮下佢個動作(DONDAKE)!! 之後去左黑店, 因為家姐想訂 24 小時件 T, 信和某間店貴到暈, 所以唯有去黑店啦,
見到黑店寫話暫停入會同埋續會, 我心諗, 好彩冇經佢地入會咋, 如果唔係咁 ARM 要續會咪俾佢"Q"起左, 真係俾錢出黎架嘛,
如果經佢地入會自己又唔可以去續會, 佢地又暫停續會, 咁即係喊都無謂!! 不過好彩!! 之後再行下兆萬同潮流特區咁,
行到三點幾有個賣家打俾家姐話去收, 我當堂做左透明人間!! 之後週圍行下咁, 一直行到去尖沙咀, 食吉野家,
之後又週圍行下咁!! 都買唔到咩野, 九點幾返到屋企, 沖完涼仲趕得切睇小新呢!!! |
| 2/8/2007 |
|
今日去左飲茶, 之後行左去 MEGA BOX, 因為之前申請左佢地果張信用咭, 所以去拎優惠券, 好多券呢, 不過真正有用O既又好少,
而家 MEGA BOX 多左好多野行, 唔似得以前咁得兩三間!! 間大眾書局好大間呢, 門口仲有兩隻好大O既熊貓, 真係非一般大喎!!
而且賣O既野都幾抵, 遲Ｄ公文袋用哂可以去呢間大眾買呢!! 大約五點幾去左食野, 亦有用優惠券, 之不過Ｄ野非常唔好食,
而且都好貴呢!! 兩碗牛肉麵+一個銀絲卷+一個蔥油餅, 咁樣就 $15X 喇!! 真係好貴, 因為又要每人 $8 茶錢, $5 前菜咁,
即係你一個人去咩都唔叫O既話, 已經要收你十幾二十蚊!! 食完之後又行左一陣, 走時先見到有一隻熊貓萬能俠,
想同佢合照時, 見到皇上同太后已經行左去車站, 所以我好快咁影左兩張就要走人, 等左兩個字到就有車返去 MTR 站,
其實行的話都一早到左, 之後再行左一陣德福就返屋企喇!! |
| 3/8/2007 |
|
今日皇上有野要辦, 所以得返我同太后食 LUNCH, 決定去食麥當當, 落街前我搵左好耐都搵唔到上兩封 YUMIKO 寫俾我O既信,
因為想確認下個地址, 因為搵唔到(一定係放左去床下底Ｄ膠箱裡面!!), 所以唯有照返上次佢寄俾我O既包裝紙寫,
不過就冇左個"郵便番號", 不過應該冇問題!! 落街寄完信就去左食麥當當, 太后好豪咁兩個餐都加大, 所以食完好滿足呢!!
之後去左行德福, 亦行左新開果間 UNIQLO, Ｄ T-SHIRT 幾靚喎, 呢幾日仲減價, 仲有好多款, Ｄ料又唔錯, 不過都係冇買到,
再週圍行下咁, 本來諗住又去 MEGA BOX, 點知太后冇帶Ｄ優惠券, 所以冇去到!! 行完後去左換左一打西餅, 返到黎屋企都好似四點幾,
收到 YAHOO 寄黎O既信(見1~3), 原來係個幾月前參加左某個活動O既獎品, 我先頭以為只係有電話繩, 點知仲有一張 CITY SUPER
O既 $50 現金券, 早知有O既話, 叫哂所有親人朋友參加啦!! 之後坐左一陣就沖澡, 睇左陣 KERORO(TVB播O既), TAMAMA 依然可愛, 不過Ｄ配音就真係 ...!!
夜晚睇尋晚O既 UTABAN, 小翼個髮型真係好型呀, 先頭我仲覺得唔太好睇, 但係佢唱歌時"Q"起Ｄ頭髮, 我先見到長髮O既底下係剷左青(見圖4),
真係好型(心)!! 十點幾整左宵夜食, 命名為: 牛油肉鬆克力架(見圖5~8), 真係好好味!! |
| 4/8/2007 |
|
今日食完 LUNCH, 太后話又想去行下 MEGABOX, 所以大約兩點幾就同太后去左 MEGABOX 喇, 行過去都真係好快呢,
好詳細咁行左間 SPORTLIGHT, Ｄ野真係好多都好平呢!! 不過暫時睇唔 ARM, 又去左果間 S+S 買左對拖鞋, 雖然係細碼,
不過估計安怡 ARM 著O既!! 之後都係咁行啦, 到左五點幾, 諗住去食少少野再用埋Ｄ優惠券咁, 點知果兩間店都好好,
唔洗消費就可以用, 所以我同太后一人一杯特飲, 同埋一人一杯雪糕, 兩樣都好好味!! 然後行到五點幾六點就走喇,
經過一間零食店同埋超市, 買左少少野, 之後就行返屋企喇, 坐左一陣就沖涼, DINNER 完就入左房睇子華哥O既電影＜情意拳拳＞,
因為有線播, 而又未睇過, 雖然都係冇咩內容, 但都算 OK 呢!! |
| 5/8/2007 |
|
今日 S 同 FEI 再次黎香港玩, 所以約左去見下面, 到左一點半左右仲未見家姐上網, 所以打俾佢, 原來佢以為已經講定約幾點,
不過其實係未約車呢, 所以就立即換出門口, 等左三個字都冇小巴, 最後當我想行去坐巴士時, 有一架小巴黎到得返一個位,
所以我就衝左上去! 唔洗一個字就到左旺角, 想打電話俾家姐時先見到我 MISS 左個 CALL, 會合左家姐後, 去左朗豪坊,
見到有"阿森一族"O既宣傳活動(見圖1~3)! 之後行左一陣信和, 又俾我買到兩隻 DORORO(見圖4), $5/集咋都係~!! 不過之前未見過呢兩隻呢!!
之後 S 同 FEI 就打黎話到左 MTR, 所以我地行去 MTR 果邊會合佢地, 之後一齊去行信和等等地方, 佢地瘋狂購物呢(笑)!!
再行左 SASA, 之後就分手喇, 因為今日條街太多人, 所以只好下一次再見啦!! 我同家姐就再行左一陣, 就去左"沙嗲"王食晚飯,
我叫左個白咖喱豬扒餐(見圖5~9), 都幾好味, 連埋加一大約 $50 啦, 相對起吉野家係好貴O既, 間唔中去下就 OK O既!!
不過果店Ｄ侍應真係令我地好汗!! 首先就係拎我果杯"青蘋果綠茶"黎時, 佢係話"青蘋果綠!", 咁就算, 另外全程都冇眼神接觸,
然後我地食完個飯, 仲有個甜品架嘛, 我就同個侍應哥仔講"麻煩你幫我地拾拾野, 仲有個甜品未黎O既!!", 之後佢就話"一係我幫你收收Ｄ野丫!",
我同家姐係呆左, 因為好明顯呢位侍應哥仔根本冇聽我講野!! 同埋佢Ｄ態度係好怪 ... 真係好怪!! 其實我O既要求都唔係好高,
但佢O既服務態度, 無言~~!! 食完野後去左美麗華果間 UNIQLO, 家姐買左幾件 T-SHIRT, 其實真係幾抵同埋幾靚,
不過可惜我成屋都係 T-SHIRT, 所以我冇買到!! 之後再行下卓悅咁, 十點幾就返到屋企喇!! 沖完涼上下網咁, 對腳有少少累呢!!
要謝謝 FEI, 因為佢真係守諾言, 送左條紅繩俾我同家姐(見圖10), 謝謝你呢!! 而家暫時放O係我屋企, 因為要加個扣之類上去,
等易戴Ｄ!! |
| 6/8/2007 |
|
今日係飲茶日, 飲完茶同太后兩個人去左行左一陣, 逛書店時見到一本熊貓 MEMO(見圖1~8), 原價是 367日元, 現在只需 $14 而已,
所以忍不住買了!! 有 8 種不同的款式, 還有兩張貼紙!! 好可愛呵!! 逛超級市場, 看到有一個很大的古天樂紙板呢(見圖9~10)!!
還有一部百事可樂的大頭貼!! 之後返屋企上下網咁啦!! 一口氣睇左"馬仔"一年O既日記(我仲未睇哂架!!), 原來佢好叻叻架,
而家只係O係屋企畫下野咁, 再加埋廣告收入咁!! 最衰我冇畫畫天份, 其實我都幾想好似佢咁樣, 起碼唔洗受其它人O既歧視先!!
不過其實我可能有呢種才能架, 我要去發掘下先!! 晚飯, 皇上特別炮製的牛腩, 有兩種不同的口味!! 超級辣版(圖11), 完全不辣版(見圖12),
真係好好食呀!! 之後食左個朱古力撻當宵夜(見圖13), 大家放心, 我食左一個咋!! 之後改下網頁咁, 同埋週圍宣傳下咁,
賺多少少都好O既!!! |
| 7/8/2007 |
|
今日冇出到街, 吸下塵上下網咁, 用左個幾鐘頭, 終於將本來個日文網變左做英文網, 因為小兔話英文會有用少少!!
眼見份人工就黎到手, 好開心呢!! 我今日先知原來Ｄ EMAIL 會亂碼, 所以又改左少少網頁內容, 而家等 小MO O既相同其它資料,
再加埋上去就大公告成喇!! 晚飯時間, 由於昨晚反應熱烈, 應群眾(即是我及太后)的熱烈要求, 皇上晚飯又一巨獻 -- 柱候牛腩(見圖1)!
真係好好味!! 講左咁耐, 都冇俾個網址大家睇下, 我幫小兔佢地間民宿整O既網頁, 我家下除左係呢間民宿O既網頁製作人之外,
其實仲係宣傳大使, 所以張圖下面O既將會係一個廣告時段!!! |
| 8/8/2007 |
|
由於天氣反常, 一心想著往後香港也不會有颱風, 因為以往差不多六七月開始便常有颱風, 但今年莫說颱風,
就連下雨的時間也少了!! 就在做好這個覺悟之際, 今早醒來看見1號風球(香港的叫法, 就是颱風最弱的等級),
心裡莫名的興奮!! 真的不知為什麼這麼興奮, 高興得還拿起相機拍照(見下圖)! LUNCH 完改左少少網頁(加返Ｄ中英文 LINK),
之後同太后落左街左一陣, 仲買左半打西餅, 不過以前Ｄ西餅唔好食都好睇架嘛, 家下Ｄ西餅連個樣都麻麻地呢!!
返左屋企上下網咁, DINNER 完又係上下網同埋做下"宣傳大使"咁! 原來今日係北京奧倒數一週年開始, 時間過得真係快!! |
| 9/8/2007 |
|
今日改返個網頁個 EMAIL!! 之後本來計劃夜晚去 MEGABOX 某間店食野, 不過落大雨, 所以就取消左, 我除左做"宣傳大使"之外,
仲睇左幾套日劇呢!! 夜晚 DINNER 完, 突然間諗起前幾日睇"馬仔"個 BLOG, 見到有"金三珣頭巾"O既做法, 所以立即搵返張圖出黎,
再拎左頭巾同毛巾出黎試下效果, 真係好攪笑呢!! 我情商左隻熊貓仔做模特兒, 影左幾張寫真(見圖1~5)! 而金三珣真人示範請見圖6,
做法(我加左中文解釋), 見圖7!! 真係好得意呢!! 其實我都有整俾自己戴, 仲同個小模特兒影左合照, 不過實在太攪笑,
所以冇謂笑親大家!! 頭先又去埋上次未睇哂O既"馬仔" BLOG, 其實好想學下用 FLASH 寫 GAME, 起碼都可以試下好似佢咁,
放上去Ｄ網站度收廣告錢, 雖然我知道我係發緊夢, 不過反正有時間, 真係想試一試!! 其實呢, 我覺得佢好幸福,
因為起碼可以做到自己鍾意O既野, 而又可以養起自己同埋養家(PS: 馬仔冇做正職喇, 而家主要係靠廣告等等O既收入!!),
如果世界上真係有"才能玉"就好喇! 起碼俾我知道我有咩才能!! |
| 10/8/2007 |
|
今朝一早起身係1號風球, 出街前係3號, 去左飲茶, 飲完茶見到掛左8號風球喇(見圖1)!! 之後去左超市, 真係多人到好恐佈,
換左一打西餅(見圖2)!! 之後返屋企, 小兔又叫我話有野想加去網頁, 不過好快攪掂左!! 唔知幾時出糧呢?! |
| 11/8/2007 |
|
認識 CC 比較長的時間, 都應該去過 CC 的個人網站"斯斯的夢想國"吧!! (我承認網站名稱很沒創意!!), 如果你而家睇緊我寫o既呢段日記,
你就要留意咯!! 我想告訴大家, "斯斯的夢想國"正式搬家了!! 由以往的 GEOCITIES 空間, (http://www.geocities.com/Augusta/9561/)
搬到 FC2 的大家庭, (http://queencie.web.fc2.com/)
讓我說說搬家的原因吧! 開始選用 GEOCITIES, 是因為那時候免費的網頁空間並不多, 所以經朋友介紹開始用 GEOCITIES 了!!
雖然有 15 MB 左右的免費空間, 不過隨著科技進步, 越來越喜歡拍照的我, 空間根本不夠用, 雖然後來想到直接 LINK 到我的 BLOG 上的照片,
但還是覺得 15 MB 真的太少!! (人家 FC2 可是有 1 GB 呵!!)!! 而 GEOCITIES 其中一個, 亦是最不方便的一個壞處,
就是國內的親是連不上的!! 雖然我的個人網站大都以廣東話寫的, 好像日記 ..., 但有時候想跟國內的親分享一下圖片也蠻不方便呢!!
另外 GEOCITIES 是有一個很大的廣告位置, 讓網頁變得怪怪的!! 而 FC2 的廣告只是在網頁最底的一小行而已!!
不過, 搬空間真的下了很大的決心, 因為日常網站已經沒什麼人看, 要是搬了家, 大家不知道的話, 那 CC 的個人網站就變成 CC 一個人自言自語的地方了!~
(其實可能一直也是 :P) 所以想了一個多月, 終於決定還是搬去 FC2, 而且 FC2 的網址比較精簡!! 不過呢, 其實要去解釋"為什麼",
是可以說出幾百個原因的, 所以也不要再說下去了!! |
| 12/8/2007 |
|
今日都係不停咁落雨呢, 不過天氣就涼返少少, 都算係好事!! 睇左深恭同伊東果套劇, 雖然係好誇張, 不過都幾好睇!!
另外皇上同太后落左街, 仲買左西餅(見下圖), 果然樣子不怎麼吸引吧!! 是否我要求太高呢?! 另外, 我又再發現,
我自己真係頂唔到Ｄ好冇效率O既人!! 同埋我O既性格又係一做就要做到最好最有效率咁, 不過我知道, 好多人都唔係咁,
完全唔會諗到有人會因為佢O既慢, 而阻住其它人繼續完成餘下O既工作!! 不過算啦, 或者係我太認真吧!! |
| 13/8/2007 |
|
今朝十點左右起左身, 之後食早餐(見圖1), 終於收到英文版網頁O既內容, 好快就修改好!! 我喜歡效率!! 之後大約一點九到,
去左間平日好少去O既酒樓飲下午茶(同埋樓上個姨姨)(見圖2), 叫左幾個點心(見圖3~9)!! 之後返屋企, 上左一陣網就沖涼,
沖完涼幫 S 翻譯左一篇日文, 跟 TSU 聊了一會兒, 要謝謝她今天傳我的 FLASH 教程呵!! 我會好好努力學習的!! |
| 14/8/2007 |
|
今日再一次睇到"人的本性", 讓我諗起 ENDLICHERI O既"UTSUKUSHIIARUTAMENI", 大家都為左自己而變得自私呢!!
或者人一直都係咁!! 不過嘛, 基本禮貌也要吧!! 成日覺得有咩 IDOL 就有咩 FANS, 所以其實好奇怪, 或者本性難移吧!
不過我相信"經一事長一智", 正如 SEAMO 的 "CRY BABY"歌詞裡面講"唔會有無意思O既事! 每件事都有好多含意的!",
我會好好學習!! 另外我再一次發現世紀最偉大O既發明應該係化粧品! 相信如果冇左佢O既話, 好多人會 ... !!
睇左＜爸爸與女兒的７天＞CH.6, 好緊張呢, 究竟可唔可以變返原本咁呢?! 睇預告下一集竟然係大結局, 即係只有 7 集,
咁好笑咁好睇, 真係可惜呢!! 夜晚又聽到一件事, 攪到我想爆粗(有幾多年冇呢個衝動呢?!)!! |
| 15/8/2007 |
|
今朝九點幾醒左, 睇下卡通咁, 之後發現原來皇上同太后飲左早茶, 所以我煮米粉食, 之後上下網咁啦, 個電腦喇叭條線鬆鬆地,
攪到有時得一邊聲!! 大約四點落左去食下午茶, 選擇左新開果間台式食店, 食左厚多士同埋珍珠奶茶(見下圖), 都唔錯,
不過相信唔會再去食, 之後行左轉超市就返屋企喇!! 收到封信, 係月頭果陣冇心咁 SEND 左張 FORM, 叫我下星期去 INTERVIEW,
其實係做電話服務員果類, 唔係好 ARM 我O既, 不過試下無防, 何況家下 IN O者, 又冇話包請, 盡左力就 OK!! YO!!
夜晚發現左一件令我非常痛心, 而又非常無奈, 亦無法補救o既事, 就係我嚇然發現我 2001 年 8 月O既日記冇左,
最慘係應該唔見左好耐, 相信係個網頁搬去 GEOCITIES 已經冇左, 只係我一直冇發現咋, 頭先個網頁全部 HTML 加返少少野,
再 UPLOAD 時發現 2001 年日記得 11 個 HTML, 先至發現冇左個 8 月, 諗住去 GEOCITIES DL 返, 點知果邊都冇,
我已經再諗唔起再之前係放O係咩空間喇!! 又搵唔返以前用 CD-ROM BACKUP 果Ｄ FILES, 唯一希望係部舊電腦,
之但係要插返又好鬼麻煩, 而且仲係用緊 98 ... 點算好?! 好唔開心呀, 因為就好似本來一件好完美O既事, 家下有污點!!
唉 ... |
| 16/8/2007 |
|
今日食完 LUNCH 出左街, 因為約左家姐, 但亦因為遲左出門口, 所以坐小巴, 坐緊小巴時家姐打黎話佢可能要遲少少,
最好笑O既係, 我地遲出門口O既原因竟然係一樣!! 我行左一陣信和, 見到＜39＞初回出左台版, 仲平過日版好多倍,
考慮緊買台版, 不過要等埋 KIDNEY 返黎睇下佢買唔買到日版先!! 之後行左去家樂, 睇左一陣家姐就話到左家樂喇,
之後去左家樂果間 GREENBOX, 好多年冇唱過 K 喇!! 上年都有去尖沙咀果間 DOREMI O既, 不過自從佢摺左後, 我就冇去過,
都係大約 50 蚊到, 今日間店冇咩人, 所以我地由兩點唱到八點, 意外的也有日語歌呢, 雖然不太新, 但也算不錯呢!!
也有小剛的歌, 不過就只有"街"這首而已, 我是有點了, 不過後來時間不夠就唱不到!! 另外唱了很多以前喜歡的歌,
例如: 鄭秀文、徐若瑄、范曉萱、王菲、李蕙敏... !! 最讓我感到意外的是, 竟然還有"黃翊"的歌(唔知佢係邊個O既話,
請去 YAHOO SEARCH 下!!), 所以忍不住唱了"哭著笑", 而且我竟然全首歌記得!! 黃翊可是我學生時代的王子呢!!
現在還是喜歡, 有幻想過要是有天碰見他, 我也會忍不住走上前拿簽名及合照, 雖然他已經沒唱歌好幾年了!! 唱了六小時,
真的很好玩呢!! 本來還有拍一些 KTV 的畫面, 不過效果太嚇人, 所以刪掉了! 唱完 K 出黎, 落好大雨呢, 去左信和,
因為要買雜誌, 之後去左朗豪坊食麥當勞, 傾下計咁啦, 再之後搵個位睇下雜誌咁, 十點幾就走喇, 因為落好大雨,
而且又夜, 所以我亦係坐小巴返屋企, 返到屋企沖完涼, 一望個鐘十一點幾, 先記起要睇＜大小愛吃＞, 之後好奇地想知道我上次張網上 FORM 有冇打錯野,
所以亂咁 APPLY 左份要十年經驗O既工, 點知 ... 大件事, 真係打錯左, 唉, 攪咩咁重要O既野都打錯!! 不過唔理,
都照去 IN, 因為到時都要俾正副本佢, 而且我唔小心打錯果樣野, 雖然好重要, 不過又冇因為咁而令到我乎合入職條件,
不過我真係點解咁失敗咁大頭蝦?! 以後用網上 APPLY 真係要 CHECK 多幾次, 上次明明 CHECK 過架喎, 咁都睇唔到,
希望佢地唔會拉我啦!! 因為我真係冇心, 真係唔知未訓醒定點, 所以先打錯左, 我會好好反省!! |
| 17/8/2007 |
|
今日去左 MEGABOX 果間＜百樂門＞飲下午茶(見圖1~12), 不過好貴, 因為只係食左呢六樣點心, 而且已經有半價優惠,
但係都要成 $120, 係平時O既一倍!! 所以唔會再去呢間食喇!! 食完後行左一陣, 之後返屋企, 收到兩封信, 一封係郵局,
叫我下星期六要去城大考試, 呢封寄左真係好耐, 估唔到我忘記左佢時, 佢就寄黎, 希望成功啦!! 亦希望聽日家姐都會收到信啦,
咁樣就可以一齊去考試, 之後一齊成功咁就真係太好喇!! 而家有少少怕, 因為唔知到時要考Ｄ咩呢!! 另一封係 SPACE 寄黎O既考試成績,
YEAH!! 我合格呀, 仲有 CREDIT 呀(見圖13), YEAH!! 好開心呀, 過幾日我可以去報 YEAR 6 喇!! YEAH!! YEAH!! YEAH!! |
| 18/8/2007 |
|
今日冇咩特別, 大約兩點幾諗住同太后出旺角行下先再會合珍姨, 想出門口時, 珍姨話而家可以黎接我地, 所以坐左一陣,
再落左樓下等左一陣, 先去左旺角幫表弟買校服, 之後去左佐敦買教科書, 之後去左黃埔, 先去"太興燒味"食左個下午茶餐(見圖1~2),
之後見到有張 POSTER 有隻熊貓(見圖3), 之後去左行 EESPRIT, 行左好耐, 不過無野睇 ARM 呢!! 之後返左屋企,
再沖完涼就食左兩件西餅, 而個頭有少少痛, 咁 ARM 又落雨, 唔會係風濕掛!! |
| 19/8/2007 |
|
今日天氣都好似好熱咁, 我只希望聽日千萬千萬唔好落雨, 因為聽日要帶Ｄ CERT 出去, 真係唔可以有咩"差池"!!
求求上天聽日唔好落雨!! 今日睇左幾個節目咁, 主要都係小翼做嘉賓O既, 睇黎佢真係好介意自己個名O既國語發音(笑),
夜晚一個人食飯, 因為皇上同太后有節目! 雖然一個人食咋, 都好豐富架(見下圖)!! 尋晚開始今年O既"24時間",
小翼加油呵!! 媽媽會睇架!! 其實睇"24時間"真係可以學到好多野架, 不過我前年同上年都冇睇哂, 因為要堅持睇哂 24 個鐘,
其實係要睇下對個 HOST 有冇興趣, 所以對上兩年都係擇黎睇, 上年我記得我睇中川翔子果 PART 睇到喊, 因為真係好感動!!
聽日真係唔好落雨, 同埋希望順利啦!! |
| 20/8/2007 |
|
今日去左飲茶, 差唔多飲完茶時家姐打黎話佢走得喇, 所以我就坐巴士出旺角, 去朗豪坊會合左家姐, 之後坐低傾下計,
同埋預備下一陣個 INTERVIEW, 我俾家姐攪到我好緊張呢(笑), 坐坐下見到何寶生呢, 不過最攪笑係我同家姐見到後,
都話"嘩! 曾航生呀!!", 好彩冇好大聲咁講咋!! 大約 16:30 開始起程行去某政府合署, 因為家姐 IN 先過我,
所以我O係出面等, 本來影左張相架, 不過頭先錯手 DEL 左, 我大約 17:40 就入去預備 IN 喇! 先黎 3 分鐘中文打字測驗,
不過因為唔係考速度, 所以我慢慢咁打, 測完行去坐低等時, 仲 FEEL 到果三個人"啤"住我, 但 ... 我真係打得好慢架喇喎!!
大約等左三個字到, 就去左對我O既資料同埋對 CERT O既副本, 不過佢只係收左我張 HKCEE 同埋 VUT 張 CERT 副本咋,
之後再等左幾個字, 就帶左我去樓下果層 INTERVIEW, 首先要讀一段英文, 不過有兩三隻字唔識, 之後要讀一段國語,
我家陣先知我Ｄ國語發音咁怪!! 之後用英文問左我幾題問題, 再用廣東話問左幾題, 最後佢地問我有冇野問, 就話大約一個月後會收到信通知結果,
之後我就行去麥當當會合返家姐, 途中打左返屋企同埋俾 KEN SAN(因為要問下佢地係咪報左日文班), 之後食左個麥當當餐,
再行返返去旺角行街, 我買左『39』O既台版喇(見下圖), 因為比日版平好多, 價錢只係日版O既大約 30%, 真係好抵!! 仲有中文歌詞,
其它內容都完全一樣! 點解以前我一直咁堅持要買日版呢?! 呢間店仲送 DM 一張, 不過我唔問佢佢都唔俾, 真係奸!!
之後行左去新世紀, 新開果間三聯都唔係好大間呢!! 之後大約九點左右(好似係), 就走喇, 因為今日好累, 唔知點解好累,
可能太緊張, 呢幾日都訓得唔係咁好, 因為越諗越覺得自己唔適合做呢份工, 而且呢份工要輪班, 要返通宵更添,
我又唔鍾意同人溝通, 所以其實唔多適合, 不過真係要自己唔好諗咁多, 我唔想Ｄ情緒病又發作!! 希望如果係 OK O既
就同家姐都一齊都 OK, 有個伴會好Ｄ吧!! 我要忘記 ... 忘記 ... 因為真係唔想自己成日諗住, 因為實在會令我不安!! 而家寄望星期六果個 EXAM,
因為我超級想做星期六果份, 話哂係公務員, 而且唔洗輪班!! 不過都係唔好諗咁多, 一陣人都傻呀!! 夜晚睇＜大小愛吃＞,
係飛輪海其中三個人做嘉賓, 亞金(汪東城)真係好可愛呢!! |
| 21/8/2007 |
|
尋晚都唔係訓得太好, 真係俾自己太大O既無形壓力, 我真係唔好再諗!! 我唔想Ｄ情緒又出現問題呢, 因為生命應該係開開心心咁去享受!!
LUNCH 後, 行左過去 SPACE 校舍報名, 真係好新好大呢, 報名時果個人攪左好耐, 攪到我以為冇哂位添, 好彩都順利報到名,
之後上左三樓影印, 因為 $0.3/張 咋, 認真抵!! 新校舍最正O既係, 有學生休息室同埋有得上網喎, 可能我去果陣冇咩人上課,
所以其實都冇咩人!! 但係呢個環境點樣都好過之前尖沙咀果度呢!! 影完印去左行超市, 買左少少野再換西餅就返屋企喇!!
我開始好討厭自己Ｄ性格, 因為呢幾日都不停惡性循環咁諗野, 不過的確學 CATCAT 話齋, 我要 RELAX!! 之後上左陣網,
沖完涼又上下網咁, 睇左＜爸爸與女兒的7天＞最終回, 好感動呢, 不過佢最後又話會有最終回, 唔通有 SP?! 之後又睇左＜LIFE＞CH.7,
果個"MANA"真係想打佢一身, 竟然可以咁樣將同學當做玩具, 好討厭, 其實我唔明白點解佢地俾人蝦又唔報警或者向家人求救,
朝香姐姐果個角色又好討厭, 真係浪費左朝香姐姐呢!! |
| 22/8/2007 |
|
尋晚都訓得唔太好, 比平時早訓, 但係仲累過以前!! 我真係要忘記, 唉, 自己呢Ｄ性格好討厭!! 睇左今年 24時間果套 SP 劇,
好感人, 雖然係 TAKKI 做主角, 不過故事真係好感人, 之後同太后落左去行左一陣, 因為太后話想落街行下, 冇咁悶呢!!
行完返黎都差唔多五點, 所以坐左一陣就沖涼, 沖完涼就睇前幾日 TVB 播O既＜死亡筆記＞動畫, 都幾好睇喎, 不過配音果幾位真係差左少少,
下次都係睇日文版!! 之後睇左＜花樣少男少女＞(日版) CH.8, 越睇越鍾意 TOMA, 佢個角色真係好可愛, 睇預告下一集竟然有吾郎!
仲應該係衝著堀北而黎O既, 好期待呢!! 夜晚有線播＜詭絲＞, 就係江口洋介同埋大Ｓ果套, 不過大Ｓ個角色好快就Ｃ左,
整體黎講呢套劇幾感人, 而江口洋介個造型真係好似鬼太郎呢!! 食左一件近日覺好味O既西餅(見下圖), 掛住睇＜詭絲＞,
唔記左得睇＜大小愛吃＞添!! 其實好怕自己成日亂諗野呢, 因為呢幾日都係勁諗, 其實點解唔可以平常心咁呢?!
睇黎我真係要努力學習下"平常心", 不過講就 EASY !! |
| 23/8/2007 |
|
今日去左飲茶, 之後行左一陣, 買左兩盒傻豹膠布(見下圖), 好平又好可愛呢!! 呢排天氣都好熱, 一唔落雨就係咁,
但係落雨又好麻煩喎!!! |
| 24/8/2007 |
|
繼前晚夢見 SHO 之後, 尋晚竟然夢見 GACKT, 因為唔係好記得詳細夢境, 所以唔寫去＜私夢記＞喇, 尋晚個夢,
只記得我竟然可以用個 REMOTE 同住樓上O既 GACKT 傾計!! 今日冇出到街, 上下網睇下片咁, 都係惡性循環咁亂諗野!!
幾日前收到郵局果封信, 明明話今日個網會 UPDATE, 但目前為止都仲未有, 所以聽朝都係考天才吧, 反正平常心啦!!
都係唔好又亂諗野, 其實我真係好怕呢Ｄ預準唔到O既野, 真係好不安呢!! |
| 25/8/2007 |
|
今朝訓下醒下咁, 最後 8:15 起身, 好快咁食個早餐, 大約 8:45 出門口, 選擇左坐 MTR, 都幾多人咁呢, O係九龍塘 MTR 行去城大,
真係有一段路, 我點解去城大?!(見圖1~4) 因為要去考"Postal Officer Recruitment Examination", 因為 3 月時寄左信去申請做郵務員,
早到左, 所以企左O係課室門口一陣, 大約 9:45 可以入去坐, 不過好奇怪, 其實封信寫得好清楚係去邊個課室考,
但係我眼見起十個人係坐左O係度好耐先發現佢自己去錯課室, 坐我前面隔離果位亞叔, 仲要我前面果個人見到佢封信寫住另一個課室,
再話佢知, 佢先醒覺自己去錯課室!! 其實真係令我好難明白!! 今日個 EXAM 要答兩題題目(1中1英), 我將自己諗到O既都答左,
所以大約 11:15 我就交卷走人!! O係又一城行左果間超市, 之後就返左屋企, 返到屋企食左個米粉, 再上下網咁,
大約三點幾坐車去左將軍澳行, 我好耐冇去呢!! 行左一陣, 買左好多野呢, 仲俾我買到幾支熊貓筆(見圖5~8),
仲咁 ARM 我前幾日先想買過支熊貓筆, 因為用開果支冇咩墨!! LUCKY!! 行到大約六點就返到屋企喇!! 之後沖涼/食下飯咁!
睇＜山田太郎＞CH.8, 睇到最後見到小託個表情, 我有少少心痛!! |
| 26/8/2007 |
|
今日睇左深恭果套劇, 之後睇埋木村上＜MECHAIKE＞, 好好笑!! 大約三點幾睇睇下＜死亡筆記＞動畫, 就全家出左街,
因為約左珍姨, 先去左一個地方, 之後又去睇下衫咁, 不過我冇買到呢, 另外咁 ARM 有個表演(見圖1~5), 我好似係第一次見人地"吊威也",
再之後夜晚八點左右返到屋企附近食晚飯, 去左＜大快活＞(見圖6~8), 食左個炒飯, 真係幾好味, 返到屋企有少少胃痛,
不過唔關晚飯事, 之前已經有少少痛, 食左胃孳再沖涼, 沖完涼睇埋＜死亡筆記＞動畫(真係幾好睇, 同電影版差唔多)!!
再上下網咁!! |
| 27/8/2007 |
|
尋晚個冷氣機有少少怪, 所以唔敢開住訓呢, 好彩都唔係好熱!! 今朝醒左睇完套卡通又訓過, 去左同樓上個姨姨飲茶,
之後行下超市咁, 幫樓上個姨姨買左張 SD 咭, 原來家陣唔再出 1GB 喎, 所以幫佢買左張 2GB, $139, 都算抵用!!
返到屋企坐左一陣再沖涼, 夜晚終於聽到一首好得意O既歌O既完整版, 係一首日本老歌(算係老歌吧, 因為 197X 年架喇),
係 SADAMASASHI 先生O既"關白宣言", 其實成日都聽到呢首歌架, 不過一直未聽過完整, 歌詞好可愛架, 係講一個"關白"(即係 ... 大男人吧!)O係結婚之前同佢老婆講O既家規(?!),
例如唔可以比佢早訓, 唔可以比佢遲起身等等, 今日聽哂成首, 最後O既歌詞原來好感人呢, 我覺得呢首歌可愛之處係,
O係 197X 年O既社會, 當然好多大男人啦, 尤其係日本, 但係大男人之餘, 亦其實係保護佢O既另一半, 好輕快O既節奏,
其實呢首歌係當年睇准一同深津果套＜未家長子姐三人＞時, 劇中准一O既媽媽好鍾意呢首歌架!! |
| 28/8/2007 |
|
今日都冇咩特別, 睇下片上下網咁, 夜晚無 LALA 肚痛, 可能食得太多生冷野掛!! 有線播＜我左眼見到鬼＞,
我雖然有 DVD , 但係都忍唔住睇多次, 依然係好感動!! 本來諗住睇＜大小愛吃＞, 不過今晚果個網有Ｄ怪,
播播下停左, 所以放棄!! BY THE WAY, 今日睇左尋晚O既＜宿題君＞, 果個裡面充滿朱古力O既甜品真係非常吸引,
果個蜜瓜蛋糕亦好正, 不過好貴, 要1萬5千幾YEN, 但一定好好食, 睇見佢地幾個係咁食都唔講野就知!! 另外又睇左尋晚O既＜SMAP X SMAP＞,
MATHCY 真係好型好正!! 而且冇前輩架子, 真係好正!! 其實 DINNER 前偶然發現有好多野跌左去個櫃筒後面, 攪左好耐先拎返哂出黎,
估計跌左落去好耐呢, 不過個櫃又好怪, 拆唔到Ｄ櫃筒出黎呢!! 所以攪到我用個衣架係咁勾返Ｄ野出黎, 認真攪笑!! |
| 29/8/2007 |
|
今朝先發現個鬧鐘冇電, 之後有個電話打黎, 講左一大輪, 係推銷!! 之後食完 LUNCH 上下網咁, 之後同太后落左去行左一陣,
買左Ｄ餅乾, 同 TSU 傾左一陣, 因為我突然記得佢尋日好似有同我講左Ｄ野, 但係 MSN 記錄又冇, 攪到我以為係我尋晚發夢,
所以向佢查証一下!! 晚飯有蝦食(見下圖), 我冒著敏感O既危機勁食!! 不出所料, 家下隻眼真係有少少癢!! |
| 30/8/2007 |
|
今朝俾個新鬧鐘嚇醒, 唔得, 今日去買返粒電用返舊果個先!! LUNCH 食雞扒意粉, 好味, 食完坐車出旺角,
會合左家姐後, 行信和呀, 呢度行下果度行下咁, 大約三點幾, 個買家 CALL 我去交收, 我仲以為要五點幾添!!
之後行左去尖沙咀, 行行下見到"亞金"張＜終極ONLINE＞ POSTER (見下圖), 估唔到香港都有宣傳呢!! 之後行左一陣,
再去左食吉野家, 不過其實加左價, 開始唔係好抵!! 食完之後行下新世界同埋 SOGO 咁, 再行返去佐敦十蚊店,
之後又返信和, 因為想睇下＜BOKUIMO＞ DVD 出左未, 不過未有呢, 之後行到就黎九點就走喇, 因為都有點累!!
返到屋企沖完涼, 睇左有線播果套＜生死速遞＞! 之後睇＜大小愛吃＞!! |
| 31/8/2007 |
|
今朝十點幾醒左, 仲睇左果套唔知咩卡通O既大結局(睇完都唔係好明白佢想表達Ｄ咩!!), 之後上左一陣網, 又睇下電視咁,
大約十二點幾就同太后出門口, 因為約左珍姨同埋契媽去旺角飲茶, 一點左右出到旺角會合左契媽, 再上左酒樓等下午茶,
不過都好快O者!! 之後珍姨到, 再過一陣就有位喇!! 勁食左十幾個點心(見圖1~10), 真係好好味, 而且都係 $130 左右,
真係好抵食!! 之後坐巴士去左黃埔行 ESPRIT, 我同太后買左幾件衫(見圖11~13), 行到六點幾坐巴士返屋企,
行緊去車站時影左幾張天空, 都好正呢!!(見圖14~16)! 成七點幾先返到屋企, 今日真係有少少累!!! |
